1.1. Yabanı halda yetişən təbii boyaq bitkilərinin
bioloji xüsusiyyətləri
Dünyanın demək olar ki, bütün ölkələrində yabanı halda yetişən və təbii
boyaq maddələrinə malik olan bitkilər mövcuddur. Bütün iqlim növlərinin 9-na
malik olan Azərbaycan bu boyaq bitkilərinin zənginliyinə görə dünya
ölkələrinin bir çoxundan fərqlənməklə, bu bitkilərin tərkibində olan boyayıcı
maddələrin keyfiyyətinə görə üstünlük təşkil edir.
Azərbaycanda ən çox yayılmış boyaq bitkilərindən andız, at əvəliyi, ağ
söyüd, birgöz, boyaq ulaxqanqalı, qaraqınığ, qarağat, rəvəndi, qara kəndəlaş,
qoz, dərman gülümbaharı, yemişan, zirinc, indiqofer, itburnu, gicitkən, gürcü
boyaqotu, murdarça, biyan və bu kimi bir çox digərlərini misal göstərmək olar
ki, bunlar da olduqca böyük əraziləri əhatə edir.
A n d ı z – (İ n u l a h e l e n i u m L.) – çoxillik ot bitkisi olub, 1 – 2
metr hündürlükdə gövdəyə malikdir. İri kökləri və bütöv kənarlı, növbə ilə
düzülmüş yarpaqları vardır. Qızılı – sarı rəngli, ətirli çiçəkləri gövdəsinin
təpəsində səbət şəklində yerləşmişdir. Əsas təsiredici maddəsi efir yağı (1 – 3
%) hesab olunur. Köklərindən hazırda tinktura və bişmiş halda öskürək əleyhinə
və bəlğəmgətirici dərman vasitəsi kimi istifadə edilir. XIX əsrin əvvəllərində,
yəni 1804-cü ildə müəyyən edilmişdir ki, bu bitki növünün köklərində efir
yağından başqa, 44 %-ə qədər boyaq maddəsi olan i n u l i n vardır.
A t ə v ə l I y I – (R u m e x c o n v e r t u s w I l l d) – Bu, gövdəsinin
hündürlüyü 120 – 150 sm-ə çatan ot bitkisidir. Kökyanı və yerüstü gövdəsinin
aşağı hissələrindəki yarpaqları çox böyük olur. Üçkünc xırda qovuqcuqlardan
ibarət meyvəsi vardır. Bitki may və iyun aylarında çiçəkləməyə başlayır. At
əvəliyi qiymətli dərman, aşı və boyaq bitkisidir. Onun kökünün tərkibində 8 –
12 %-ə qədər aşı maddəsi, 5 %-ə qədər antraxion, xrizofan turşusu, katexin,
flavonoid və bu kimi bir sıra digər boyaq maddələri vardır.
A ğ s ö y ü d – (S a l i x a l b a L.) – Söyüd cinsinin Yer kürəsinin
mülayim və soyuq ölkələrində 600-ə qədər növü vardır. Söyüdün yarpaq,
tumurcuq, çiçək və qabıq hissələrində flavonoid, xrizin, katexin, kversitrin
tərkibli boyaq maddələri vardır.
B i r g ö z – (L i g u s t r u m v u l q a r e L.) – hündürlüyü 1-3 metrə
qədər olan kol bitkisidir.Yarpaqları uzunsov, neştərşəkilli, çılpaq və parlaqdır.
Çiçək qrupu, süpürgə şəklində olun budaqların uclarındadır. Tacı ağdır,
meyvələri qara və ovalşəkillidir. Çiçəkləri çox ətirlidir, ondan alınan yağ
ətriyyat sənayesində istifadə edilir.
Yarpaqlarında və gövdəsinin qabığında aşı maddəsi ilə yanaşı, kimyəvi
cəhətdən tam öyrənilməmiş boyaq maddəsi də vardır.
B o y a q u l a x q a n q a l ı – (C a r t h a m u s t i n c t o r i u s L.) –
Birillik, çılpaq bitkidir. Gövdəsi silindirvari, boyu 30 – 80 sm-dir. Çiçəkləri
narıncı – qırmızı rəngə çalır. Boyaq ulaxqanqalı Avropa, Asiya və Amerika
qitələrinin bir çox ölkələrində mədəni halda geniş surətdə əkilib – becərilir.
Bunun toxumlarının tərkibində 27 – 32 %-ə qədər qiymətli yağ vardır. Bu
yağdan sənayedə marqarin, əlif, lak və sabun hazırlanmasında istifadə olunur.
Çiçəklərindən alınan boyaq maddəsindən qida sənayesində istifadə olunur.
Çiçəklərinin tərkibində kartamin, C
24
H
30
O
15
tərkibli boyaq maddələri vardır.
