Mavzu. Yuridik shaxslardan olinadigan foyda solig’i. Reja

Mavzu. Yuridik shaxslardan olinadigan foyda solig’i. Reja

Mavzu. Yuridik shaxslardan olinadigan foyda solig’i.

Reja:
1.Yuridik shaxslardan olinadigan foyda solig‘ining iqtisodiy mohiyati. Iqtisodiyotni modernizatsiyalash sharoitida yuridik shaxslardan undiriladigan foyda solig’ining budjet daromadlarida tutgan o’rni
2. Yuridik shaxslardan olinadigan foyda solig‘i to‘lovchilari tarkibi. Soliqqa tortish maqsadida yuridik shaxs rekvizitlari. Yuridik shaxslardan olinadigan foyda solig‘ining soliq solish ob’yekti va bazasi.
3. Yuridik shaxslarning jami daromadlari tarkibi. O’zaro aloqador yuridik shaxslarni soliqqa tortishda foydalariga o’zgartirish kiritish tartibi. Jami daromaddan chegirmalar. Yuridik shaxslardan olinadigan foyda solig‘i bo‘yicha imtiyozlar.
4. Yuridik shaxslardan olinadigan foyda solig‘ini hisoblash va to‘lash muddatlari.
Tayanch so‘z va iboralar: yuridik shaxs, foyda, jami daromad, jami daromaddan chegirmalar, soliq bazasini kamaytiruvchi imtiyoz, joriy to‘lovlar,soliqni to‘lash muddati, hisobotni taqdim etish muddati,dividendlar, foizlar, royalti;
1. Bozor iqtisodiyotiga o‘tish davrida “foyda” iqtisodiy kategoriyasi mamlakatimizda yangicha ma’no kasb etdi. Foyda bozor iqtisodiyotining asosiy harakatlantiruvchi kuchi bo‘lib, tadbirkorlar faoliyatini asoslaydi. “Foyda” kategoriyasining mazmunini uning manbalari, omillari va iqtisodiy sub’yektlarning samarali ishlab chiqarish faoliyatini tadqiq etish turli iqtisodiy ilmiy maktablar vakillari tomonidan olib borilgan va foyda nazariyalari ishlab chiqilgan. Iqtisodiy qarashlarning rivojlanib, takomillashib borishi bilan “foyda” tushunchasining ta’rifi ham murakkablashib bordi. Jamiyatda savdo kapitali ustunlik qilgan
davrda foyda pullarning sotuv va amalga oshirilgan xarajatlar o‘rtasidagi farqi sifatida qaraldi. Kapitalizm davrida tadbirkorlar foydani kiritilgan kapital va olingan kapital o‘rtasidagi farq sifatida belgiladilar. Ular faoliyatining maqsadi ishlab chiqarilgan tovarlarni sotishdan tushgan tushumlar va amalga oshirilgan xarajatlar o‘rtasida yuqori miqdorda ijobiy farqqa erishish edi.
Foyda solig`i davlat budjeti bilan yuridik shaxslar o`rtasidagi foydani taqsimlash va qayta taqsimlashdagi pul munosabatlarini ifodalaydi. Bunday munosabatlarni tashkil etishni davlat o`z qo`liga olgan. Albatta bu hamma yuridik shaxslarning foyda solig`i emas, balki aynan shunday soliqni to`lovchi yuridik shaxslar soliqlaridir. Bundan tashqari o`z foydasi dan boshqa ko`rinishdagi soliqlar to`laydigan yuridik shaxslar ham mavjud (aylanmadan soliq).
Foyda solig`ining tavsifiy belgilari 1-chizmada aks ettirilgan.
O‘zbekiston Respublikasi davlat budjeti daromadlari 1991 yilga qadar asosan dalat korxonalari foydasidan ajratiladigan ajratmalar hisobidan shakllanar edi. Ushbu foydadan ajratma davlat tomonidan belgilangan majburiy to‘lov bo‘lib, u korxonalar balans foydasining 90 foizgacha bo‘lgan qismini budjetga olib ketar edi. Qolgan mablag‘lar esa korxona tomonidan emas, balki yuqori tashkilot topshirig‘iga ko‘ra tegishli fondlarga taqsimlanar edi. Respublikamiz ma’muriy-buyruqbozlik tizimidan bozor munosabatlariga o‘tishi tufayli mamlakatimiz xo‘jalik turmushida chuqur ijobiy o‘zgarishlar ro‘y bera boshladi. Natijada mulkchilikning turli shakllari rivojlanishi, korxonalarning imkoniyatini oshishi, bozor infrastrukturasi rivojlanishi bilan majburiy ajratmalarning avvalgi tizimi korxonalarning xo‘jalik yuritish samaradorligini ta’minlay olmay qoldi hamda ular bevosita va bilvosita investitsiya dasturlariga to‘sqinliq qila boshladi. Chunki, foydadan ajratma o‘zining iqtisodiy mohiyatiga ko‘ra faqat davlat korxonalari foydasidan ajratilishi lozim edi.
1-chizma

