"Həyatın Dastanı"nda Müasir şeirin xanı, poetik ruhun Məsihi Hamlet İsaxanlı



Yüklə 76.55 Kb.
tarix22.05.2017
ölçüsü76.55 Kb.
“Həyatın Dastanı”nda...

Müasir şeirin xanı, poetik ruhun Məsihi Hamlet İsaxanlı

(Əli Rza Xələfli , “Həyatın Dastanı” ədəbi-fəlsəfi düşüncələr, Bakı: 2012. 239 səh.)

Lap əvəldən başlamaq istəyirəm. Elə, Əli Rza Xələflini tanıdığım vaxtdan. Daha bu imzaya, bu ada şair, yazıçı, publisist, jurnalist, tədqiqatçı adlarını əlavə etmədən. Çünki, Əli Rza Xələfli imzası müasir ədəbi və ictimai mühitdə özünə elə köklü-köməcli yer tutubdur ki, adı çəkilən kimi bunların hamısı yada düşür. Özü də, həqiqət naminə, onu da deyim ki, sıraladığım bu yaradıcılıq shəsinin hər birində Əli Rza Xələfli özünəməxsus, orjinal bir məqamdadır və elə onun biri ilədə məşğul olsayıdı tanınacağıdı, seviləcəyidi, rəğbət doğuracağıdı... Səhv etmirəmsə, buna yaradıcılıq polufonizmi deyirlər, başqa sözlə, Əli Rza Xələfli çoxşaxəli yaradıcılıq imkanlarına malik qələmsiz qələm adamıdır və mən özüm də elə əvvəldən onu bu cürə tanımışam... “Qələmsiz qələm admı” ifadəsini də, deyəsən ilk dəfə mən onun haqqında işlətmişəm, özü də bir əlavə ilə, demişəm ki, Əlirza Xələfli qədim Roma filosofları kimi, nə yaradırsa, bir əli cibində, bir əlində siqaret tutaraq qələmsiz-kağızsız diktə edir. İndi də əlavə edirəm ki, fikri improvizə edərək, nə yaradırsa şifahi şəkildə yaradır. Elə ona görə də, onun bütün yaradıcılığı şifahi xalq yaradıcılığı təkin şirin, cazibadar və diqqətçəkəndir...

Bu sözləri də onun haqqında mən yazmışam və təkrar etməkdə məqsədim budur ki, fikrimi gəlişigözəl söz təkin yox, sabit qənaətim təkin irəli sürmüşəm: “Mənim üçün (həmçinin eləcə də onu tanıyanlar üçün də) heç bir metaforaya sığışmayan bir qələm əhli, ürək və əqidə dostum var - bu, şair, yazıçı, publisist-jurnalist, tədqiqatçı-tənqidçi Əli Rza Xələflidir! Bu adın, bu imzanın özü müasir ədəbi prosesdə həyatı bədii-fəlsəfi dərkin və inikasın bütöv bir sistemini özündə ehtiva etməyə qadirdir!.. Əli Rza Xələfli adı, imzası ədəbi-bədii siferada ülfət və ünsiyyət mücəssəməsidir! Ülfət və ünsiyyət intiqralının bütün kodları onun ürəyinin, qəlbinin döyüntüləri ilə kodirovka ola bilər!..”

“İnteqral” deyəndə yadıma bir el kəlamı düşdü: “Dost dosta tən gərək!” Əslində, bu kəlamı yaradıcı aləmə tətbiq eləyəsi olsaq, bir-biri haqqında söz dyən yaradıcı şəxsiyyətlər də, gərək ki, bir-birinə tən gəlsin. Əli Rzanın qələm dostu, tanınmış alim, riyaziyyatçı, deyilənə görə, riyaziyyat elminin bütün “inteqrallarının” açarını cibində gəzdirən, fizika-riyaziyyat elmləri doktoru, professor, bizim üçünsə istedadlı şair-publisist Hamlet İsaxanlıdır və Əlirza Xələflinin Hamlet İsaxanlı yaradıcılığına müraciət etməsi, ondan bir kitablıq söz yazması bu iki yaradıcı şəxsiyyət tipinin bir-birinə tən-dürüst gəlməsidir...

Elə buradaca, tanınmış şair-publisist, tərcüməçi, kitabın redaktoru Hafiz Rüstəmin “Həyatın Dastanı” kitabına yazdığı, kitabın özü qədər dərin, mənalı "Həyatın Dastanı"nda "Ziyarət"in fəlsəfi mahiyyəti” adlandırdığı ön sözündən bir abzası fikrə qüvvət kimi misal gətirirəm: “Çünki ən azı iddiayla tələb, imkanla gerçəklik, formayla məzmun, təsadüflə zərurət bir-birini tamamlamayanda, başqa sözlə, real həyatla tale yazısı üst-üstə düşməyəndə heç nə alınmır. Əksinə, bütün bunlar düz mütənasib olanda, ədəbi şəxsiyyətin missiyası qismən müəyyənləşir.” Ziyalı şəxsiyyətinə və təfəkkürünə böyük hörmət bəslədiyim Hafiz Rüstəmin bu postulatından çıxış edərək “Həyatın Dastanı”nın müəllifi Əli Rza Xələfli ilə “Ziyarət” poemasının müəllifi Hamlet İsaxanlını görək bir ziyalı, şair, alim tipi kimi nələr birləşdirir, hansı cəhətlər üst-üstə düşür, bunların yaradıcı şəxsiyyətləri arasında düzmüntənasib gələn hansı məqamlardır ki, hər iki ədibi, hər iki ədəbi şəxsiyyətin missiyasını müəyyənləşdirib. Bunu bilənlər bilir... Bilməyən oxucularım üçünsə aydınlıq hasil olsun deyə hər iki qələm dostumuzun şəxsiyyətlərini, fəaliyyət dairələrini qısa şəkildə olsa da proyeksiya edək:

Əli Rza Xələfli (Əzizli Əlirza Zal oğlu) - Azərbaycan Dövlət Pedaqoji Universitetinin filologiya fakültəsini fərqlənmə diplomu ilə bitirmiş, Cəbrayılın (əslən oralıdır - Q.B.) Şahvəlli, Tatar, Aşağı Xələfli kəndlərində müəllim işləmişdir. Həmin illərdəki peaqoji fəaliyyətinə görə “Qabaqcıl maarif xadimi” fəxri adına layiq görülmüşdür. Qarabağ uğrunda döyüşlərdə qələmi və süngüsü ilə iştirak etmiş, Qarabağ qazilərindən biri kimi müharibə veteranıdır.

