Ega va kesim turlari ifodalanishi Reja

Ega va kesim turlari ifodalanishi
Reja:
1.Gapni bo’laklarga ajratish
2.Bosh bo’lak, ikkinchi darajali bo’laklar haqida
3.Ega va uning ifodalanishi
Gap tarkibidagi o’zaro tobe bog’lanishda bo’lgan so’zlardan bittasi tobe bo’lak, ikkinchisi hokim bo’lak vazifasini bajaradi.Tobe bo’lak hokim bo’lakka bog’lanib, hokim bo’lak talab etgan sintaktik vazifada keladi.Ana shu vazifa gap bo’lagi nomi bilan yuritiladi. Gap tarkibida tobe bog’lanib ma’lum so’roqqa javob bo’luvchi so’z yoki so’z birikmasiga gap bo’lagi deyiladi.gap bo’lagi tobe bog’lanish doirasida, tobe qism vazifasida kelgan bo’laklar hisoblanadi.Uning qaysi bo’lak vazifasida kelayotganligi hokim bo’lakka nisbatan aniqlanadi.gapdagi barcha bo’laklar kesimga qarab aniqlanadi.Gap bo’laklari gap tuzilishidagi vazifasiga ko’ra ikki guruhga, ikki darajaga bo’linadi:
1. Bosh bo’lak: kesim, ega
2. Ikkinchi darajali bo’laklar: to’ldiruvchi, aniqlovchi, hol
Gapda kesim bilan bog’lanib , shu kesimdagi qo’shimcha ifodalagan shaxs-sonni bildiruvchi va kim? nima? qayer? so’roqlariga javob bo’ladigan bosh bo’lak ega deb ataladi. Odam (kim?) ko’p , ish (nima?) kam. Atrof (qayer?) jimjit.
Ega bosh kelishikda bo’lib , odatda, quyidagicha ifodalanadi:
1.Ot bilan : Shamol gullar hidini atrofga taratdi.
2.Olmosh bilan :Ular to’garak mashg’ulotlariga muntazam qatnashadilar.
3.Harakat nomi bilan: O’qish tugadi.
4.Otlashgan so’zlar bilan :
a) sifat bilan: Oqlar yurishni boshladi.
b) son bilan : Uchovimiz dala aylandik.
d) sifatdosh bilan : Qimirlagan qir oshar.
e) ravish bilan: Ko’plar qatnashdi.
f)taqlid so’z bilan: To’plarning gumbur-gumburi eshitilardi.
g) modal so’zlar bilan: Bor boricha , yo’q holicha.
5. Ibora bilan : Hafsalasi pir bo’lgani sezilib turardi.
6.Sintaktik birliklar (so’z birikmasi) bilan: Otlarning otxonaga olib o’tilmagani Ziyodillani taajjublantirdi.
Ayrim paytlarda teng aloqadagi bir necha so’z ham butunicha yoki bo’lak – bo’lak ravishda ega bo’lib kelishi mumkin: Otam bilan akam bozorga ketishdi.
Ba’zan ega chiqish kelishigidagi so’zlar bilan ham ifodalanishi mumkin. Bunday paytlarda haqiqiy ega tushirilgan bo’lib, undan oldin kelayotgan chiqish kelishigidagi so’z ega vazifasinin ifodalaydigan bo’lib qoladi: Unda ham bu kitoblardan bor. Bu gapdagi haqiqiy egani tiklash mumkin: Unda ham bu kitoblardan biri bor.
Kesim gap markazi bo’lib, u tsdiq-inkor, zamon, mayl, shaxs-son ma'nolarini ifodalab keladi, hukmni ifodalaydi va gapning boshqa bo’laklarini o’z atrofida birlashtiradi.
Gapni yuzaga keltirish, fikrni ifodalash jihatidan kesimning gapdagi ahamiyati juda katta. U hukmni ifodalovchi, gaplikning asosiy belgilarini ko’rsatuvchi eng muhim bo’lakdir. Gapda ega ham, ikkinchi darajali bo’laklar ham bevosita yoki bilvosita kesimga bog’lanadi.
Kesim nima qildi? nima qilyapti? nima qiladi? (ba'zan nechanchi? qanday?) so’roqlariga javob bo’ladi.
Kesim qaysi turkum so’zlari bilan ifodalanishiga ko’ra ikki xil:
fe'l-kesim, ot-kesim.
Kesim tuzilishiga ko’ra ikki xil bo’ladi: sodda kesim va murakkab kesim.
Felning turli shakllari orqali ifodalangan kesim fe'l-kesim deyiladi.
Fe’l-kesimlar quyidagi ko’rinishlarga ega:
sof fe'l-kesimlar: Men maktabga boraman;
ravishdosh bilan ifodalangan kesim: Motor gurillab, mashina oldinga intildi;

D) sifatdosh bilan ifodalangan kesim: It hurar-karvon o’tar. Po’lat xatni kecha yuborgan.

Fe’ldan boshqa so’z turkumlari (ot, sifat, son, olmosh, ravish, taqlid so’z) bilan, shuningdek, fe’lning harakat nomi shakli bilan ifodalangan kesim ot-kesim deyiladi.