Bozor munosabatlari rivojlanishi bilan iqtisodiyotni soliqlar yordamida tartibga solish xususan, foydadan ajratmalar o‘rniga daromad solig‘ini joriy etish zarurati paydo bo‘ldi va 1992 yildan boshlab barcha turdagi xo‘jalik yurituvchi sub’yektlar “Daromad” solig‘ini to‘lashga o‘tdilar.

O‘zbekiston Respublikasi rubl mintaqasida qolib turgan vaqtda daromad solig‘ini olishga o‘tish pul qadrsizlanishi tufayli ish xaqi o‘sishini cheklash uchun davlat tomonidan majburiy chora bo‘ldi. Bunday sharoitda ishlab chiqaruvchilarning moliyaviy ahvoli yomonlasha boshladi. Natijada mahsulotga talab pasayib, sotishdan olingan tushum xajmi kamaygani holda, ular o‘z ishlab chiqarishlari yo‘nalishini o‘zgartirishga, foyda olmasalar ham juda kata miqdorda ishchilarga ish xaqi to‘lashga majbur bo‘ldilar. Bunday holatda amaliyotda korxonalar hisobot davrida foyda bilan faoliyatlarini yakunlamasada daromad solig‘ini ish xaqi fondidan belgilangan stavkada to‘lashga majbur edilar.
1995 yil yanvar oyidan boshlab soliqlarning rag‘batlantiruvchi rolini kuchaytirish maqsadida mamlakatimizda korxonalarning foydasidan olinadigan soliq joriy etildi.
Yurdik shaxslarning foyda solig’i rivojlanishi xo’jalik munosabatlarining shakllanishi bilan bog’liq bo’ldi. XX-asrga kelib yuridik va jismoniy shaxslarning daromad solig’idan maxsus soliq –korporatsiyalar foydasiga soliq ajralib chiqdi va XX-asrning 40-50 yillariga kelib o’z shaklini namoyon qildi.
Tarixan foydani soliqqa tortishning rivojlanishini ta’minlashning asosida quyidagi omillar: kapitallarni birlashtirishga va uning a’zolarini mas’ulyatini cheklashga asoslangan xo’jalik jamiyatlarining yalpi shakllanishi, jamiyatlarning faoliyatiga markazlashgan nazoratning moliyaviy hisobot ko’rinishida joriy etilishi, ilmiy assoslangan va tizimli rivojlangan buxgalteriya hisobining shakllanishini ko’rsatish mumkin.¹
Natijada foyda solig’ining joriy etilishi tadbirkorlik faoliyatiga rag’batlantirishni transformatsiyalab berdi.
Iqtisodiyotni modernizatsiyalashda xo’jalik yurituvchi sub’yektlar faoliyatini rivojlantirish asosiy masalalardan hisoblanadi. Xo’jalik yurituvchi sub’yektlarning faoliyati mezonlarining sifat jihatidan o’zgarishini amalga oshirish ob’yektiv zaruriyat bo’lmoqda. Bunda xo’jalik yurituvchi sub’yektlarni moliyaviy boshqarish jarayonida soliqlar asosiy dastaklardan biri bo’lmoqda.
Yuridik shaxslardan olinadigan foyda solig’ining fiskallik xususiyatiga nisbtan rag’batlantiruvchi holatini amalda ta’minlanayotganligini ko’rish mumkin.. Ushbu o’zgarish xo’jalik yurtuvchi sub’yektlar ixtiyoridagi foyda miqdorini oshirib ularga quyidagi imkoniyatlarni taqdim etadi:

• ichki investitsion faollikni kuchaytirish;

  
  

• soliq yuki kamayish;

  
  

• soliq yuki kamayishi natijsida yashirin daromadlarni legallashtirish ;

  
  

Yuridik shaxslardan olinadigan foyda solig’ini tushumlari miqdori keyingi yillarda muntazamligini saqlab qolmoqda. Yuridik shaxslardan olinadigan foyda solig’ini bo’yicha o’zgarishlarning ijobiy natijasini, davlat budjeti daromadlarini shakllantirishdagi ahamiyatida ko’rishimiz mumkin.