Q a r a k ə n d ə l a ş – (S a m b u s u s n i g r a L.) – (Doqquzdon
fəsiləsi – Caprifoliaceae). Bu, hündürlüyü 2 – 10 metr olan kol və ya ağac bitkisi
olub, cüt lələyə oxşar, qarşı – qarşıya düzülmüş yarpaqları vardır. Sarımtıl – ağ
rəngli xırda, ətirli çiçəkləri bir yerə toplanaraq dəstələr əmələ gətirir. Bitkinin
gövdəsi və yaşlı budaqları boz rəngli qabıqla örtülmüşdür. Kürəcik formalı şirəli
meyvələri yetişən vaxt qaralır. Bitki, may – iyun aylarında çiçək açır, meyvəsi
iyul – avqust aylarında yetişir.
Qara gəndəlaş Respublikamızın Quba, Qusar, Xaçmaz, Şabran, Şəki,
Şuşa, Xankəndi, Ağdam, Qax, Qəbələ, Ağsu, Oğuz, Balakən, Zaqatala,
İsmayıllı, Şamaxı, və bu kimi bir çox digər rayonlarında, o cümlədən talış
bölgəsində geniş yayılmışdır.
Qara gəndəlaş bitkisinin çiçəklərində sambutin C
14
H
17
O
6
tərkibli qlükozid
maddəsi vardır ki, bu da fermentlərin təsirindən parçalandıqda benzoaldehid,
hidrogen – sionid və qlükoza kimi maddələrin alınmasına səbəb olur. Bundan
başqa çiçəyin tərkibində rutin, 0,32 %-ə qədər yarıbərk halda ətirli yağ, xolin,
kofein, valerian, alma və sirkə turşuları, 82 mq % askorbin turşusu (C vitamini),
etil – izobutil, boyaq və aşı maddələri tapılmışdır. Yarpaqlarının tərkibində isə
0,11 % miqdarında sambunigirin ətirli yağ, xolen, aşı və boyaq maddələri
müəyyən edilmişdir.
Meyvələrinin tərkibində isə 50 mq % askorbin turşusu, karotin, antosian
tərkibli maddələr – sionidin qlikozidlərinin xloridləri tapılmışdır. Bundan əlavə,
meyvələrinin tərkibində sambunigiren qlikozidi, toxumlarında isə piyli yağ
olduğu müəyyən edilmişdir.
Qida sənayesində qara kəndəlaş meyvələrindən alınan təbii boyaq
maddəsindən müxtəlif içkilər istehsalında geniş istifadə olunur.
Moskva pivə və alkoqolsuz içkilər istehsalı kombinatında kəndəlaş
boyağının tətbiqi ilə “Lesnaya Yaqoda” limonadı istehsal edilir. Həmçinin qara
kəndəlaşın yetişmiş meyvələrindən alınan boyaq ekstraktından istifadə edib,
konfet, tort, marmelad, şokolad, likor, limonad və eləcə də konserv
məhsullarının rəngini və keyfiyyətini daha da yaxşılaşdırmaq olar [6].
İ t b u r n u – (R o s a s p. d v (G ü l ç i ç ə k l i l ə r f ə s il ə s i
– R o s a c e a e ). Bu, hündürlüyü 1 – 2 metr olan tikanlı kol bitkisidir. Növbə
ilə düzülmüş yarpaqları, qırmızı, çəhrayı və bəzən də ağ rəngli, ətirli çiçəkləri
vardır. Meyvəsi giləmeyvəyə oxşayır, yetişən vaxt qırmızı və qonur – qırmızı
rəngdə olur. Meyvələrinin üzəri qalın qabıqla örtülmüşdür. İtburnu növlərinin
hamısı bütün yayı çiçəkləyir. Meyvələri avqust – sentyabr aylarında yetişir.
Keçmiş Sovetlər İttifaqında itburnu bitkisinin 60 növünə təsadüf
olunurdu. Bəzi rayonlarda itburnu bitkisinə “d ə r g i l” də deyirlər.
Azərbaycanda yayılan bir sıra dərgil növləri tədqiq olunmuş və onların
tərkibində çoxlu miqdarda müxtəlif vitaminlərin olduğu müəyyən edilmişdir.
İtburnu meyvələri adətən sentyabr – oktyabr aylarında toplanır. Bu dövrdə
qırmızı – çəhrayı rəngə boyanan dərgil meyvələrini əllə toplayırlar, sonra isə
xüsusi quruducu qurğularda 70 – 80
0
C temperatur rejimində qurudurlar. Qeyd
etmək lazımdır ki, itburnu meyvələri şaxta düşənədək toplanılmalıdır. Əks
təqdirdə keyfiyyəti pisləşir. İtburnu meyvələri qurudulduqdan sonra tərkibində 5
– 6 %-ə qədər C vitamini olur [11]. Lakin seleksiya yolu ilə yetişdirilən dərgil
meyvəsində C vitamininin miqdarı daha çox, məsələn 15 – 16 % olur. Ona görə
də itburnu çox zəngin C vitamini mənbəyi hesab olunur.
