Umumiy guruh boʻlib ishlash – frontal mashgʻulot boʻlib, unga nutq, oʻqish va yozish malakalarini rivojlantirish, elementar matematika; savodxonlikka oʻrgatish; xorijiy til; jismoniy tarbiya; musiqa faoliyatlari hamda xoreografiya mashgʻulotlari kiradi. Tarbiyachi tomonidan mutaxassislar bilan kelishgan holda, ushbu frontal mashgʻulotlarni olib borish vaqti ishlab chiqiladi va 1-chi pedagogik kengash qarori bilan tasdiqlanadi.
Markazlardagi faoliyatlar –taʼlim faoliyati mavzuli rejalashtirish asosida tashkil etilib, har bir yosh guruhlari uchun alohida oy va hafta mavzulari aks ettiriladi hamda beshta rivojlantirish markazlarida taʼlimiy faoliyat turlari tashkil etiladi:
●Qurish-yasash, konstruksiyalash va matematika markazi; ●Syujetli-rolli oʻyinlar va sahnalashtirish markazi; ●Til va nutq markazi; ●Fan va tabiat markazi; ●Sanʼat markazi. Namunaviy rejalashtirish berilgan markazlardagi faoliyatlarga, hudud (shahar)larning ichki imkoniyatlarini inobatga olib yoki ijodiy yondoshgan holda (asosiy oy mavzusidan chiqib ketilmaydi) oʻzgartirish va qoʻshimchalar kiritilganda markazlardagi faoliyat ish daftarida qayd etiladi.
Ish jurnalining sayr boʻlimi 5 qismdan iborat.
Kuzatish – ikki turdan iborat boʻlib, jonli va jonsiz tabiatni kuzatadi. Obyektga mos boʻlgan mehnat turini tanlashi kerak (oʻz-oʻziga hizmat, xoʻjalik-maishiy mehnat, tabiatdagi mehnat, qoʻl mehnati (katta va tayyorlov guruhlarda oʻtkaziladi).
Mehnat - ushbu qismda tarbiyachi maydonchada olib borilishi mumkin boʻlgan bolalarning yoshiga mos mehnat turlarini tanlaydi. Maydonchaga chiqishda albatta mehnat qurollarini ham olib chiqish maqsadga muvofiqdir.
Harakatli oʻyin –jismoniy tarbiya yoʻriqchisi tomonidan oʻrgatilgan yangi harakatlarni mustahkamlashga qaratilgan boʻlib, asosan 1 ta harakatli oʻyin rejalashtiriladi va qayd etiladi.
Asosiy harakat turlarini mustahkamlash – ushbu qism barcha bolalar uchun emas balki, ayrim sakrash, yugurish, tirmashib chiqish, uloqtirish, irgʻitish, turli usullarda yurishda kamchiliklar boʻlgan bolalar bilan olib boriladi va qaysi harakat mustahkamlanishi kerak bo’lsa o’sha harakat qayd etiladi va mustahkamlanadi.