80-ci illərin əvvəllərindən mətbuatda çalışır. Əli Rza Xələfli zəngin yaradıcılıq yolu keçmişdir. “Karvan körpüdən keçir” (1997), “Baş daşımın yazıları” (1998), “Yurdun övladları” (E.Kamalla birlikdə, 2000) ədəbi-bədii, publisistik, “Sözə doğru (2003), “Dünyanın söz üzü” (2007) ədəbi-tənqidi, “Ocağımın işığı” (2001), “Həsrət körpüsü” (2003) şeirlər və poemalar kitablarının müəllifidir. O, “Mənəviyyatın ekologiyası” (2005), “Fənayənin sualları” (2006), “Yana-yana yaşadım” (2006), “Koroğlu - hoydu dəlilərim, hoydu” (İslam Sadıqla birlikdı, 2006) kitablarının tərtibçi müəllifidir. Ə.Xələflinin “Meyar”, “Dünya yazana qaldı” ədəbi-publisistik və “Daş yazı” şeirlər və poemalar (2008), “Dilimiz-Varlığımız” (2009), “Axtala əfsanəsi” (2010) ədəbi-tənqidi, “Damcılı” poema (2011), “Üçüncü dünyanın qorxusu”, “Döyüşçü əfsanəsi” povestlər (2011) “Yaddaşa aparan yollar” ədəbi düşüncələr (2011),“Həyatın dastanı” (2012) kitabları ilə oxucularını sevindirib. Otuzdan çox kitabın müəllifidir...

Ə.Xələfli “Qızıl qələm” və “Araz” ali ədəbi təltiflərinə və Yazıçılar Birliyi Bədii Ədəbiyyat Təbliğ Bürosunun “Qılınc və qələm” yaddaş mükafatına (2004) layiq görülmüşdür. Ə.Xələfli Beynəlxalq Rəsul Rza mükafatı (2008) laureatıdır və həm də Şahmar Əkbərzadə adına Beynəlxalq Ədəbiyyat mükafatına da (2010) layiq görülüb. Prezident təqaüdçüsüdür (2010). Professor Abbas Hacıyevin “Sənətin işığında” (2010) monoqrafiyası Ə.R.Xələflinin yaradıcılığına həsr edilib. Azərbaycan Yazıçılar Birliyinin və Azərbaycan Jurnalistlər Birliyinin üzvü, “Kredo” (1999) qəzetinin baş redaktorudur.”

Hamlet İsaxanlı (tam adı: İsayev Hamlet Abdulla oğlu) - riyaziyyatçı, fizika-riyaziyyat elmləri doktoru, professor, şair, yazıçı, publisist, tərcüməçi, elm, mədəniyyət və təhsil tarixi üzrə mütəxəssis, ədəbiyyat və dilçilik, tarix və fəlsəfəyə dair çoxsaylı əsərlərin müəllifi.

İsaxanlı soyadını o, poetik yaradıcılığında, həmçinin humanitar və sosial elmlər sahəsində yazdığı əsərlərində işlətmişdir. Onun bütün riyazi əsərləri "İsayev" soyadı ilə çap olunmuşdur. Hazırda o, geniş ictimaiyyət arasında daha çox Hamlet İsaxanlı kimi tanınır.

Hamlet İsaxanlı müxtəlif sahələrdə geniş fəaliyyət göstərmiş və göstərməkdə olan ensiklopedik biliyə malik elm və sənət adamıdır - riyaziyyatçı, humanitar və sosial elmlərin bir çox sahələrində yazılmış elmi-tədqiqat işlərinin, poetik və bədii-publisistik əsərlərin müəllifidir, tərcüməçi, təşkilatçı maarifçidir, Xəzər Universitetinin təsisçisi və rektoru, Xəzər Universitetinin Direktorlar və Qəyyumlar Şurasının sədri, Dünya məktəbinin (ibtidai, ümumi orta, tam orta) təsisçisi, nəşriyyat təsisçisi, redaktor, ictimai xadimdir və s.

1920-ci illərin sonu və 1930-cu ildə Gürcüstan və Ermənistanda Sovet hakimiyyətinə qarşı üsyana başçılıq etmiş məşhur Qaçaq İsaxanın nəvəsidir.

Hamlet İsayevin riyaziyyat üzrə tədqiqatlarını SSRİ Elmlər Akademiyası üzvləri N.N. Boqolyubov, V.S.Vladimirov, S.M.Nikolski, Lenin mükafatı laureatları B.M.Levitan və V.B.Lidski, eləcə də A.Q.Kostyuçenko, A.A.Dezin, V.A.Sadovniçi (hazırda M.V.Lomonosov adına Moskva Dövlət Universitetinin rektoru), professor F.Atkinson (Toronto Universiteti), professor P.J. Broun (Kalqari Universiteti) və digər görkəmli riyaziyyatçılar, o cümlədən Azərbaycan riyaziyyatçıları Zahid Xəlilov, Mirabbas Qasımov yüksək qiymətləndirmişdilər...

Bütün bunları əsərində yeri gəldikcə izah və şərh edən Əli Rza Xələfli göstərir ki, Hamlet İsaxanlı Azərbaycanda və onun hüdudlarından kənarda təkcə alim və elm-təhsil təşkilatçısı kimi deyil, şair kimi də çox yaxşı tanınır. Qeyd edək ki, Hamlet İsaxanlı gənclik illərindən şeir yazmış, lakin onları uzun müddət çap etdirməmişdir. Lakin onun poetik əsərləri nəşr üzü görəndən, geniş oxucu marağına səbəb olmuş, əsərləri təkcə Azərbaycanda deyil, Rusiyada, Çində, İranda, Gürcüstanda, Pakistanda və digər ölkələrdə tanınmış, rus, ingilis, çin, gürcü, eston, türk və digər dillərə tərcümə olunan şeir kitabları, jurnal, qəzet və poetik toplularda şeir və poemaları nəşr olunaraq yayılmışdır...

Onun “Təzadlar” (Xəzər Universitəsi Nəşriyyatı, Bakı, 2001), “Bu da bir həyatdı” (Xəzər Universitəsi Nəşriyyatı, Bakı, 2004), “Dördlüklər” (Xəzər Universitəsi Nəşriyyatı, Bakı, 2007),

“Ziyarət” ( Xəzər Universitəsi Nəşriyyatı, Bakı, 2009), "Kontpastı. Kniqa stixotvoreniy" (V perevodax Allı Axundovoy). "İzoqpaf", Mockva (Moskva), 2006), "Şeirə dönən duyğular", Əxtər nəşriyyatı, Təbriz, 2004, “Təzadlar”, Əxtər nəşriyyatı, Təbriz, 2005, "Bu da bir həyatdı". Əxtər nəşriyyatı, Təbriz, 2005, "Sitotxlis Poezia" (Ömür Poeziyası).(Gürcücə, İmir Məmmədlinin tərcüməsində). "İntellekt", Tbilisi, 2004, "Təzadlar. Bu da bir həyatdı" (Çincə) -(Putonghua-mandarincə). CCTP - Central Compilation & Translation Press, Beijing (Pekin, 2009) poetik kitabları bu silsilədəndir...