Dərgil meyvəsində C vitaminindən başqa 12 – 18 mq% karotin,
(provitamin A), 0,3 mq% B
1
və B
2
vitaminləri, 1 qramında 40 bioloji vahid K
vitamini, karotinoidlər, P vitamini, flavonoidlər, 18,0 %-ə qədər şəkər, 4,0 %
aşı maddələri, 3,7 % limon və alma turşuları, pektin maddələri və digər
birləşmələr vardır. Toxumlarının tərkibində isə çoxlu miqdarda piyli yağ və E
vitamini mövcud olur.
Dərgil meyvələrinin tərkibində çoxlu miqdarda C vitamini və karotin
olduğundan, onun meyvələrindən C vitamini və eləcə də polivitamin mənbəyi
kimi təbabətdə geniş istifadə olunur.
Meyvələrindən
çay kimi dəmləmə şəklində, bir sıra vitamin
komplekslərinin tərkibində, bundan əlavə toz və həb formasında, təzə dərilmiş
meyvələrindən isə konsentrat, şərbət və mürəbbə şəkilində bir sıra xəstəliklərin
müalicəsində: məsələn, sinqa, raxit, qızılyel, qanazlığı, vərəm, böyrək, öd
xəstəliklərində geniş istifadə edilir. Son illərdə toxumlarından piyli yağ da alınır
ki, bu yağdan da müxtəlif yanıqlarin müalicəsində, eləcə də dermatit xəstəliyi
zamanı yara sağaldıcı dərman preparatı kimi istifadə olunur. Ümumiyyətlə
dərgil meyvəsi son illərdə ödqovucu, sidikqovucu, eləcə də ateroskleroza qarşı
geniş tətbiq olunur. Bu məqsədlə dərgil meyvəsindən bir sıra preparatlar
hazırlanır.
Qeyd etmək lazımdır ki, dərgil meyvəsinin müalicəvi əhəmiyyəti əsas
etibarı ilə onda olan C vitamini ilə xarakterizə olunur. Doğrudur, C vitamini
ilə yanaşı, dərgil meyvələrinin tərkibində digər vitamin növləri və bir çox başqa
üzvi və qeyri – üzvi birləşmələr də müəyyən dərəcədə tibbi, farmakoloji və
texnoloji əhəmiyyətə malikdir. Lakin burada olan C vitamini miqdarca çox
olduğu üçün onun rolu müəyyənedicidir.
Məlum olduğu kimi, insan orqanizmində C vitamini sintez olunmur.
Aparılan çoxsaylı araşdırmalar nəticəsində müəyyən edilmişdir ki, orta hesabla
böyük adamlar üçün bir sutka ərzində 50 mq, daim fiziki əməklə məşğul olan
insanlar üçün 75 – 100 mq civarında C vitamini tələb olunur. Hamilə qadınlar
üçün sutkada 75 mq, 7 yaşlı uşaqlar üçün isə 30 – 35 mq C vitamini normal
hədd hesab olunur. İnsanın C vitamininə olan ehtiyacını nəzərə alaraq son
illərdə C vitaminini süni üsulla istehsal edirlər. Buna baxmayaraq, hazırda
insanların sağlamlığının mühafizəsi nöqteyi – nəzərindən, təbii mənbələrdən
alınan C vitamininə daha böyük ehtiyac vardır.
Ümumiyyətlə, texnoloji məqsədlər üçün C vitamini ilə zəngin olan
itburnu meyvəsi olduqca böyük əhəmiyyət kəsb edir. Müxtəlif çeşiddə
vitaminləşdirilmiş qənnadı məmulatları və çörək – bulka məhsulları istehsalında
itburnu meyvəsindən alınmış ekstrakt, yaxud da tozlar əlavə edilməsi
probleminin geniş perspektivləri vardır.
Qənnadı məmulatları istehsalı üçün böyük əhəmiyyət kəsb edən bitkilər
içərisində yemişanın özünə məxsus yeri vardır.
Y e m i ş a n – (C r a t a e q u s p e n t a q y n a W. e t K.) – Bu bitki,
qızılgülçiçəklilər (Rosaceae) fəsiləsindəndir. Ağac və ya iri kol bitkisi olan
yemişanın növbə ilə düzülmüş yumurtaşəkilli yarpaqları vardır. Yarpaqların
kənarları diş – dişdir. Ağ rəngli nəzəri cəlb edən ətirli çiçəkləri vardır. Uzunsov
kürəşəkilli giləmeyvəyə oxşayan, ətli və şirəli meyvəsi olur. Yetişəndə qırmızı
rəngə boyanan meyvələrinin içərisində açıq – sarı rəngli toxumaları olur.
