Fanidan O’quv-uslubiy majmua

9.3. Мақсадли тушумлар, субсидия ва грантлар ҳисобни юритиш

Қайтарилмайдиган маълум бир мақсадли тадбирларни амалга ошириш учун тайинланган мақсадли тушумлар, маблағлар ҳолати ва ҳаракати, шунингдек аъзолик бадаллари ҳамда бошқа маблағларнинг кирими уларнинг сарфланиши тўғрисидаги ахборот қуйидаги:

8810 «Грантлар»,
8820 «Субсидиялар»,
8830 «Аъзолик бадаллари»,
8840 «Мақсадли фойдаланиладиган солиқ имтиёзлари»,
8890 «Бошқа мақсадли тушумлар» счетларда умумлаштирилади
Юқорида кўрсатилган тушумларни хусусий капитал сифатида акс эттиришнинг қуйидаги шартлари мавжуд:
а) мақсадли тайинланиши бўйича фойдаланиш;
б) маблағларни жалб этиш билан боғлиқ бўлган харажатларнинг содир бўлмасиги;
в) маълум шартлар бажарилганда қайтарилмаслиги лозим.
Грант бу (8810 «Грантлар» счети)- иқтисодиётни ривожлантиришга қизиқтириш, илмий-техника ва инновация дастурларини бажариш учун ижтимоий аҳамиятли мақсадлар бўйича корхонага қайтариб олмаслик шарти билан давлат, шунингдек, нодавлат, хорижий, халқаро ташкилотлар ва фондлар томонидан кўрсатиладиган гуманитар пул ёки моддий-техника ёрдамидир. Грант маблағлари қатъий мақсадли тайинланиши бўйича фойдаланилади.
Грант ажратилган ҳолларда тегишли грант ажратувчи ташкилот ва фондлар томонидан корхонага хабарнома юборилади. Ушбу хабарномада кўрсатилган суммага корхона қуйидагича расмийлаштирилади:
Дт 4890 «Бошқа дебиторларнинг қарзлари»,
Кт 8810 «Грантлар» счети.
Грант бўйича молияланадиган мақсадли лойиҳа бюджетида назарда тутилган пул маблағлари ёки мулклар олинганда қуйидагича расмийлаштирилади:
Дт Пул маблағларини ҳисобга оладиган (5110-5530), капитал қўйилмалар (0800), Ўрнатиладиган ускуналар (0700), ТМЗ ва бошқа счетлар,
Кт 4890 «Бошқа дебиторларнинг қарзлари» счети.
Чет эл валюталарида олинган грантлар суммаси Ўзбекистон Республикаси Марказий банки томонидан хўжалик муомалаларини содир бўлиш кунига белгиланган курс бўйича Ўзбекистон Республикаси миллий валютасига айлантирилади.