Əli Rza Xələfli bir tədqiqatçı şəristəsi ilə Hamlet İsaxanlının “Ziyarət” poemasının fonunda bu maraqlı, çoxşaxəli yaradıcılıq imkanlarına malik ziyalının fəaliyyətinə müxtəlif rakursalardan işıq salır, onu bir şəxsiyyət tipi kimi hər tərəfdən açmağa müvəffəq olur.

O, sübut edir ki, Hamlet İsaxanlı lirik, emosional axarlı şeirlər müəllifidir. Elə buna görə də, onun musiqi ilə dolu, ürəyəyatan, könülləri ehtizaza gətirən poeziyası Azərbaycan bəstəkarlarının diqqətini cəlb edib. Çoxsaylı lirik şeir və poemaları əsasında mahnılar yazılmış və musiqili tamaşalar hazırlanmışdır. Şairin "Xəzər Universitəm" şeirinə görkəmli bəstəkarlar, xalq artistləri Ramiz Mustafayev və Vasif Adıgözəlov musiqi-himn yazmış, Ramiz Mustafayev "Xəzərimin sorağında" şeirinə mahnı-tələbə valsı bəstələmişdir. Vaqif Gərayzadə "Hicran", Lütfiyar İmanov "Yaşamağa nə var ki?!", Nailə İsayeva "Səni sevdim çox sadəcə", "Gözəldir", "Lalə", "İnciçiçəyi", "Külək və qız", "Tək qalmaq istəyirəm", "Tez gəlin", "Dünyam" şeirlərinə, Elza Seyidcahan "Baş açmadım bu dünyadan", "İkimizdən birimiz" və "Bakı" şeirlərinə , Cahangir Zülfüqarov "Görüş yerimiz", Tahir Əkbər "Rübailər" (və ya "Mənə ayrılan vaxt") və "Məndən sənə yar olmaz", Dilarə Qulamova "Qədim sual", "Möcüzə gecə", "Uşaqlıqda qalan buludlar" və digər şeirlərinə, həmçinin şairin fəlsəfi şeirlər silsiləsi əsasında qurulmuş "Ömür yolu bircə andır" adlı tamaşaya musiqi bəstələyiblər. Hamlet İsaxanlının "Ziyarət" poemasına bütövlükdə musiqi bəstələyən Cavanşir Quliyev şairin on bir şeirini də mahnıya çevirmişdir. Bu və başqa mahnılar və musiqili tamaşalar Brilliant Dadaşova, Lütfiyar İmanov, Flora Kərimova, İlqar Muradov, Azər Zeynalov, Rəşidə Behbudova, Aygün Bəylər, Gülyanaq Məmmədova, Manana Caparidze, Elza Seyidcahan, Samir Cəfərov, Fədayə Laçın, Azərbaycan dövlət simfonik orkestri və xoru, "Savalan", "Şaron", "Kristal" qrupları, Dünya məktəbinin xoru və b. tərəfindən ustalıqla ifa olunmuş və olunmaqdadır. Arif Babayev, Alim Qasımov, Nəzakət Teymurova, Zabit Nəbizadə, Zakir Əliyev kimi muğam ustaları, gənc Abgül Mirzəliyev və başqa xanəndə və müğənnilər də Hamlet İsaxanlı yaradıcılığına müraciət etmişlər...

Hamlet İsaxanlının çoxtərəfli yaradıcılığına tərcümə işi də daxildir. O, V.A.Jukovski, F.Baratınski, F.İ.Tyutçev, A.Fet, Sergey Yesenin, Nikolay Qumilyov, Anna Axmatova, Alla Axundova, Corc Qordon Bayron, W.Bleyk, R.Herrik və G.De Nerval kimi rus, ingilis və fransız şairlərinin şeirlərini orijinaldan Azərbaycan türkcəsinə çevirmişdir. Azərbaycan tərcüməçilərinin ingilis, rus və fransız dillərindən Azərbaycancaya və Azərbaycancadan ingiliscə və ruscaya etdikləri poetik tərcümələr Hamlet İsaxanlının redaktorluğu (və müəllifliyi) ilə xeyli adda kitab da nəşr edilərək işıq üzü görmüşdür...

Hamlet İsaxanlının bədii-publisistik yaradıcılığı da maraq doğurur. Onun sənədli povest janrında qələmə aldığı "Xəzər"in sorağında" əsəri, ədəbiyyat və mədəniyyət tarixinə, görkəmli şəxsiyyətlərə, çağdaş problemlərə həsr olunmuş bir sıra ədəbi etüdləri, esseləri bu sıradandır..

Bütün bunlarla bir sırada Hamlet İsaxanlı dil və ədəbiyyat, tərcümə nəzəriyyəsi və tarixi üzrə tədqiqat aparan və sanballı əsərlər yazan elm və sənət adamıdır, çoxsaylı məqalə, monoqrafiya və dərsliklərin müəllifidir... Həmçinin o, öz yazılarında poeziya və fəlsəfə, poeziya və sevgi, ədəbiyyat və milli kimlik, ədəbiyyat və ideologiya, mətbuat tarixi və digər problemləri də araşdırır.

Hamlet İsaxanlının yaradıcılığında və elmi fəaliyyətində tarix, fəlsəfə, siyasət və tarix, siyasət və beynəlxalq münasibətlər, mədəniyyət və elm tarixi üzrə əsərlər mühüm yer tutur. Onun "Milli azadlıq hərəkatı haqqında düşüncələr", "Amerika azərbaycanlıların gözü ilə", "Dağlıq Qarabağ problemi üzrə danışıqlar. Buradan hara gedirik?", "Sovetləşmə, kollektivləşmə və sovet totalitarizmi" mövzusunda yazıları və məruzələri Azərbaycanda və nüfuzlu xarici mətbuatda, beynəlxalq konfranslarda öz əksini tapmışdır. İslam sivilizasiyası, Orta əsrlər İslam dünyasında elm, mədəniyyət, təhsil və texnologiyanın inkişafı və Avropaya təsiri, eləcə də "Keçmişin fəlsəfəsi və ya tarix necə yazılır" mövzusunda silsilə əsərləri xüsusi maraq doğurur...