Meyvəsinin azca büzüşdürücü dadı vardır. Yemişan bitkisinin meyvələri may –
iyun aylarında çiçək açır, meyvələri isə avqust – sentyabr aylarında yetişir [10].
Texniki yetişkənlik mərhələsində tədarük olunan meyvələri texnoloji məqsədlər
üçün istifadəyə yararlı hesab olunur.
Qırmızı yemişan meyvələri Qonur yemişan meyvələri
Yemişan bitkisi haqqında ilk məlumatlara eramızdan əvvəl 372 – 287 – ci
illərdə yaşamış qədim yunan filosofu F e o f r a s t ı n kitablarında rast gəlinir.
Sonralar, bizim eranın I əsrində D i o s k o r i d öz əsərlərində yemişanı mədə
– bağırsaq sisteminin xəstəliklərində, piylənmədə, qanaxmalarda, və böyrəklərin
fuksional pozğunluğunda, xüsusən də sidik daşı xəstəliyində istifadə etməyi
məsləhət görmüşdü. Avropanın elmi təbabətinə isə bu bitki XIX əsrdə
gətirilmişdir.
Dünyada yemişan cinsinin 1000-dən artıq növü yayılmışdır, Azərbaycanın
ərazisində isə 18 növü bitir. Bunlar, hündürlüyü 3 – 5 metrə çatan, bəzən isə 10 –
15 metrə qədər olan ağac və ya kollardır.
Azərbaycanda bitən yemişan növlərinin əksəriyyəti işıqsevəndir, şaxtaya
davamlıdır, torpağa az tələbkardır. Yemişan növləri əsasən açıq yerlərdə,
meşələrin kənarında, sıx kollu yerlərdə habelə meşələrdə bitir. Yemişan qiymətli
dərman, qida, bəzək və texniki bitki hesab edilir [11]. Azərbaycanda Samur –
Sabran ovalıqlarında Şamaxı, Ağsu, İsmayıllı, Qax, Şəki, Zaqatala, Balakən,
Zəngilan, Quba, Qusar, Xaçmaz, Tovuz, Şəmkir, Qazax rayonlarının
meşəliklərində, Naxçıvan Muxtar Respublikasında, Qarabağda, Kəlbəcər,
Gədəbəy, Xanlar və bir çox digər rayonların ərazilərində böyük ehtiyatı vardır.
Yemişan çiçəklərinin görünüşü
Təbabətdə yemişanın çiçəkləri və meyvələri dərman məqsədi ilə istifadə
olunur. Çiçəklərini kölgə şəraitində, meyvələrini isə 55 – 60
o
C temperatur
civarında, xüsusi quruducu qurğularda qurudurlar. Çiçəklərinin və meyvələrinin
tərkibində bir sıra müalicəvi əhəmiyyət kəsb edən üzvi maddələr var. Bunlardan
flavonoidləri, qəhvə və xlorogen turşularını, efir yağlarını, askorbin turşusunu,
karotini (provitamin A), riboflavini, B vitamin qurupunu, PP vitaminini, üzvi
turşuları, şəkəri, proteini, boyaq və aşı maddələrini, bir sıra alkoloid maddələri
və digərlərini göstərmək olar. Toxumlarının tərkibində 30 – 38 % civarında yağ
vardır.
XYIII əsrin sonlarından etibarən, yemişan bitkisinin həm çiçək və həm də
meyvələrindən hazırlanan cövhər və tinktura ilə ürək – damar xəstəliklərini və
sinir pozğunluqlarının müalicə edilməsi haqqında da məlumatlar mövcuddur.
Beş yuvalı yemişan növü Azərbaycan Dövlət Tibb Universitetinin əməkdaşları
tərəfindən öyrənilmiş və elmi təbabətə daxil edilmişdir. Yemişanın
meyvələrindən və çiçəklərindən bir sıra preparatlar hazırlayıb sinir
pozğunluqlarında,
ürək
xəstəliklərindən
stenokardiyada,
aritmiyada,
hipertoniyada, ürək nevrozunda, eləcə də yuxusuzluqda, kəskin keçən angina və
qripdən sonra baş verən ürək pozğunluqlarında sakitləşdirici və tənzimləyici
vasitə kimi, qan təzyiqini tənzimləyən dərman preparatı kimi geniş istifadə
olunur [11].
Bundan başqa, çiçək və meyvələrdən, kordiovalen preparatı alınır ki, bu
preparatdan da, əsəb sisteminin sakitləşdirilməsində, qan təzyiqinin
nizamlanmasında və ürək xəstəliklərinin müalicəsində və insanın əhvalının
gümrah olmasında istifadə olunur.
