Şakir Musayev

Cinayət mühakimə icraatının  

məhkəmə-tibbi təminatı  

 

333

FƏSİL 13. MƏHKƏMƏ TİBBİ TƏCRÜBƏDƏ 

MÜAYİNƏ OBYEKTLƏRİNİN 

ZƏDƏLƏNMƏSİ VƏ ONLARIN 

XÜSUSİYYƏTLƏRİNİN DƏYİŞMƏSİ. 

 

Müayinə obyektinin zədələnməsi dedikdə ona müayinə gedişində 

fiziki, kimyəvi, bioloji və digər metodların tətbiqi nəticəsində 

vəziyyət və xüsusiyyətlərinin dəyişilməsi nəzərdə tutulur.  

Məhkəmə tibbi təcrübədə müayinə zamanı bir çox hallarda 

obyektlərin zədələnməsi, bəzən isə tam sərf olunması müşahidə 

olunur. Məhkəmə tibb ekspertinə ekspertizanı təyin etmiş orqanın və 

şəxsin icazəsi olmadan obyektlərin sərf olunmasına, onların xarici 

görünüşü və ya xüsusiyyətlərinin dəyişilməsinə  səbəb ola bilən 

müayinələrin aparılmasına icazə verilmir. Prosessual təbiətindən asılı 

olmayaraq bu qayda ekspert müayinələrin bütün obyektlərinə aiddir. 

Müayinəni planlaşdırdıqda ekspert elə müayinə metodlarının 

ardıcıllığını seçməlidir ki, o maksimal dərəcədə obyektin sonrakı 

müayinə  mərhələlərində müayinəsi üçün saxlanmasını  təmin etsin. 

Öncə obyektin xüsusiyyətlərini dəyişməyən metodlar, sonra obyektin 

xüsusiyyətlərini hissəvi dəyişən metodlar və  nəhayət, obyektin 

xüsusiyyətlərini tam dəyişən və ya onun tam sərf olunmasına səbəb 

olan metodlar tətbiq edilir. Əgər obyektin sərf olunması və ya onun 

xüsusiyyətlərinin dəyişilməsi güman edilirsə, bu zaman müstəntiq və 

məhkəmədən icazə almaq lazımdır.  

Ekspertizanın keçirilməsi və  rəyin verilməsinə  zərurət yaranan 

hallarda ekspertizanı  təyin etmiş orqan və  şəxsin icazəsi ilə maddi 

sübutların, sənədlərin müayinəsində obyektləri zədələmək və tam sərf 

etmək olar. İcazə ekspertizanın təyin edilməsi barədə olan sənəddə öz 

əksini tapmalıdır. Ekspertizanı təyin etmiş orqan və şəxsin icazəsi ilə 

maddi sübut və  sənədlərin zədələnməsi və tam sərf olunması 

məhkəmə tibbi ekspert idarəsi və ekspert tərəfindən zərərin 

ödənilməsinə səbəb olmamalıdır.  

Ekspert rəyində müayinənin məzmunu və  tətbiq edilmiş üsullar, 

onların etibarlılıq dərəcəsi göstərilir (CPM, maddə 271.2.6). 

---