Ma’muriy amaliyotni tashkil etish fanining taqsimlanishi dasturning mazmuni

1.Soliqlar va boshqa majburiy to’lovlarni to’lash muddatlarini buzganlik uchun ma’muriy javobgarlik choralarini qo’llash.
O’zbekiston Respublikasi Soliq kodeksining 59-moddasiga muvofiq, soliqlar va boshqa majburiy to’lovlarni to’lash bo’yicha bajarilmagan majburiyatlari bo’lgan soliq to’lovchi o’zining bank hisobvarag’ida pul mablag’lari mavjud bo’lishidan qat’i nazar, soliqlar va boshqa majburiy to’lovlarni Soliq kodeksida belgilangan to’lash muddatidan kechiktirmay ularni xizmat ko’rsatayotgan bankka to’lash uchun to’lov topshiriqnomasini taqdim etishi shart.
O’zbekiston Respublikasi Ma’muriy javobgarlik to’g’risidagi kodeksining 175-moddasi uchinchi qismiga muvofiq, to’lov intizomini buzish, shu jumladan korxonalarning hisobvaraqlarida tegishli mablag’lar bo’lgan holda to’lovlarni amalga oshirishning belgilangan muddatlarini buzish, mansabdor shaxslarga eng kam ish haqining o’n baravaridan o’n besh baravarigacha miqdorda jarima solishga sabab bo’ladi.
Soliqlar va boshqa majburiy to’lovlarni to’lash muddatlarini buzish bilan bog’liq soliqqa oid huquqbuzarlikni aniqlash va ularga barham berish davlat soliq xizmati organlari tomonidan soliq nazoratining budjetga va davlat maqsadli jamg’armalariga tushumlarni hisobga olish shaklida amalga oshiriladi.
Tuman (shahar) davlat soliq inspeksiyalarining “Soliq va majburiy to’lovlar tushumini hisobga olish, tahlil qilish, ma’lumotlar bazasiga xizmat ko’rsatish” bo’limi mansabdor shaxslari:
korxonalarning hisobvaraqlarida tegishli mablag’lar bo’lgan holda soliqlar va boshqa majburiy to’lovlarni Soliq kodeksida belgilangan to’lash muddatida ularni xizmat ko’rsatayotgan bankka to’lash uchun to’lov topshiriqnomasi taqdim etilmaganda;
korxonalarning soliq qarzini undirish davlat soliq xizmati organining inkasso topshiriqnomasi orqali amalga oshirilganda ularning rahbarlari va bosh hisobchilariga nisbatan ma’muriy huquqbuzarlik to’g’risida bayonnoma tuzadi.
2.Soliq tekshiruvlari chog’ida aniqlangan huquqbuzarliklar uchun ma’muriy javobgarlik choralarini qo’llash.
Rejali soliq tekshiruvlari nazorat qiluvchi organlar faoliyatini muvofiqlashtiruvchi Kengash tomonidan tasdiqlangan rejalar asosida o’tkaziladi. Davlat soliq xizmati organlariga xo’jalik yurituvchi subyekt tomonidan qonunlar va boshqa qonun hujjatlarining buzilganligi to’g’risida qo’shimcha ma’lumotlar kelib tushganda rejadan tashqari soliq tekshiruvlari amalga oshiriladi. Qo’shimcha ma’lumotlar sifatida korxonalar, tashkilotlar, muassasalar va fuqarolarning aniq isbotlangan va hujjatlar bilan tasdiqlangan qonunbuzilish faktlari xizmat qilishi mumkin.
Tekshirishlar, shu jumladan, nazorat tekshirishlari va taftishlar natijalari dalolatnoma bilan, zarur hollarda esa aniqlangan kamchiliklarni bartaraf etish to’g’risidagi ko’rsatma bilan ham rasmiylashtiriladi. Ko’rsatib o’tilgan hujjatlarning bir nusxasi majburiy tartibda tekshirish obyektida qoladi.
Dalolatnoma va ko’rsatmalarni rasmiylashtirish qonun hujjatlari bilan belgilangan tartibda amalga oshiriladi.
Moliyaviy buzilishlar, shuningdek, suiiste’molliklar, o’g’irliklar aniqlangan hollarda, yetkazilgan zararlarning miqdoriga qarab, aybdor shaxslar belgilangan ma’muriy javobgarlikka tortiladilar yoki tekshirishlar materiallari o’n kun muddatda tergov organlariga oshiriladi.