Fransada yemişanın yarpaq, çiçək və meyvə hissələrindən hazırlanan maye
cövhərdən əsəb xəstəliklərində, ürək nevrozlarında və qan təzyiqi xəstəliklərində
istifadə edilir. Bundan başqa, yemişan növlərinin cavan budaqlarının
qabıqlarından hazırlanan cövhərlə qarın yatalağı müalicə olunur.
Avstraliyada yemişan növlərinin meyvə və çiçəklərindən alınan cövhərdən
qan damarlarının genişləndirilməsində istifadə olunur.
Almaniyada yemişan meyvələrindən hazırlanan dərman preparatları ilə
zəifləmiş ürək və qan damarlarının müqavimətini artırır və eləcə də ürək – qan
dövranının işini nizama salırlar.
Yemişanın meyvələrindən təzə – tər halda və yaxud şəkərləndirilmiş
halda, yetişdiyi müvsümdə qida rasionunda geniş. Meyvələrinin tərkibində
çoxlu miqdarda pektin və protein var.
Azərbaycan və Orta Asiya xalqları yemişanın şərq və pontika növlərinin
iri və lətli meyvələrini qurudaraq üyüdüb un şəklinə salır, buğda unu ilə
qarışdırıb xəmir hazırlayır və ondan meyvə ətri ilə üstünlük təşkil edən şirintəhər
çörək məmulatı bişirirlər [11].
Yemişanın cavan şitillərindən armud, alma, heyva və.s ağaclarda calaqaltı
kimi istifadə etmək mümkündür.
Yemişandan düzəldilən canlı çəpərlər möhkəm olur, çətin keçilir və
yaraşıqlı görünür. Lakin yemişanın yarpaqları ziyanvericiləri, xüsusən alma
ağaclarının ziyanvericilərini özünə cəlb etdiyindən, meyvə bağlarının
yaxınlığında yemişan çəpərləri düzəltmək məsləhət görülmür.
Yemişan meyvəsinin 80 %-ni təşkil edən lətli hissə şirintəhər, xoş ətrə
malik olub, çiyələk və alma iyini xatırladır. Onun tərkibində 14 – 18 % şəkər,
0.77 % turşu olur. Meyvə qabığı çox incə və nazik olmaqla yanaşı, məhsuldar
illərdə bir ağacdan 20 – 30 kq, bəzi hallarda isə hətta 50 kq-dək meyvə toplamaq
olur. Yemişan meyvəsindən hazırlanan boyaq maddəsi ilə qida məhsullarını
boyamaq üçün istifadə oluna bilər.
Yemişan bitkisinin budaqlarından hazırlanan cövhərlə yun və ipək
məmulatlarının qəhvəyi, tünd qəhvəyi, qonur, yaşıl, narıncı – yaşıl, firuzəyi,
tütünü və başqa çalarlara boyamaq olar. Alınan rənglər günəş şüasına və kimyəvi
yuyulmalara qarşı çox davamlıdır. Yemişan həm də əla bal verən bitkidir. Bal
arıları üçün yaxşı qida mənbəyidir.
Qeyd olunanlarla yanaşı, yemişan növlərinin qabıq hissəsində 10 %-dən
çox aşı maddəsinin olması, ondan gön – dəri sənayesində istifadə edilməsinə
imkan verir. Onun ən qiymətli xüsusiyyəti odur ki, tərkibindəki aşı maddəsi gönü
həm aşılayır və həm də boyayır.
Payız vaxtı yerə tökülən yarpaqlarından və xəzəlindən heyvanları
qidalandırmaq məqsədi ilə istifadə olunur ki, bu da heyvanların daha sağlam
inkişafını şərtləndirir. Qış mövsümündə yabanı yemişan meyvələri quşlar üçün
olduqca qidalı yemdir. Yemişan sıx və güclü kök sisteminə malik olduğundan,
ondan sürüşkən dağ yamaclarının bərkidilməsində də istifadə edilə bilər [11].
1.2. Yabanı halda yetişən təbii boyaq bitkilərinin
kimyəvi tərkib xüsusiyyətləri
Yabanı halda yetişən təbii boyaq bitkiləri kimyəvi tərkib göstəricilərinə və
mövcud maddələrin miqdar tərkibinə görə bir – birindən olduqca böyük
müxtəlifliklərdə fərqlənirlər. Təbiətdə yabanı halda yetişən və təbii boyaq
maddələri ilə zəngin olan bitkilərin kimyəvi tərkib göstəriciləri hələ indiyədək
tamamilə öyrənilməmiş olsa belə, bu bitkilərdən alınan boyaq maddələrindən
qida sənayesinin müxtəlif sahələrində, eləcə də müxtəlif yüngül sənaye
sahələrində, o cümlədən tekstil sənayesində geniş istifadə olunur.
Azərbaycana xas olan əlverişli iqlim, olduqca münbit torpaq, relyefin
müxtəlif olması, kifayət qədər yüksək miqdarda günəş şüası, tələb edilən
miqdarda su ehtiyatlarının mövcudluğu burada faydalı bitki sərvətlərinin, o
cümlədən bir çox boyaq bitkisinin yayılmasına və inkişafına zəmin yaratmışdır.