3-jadval

Yuridik shaxslardan undiriladigan foyda solig’ining O’zbekiston Respublikasi davlat budjeti soliqli daromadlari tarkibidagi o‘rni²

Ko’rsatkichlar	2016 yil			2017 yil			2018 yil
	mlrd.so’m	foiz	mlrd.so’m		foiz	mlrd.so’m		foiz
Jami soliqli daromadlar	41 043,4	100,0	49 684,8		100,0	79099.1		100,0
To’g’ri soliqlar	9 852,8	24,0	11 538,9		23,2	15656.2		19,7
Yuridik shaxslardan olinadigan foyda solig’i	1 215,1	2.9	1 475,5		2.9	3502.2		4.4

3-jadval ma’lumotlaridan ko’rinadiki, 2016-2018 yillar davomida yuridik shaxslardan olinadigan foyda solig’i mutlaq miqdorda ham o’sishi kuzatilgan. Ushbu ijobiy o’sishni quyidagi holatlar bo’yicha baholash mumkin. Birinchidan yuridik shaxslarning moliyaviy natijasida ijobiy o’zgarish va xo’jalik yurituvchi sub’yektlarning sonining oshishi, modernizatsiyalash jarayonining ta’siri natijasida yuz bermoqda. Ikkinchidan yuridik shaxslardan olinadigan foyda solig’ining takomillashuvi natijasi hisoblanadi.
Yuridik shaxslardan olinadigan foyda solig’i mutlaq miqdorda o’sgan, davlat budjeti daromadlaridagi ulushi esa 2016 yildagi 2.9 foizdan 2018 yilda 4.4 foizni tashkil etishi rejalashtirilib, 1,5 punktga oshishi mo‘ljallangan.. Bu o’zgarish yuridik shaxslardan olinadigan foyda solig’i bazasini kengayishi bilan izohlanadi.
Umuman xulosa qilganda iqtisodiyotning real sektorini yanada rivojlantirish maqsadida mazkur vazifalarni amalga oshirishda yuridik shaxslardan olinadigan foyda solig’ini takomillashtirish zaruriyat bo’lib qolmoqda.
2. Yuridik shaxslardan olinadigan foyda solig’ini undirishda qo’llaniladigan me’yoriy hujjatlar tarkibida asosiy o‘rinni O‘zbekiston Respublikasi Soliq Kodeksi egallaydi. Respublikamizda buxgalteriya hisobida foydani aniqlashdagi asosiy hujjat hisoblangan 1999 yil 5 fevraldagi Vazirlar Maxkamasining 54-sonli qaroriga asosan tasdiqlangan “Mahsulot(ishlar, xizmatlar)ni ishlab chiqarish va sotish xarajatlarining tarkibi hamda moliyaviy natijalarni shakllantirish tartibi to‘g‘risida”gi Nizomga muvofiq korxonalar foydasi yalpi foyda, asosiy faoliyatdan olinadigan foyda, umumxo‘jalik faoliyatidan olinadigan foyda, soliq to‘lagunga qadar foyda va sof foydalarga tasniflanadi.
Soliq solish maqsadida yuridik shaxs deb quyidagilar e’tirof etiladi:
-O‘zbekiston Respublikasining qonun hujjatlariga muvofiq tashkil etilgan, o‘z mulkida, xo‘jalik yuritishida yoki operativ boshqaruvida alohida mol-mulkka ega bo‘lgan hamda o‘z majburiyatlari yuzasidan ushbu mol-mulk bilan javob beradigan, mustaqil balansiga yoki smetasiga ega bo‘lgan, o‘z nomidan mulkiy va shaxsiy nomulkiy huquqlarga ega bo‘la oladigan hamda ularni amalga oshira oladigan, majburiyatlarni bajara oladigan, sudda da’vogar va javobgar bo‘la oladigan tashkilot
- chet davlatning qonun hujjatlariga muvofiq tashkil etilgan chet el tashkiloti,
- O‘zbekiston Respublikasining, chet davlatning qonun hujjatlariga yoki xalqaro shartnomaga muvofiq tashkil etilgan xalqaro tashkilot.
Notijorat tashkilotlari deganda foyda olishni faoliyatining asosiy maqsadi qilib olmagan va olingan daromadlarni o‘z qatnashchilari (a’zolari) o‘rtasida taqsimlamaydigan yuridik shaxslar tushuniladi.