Hamlet İsaxanlının fəaliyyət sahəsində sədrlik etdiyi "Elm və Sənət Məclisi" də fərqlənir və bura görkəmli tədqiqatçıların, elm və sənət adamlarının, istedadlı gənclərin, tələbələrin bir yerə yığışdığı və humanitar və sosial elmlər üzrə müxtəlif aktual məsələlərin müzakirə olunduğu bir yerdir. Bu “Elm və sənət məclisi”ndə (XIX əsr Azərbaycanın müxtəlif şəhərlərində fəaliyyət göstərən poetik məclislər yadıma düşdü) sıra xarici ölkələrdən gələn görkəmli alimlərlə yanaşı Azərbaycan tədqiqatçıları da məruzə edirlər. Hamlet İsaxanlı bu məclislərdə fəlsəfə və poeziya, sufilik, tərcümə nəzəriyyəsi və tarixi, etnogenezis və millətçilik, qloballaşma və mənəvi varislik, elektron məkan, hun tarixi, oriyentalizm, Azərbaycan ədəbiyyatının tarixi və coğrafiyası, tarixşünaslığın problemləri və digər mövzularda məruzə etmiş, məqalə və esselər çap etdirmişdir...

Professor Hamlet İsaxanlı həmçinin, təhsilin çox müxtəlif məsələləri, o cümlədən təhsil siyasəti, təhsil nəzəriyyəsi, təhsilin tarixi və fəlsəfəsi sahələrində fəaliyyət göstərən ən nüfuzlu alim və ictimai xadimlər sırasındadır. Onun "On Education System in Transition Economy. A View From Azerbaijan" ("Keçid iqtisadiyyatındakı təhsil sistemi haqqında. Azərbaycandan baxış") və "Müasir dünyada ali təhsil sistemində nələr baş verir və "2008-2012-ci illərdə Azərbaycan Respublikasının ali təhsil sistemində islahatlar üzrə Dövlət Proqramı necə olsa yaxşıdır?" adlı kitabları, orta əsrlər təhsil tarixi və fəlsəfəsi, təhsil və elmdə Şərq-Qərb əlaqələri-tarix və bu gün, təhsil sistemləri, təhsildə keyfiyyət, milli azlıqların müqayisəli təhsil problemləri və digər məsələlər üzrə tədqiqatları, müxtəlif ölkələrdə və dillərdə çap olunmuş çoxsaylı məqalələri, hesabatları, qəzet, radio və televiziya müsahibələri bir qayda olaraq mütəxəssislərin, qərarverənlərin və ümumiyyətlə, ictimaiyyətin diqqət mərkəzindədir...

(Davamı 6-cı səhifədə )

Ümumiyyətlə Hamlet Isaxanlı adı çəkiləndə o belə səciyyələndirilir: alim və ictimai xadim, fizika-riyaziyyat elmləri doktoru, professor, pedaqoq, şair, yazıçı və publisist, tərcüməçi, riyaziyyat, humanitar və sosial elmlər üzrə məqalə, kitab, dərslik və monoqrafiyalar müəllifi, Xəzər Universitetinin təsisçisi, Direktorlar və Qəyyumlar Şurasının sədri, Dünya məktəbinin həmtəsisçisi, naşir, və redaktor...

Biz burada Əli Rza Xələfli şəxsiyyəti ilə Hamlet İsaxanlı şəxsiyyətini müqayisə etmək fikrindən uzağıq, amma kimin kim haqqında söz, fikir demək səlahiyyəti ədəbi təsərüfatda və prosesdə mühüm amildir. Bu cəhətdən, yuxarıda qeyd etdiyim kimi hər iki ziyalı şəxsiyyəti çox müxtəlif tərəflərdən və məqamlrdan bir-birini tamamlayır... Blə ki, Əli Rza Xələfli müasir ədəbi prosesdə ən müxtəlif məqamlarda, məqamında nüfuzlu söz demək səlahiyyətinə malik ziyalılarımızdan biridir...

İndiyənə qədər Hamlet İsaxanlının həyat və fəaliyyəti müxtəlif müəlliflər tərəfindən yazılmış elmi, bədii və publisistik yazılarda, məqalə və kitablarda, sənət əsərlərində öz geniş əksini tapmışdır.

Məsələn, Fuad Tanrıverdiyevin 1997-cu ildə nəşr olunmuş "Hamlet İsaxanlı. Alim və qurucu ömrü" kitabında alimin həyat və fəaliyyəti hərtərəfli araşdırılmışdır. Knyaz Aslan və Vahid Ömərlinin 2005-ci ildə azərbaycan və rus dillərində dərc olunmuş "Bu dünyaya nə gətirdim...Hamlet İsayev (İsaxanlı" kitabında Hamlet İsaxanlının elmi və bədii-publisistik yaradıcılığının, ictimai fəaliyyətinin və təşkilati işlərinin qısa təsviri ilə yanaşı, müxtəlif ölkə və millətlərdən olan tanınmış elm, sənət və mədəniyyət xadimlərinin onun haqqında deyilmiş fikirləri də verilmişdir. Bunlarla yanaşı Azərbaycanda, ABŞ, Kanada, Rusiya, Türkiyə, Gürcüstan, İran, Hindistan, Çin, Estoniya və başqa ölkələrdə alim, yazıçı, şair və jurnalistlər onun barəsində çoxsaylı məqalələr yazıb dərc etdirmişlər.

Onun barəsində dünyanın onlarla ən nüfuzlu şəxsiyyətlərinin dediyi söz içərisindən ikisini seçmələyib təqdim edirəm:

Azərbaycan mədəniyyətinin, elmi fikrinin nüfuzlu nümayəndələrindən biri olan, tanınmış diplomat, “Azərbaycan Doplomatiya Akademiyasının prezidenti, professor Hafiz Paşayev, Azərbaycan Respublikasının ABŞ-dakı sabiq səfiri: «Hamlet müəllimin fəaliyyəti respublikamızın ictimaiyyətinə yaxşı bəllidir. Öz elmi işini riyaziyatçı kimi başlayıb, həmin sahədə dəyərli nəticələr əldə etdikdən sonra o, elm, təhsil, humanitar və ictimai sahələrdə daha geniş fəaliyyətə qoşulmuş və ölkəmizdə keçirilən islahatlar üçün əhəmiyyətli konkret işlər görmüşdür.