Elə bu səbəbdəndir ki, Azərbaycan ərazisində yabanı halda yetişən təbii
boyaq bitkilərinin kimyəvi tərkib göstəriciləri dünyanın digər regionlarında
yabanı halda bitən boyaq bitkilərinin kimyəvi tərkib göstəricilərindən müsbətə
doğru fərqlənirlər. Bu ilk növbədə təbii boyaq bitkilərinin kimyəvi tərkibinə
daxil olan boyaq maddələrinin miqdarının daha çox olması və rəng çalarlarının
intensivliyinin daha yüksək olması ilə şərtlənir.
Qədim zamanlardan etibarən yabanı halda yetişən təbii boyaq bitkilərinin
Azərbaycanda çox olmasına baxmayaraq, onların hamısından boyaq məqsədi ilə
istifadə olunmamışdır.
Təbii boyaq bitkisi növlərinin kimyəvi tərkib göstəriciləri və istifadə
olunma üsulları lazımi səviyyədə öyrənilmədiyi üçün onların hamısının nə yerli,
nə də ki, botaniki – elmi adları və siyahısı son zamanlaradək izah olunmamış
qalmaqdadır.
Qeyd etmək lazımdır ki, bütün bitki növlərinə şamil edildiyi kimi, hər bir
yabanı boyaq bitkisinin özünün fərdi toplanma müddəti mövcuddur. Məsələn,
murdarça bitkisinin meyvəsi yetişən zaman, onun cavan zoğlarını yay
mövsümünün ikinci yarısında, tut, sarağan, sumaq, və qoz ağacı yarpaqlarını,
yemişan, itburnu (dərgil) meyvələrini payız mövsümünün axır aylarında, yəni
oktyabr – noyabr aylarında, toplamaq məqsədəuyğun hesab olunur. Boyaqçılıqla
məşğul olan ixtisaslı mütəxəssislər uzun illərin mövcud olan təcrübəsinə
əsaslanaraq deyirlər ki, boyaq bitkisi kökünün yaz və ya payız aylarında tədarük
olunması, açıq və ya rəngli boyaq maddəsinin alınmasına səbəb olur.
Cədvəl 1
Yabanı halda bitən bəzi boyaq bitkilərinin kimyəvi tərkib göstəriciləri
Bitkilərin
adı
Quru
maddə
miqdarı,
%-lə
Efir
yağları,
%-lə
Boyaq
maddələri,
%-lə
Üzvi
turşular,
%-lə
Vitaminlər, mq%-lə
C
A
B
Yemişan
7,0 – 10,0
30–38
(toxumda)
2,5-3,3
0,24
200,0 12,0
0,44
Qara
kəndalaş
5,8-8,0
0,32
2,8-3,6
0,32
82,0
-
0,04
Şirin
biyan
25
0,43
0,8-1,1
0,18
30,0
3,5
0,21
İtburnu
18,0-24,0
0,03
0,9-1,2
1,80
470,0
2,6
0,3
Çaytikanı
7,5-10,5
8,8-12,13
0,7-1,0
2,64
273,0
8,5
0,38
Zəfəran
30-35,0
0,4-1,3
3,0-3,5
0,38
15,0
1,5
5,3
Məhz boyağın kimyəvi tərkibi, istehsal edildiyi ilk xammalın, yəni bu
bitkilərin kimyəvi tərkibi ilə əlaqədardır.
Yabanı halda yetişən yemişan bitkisinin meyvələrinin tərkibində olduqca
yüksək bioloji əhəmiyyət kəsb edən karotin, C – vitamini (askorbin turşusu) və
PP vitamini də vardər. Onun meyvə hissəsindən hazırlanan ekoloji təmiz təbii
boyaq maddəsi ilə bir çox qida məhsullarını boyamaq mümkündür.
Yemişan bitkisinin bütün qiymətli xüsusiyyətləri nəzərə alınaraq hazırda
onun növləri, yayılma arealı, bütün ekoloji – bioloji xüsusiyyətləri, yetişdiyi
regiondan asılı olaraq orta illik məhsuldarlığı, sənaye miqyasında istifadə
olunması məqsədi ilə təbii ehtiyatları geniş şəkildə öyrənilir.
Yemişan meyvələrində olduğu kimi itburnu (dərgil) meyvələrindən də
ekoloji cəhətdən təmiz olan təbii boyaq maddəsi istehsal etmək mümkündür. İlk
dəfə olaraq Azərbaycanda və eləcə də Zaqafqaziya regionunda itburnu
meyvələrindən təbii boyaq maddəsi Azərbaycan Milli Elmlər Akademiyası
Botanika İnstitutunun əməkdaşı Qasımıv M. Ə. Tərəfindən alınmışdır.