Notijorat tashkilotlariga budjet tashkilotlari, shu jumladan davlat hokimiyati va boshqaruvi organlari, nodavlat notijorat tashkilotlari, shu jumladan O‘zbekiston Respublikasida davlat ro‘yxatidan o‘tgan xalqaro nodavlat notijorat tashkilotlari, shuningdek fuqarolarning o‘zini o‘zi boshqarish organlari va qonun hujjatlariga muvofiq boshqa tashkilotlar kiradi
O‘zbekiston Respublikasida davlat ro‘yxatidan o‘tgan yuridik shaxs O‘zbekiston Respublikasining rezidenti deb e’tirof etiladi.
2. Foyda solig‘i to‘lovchi yuridik shaxslar quyidagilardir:
1) O‘zbekiston Respublikasining soliq rezidentlari bo‘lgan yuridik shaxslar;
2) O‘zbekiston Respublikasining norezidentlari bo‘lgan yuridik shaxslar, shuningdek O‘zbekiston Respublikasida faoliyatni doimiy muassasalar orqali amalga oshiradigan, yuridik shaxs tashkil etmagan holdagi chet el tuzilmalari;
3) O‘zbekiston Respublikasidagi manbalardan daromadlar oluvchi O‘zbekiston Respublikasi norezidentlari bo‘lgan yuridik shaxslar;
4) soliq to‘lovchilar konsolidatsiyalashgan guruhining mas’ul ishtirokchilari bo‘lgan yuridik shaxslar;
5) soliq davrida tovarlarni (xizmatlarni) realizatsiya qilishdan olgan daromadlari bir milliard so‘mdan ortiq bo‘lgan yoki o‘z ixtiyori bilan foyda solig‘ini to‘lashga o‘tgan yakka tartibdagi tadbirkorlar;
6) oddiy shirkat shartnomasi (birgalikdagi faoliyat to‘g‘risidagi shartnoma) doirasida amalga oshiriladigan faoliyat bo‘yicha oddiy shirkatning ishonchli shaxsi.
Aylanmadan soliq to‘lovchi shaxslar soliq to‘lovchilar hisoblanmaydi.
Soliq to‘lovchi tomonidan olingan foyda foyda solig‘i (bundan buyon ushbu bo‘limda soliq deb yuritiladi) bo‘yicha soliq solish ob’yekti hisoblanadi.
Ushbu bo‘lim maqsadida quyidagilar foyda deb e’tirof etiladi:
1) yuridik shaxs uchun — ushbu bo‘limda nazarda tutilgan jami daromad va xarajatlar o‘rtasidagi farq;
2) faoliyatni doimiy muassasa orqali amalga oshiruvchi norezident uchun —qonunda belgilangan o‘ziga xos xususiyatlar inobatga olingan holda, ushbu bo‘limda nazarda tutilgan doimiy muassasaning faoliyati bilan bog‘liq bo‘lgan jami daromad va xarajatlar o‘rtasidagi farq;
3) norezident uchun — qonunda belgilangan xususiyatlar inobatga olingan holda, O‘zbekiston Respublikasidagi manbalardan olingan daromadlar;
4) yakka tartibdagi tadbirkor uchun — qonunda belgilangan o‘ziga xos xususiyatlar inobatga olingan holda, ushbu bo‘limda nazarda tutilgan jami daromad va xarajatlar o‘rtasidagi farq;
5) zimmasiga oddiy shirkat ishlarini yuritish yuklatilgan shaxs uchun — birgalikda ishlab chiqarilgan tovarni (ko‘rsatilgan xizmatni) realizatsiya qilishdan olingan daromad va birgalikda ishlab chiqarilib realizatsiya qilingan tovarga (xizmatga) to‘g‘ri keladigan birgalikdagi faoliyatga kiritilgan mablag‘lar summasi o‘rtasidagi farq.
Qonunga aniqlanadigan, soliq solinishi lozim bo‘lgan foyda summasi soliq bazasi hisoblanadi.

3.Yuridik shaxslardan olinadigan foyda solig‘ida soliqqa tortiladigan daromadni aniqlashda xo‘jalik yurituvchi sub’yekt faoliyatining moliyaviy natijalari foydaning quyidagi ko‘rsatkichlaridan foydalaniladi.

