1 O‘zbekiston respublikasi oliy va o‘rta maxsus ta’lim vazirligi

 
Yo‘ldosheva Gulchiroy Rashid qizi 
Peshku tuman 22-maktab o‘qituvchisi 
AMIR TEMURNING BUNYODKORLIK FAOLIYATI 
Annotatsiya.
Maqolaning mazmuni XIV-XV asrlarda Movarounnahr va 
Xurosonda hukmronlik qilgan Amir Temur davrida amalga oshirilgan obodonchilik 
va bunyodkorlikning rivojlanishiga qaratilgan. Chunki aynan shu davr Sharqdagi 
“Uchinchi Renessans”ni boshlab bergan hisoblanadi. 
Kalit so‘zlar:
temuriylar, Markaziy Osiyo, «Qubbat ul-ilm val-adab», Go‘ri 
Amir, Gavharshodbegim, Oqsaroy, Bo‘stonsaroy. 
Amir Temur va uning avlodlari hukm surgan tarixiy davrni nazardan o‘tkazar 
ekanmiz, bunda ijtimoiy-iqtisodiy va madaniy taraqqiyotning yuksak marralari sari 
ko‘tarilgan Movarounnahr va Xurosonning butun yorqin manzarasi ko‘z o‘ngimizda 
namoyon bo‘ladi. Markaziy Osiyo xalqlari sivilizatsiyasi va madaniyati ravnaqining 
yuqori cho‘qqisi hisoblangan Temuriylar davri nafaqat shu mintaqa doirasida, balki 
umumjahon miqyosida ham o‘ziga xos yuksak bosqich bo‘ldi. Uning qudratli aks-
sadosi asrlar osha avlodlar qalbi va tafakkurini hamon nurlantirib kelmoqda. 
Ona tariximizning mana shu muhim bosqichida xalq dahosi, qudrati bilan 
betimsol moddiy va ma’naviy madaniyat namunalari, mislsiz osori atiqalaru 
monumental me’moriy obidalar bunyod etildi. llm-fan yuksaldi. Bunday yuksalish 
Amir Temur va uning avlodlarining ilm-fan, ma’rifat ravnaqiga alohida rag‘bat, katta 

---

-145- 
sa’y-harakat bog‘laganliklari natijasi bo‘ldi. Xususan, Amir Temur siymosiga 
to‘xtaladigan bo‘lsak, uning o‘zi yuksak ma’rifatparvar hukmdor sifatida xalq ichidan 
chiqqan qanchadan-qancha noyob iste’dodlar, ilmu urfon va din ahllari, me’moru 
hunarmandlarni parvarishlab o‘stirish barobarida mamlakat obodonligi, ravnaqi 
uchun ham doimiy harakatda, izlanishda bo‘ldi. 
Sohibqironning bunyodkorlik sohasidagi tarixiy xizmatlari beqiyosdir. Tarix bu 
ko‘hna dunyoda o‘tgan ko‘p jahongirlarni biladi. Ularning aksariyati faqat buzgan. 
Amir Temurning ulardan farqi shundaki, u umr buyi bunyodkorlik bilan mashg‘ul 
bo‘lgan. Uning «
Qay bir joydan bir g‘isht olsam, o‘rniga o‘n g‘isht qo‘ydirdim, bir 
daraxt kestirsam, o‘rniga o‘nta ko‘chat ektirdim
», degan so‘zlari buning yorqin 
isbotidir. Amir Temurga har bir zafarli voqea va sevinchli hodisani muhtasham 
me’morlik obidasi barpo etish bilan nishonlash odat bo‘lgan. Shu maqsadda 
Hindiston, Sheroz, Isfahon va Damashqning mashhur usta-hunarmandlari 
mamlakatda hashamdor imoratu inshootlar bino qilganlar. Amir Temur zabt etgan 
mamlakatlarning bir qator shaharlari (Bag‘dod, Darband, Baylaqon)ni qayta tikladi. 
Amir Temur Tabrizda masjid, Sherozda saroy, Bag‘dodda Madrasa, Turkistonda 
mashhur shayx Ahmad Yassaviy qabri ustiga maqbara qurdirgan bo‘lsa-da, lekin 
asosiy e’tiborini ona shahri Kesh va poytaxti Samarqandga qaratdi. Keshda otasining 
qabri ustiga maqbara, o‘g‘li Jahongirga maqbara bilan masjid qurdirdi. Amir Temur 
hukmronligining ilk davrida Kesh shahrini poytaxtga aylantirish niyatida bo‘lib, 
uning obodonchiligiga katta ahamiyat berdi, bu yerda mashhur Oqsaroy qad ko‘tardi. 
Amir Temur Keshni Movarounnahrning madaniy markaziga aylantirishga harakat 
qildi. Shu boisdan bu shahar «Qubbat ul-ilm val-adab» unvoniga ega bo‘ldi. Saltanat 
poytaxti Samarqand Amir Temur davrida ayniqsa gullab-yashnadi. Shaharda Isfahon, 
Sheroz, Halab, Xorazm, Buxoro, Qarshi va Kesh shaharlarining me’moru binokorlari 
qo‘li bilan saroylar, masjidlar, madrasalar, maqbaralar quriladi. Shahar tashqarisida 
esa bog‘-rog‘lar va bo‘stonlar barpo etiladi. Xususan Shohizinda me’moriy 
majmuasiga mansub Shodimulk og‘o maqbarasi, Shirinbeka og‘o maqbarasi va 
boshqalar quriladi. Shaharda Bibixonim jome masjidi, Amir Temurning qarorgohi 

