Lüğətin quruluşu onun qarşısında qoyulan vəzifə və məqsədə uyğun şəkildə müəyyən edilmişdir. Lüğətçilik ənənəsinə uyğun olaraq kitabda terminlər əlifba sırasına görə ardıcıllıqla verilmişdir. Lakin ensiklopedik nəşrlərdən fərqli olaraq bu sahə lüğətində spesifik terminlərin etimologiyası deyil, işləklik dərəcəsi və təcrübi ehtiyacları nəzərə alınaraq ingilis dilində qarşılığı verilmişdir. Kino, televiziya, radio və informatika sahəsində işlənən terminlərin böyük bir qisminin (xüsusən son illərdə yaranan) leksikamıza ingilis dilindən keçdiyini, eləcə də təcrübədə bəzən bu dilə ehtiyac olduğunu nəzərə alaraq sonda daha populyar terminlərin azərbaycanca-ingiliscə qısa lüğəti də verilmişdir.