O, ilk dəfə olaraq “çal”a çevrilmiş itburnu meyvələrindən təbii boyaq
məhlulu hazırlayarkən, yun sapda boz, qara, tütünü, tütünü – boz, narıncı –
qonur və başqa rəng çalarları almışdır (1980). Alınan təbii boyaqlar müxtəlif
kimyəvi birləşmələrin təsirinə qarşı həddən artıq davamlı olmuşdur [3].
Yabanı halda bitən itburnu ağacında yetişən meyvələrin kimyəvi tərkib
göstəricilərini xarakterizə edən müxtəlif maddələrin miqdarı 1 – ci cədvəldə
göstərilmişdir.
Qida məqsədli təbii boyaq maddələri istehsal etmək üçün xammal kimi
istifadə olunan yabanı boyaq bitkilərindən qara kəndalaş, çaytikanı, zəfəran və
şirin biyanın da kimyəvi tərkib göstəricilərinin bəzi parametrləri 1 – ci cədvəldə
göstərilmişdir. Cədvəldən göründüyü kimi, tərkibində olan boyayıcı maddələrin
miqdarına görə, zəfəran, yemişan qara kəndalaş meyvələri ilk yerləri tutur.
Digər yabanı bitki xammallarının tərkibində təbii boyaq maddəsinin miqdarı
nisbətən aşağı olsa da, onların boyayıcı effekti heç də birincilərdən geridə
qalmır. Hətta bəzi rəng çalarlarının daha da intensiv alınmasına görə, müəyyən
qədər üstünlük təşkil edir.
Müəlliflər tərəfindən yerinə yetirilən çoxsaylı elmi – tədqiqat işlərinin
nəticələri göstərmişdir ki, 100 qram çaytikanı meyvəsinin tərkibində 10 – 12
mq% karotin, 273 mq%-ə qədər askorbin turşusu (C vitamini), 0,79 mq% fol
turşusu (B
15
vitamini), 0,1 – 0,35 mq% B
1
vitamini, 0,06 mq% B
2
vitamini, 20,0
mq% E vitamini (tokoferol), digər B qrup vitaminləri və PP vitamini vardır. Bu
qiymətli bitki meyvələrinin tərkibində vitaminlərdən başqa 8,0 faizdən çox yağ
vardır ki, bu da meyvələrin bioloji dəyərinin yüksək olmasını şərtləndirir.
Çaytikanı yağının tərkibindəki stearin turşusu insanların qan damarlarında
xolesterin maddəsinin toplanmasının qarşısını alır. Çaytikanı meyvəsi digər
bioloji aktiv maddələrlə də kifayət qədər zəngindir [10].
Ürək, qan – damar, ateroskleroz, hipertoniya, yüngül və ağır yanıqlar və
eləcə də bu kimi bir çox digər xəstəliklərin qarşısını almağa qadir olan çaytikanı
meyvələrinin özləri və eləcə də bu meyvələrdən hazırlanan müxtəlif vasitələr
(çaytikanı meyvəsinin qurusu, çaytikanı yağı və s.) xalq təbabətində olduqca
geniş miqyasda istifadə olunur [41].
Yoluxucu mədə və mədə – bağırsaq xəstəlikləri, əsəb pozğunluğu və
qalxanvari vəzinin xəstəlikləri zamanı çaytikanı yağı olduqca faydalıdır. O,
həmçinin təbabətdə mədə, onikibarmaq bağırsağın xorasına, yanıq, donvurma,
ekzema, dəmirəv, dəri vərəmi, müxtəlf qadın xəstəlikləri (ginekoloji xəstəliklər)
və göz xəstəliklərinə qarşı da müvəffəqiyyətlə istifadə olunur [38].
Çaytikanı bitkisinin yarpaq və yenicə inkişaf etmiş budaqlarından təbii
boyaq maddəsi kimi də istifadə edilə bilər. Belə ki, onun yarpaq və oduncaq
hissələrindən sarı, sarı – narıncı, narıncı, yaşıl, qonur, qəhvəyi, qəhvəyi – qonur,
şabalıdı, firuzəyi, zeytunu, abı, abı – yaşıl və s. rəng və rəng çalarları alınır. Qida
sənayesində çaytikanı bitkisinin müxtəlif orqanlarından alınan boyaq
növlərindən müxtəlif qida məhsullarının boyadılmasında geniş istifadə edilə
bilər [20].