Professor Hamlet İsayev (İsaxanlı) elmin və təhsilin inkişafında sərhədsiz mübadilə və ünsiyyətin vacib olmasını hələ Sovet dövründə yaxşı dərk edib, Azərbaycan elminin xaricdə tanınması üçün əlindən gələni etmişdi. Həmin təcrübə, yaratdığı əlaqələr inanıram ki, hazırda Xəzər Universitetinin işlərində əvəzsizdir.

Onun Amerika universitetləri ilə birgə proqramlar üzrə müvəffəqiyyətlə apardığı işləri qeyd edərək, məmnuniyyətlə yada salıram ki, səfirliyimizin müdaxiləsi ilə ABŞ hökumətinin Azərbaycanda maliyyələşdirdiyi ilk təhsil layihəsi məhz Hamlet müəllimin yaratdığı və rəhbərlik etdiyi universitetlə bağlı olmuşdur».

Zəlimxan Yaqub, xalq şairi, millət vəkili: «Hamlet İsaxanlı - gözəl insan və böyük alim! Bu qün varlığıyla vətəninə bağlı əsil Azərbaycan vətəndaşı! Yüksək intellekt, böyük ağıl, güclü zəka, nadir istedad sahibi!

Təkcə Gürcüstan azərbaycanlılarının deyil, təkcə Azərbaycan Respublikasının deyil, dünya azərbaycanlılarının ən şöhrətli nümayəndələrindən biri!

Dünyanın bir çox ölkələrində Azərbaycan elminin şərəfini göylərə qaldıran, alın tərinə, əl qabarına, yuxusuz gecələrə arxalanan sadə və səmimi, ciddi və qayğıkeş, tələbkar və inadkar, namuslu elm fədaisi! Kökünə, nəslinə, torpağına, ədəbiyyatına, tarixinə, musiqisinə dərindən bələd olan, ömrünü elmi, bədii, siyasi, psixoloji, tarixi axtarışlara həsr edən bir neçə sahənin yorulmaz tədqiqatçısı! Dünyanın müxtəlif millətlərə və ölkələrə məxsus olan ən böyük alimlərini heyrətə gətirən Vətən oğlu!..”

Yeri gəlmişkən, onu da qeyd edim ki, şairlərdən Nəriman Həsənzadə, Hüseyn Kürdoğlu, Müzəffər Şükür, Şahin Fazil, Səadət Buta və başqaları Hamlet İsaxanlı şəxsiyyətinə xüsusi şeirlər həsr etmişlər. Onun elmi-bədii yaradıcılığı və şəxsiyyəti haqqında Azərbaycanda Camal Mustafayev, Manaf Süleymanov, Nurəddin Rzayev, Mövlud Süleymanlı, Mirabbas Qasımov, Vidadi Babanlı, Nəriman Həsənzadə, Zəlimxan Yaqub, Kamran Nəzirli, Xəlil Məcidoğlu, Vaqif Arzumanlı, Aydın Xan və digər müəlliflər, Türkiyədə Mətin Turan, Çində Van Dzen Bo, Rusiyada V. Odinets, Lyudmila Lavrova, İran, Gürcüstan və digər ölkələrdə müxtəlif elm və sənət adamları dəyərli fikirlər söyləmiş, məqalələr yazıb dərc etdirmişlər.

Şair, yazıçı və jurnalist, tədqiqatçı-publisist, "Kredo" qəzetinin baş redaktoru Əli Rza Xələflinin "Həyatın Dastanı: ədəbi-fəlsəfi düşüncələr” Hamlet İsaxanlının "Ziyarət" poemasının motivləri əsasında", "Xəzər Universitəsi Nəşriyyatı" (2012) kitabı isə Hamlet İsaxanlının poetik yaradıcılığına həsr olunmuş əsərlər arasında xüsusi, özü də deyərdim ki, əhəmiyyətli, siqlətli yer tutur (əsər əvvəlcə uzun zaman ərzində hissə-hissə "Kredo" qəzeti səhifələrində dərc olunmuşdu).

Bu kitab, Hamlet İsaxanlının təkcə bir poeması haqqında yazılsa da, Əli Rza Xələfli elə bir üslubi fənd tapır ki, bu fonda onun poetik yaradıcılığı, şəxsiyyəti, elmi-ictimai fəaliyyəti barədə müfəssəl təsəvvür yaradır. Həmçinin, müəllif - Əli Rza Xələfli “Həyatın Dastanı” kitabını bir şair fəhmi və bir tədqiqatçı təfəkkürü ilə yazdığından, Hamlet İsaxanlı poeziyasını müasir Azərbaycan poeziyasının faktı təkin götürmüş, bununla da ümumən müasir ədəbi proses haqqında da qənaətlərini və ədəbi-fəlsəfi düşüncələrini oxunaqlı, şirin-şairanə bir üslubda, müasir publisistikanın son imkanları çərçivəsində, hisslərini və fikirlərini yüksək səmimiyyətlə yoğuraraq ortaya qoymuşdur...

Əslində bu əsəri ilə Əli Rza Xələfli Hamlet İsaxanlını müasir şeirin xanı, poetik ruhun Məsihi kimi təqdim etmiş, onun bədii yaradıcılığının heç kəsin görmədiyi və ya görə bilmədiyi Hamlet fəlsəfəsini açmışdır... Və “Hamlet İsaxanlı kimdir?” sualına bədii-publisistik, fəlsəfi-estetik manerada cavablar axtararaq bu maraqlı şəxsiyyətin ədəbi-ictimai müstəvidə tutduğu yeri aşkarlamışdır...

Əli Rza Xələfli əsərinin əvvəlindəcə ədəbi niyyətini ortaya qoyaraq yazır: “H.İsaxanlı kimdir? Bu suala axıradək cavab vermək yəqin ki, müasirlərimiz üçün olduqca çətin olacaq. Buna görə də onun şəxsiyyətindən, bir müəllif olaraq yaradıcılıq dünyasından, ən başlıcası, onun elmi-bədii yaradıcılığından danışmaq məsuliyyət, ədəbi-elmi cəsarət tələb edir. Bizim qiymətləndirdiyimiz onun çox böyük mənəvi aləmi, şairlik dünyasıdır. O, ürəyi ilə, qəlbi ilə tənha qalmağı bacarır. İnsanın hisslərinə, arzularına, duyğularına qarşı durmuş olan dünyanın özü ilə üzbəüz danışmaq gücü və qüdrəti var Hamletin şeirlərində. Hamlet İsaxanlı poeziya tarixində nadir hisslərin ifadəsinə görə, yaşamaq haqqını qoruyub saxlaya biləcək.

