Ma’muriy amaliyotni tashkil etish fanining taqsimlanishi dasturning mazmuni

2.Soliq to’g’risidagi qonunlarning buzilishiga doir ma’muriy ishlarni ko’rib chiqishni tashkil etish.
Soliq xizmati organlarining tekshirish va nazorat qilish qonun hujjati bilan zimmasiga yuklatilgan mansabdor shaxsi yuridik va jismoniy shaxslar ustidan soliq nazoratini amalga oshirish chog’ida, shuningdek tekshiruv materiallarining ko’rib chiqilishida ma’muriy huquqbuzarlik alomatlari aniqlanganda, soliq to’g’risidagi qonunlarni buzgan shaxs(lar)ga nisbatan ma’muriy bayonnoma tuzadi.
Ma’muriy huquqbuzarlik to’g’risidagi bayonnomada quyidagi ma’lumotlar ko’rsatiladi:
Bayonnoma tuzilgan sana, vaqt va joy, bayonnomani tuzgan xodimning lavozimi, familiyasi, ismi, otasining ismi;
huquqbuzarlik sodir etilgan joyi va vaqti;
huquqbuzarning familiyasi, ismi, otasining ismi, tug’ilgan yili, oyi, kuni, yashash joyi, ish joyi va mansabi, oilaviy ahvoli, fuqaroligi (ushbu ma’lumotlar huquqbuzarning shaxsini tasdiqlovchi hujjatlari asosida to’ldiriladi. Agarda bayonnoma tuzilganda huquqbuzarda tegishli hujjatlar bo’lmasa, qayd etilgan ma’lumotlar uning so’zidan yoziladi va bu haqida bayonnomada ko’rsatiladi. Keyinchalik esa ichki ishlar idoralari orqali tekshiriladi);
huquqbuzarlikning mohiyati, soliq to’g’risidagi qonun hujjatlarining tegishli normasiga havola etilgan holdagi mufassal tavsifi, hisoblangan yoki ortiqcha to’langan soliq va boshqa majburiy to’lovlar, shuningdek huquqbuzarlik tufayli yetkazilgan moddiy zarar summasi;
sodir etilgan huquqbuzarlik uchun javobgarlikni nazarda tutuvchi O’zbekiston Respublikasi Ma’muriy javobgarlik to’g’risidagi Kodeksining moddasi, qismi;
agar guvohlar yoki xolislar va jabrlanuvchilar bo’lsa, ularning familiyalari va yashash manzillari;
huquqbuzarning tushuntirishi (alohida ilova qilinishi ham mumkin);
ishni hal qilish uchun zarur bo’lgan boshqa ma’lumotlar.
Bayonnoma uni tuzgan va ma’muriy huquqbuzarlik sodir etgan shaxslar tomonidan imzolanadi, guvohlar, xolislar va jabrlanuvchilar bo’lgan taqdirda esa bayonnoma ular tomonidan ham imzolanadi.
Huquqbuzarlik sodir etgan shaxs bayonnomani imzolashdan bosh tortgan takdirda bayonnomaga bu haqda uni tuzgan shaxs tomonidan yozib qo’yiladi. Huquqbuzarlik sodir etgan shaxs bayonnomaning mazmuni yuzasidan bayonnomaga o’z fikr-mulohazalarini yozib qo’yishga, shuningdek mazkur bayonnomaga imzo chekishdan bosh tortish sabablarini bayon etishga haklidir.
Bayonnomani tuzish vaqtida huquqbuzarga Ma’muriy javobgarlik to’g’risidagi kodeksning 294-moddasida ko’rsatilgan huquq va burchlari tushuntirilib, bu haqda bayonnomaga yozib qo’yiladi.
Aynan bir huquqbuzarlik bir necha shaxs tomonidan sodir etilgan bo’lsa, bayonnoma har bir huquqbuzar uchun alohida tuzilishiga e’tibor berilishi kerak.
Ma’muriy huquqbuzarlik to’g’risidagi ishni ko’rib chiqilishi boshqa vakolatli organga taalluqli bo’lsa, ma’muriy huquqbuzarlik to’g’risidagi bayonnoma boshqa hujjatlar va ish bo’yicha ashyoviy dalillar bilan birga, tekshiruvni amalga oshirgan yoki huquqbuzarlarga oid hujjatlarni rasmiylashtirgan xodim tomonidan bir sutkadan kechiktirilmay vakolatli organ (sud, ichki ishlar, bojxona xizmati va h.k.)ga yuboriladi.
Shaxs bir necha ma’muriy huquqbuzarliklar sodir etgan bo’lib, shulardan birortasining sudga taalluqliligi aniqlangan taqdirda, ma’muriy huquqbuzarlik to’g’risidagi ishlar sudga yuboriladi.