Digər yabanı bitkilər kimi sumaq da həm xalq təbabətində və həm də qida
sənayesində, məsələn milli kulinariyada bir dadverici qida əlavəsi kimi geniş
istifadə edilir. Sumaq, həm də olduqca qiymətli texniki bitkidir. Bu bitki
növünün kimyəvi tərkib göstəriciləri kifayət qədər yaxşı öyrənilmiş və
yarpaqlarının tərkibində 11,5 – 25,0 faizədək tanin maddəsinin olduğu müəyyən
edilmişdir. Sumaq bitkisinin yarpaqlarından tibb sənayesində istifadə olunmaq
məqsədi ilə tanin və qal turşusu hazırlanır. Sumaq meyvəsinin qabıqlarında
çoxlu miqdarda turş dada malik birləşmələr olduğundan o, qida sənayesində
daha geniş miqyasda işlədilir.
Sumağın qabığında, yarpaqlarının tərkibində, ağacının köklərində və eləcə
də meyvə hissəsinin tərkibində boyaq maddəsi olan mirsetin maddəsi –
C
15
H
10
O
8
vardır.
Sumağın gövdə və yarpaqlarından sarı və boz, köklərinin qabığından
şabalıdı, meyvələrindən isə qırmızı boyaq alınır. Sumağın yarpaq və meyvə
hissələrindən alınan boyaq məhlulunda rənglənmiş yun sap, müxtəlif rəng
çalarları, məsələn sarı, boz, yaşıl, qonur, narıncı – qəhvəyi çalarlar qazanır.
Alınan rənglər Günəş şüasına və kimyəvi yuyucu vasitələrlə yuyulmaya qarşı
çox davamlı olur. Sumaqdan hazırlanmış boyaq maddələri bir çox unlu və
şəkərli qənnadı məmulatları üçün də olduqca qiymətli boyayıcı vasitədir.
Zirinc də qiymətli boyaq bitkisi kimi hələ lap qədim zamanlardan etibarən
istifadə olunmağa başlanmışdır. Meyvələrinin tərkibində 5,0 faiz şəkərli
maddələr, 6,5 faiz üzvi turşular, 15,0 mq faiz askorbin turşusu, karotin, E
vitamini, pektin maddələri, aşılayıcı birləşmələr, antosianlar çoxluq təşkil edən
boyaq maddələri və bu kimi bir çox kimyəvi maddələr vardır.
Toxumlarının tərkibində 15,0 faizə qədər yağ mövcud olur.
Meyvələrindən qədim zamanlarda belə qırmızı rəngli mürəkkəb hazırlanarmış,
bu ənənə indi də davam etdirilir.
Zirinc meyvələrindən istehsal edilən şərabdan halsızlığa, difteriyaya və
baş gicəllənmələrinə qarşı aparılan müalicədə bir dərman vasitəsi kimi istifadə
edirlər. Müxtəlif konserv məhsulları və qənnadı məmulatları istehsalı üçün ən
yaxşı və əvəzsiz xammal növü sayılır [15].
Zirincin qabıq, oduncaq və kök hissələrinin tərkibində berberin adlı təbii
boyaq maddəsi vardır.
Bir çox tədqiqatçılar qeyd edirlər ki, zirinc bitkisinin müxtəlif
hissələrindən (kök, gövdə, yarpaq, çiçək, meyvə) 350 – 400-ə qədər rəng və rəng
çalarları almaq mümkündür. Alınan rənglər Günəş şüalarına, əsasların,
turşuların və kimyəvi yuyucu vasitələrin təsirinə qarşı çox davamlı olub,
boyaqçılıq sənayesində yun, ipək və pambıq parçadan hazırlanan məmulatların,
meyvə hissələrindən alınan boyaq ekstraktı isə qida məhsullarının boyanmasında
geniş istifadə oluna bilər. 1 kq zirincdən hazırlanan boyaq ekstraktı ilə 8 – 9 kq
yun və müxtəlif qida məmulatlarını boyamaq mümkündür.
Ümumiyyətlə yabanı halda yetişən bitkilərin kimyəvi tərkibi təbii boyaq
maddələri ilə olduqca zəngindir. Bu bitkilər içərisində əsasən də yemişan bitkisi,
tərkibinə daxil olan təbii boyaq maddələrinin rənglərinin intensivliyinə görə
digər bitkilərdən kəskin fərqlənir. Yemişan bitkisi meyvələrinin kimyəvi
tərkibinə daxil olan maddələr qrupu həm müalicəvi və həm də qidalıq dəyəri
nöqteyi – nəzərindən çox əhəmiyyətli olduğundan, bu xammal növündən alınan
müxtəlif çalarlı boyaq maddələri də qida sənayesinin müxtəlif sahələrində
müxtəlif çeşidli qida məhsullarını rəngləmək məqsədi ilə geniş miqyasda tətbiq
edilə bilər. Hələlik yemişandan alınan boyaq maddəsinin qida sənayesində
konserv məhsullarının, qənnadı məmulatlarının və qida konsentratlarının
boyadılmasında istifadə edilməsi qarşıda duran ən mühüm və həlli zəruri sayılan
problemlərdən biridir.
Dostları ilə paylaş: |