H.İsaxanlının ictimai-fəlsəfi görüşlərini, insani məhəbbət duyğularını əks etdirən poetik örnəklərində biz onun mənəvi gücü ilə qarşılaşırıq. H.İsaxanlı şair olmaqdan başqa, rus, Avropa və dünya ədəbi-mənəvi mühitinin təlqin elədiyi əsas ideyanı, fəlsəfi mahiyyəti özünün yaradıcılığında, xüsusilə, poetik yaradıcılığında göstərən və təsdiq edən bir tədqiqatçıdır.”

Əli Rza Xələfli öz qələm dostu haqqında yüksək səmimiyyətlə, bir az da, deyərdim ki, vurğunluqla danışır, ona Azərbaycanın ədəbi-mənəvi tarixində yeri olan, yeri görünən poetik sözü ilə özünü diktə edən bir sənətkar səviyyəsində yanaşaraq əminliklə deyir: “H.İsaxanlı sözün övladıdır, elmin övladı olmaqdan əvvəl. Kövrək duyğularının tarixi nə zamandan başlamasından asılı olmayaraq, şeirin, poeziyanın övladıdır. ...Hamlet İsaxanlı hər sözü ilə, hər misrası ilə, auditoriya qarşısındakı çıxışları ilə, cəmiyyət içərisindəki görüşləri ilə bu dünyaya ancaq səmimiyyət gətirdiyini təsdiq edən ziyalıdır....Görəsən, səmimiyyətdən üstün daha bu dünyaya nə gətirmək olardı?

H.İsaxanlının poeziyasında lövhələr tez-tez dəyişir. O, bütün ruhu poeziyanın hakimiyyəti altında olan və bu hakimə özünü bütün varlığı ilə təslim edən istedadlı bir şairdir. Və heç şübhəsiz, heç vaxt H.İsaxanlının səmimiyyətini onun şairliyindən ayırmaq olmaz. Bəlkə də, onun şairliyinin və demək poeziyasının ən üstün məziyyətlərindən biri səmimiyyətdir - həyata, insanlara, eləcə də keçmişə və gələcəyə səmimiyyət. Oxucu, H. İsaxanlının ən azı hədsiz səmimiyyəti qarşısında qibtə hissi ilə düşünməli olur. Onun şeirləri insan qəlbinin dərinliklərindən süzülüb gəlir, duyğu ilə, hissiyyatla süzülüb gəlir...”

Bu cümlələri, fikirləri oxuduqca, adam Əli Rza Xələflinin özünün də səmimiyyətinə, dosta, qələm yoldaşına, əsirdaşına yanaşma səmimiyyətinə qibtə edir, onun səmimiyyətdən yoğrulmuş qəlbinin çırpıntılarını səmimiyyət mahnısıının not sədaları kimi eşidir... Bu sözlərin, bu duyğuların, belə bir münasibətin arxasında şübhəsiz ki, böyük ziyalı ürəyi, ziyalı mövqeyi, bütövləşmiş ziyalı dayanır.

Əli Rza Xələfli, bu əsərində də, şübhəsiz Hamlet İsaxanlı şəxsiyyəti ilə bahəm öz şəxsiyyətinin bütövlüyünü də ortaya qoymuş olur. Hamletin poezyasının oyatdığı duyğulardan irəli gələn hansısa fövqəltəbii qüvvənin təsiri ilə onu bir şair, bir yaradıcı kimi daxildən sıxan, ona əziyyət və əziyyət qədər də güc verən, sevindirən, sözün fəthindən qürurlanan hisslərini, ədəbi-estetik görüşlərini, ictimai-fəlsəfi düşüncələrini ifadə edir, bəzən fikrin improvizə dalğalarında uyarlı və tutarlı gəzişmələr aparır... Bütün bunlar Əli Rza Xələflinin “Həyatın Dastanı” kitabını, doğrudan da həyat haqıında, müasir dünyamız haqqında, müasir poeziyamız və ədəbi-bədii fikrimiz barəsində elmi-publisist üslubda yazılan dastana çevirir - həyat dastanına, həyatımızın dastanına!...

Əli Rza Xələflinin “Həytın Dastanı” əsərində belə bir məqam da diqqətimi cəlb elədi. O, Hamlet İsaxanlıya xitabən yazır: “Əzizim Hamlet müəllim, sizin zəngin yaradıcılığınız, hətta “Təzadlar” (2001), “Bu da bir həyatdı” (2004), “Dördlüklər” (2007), “Ziyarət” (2009) adı altında çap olunan kitablarınız bəs eləyir ki, biz haqqında danışa bilək. Mən ayrı-ayrı misraları oxuduqca sizin insan hisslərinin rənga¬rəng xəritəsində ən ecazkar, bəlkə də, ekzotik ərazilər zonası olaraq təsvir elədiyiniz məqamları gözümün önünə gətirirəm və həmin anlarda düşünürəm ki, insan hisslərinin bu qeyri-adiliklərini ancaq şair görə bilər.”

Çox doğru, düzgün, özü də elmi-psixoloji müşahidədir! Elmi, publisistik yaradıcılıqda da belədir. Bədii təfəkkür sahibləri bədiyyatı daha dolğun, daha dürüst duya və qiymətləndirə bilərlər. Bu mənada şair-publisist Əli Rza Xələfli, Əli Rza Zal oğlu şair - publisist, alim-riyaziyyatçı Hamlet İsaxanlını, Qaçaq İsaxanın şair nəvəsini doğru-dürüst anlaya bilər, onun heç kəsin görmədiyi, daha doğrusu görə bilmədiyi tərəflərini görüb, qədrini-qiymətini bilə bilər! Ancaq şair şairin qəlbinin pünhanlarına, gizlinlərinə bu qədər mərhəmliklə əl apara bilər ki, biz bunu Əli Rza Xələflinin “Həyatın Dastanı” bədii-publisisistik üslubda yazdığı fəlsəfi-estetik traktaktının hər fəslində, hətta fəsillərin başlıqlarında belə müşahidə etdik. “Kövrək sözün işığında”, "Bitik"lər nəsillərə ünvandır”, “Göynəyin köynəyində”, "Obrazın məntiqi - həyatın mənası”, "Yurda könül ziyarəti”, “Söz var, kimsəyə deyilməz”, "Yaşamağın vətəndaşlıq mahiyyəti”, “Səsin işığı”, "Poeziya - ruhun zərrələri”, "Çiçəklər önündə təzim”, “Bənzərsiz anların poeziyası”, "Aristarxlara cavab”, “Həyatdakı həqiqət - yuxudakı səadət”, "Dedal və İkar əfsanəsi”, “Hamlet - olum-ölüm arasında”, “Yaddaş simfoniyası - son akkordlar” təkin başlıqların hərəsi bir şeir misrasını, hərəsi bir fəlsəfi postulatı xatırladır və deyim ki, gəlişigözəl ifadələr deyil, fəsllərdəki məna və mahiyyətə, qoyulan problemə, məzmuna tamamilə uyar, Hamlet İsaxanlı poeziyasının kod açarına çevrilən başlıqlardır və oxucunu məcbur edir ki, oxu, gör bu başlıqların arxasında hansı mətləblər, mənalar gizlənibdir...