O’zbekiston Respublikasi Ma’muriy javobgarlik to’g’risidagi Kodeksi 164-moddasining birinchi va to’rtinchi qismlarida, 168, 171-moddalarida, 172, 174-moddalarida, 175-moddasining birinchi, ikkinchi, uchinchi, to’rtinchi, oltinchi va yettinchi qismlarida, 175⁴-moddasida, 176-moddasining birinchi qismida, 176², 179¹-moddalarida 186¹-moddasida (aksiz markasi bilan markalanmagan tovarlar qonunga xilof ravishda ishlab chiqarilgan yoki muomalaga kiritilgan hollarda), 215³-moddasida nazarda tutilgan ma’muriy huquqbuzarliklar to’g’risidagi ishlar davlat soliq xizmati organlarining boshliqlari va ularning o’rinbosarlari tomonidan ko’rib chiqiladi.
Ma’muriy huquqbuzarlik to’g’risidagi ishlar huquqbuzarlik sodir etilgan joyda ko’rib chiqiladi.
Ma’muriy huquqbuzarlik to’g’risidagi ish mazkur ishni ko’rib chiqishga vakolatli organ (mansabdor shaxs) tomonidan ma’muriy huquqbuzarlik to’g’risidagi bayonnoma va ishga oid boshqa materiallar olingan kundan boshlab o’n besh kunlik muddat ichida ko’rib chiqiladi.
Ma’muriy jazo huquqbuzarlik sodir etilgan kundan boshlab, davom etayotgan huquqbuzarlik uchun esa huquqbuzarlik aniqlangan kundan boshlab ikki oydan kechiktirmay qo’llanilishi mumkin.
Jinoyat ishini qo’zg’atish rad etilgan yoki jinoyat ishi tugatilgan

bo’lsa-yu, lekin huquqbuzarning harakatlarida ma’muriy huquqbuzarlik alomatlari mavjud bo’lsa, ma’muriy jazo chorasi jinoyat ishini qo’zg’atishni rad etish yoki jinoyat ishini tugatish to’g’risida qaror qabul qilingan kundan boshlab bir oydan kechiktirmay qo’llanilishi mumkin.

Ma’muriy huquqbuzarlik to’g’risidagi ishlarni ko’rib chiqishga vakolati bo’lgan mansabdor shaxslar o’zlariga berilgan vakolatlar doirasida va faqat xizmat burchlarini bajarib turgan paytlardagina qonunlarda nazarda tutilgan ma’muriy jazolarni qo’llashlari mumkin.
Ma’muriy huquqbuzarlik to’g’risidagi ish ma’muriy javobgarlikka tortilayotgan shaxs ishtirokida ko’rib chiqiladi.
Ishni ko’rib chiquvchi mansabdor shaxs ma’muriy hujjatlarni olgandan so’ng huquqbuzarga ishni qachon va qaerda ko’rilishi haqida xabarnoma yuboradi. Huquqbuzarni ish qachon va qaerda ko’rib chiqilishidan o’z vaqtida xabardor etilganligi haqida ma’lumotlar bo’lganda, undan ishni ko’rib chiqishni kechiktirish haqida iltimosnoma tushmagan taqdirda ish uning ishtirokisiz ko’rib chiqilishi mumkin.
Ma’muriy huquqbuzarlik to’g’risidagi ishni ko’rib chiqish paytida davlat soliq xizmati organi rahbari yoki uning o’rinbosari huquqbuzarlik holatida jinoyat alomatlari bor degan xulosaga kelsa, hujjatlarni surishtiruvchiga topshiradi yoki prokurorga yuboradi.
Davlat soliq xizmati organi rahbari yoki uning o’rinbosari ma’muriy huquqbuzarlik to’g’risidagi ishni ko’rib chiqib, quyidagi qarorlardan birini qabul qiladi:
ma’muriy jazo qo’llanish to’g’risida;
ishni yuritishni tugatish to’g’risida.
Ma’muriy huquqbuzarlik to’g’risidagi ish yuzasidan chiqarilgan qarorda O’zbekiston Respublikasi Ma’muriy javobgarlik to’g’risidagi kodeksning 309-moddasi talablariga muvofiq, quyidagilar ko’rsatilgan bo’lishi lozim:
qaror chiqargan organ (mansabdor shaxs)ning nomi;
ish ko’rib chiqilgan sana;
ish ko’rib chiqilayotgan shaxs xususidagi ma’lumotlar;
ishni ko’rib chiqish paytida aniqlangan holatlarning bayoni;
mazkur ma’muriy huquqbuzarlik uchun javobgarlikni nazarda tutuvchi normativ hujjat;
ish yuzasidan qabul qilingan qaror.
