Fəndaxili inteqrasiya - hər hansı bir fənnin daxilində mövzular arasında yaradılan əlaqədir. İki növü var: şaquli və üfüqi.
Şaquli inteqrasiya – məzmun standartlarının siniflər üzrə əlaqəsini əhatə edir. Sinifdən sinfə keçərkən öyrənilən obyektlər arasında əlaqə saxlanılmaqla, məzmun daha da genişlənir və dərinləşir. Məsələn, Azərbaycan dili fənni üzrə şaquli inteqrasiyaya nəzər salaq:
Müəllim VIII sinifdə 3.1.1 altstandartını reallaşdırarkən VI sinif 3.1.1 altstandartına inteqrasiya etməsi mümkündür, hətta lazımdır. Yəni müxtəlif tipli mətnlər yazmazdan əvvəl yazı tipləri və fərqlərini yada salmaq, qaranlıq məqamlara aydınlıq gətirməlidir.
Üfüqi - müəyyən bir sinifdə fənnin müxtəlif məzmun xətləri arasında əlaqəni əhatə edir. Məsələn, VII sinif Azərbaycan dili fənnində müəllim 3.1.1. Verilmiş mövzunu müxtəlif yazı formalarında (ifadə, inşa, hekayə) ifadə edir altstandartını reallaşdırarkən 4.1.3 Köməkçi nitq hissələrinin işlənmə məqamından asılı olaraq durğu işarələrindən istifadə edir altstandartına inteqrasiya edərək 3-cü məzmun xətti olan Yazı ilə 4-cü məzmun xətti olan Dil qaydaları arasında əlaqə yaratmış olur.