Həmçinin, kitabın bu cür mənalı, təsirli mündərəcatı başlanğıcdaca oxucunu müəllifin - avtorun düşüncə və ruh aləminə salır! Oxucu hiss edir ki, qeyri-adi, bənzərsiz, filosof və şair düşüncəli zövqü yüksək məqamda olan bir qələm sahibi ilə həmsöhbət olacaq. Və belə də olur!..

Əli Rza Xələflinin təhlilləri zərif, şərhləri mənlı, izahları inandırıcıdır. O, Hamlet İsaxanlının poetik üslububnda müşahidə etdiyi elə məqamlara toxunur ki, bunlar onun yaradıcılığının mahiyyətindən irəli gəlir. Məlumdur ki, Hamlet İsaxanlı mənalı dördlüklər, bayatılar müəllifidir və bu onun poetik stixiyasında əsas yerlərdəndir. Əli Rza bu stixiyanı onun epik-lirik “Ziyarət” poemasında da aşkara çıxararaq belə mənalandırır: “H.İsaxanlının poeziyasında onu fərdiləşdirən, onun poeziyasını müasir şeiriyyətin boz-bulanıq axınından fərqləndirən bir cəhəti mütləq qeyd etmək lazımdır. Bu, bir bayatı ovqatıdır.

Müəllif anasına ismarıc elədiyi mahnısını “Gedin, deyin anama” şəklində oxuyur. Nə qədər gözəldir, nə qədər ritmikdir, nə qədər kədərli bir mahnıdır! Şairin bütün varlığını özündə ehtiva edən bu mahnı-oxşama, bu nəğmə-bayatı sanki xalqın min illər boyu ruhundan gələn, varlığına hopmuş olan, az qala onun özüylə əbədiyyətəcən yoldaşlıq edəcək bir kədərin səsidir. Bundan o yanası yoxdur.”

Beləliklə, elə bu tərzdə Əli Rza Xələfli Hamlet İsaxanlının şeiriyyət aləminin söz, ritm vəanəng qovuşuğunun sirli əlaqələrini sərrafcasına aşkarlayır, üzə çıxarır, bu harmoniyanın mahiyyətini izah edir, Hamlet İsaxanlının poetik üslubunu şərtləndirən lirik hissin ahəngdar təhkiyyə siferasına nüfuz edir:

“Poeziya, nəzm və adi şeirdən fərqli olaraq daha çox fəlsəfi ümumiləşdirmədir. Poeziyada bənzərsizlik və təkrarsızlıq var. H.İsaxanlı da özünün səmimiyyətilə müşayiət olunan şeirlərində daha çox poetik ruhun daşıyıcısı kimi görünür. Onun “Ziyarət” poemasındakı əhval adi bir adamın, sıradan bir nəfərin əhvalı deyil. Onu oxuyan hər kəs özündən xəbəri olmadan, özünü o yerin adamı bilir, özünü elə orada bilir. Nə vaxtsa, hardasa bir qərib diyarda keçirdiyi hissləri yada salır.

H.İsaxanlı istər şeirlərində, istərsə də “Ziyarət” poemasında sözü, fikri qafiyə xatirinə divana çəkmir. Elə təbii axarla öz ritmində ifadə edir. O, daxilində olan ritmi formaya tabe etməyə cəhd göstərmir. Sanki onun başlıca bir prinsipi var - səmimiyyəti qorumaq. Onun daxili aləmində səslənən simfoniya ağır-ağır, təmkinlə, kədərqarışıq bir ovqatla, necə varsa, eləcə də üzə çıxır. Daxili aləmindəki sarsıntılar, psixoloji gərginliklər onun misralarında açıq-aşkar duyulur. Bəzən bu fəryad şəklində, bəzən də həyatın xoş üzündən ruhlanan, həyat eşqilə alışan bir ürəyin çırpıntıları şəklində...”

(Davamı 8-ci səhifədə)

(Əvvəli 6-cı səhifədə)

Əslində, Əli Rza Xələflinin qələmə aldığı “Həyatın Dastanı” əsəri də həyat eşqi ilə alışan bir ürəyin çırpıntılarıdır, onun mənəvi aləmindəki fırtınaların, təlatümlərin əks-sədasıdır. Əli Rza Hamletin lirik qəhramanına məxsus olan cizgiləri açdıqca, proyeksiya etdikcə onun özü də bir lirik qəhrəmana çevrilir, Hamletin lirik qəhrəmanına “Yaddaş Sahibi” adını verərək özü də sözün sahibinə çevrilir, onun əlindən tutub Yurd, Vətən, Torpaq adlandırdığımız mehraba doğru ziyarətə apararaq belə bir qənaəti ifadə edir:

“Zənnimcə, insanın mənəvi pasportu onun mənəvi dünyasını təsdiq edən ən dəyərli sənəd, ən tutarlı şəxsiyyət vəsiqəsi onun kövrək duyğularını ifadə elədiyi sözdə öz əksini tapır. Söz insanın rişəsidir. İnsan danışanda onun kökünü hansı torpaqda bitdiyini, hansı mənəvi münbitlik üstündə boy göstərdiyini təsəvvür etmək olur. Təsadüfi demirlər ki, insan doğulduğu yerə, yurda, torpağa, təbiətə daha çox oxşayır.” Hamlet İsaxanlı Əli Rza Xələflinin zənnində, qələmində yurduna, torpaqına, doğulduğu yerin təbiətinə oxşayan bir obraz kimi canlandırılır və bu cür də təqdim olunur... Bütün istedadlı şairlər kimi, Hamlet İsaxanlının şairlik mahiyyətini, şairlik kübarlığını da bu oxşarlıqda görür... Və müəllif doğru olaraq bu versiyanı irəli sürür ki, Hamle İsaanlı yurd yerlərini gəzə-gəzə ozanlıq edir və ozanlaşa-ozanlaşa Hamlet özü də Yurd atasına çevrilir:

“Məlumdur ki, "Ziyarət"də insan özünü ruhi-mənəvi aləmdə hiss edir. Demək olar ki, müəyyən mənada, gerçəklikdən təcrid olunur. Özünə qapanma, hətta yaşını unutma, həmin yerlərdəki yaşın çağlarına qayıtma burada əsas şərtdir. Həmin o erkən yaşlarından dünya işığını ona qaytaran şəffaf eynəyinin arxasından boylanan gənc - əslində, eynəkli adam - o adam ki, indi kifayət qədər ömür yolu keçmiş, həyatın ağırlıqlarını çiyinlərində duyan bir ziyalı özü yurd atasına çevrilib.”