Basharti ish yuzasidan ashyolar va hujjatlar olib qo’yilgan bo’lsa, ma’muriy huquqbuzarlik to’g’risidagi ish yuzasidan chiqarilgan qarorda ularning masalasi ham hal etilgan bo’lishi lozim.
Agarda bir shaxs ikki yoki undan ortiq huquqbuzarlik sodir etgan bo’lsa, ma’muriy jazo Ma’muriy javobgarlik to’g’risidagi kodeksning 34-moddasiga muvofiq har bir huquqbuzarlik uchun alohida-alohida (har bir huquqbuzarlik uchun MJTKning belgilangan moddasi, qismi, jarima miqdori alohida ko’rsatilgan holda) qo’llaniladi, qo’llaniladigan uzil-kesil jazo og’irroq ma’muriy jazoni nazarda tutuvchi sanksiya doirasida belgilanadi.
Quyidagi holatlar mavjud bo’lgan taqdirda ma’muriy huquqbuzarlik to’g’risidagi ishlarni yuritishni boshlash mumkin emas, boshlangan ish esa tugatilishi lozim:
ma’muriy huquqbuzarlik hodisasi yoki alomati yo’q bo’lsa;
huquqbuzarlikni sodir etish paytida shaxs o’n olti yoshga to’lmagan bo’lsa;
huquqbuzarlikni sodir etgan shaxs aqli noraso bo’lsa;
huquqbuzarlik zaruriy mudofaa holatida yoki ohirgi zarurat holatida sodir etilgan bo’lsa;
amnistiya akti chiqishi, agar u ma’muriy jazo chorasini qo’llanishni bekor qilsa;
ma’muriy javobgarlikni belgilovchi hujjat bekor qilingan bo’lsa;
huquqbuzarlik to’g’risidagi ishni ko’rib chiqish paytiga kelib O’zbekiston Respublikasi Ma’muriy javobgarlik to’g’risidagi kodeksining 36-moddasida nazarda tutilgan muddatlar o’tib ketgan bo’lsa;
ma’muriy javobgarlikka tortilayotgan shaxs xususida shu fakt yuzasidan ma’muriy jazo qo’llanish to’g’risidagi vakolatli organ (mansabdor shaxs) qaror chiqargan bo’lsa yoki ma’muriy huquqbuzarlik to’g’risidagi ishlarni tugatish to’g’risida chiqarilgan qaror bekor qilinmagan bo’lsa, shuningdek mazkur fakt yuzasidan jinoyat to’g’risidagi ish qo’zg’atilgan bo’lsa;
shaxs ishi yuritila boshlagan paytda vafot etgan bo’lsa.
Ma’muriy huquqbuzarlik to’g’risidagi ish yuzasidan chiqarilgan qaror ishni ko’rib chiqish tugashi bilanoq darhol e’lon qilinadi. Qarorning nusxasi uch kun ichida ustidan shu qaror chiqarilgan shaxsga topshiriladi yoki jo’natiladi. Qarorning nusxasi tilxat bilan beriladi.
Jarima huquqbuzar tomonidan unga jarima solish to’g’risidagi qaror topshirilgan kundan boshlab o’n besh kundan kechiktirmay to’lanishi lozim.
Huquqbuzar jarimani belgilangan o’n besh kunlik muddat ichida to’lamagan taqdirda, jarima solish to’g’risidagi qaror qonun hujjatlarida belgilab qo’yilgan qoidalarga muvofiq jarimani majburiy tartibda undirib olish uchun sud ijrochilariga yuboriladi.
Basharti ma’muriy jazo qo’llash to’g’risidagi qaror qabul qilingan kundan boshlab uch oy davomida ijro etishga qaratilmagan bo’lsa, u holda bunday qaror ijro etilmaydi. Ma’muriy javobgarlik to’g’risidagi kodeksning 318, 328-moddalariga muvofiq qaror ijrosi to’xtatib turilgan yoki kechiktirilgan muddat hisobga olinmaydi.
Ishni ko’rib chiqish jarayonida ma’muriy huquqbuzarliklar sodir etish sabablari va ularga olib kelgan shart-sharoitlar aniqlanganda, ularni bartaraf qilish yuzasidan choralar ko’rish to’g’risida tegishli korxona, muassasa, tashkilot rahbariga taqdimnoma kiritiladi.
Ma’muriy jarima undirilgandan va taqdimnomaga javob olingandan (agarda taqdimnoma kiritilgan bo’lsa) so’ng ma’muriy ish yurituvi yakunlangan hisoblanadi.