---

-146- 
Ko‘ksaroy va Bo‘stonsaroylar qad ko‘taradi. Umuman olganda Samarqand shahri 
Amir Temur davrida o‘zining qadimgi o‘rni Afrosiyobdan birmuncha janubroqda 
butunlay yangidan qurildi. Shahar tevaragi mustahkam qal’a devori bilan o‘ralib, 
Ohanin, Shayxzoda, Chorsu, Korizgoh, So‘zangaron va Feruza kabi nomlar bilan 
ataluvchi 6 ta darvoza o‘rnatildi. Movarounnahrning dehqonchilik vohalarida, 
xususan Zarafshon vodiysida o‘nlab sug‘orish tarmoqlari chiqarilib, dehqonchilik 
maydonlari kengaytirildi. Yangi qishloqlar barpo etildi. Ibn Arabshohning 
yozishicha, Amir Temur Samarqand atrofida qad ko‘targan bir qancha yangi 
qishloqlarni Sharqning mashhur shaharlari Dimishq (Damashq), Misr, Bag‘dod, 
Sultoniya va Sheroz nomlari bilan atadi. Amir Temurning fikricha, Samarqand 
kattaligi, go‘zalligi hamda tevarak-atrofining obod etilganligi jihatidan dunyodagi 
eng yirik shaharlardan ham ustunroq turmog‘i lozim edi.
Hofizi Abro‘ning yozishicha, Amir Temur turk, arab va eronliklar tarixini 
chuqur bilgan. U davlat ahamiyatiga ega bo‘lgan har bir masalani hal etishda, shu 
sohaning bilimdonlari va ulamolari bilan maslahatlashardi. Odatda u tibbiyot, 
riyoziyot, falakiyot, tarix, adabiyot, tilshunoslik ilmi namoyandalari, shuningdek 
ilohiyot va din sohasidagi mashhur ulamolar bilan suhbatlar o‘tkazardi. Amir Temur 
saroyida ulamolardan mavlono Abdujabbor Xorazmiy, mavlono Shamsuddin 
Munshiy, mavlono Abdullo Lison, mavlono Bahruddin Ahmad, mavlono 
Nu’monuddin Xorazmiy, Xo‘ja Afzal, mavlono Alouddin Koshiy, Jalol Xokiy va 
boshqalar xizmat qilardi.
Alisher Navoiyga Amir Temurning ilm va ma’naviyat aqliga ko‘rsatgan 
g‘amxo‘rligi juda yoqar edi. Bu haqda Navoiy shunday degandi: «
Agar Temur 
qayerda fan, madaniyat va san’at ahlini uchratsa, ularni o‘z homiyligiga olar, ularga 
izzat-ikrom ko‘rsatar, ularning tarbiyasiga ahamiyat berar hamda bu zotlardan o‘z 
oliy majlisida nadim (maslahatchi) sifatida va boshqa lavozimlardan foydalanardi
». 
Ulug‘ ajdodlarimiz tomonidan yaratilgan moddiy va ma’naviy madaniyatning yuksak 
namunalari, dur-u javohirlari mana necha asrlardirki, jahon ahlini hayratga solib, 

---

-147- 
minnatdor avlodlar ardog‘ida e’zozlanib kelmoqda. Bu meros yana asrlar davomida 
xalqimiz ma’naviyatining ajralmas qismi bo‘lib qolishiga ishonamiz.