“Yurd atasına” çevrilən ozan-şairin “Ziyarət” poeması da özü kimi rişəsiz, köksüz, ənənəsiz deyil. Əli Rza Xələfli tədqiqatçı fəhmi ilə, onu ulu Şəhriyarın “Heydərbabaya salam kitabxanası”na ən dəyərli hədiyyə hesab edərək, “Ziyarət”i üslubca, ritm və havacatla olmasa da, (bu Hamlet İsaxanlının ustalığıdır) ruhca onun “Şəhriyar düsturu”ndan istifadə etdiyini bildirir, onu bu sıradan yazılmış dəyərli ədəbi-bədii fakt təkin qiymətləndirir:

“Şəhriyar düsturu ilə, Heydərbaba ruhu ilə yazılmış əsərlərin dəqiq sayını bu gün bilən yoxdur. İraqdan Əlbüllətif Bəndəroğlu və onun "Yurt" dərgisi ətrafında birləşən çoxlu sənətkarlar "Heydərbabaya salam" poemasına nəzirələr yazmışlar. Cənubi Azərbaycanda da şairlər onun səsinə çox böyük hiss və duyğu ilə cavab vermişlər.

“Bu günə qədər Cənubi Qafqaz əhatəsində olan azərbaycanlı şairlər də "Heydərbabaya salam" kitabxanasına özlərinin zəngin töhfələrini vermişlər. Çox böyük məmnunluq hissi ilə qeyd edərdim ki, bu sətirlərin müəllifi olaraq mən də "Bir Xələfli var imiş" adlı əsərimlə o möhtəşəm "salam" qarşısında mənəvi borcumu verməyə çalışmışam. Təəssüflə bunu da deməliyəm; Şəhriyar düsturundan istifadə ilə yazılmış "qrafoman" əsərlər də az deyil. Bunu da təbii qəbul etmək lazımdır. Hər kəs yaddaş fenomeninin ecazkar sarayına özünün istedadı, düşüncəsi və təxəyyülünün imkan verdiyigüclə daxil olur. Son vaxtlar yaddaş fenomeninin təsiri altında yazılmış Şəhriyar ənənəsini yalnız mənəvi olaraq qəbul edib özünün original forması ilə diqqəti çəkən çox maraqlı əsərlər yaranmaqdadır. Xalq şairi Nəriman Həsənzadənin "Poylu beşiyim mənim" eposu, Hafiz Rüstəmin "Bakıdan Yardımlıya səyahət" yaddaş poeması, bu sıradan heç şübhəsiz, çox dəyərli yerlərdən birini tutan H.İsaxanlının "Ziyarət" poeması ədəbi-bədii dəyərinə, "sağlam-estetik əsaslarına" görə yaşarılıq haqqı qazanacaq, zamanzaman müəllifinə şöhrət qazandıracaq əsərlərdəndir.”

Mənə elə gəlir ki, müəllifin bu müqayisələri, “Heydərbaba kitabxanası” və “Şəhriyar düsturu” onun bir tədqiqatçı kimi tapıntısıdır və ədəbiyyatşünaslıqda tamamilə yeni anlayışlardır.

Onun yeni yazı manerası da diqqətimi çəkdi. Əli Rza söz arası söz deyir! Poeziyada “lirik ricət” anlamı var. Elə bil ki, bu anlama uyğun olaraq Əli Rza publisistik ricətlər edir, sözə əriş-arğac qatır, təzə-tər ilmələr artırır... Ümumiyyətlə, Əli Rzanın bu əsəri publisist ricətlərlə, elmi monoloqlarla, fikri imrovizələrlə süslənmiş, yeni üslubda yazılan monoqrafik tədqiqat əsəridir...

Son olaraq qeyd edim ki, Əli Rza Xələflinin “Həyatın Dastanı” ədəbi-fəlsəfi düşüncələr əsəri Hamlet İsaxanlının “Ziyarət” poemasının motivləri əsasında yazılsa da, müasir poeziyamızın, ədəbi-estetik düşüncəmizin bir sıra problemlərini əhatə edən kompleks səciyyəli əsərdir. Onun bu kitabı Hamlet İsaxanlının “Ziyarət”i kimi yurda bağlılığın, yurda can atmağın, yurda qovuşmağın, yurdu qorumağın, ona həyan olmağın, onun yalnız özünün başa düşə biləcəyi bir dildə dərdlərini danışmağın elmi-publisistik üslubda yazılmış könül “Ziyarət”idir. Hamlet İsaxanlı da, Əli Rza Xələfli də ruh adamıdırlar. Bu iki tanınmış ziyalının ruh qovuşuğu öz gözəl nəticəsini, bəhrəsini vermiş, Kürlə Arazın qovuşuğu təkin bollu-bəhərli olmuş, müasir fikir dünyamızı, ruh dünyamızı zənginləşdirmişlər...

Əli Rza Xələflinin “Həyatın Dastanı” əsəri Hamlet İsaxanlının “Ziyarət” poemas təkin bir poema şirinliyində yazılmış, inandırıcı elmi arqumentlərə söykənərək qələmə alınmış və oxunduqca fikri və ruhu, yaddaşı təzələyir, emosiyaları artırır, oxucunun köksünü qabardır, oxucunun özünün oxşar duyğularını tərpədib oyadır, silkələyir, ona indiyə qədər yadına salmadığı, düşüncələrində təzələmədiyi duyğuları oyadır, əzan-cümlə qəhrəmanını - Hamlet İsaxanlını oxucularına sevdirir...



Əli Rza Xələflinin “Həyatın Dastanı” əsəri ədəbi-elmi dəyərinə, sağlam-estetik əsaslarına, təfəkkür dərinliyinə, sağlam təxəyyül zənginliyinə görə müasir poeziyaşünaslığımza və əlbəttə ki, müəllifinə şöhrət qazandıracaq əsərlərdəndir.

05 may - 06 iyun, 2013


Verilənlər bazası müəlliflik hüququ ilə müdafiə olunur ©azkurs.org 2016
rəhbərliyinə müraciət

    Ana səhifə