— mahsulotni sotishdan olingan yalpi foyda, bu sotishdan olingan sof tushum bilan sotilgan mahsulotning ishlab chiqarish tannarxi o‘rtasidagi tafovut sifatida aniqlanadi:
YaF=SST-IT,
bunda,
YaF — yalpi foyda;
SST — sotishdan olingan sof tushum;
IT — sotilgan mahsulotning ishlab chiqarish tannarxi;
— asosiy faoliyatdan ko‘rilgan foyda, bu mahsulotni sotishdan olingan yalpi foyda bilan davr xarajatlari o‘rtasidagi tafovut, va plyus asosiy faoliyatdan ko‘rilgan boshqa daromadlar yoki minus boshqa zararlar sifatida aniqlanadi:
AFF = YaF-DX+BD-BZ,
bunda,
AFF — asosiy faoliyatdan olingan foyda;
DX — davr xarajatlari;
BD — asosiy faoliyatdan olingan boshqa daromadlar;
BZ — asosiy faoliyatdan ko‘rilgan boshqa zararlar;
— xo‘jalik faoliyatidan olingan foyda (yoki zarar), bu asosiy faoliyatdan olingan foyda summasi plyus moliyaviy faoliyatdan ko‘rilgan daromadlar va minus zararlar sifatida hisoblab chiqiladi:
UF=AFF+MD-MX,
bunda,
UF — umumxo‘jalik faoliyatidan olingan foyda;
MD — moliyaviy faoliyatdan olingan daromadlar;
MX — moliyaviy faoliyat xarajatlari;
— soliq to‘langungacha olingan foyda, u umumxo‘jalik faoliyatidan olingan foyda plyus favqulodda (ko‘zda tutilmagan) vaziyatlardan ko‘rilgan foyda va minus zarar sifatida aniqlanadi:
STF=UF+FP-FZ,
bunda,
STF — soliq to‘langungacha olingan foyda;
FP — favqulodda vaziyatlardan olingan foyda;
FZ — favqulodda vaziyatlardan ko‘rilgan zarar;

— yilning sof foydasi, u soliq to‘langandan keyin xo‘jalik yurituvchi sub’yekt ixtiyorida qoladi, o‘zida foydadan to‘lanadigan soliqni va minus qonun hujjatlarida nazarda tutilgan boshqa soliqlar va to‘lovlarni chiqarib tashlagan holda soliqlar to‘langunga qadar olingan foydani ifodalaydi:

SF= STF-DS-BS,
bunda,
SF — sof foyda;
DS — foydadan to‘lanadigan soliq;
BS — boshqa soliqlar va to‘lovlar.
Soliq bazasi (SB) quyidagicha aniqlanadi:
SB=STF+ soliq solinadigan bazasiga kiritiladigan xarajatlar-(dividend va foizlar)-imtiyozlar (imtyoizlar va soliq bazasini kamaytirish bo‘yicha imtiyozlar )
Jami daromad yuridik shaxs tomonidan O‘zbekiston Respublikasidagi va uning hududidan tashqaridagi manbalardan hisobot (soliq) davri mobaynida olingan daromadlardan iboratdir.
Jami daromad qo‘shilgan qiymat solig‘ini va aksiz solig‘ini inobatga olmagan holda aniqlanadi.
Jami daromadga (bundan buyon ushbu bo‘limda daromad deb yuritiladi) har qanday shaklda va (yoki) har qanday faoliyatdan olinishi lozim bo‘lgan daromadlar (bundan buyon matnda olingan daromadlar deb yuritiladi), xususan, quyidagi daromadlar kiradi:
1) tovarlarni (xizmatlarni) realizatsiya qilishdan olingan daromad;
2) kredit (qarz, mikrokredit va boshqa moliyaviy operatsiyalar) bo‘yicha mukofot tarzidagi daromad;
3) sug‘urta, qayta sug‘urta tashkilotining sug‘urta, qayta sug‘urta qilish shartnomalari bo‘yicha daromadi;
4) RYePO operatsiyalari bo‘yicha daromad;
5) qimmatli qog‘ozlar va (yoki) muddatli bitimlarning moliyaviy vositalariga doir operatsiyalar bo‘yicha olingan daromad;
6) asosiy vositalarning va boshqa mol-mulkning chiqib ketishidan olingan daromad;
7) moliyaviy ijara (lizing) shartnomasiga binoan mol-mulkni berish bo‘yicha pul mukofoti tarzidagi daromad;
8) mol-mulkni mulk ijarasiga (ijaraga) berishdan olingan daromad, bundan moliyaviy ijara (lizing) mustasno;
9) royalti;
10) tekin olingan mol-mulk (olingan xizmatlar);
11) inventarizatsiya natijasida aniqlangan ortiqcha tovar-moddiy zaxiralarning va boshqa mol-mulkning qiymati tarzidagi daromad;
12) qonun hujjatlarida belgilangan tartibda majburiyatlarni hisobdan chiqarishdan olingan daromad, bundan ilgari chegirib tashlanmagan xarajatlarni hisobdan chiqarishdan olingan daromadlar mustasno;
13) talab qilish huquqidan o‘zganing foydasiga voz kechish shartnomasi bo‘yicha olingan daromad;
14) ilgari chegirib tashlangan xarajatlar yoki zararlarning o‘rnini qoplash tarzidagi daromad;
15) xizmat ko‘rsatuvchi xo‘jaliklardan olinadigan daromad;
16) muvofiq birgalikdagi faoliyatda ishtirok etishdan olingan daromad;
17) qarzdor tomonidan e’tirof etilgan yoxud qarzdor tomonidan sudning qonuniy kuchga kirgan hujjati asosida shartnoma majburiyatlarini buzganlik uchun to‘lanishi lozim bo‘lgan jarimalar, penyalar va boshqa sanksiyalar, shuningdek zararlarning (ziyonning) o‘rnini qoplash summalari;
18) kursdagi ijobiy farq;
19) dividendlar va foizlar;
20) ishonchli boshqaruv muassisi tomonidan mol-mulkni ishonchli boshqarishdan olingan daromad;
21) belgilangan tartibda va shartlarda xarajatlar tarkibiga qabul qilingan, qayta tiklangan zaxiralar summalari;
22) aksiyador, ishtirokchi yuridik shaxs foydasiga o‘z ulushining (ulushi bir qismining) qiymatini olishdan voz kechgan taqdirda, mazkur yuridik shaxsning ustav fondi (ustav kapitali) kamayishi munosabati bilan olgan daromad;
23) korxonani mol-mulk majmui sifatida sotishdan olingan daromad;
24) belgilangan hollarda va tartibda narxlarga tuzatishlar kiritish tufayli olingan daromad;
25) chet el kompaniyasining foyda tarzidagi daromadi;
26) alohida hisobi mavjud bo‘lmagan va (yoki) ulardan maqsadli foydalanilmagan maqsadli mablag‘lar tarzidagi daromad (bundan budjet to‘g‘risidagi qonun hujjatlari normalari qo‘llaniladigan budjet mablag‘lari mustasno);
27) boshqa daromadlar.
Quyidagilar daromad sifatida hisobga olinmaydi:
1) ustav fondiga (ustav kapitaliga) qo‘shilgan hissa tarzida olingan mablag‘lar;
2) aksiyalarni (ulushlarni) joylashtirish narxining ularning nominal qiymatidan (dastlabki miqdoridan) ortiqcha summasi;
3) ishtirokchilar tarkibidan chiqish (chiqib ketish) chog‘ida ustav fondiga (ustav kapitaliga) qo‘shilgan hissa doirasida olingan yoki ishtirokchining ulushi miqdorini kamaytirish, shuningdek tugatilayotgan yuridik shaxsning mol-mulkini ishtirokchilar o‘rtasida taqsimlash chog‘ida olingan mablag‘lar;
4) oddiy shirkat shartnomasi bo‘yicha birgalikdagi faoliyatni amalga oshirish uchun birlashtiriladigan mablag‘lar;
5) oddiy shirkat shartnomasi bo‘yicha sherikning (ishtirokchining) shartnoma sheriklari (ishtirokchilari) umumiy mulkidagi ulushi qaytarilgan yoki bunday mol-mulk bo‘lingan taqdirda, ushbu sherik (ishtirokchi tomonidan) qo‘shilgan hissa miqdorida olingan mablag‘lar;
6) realizatsiya qilinadigan tovarlar (xizmatlar) uchun oldindan to‘lov (bo‘nak) tarzida boshqa shaxslardan olingan mablag‘lar;
7) qonun hujjatlariga muvofiq ushbu majburiyatlarning ta’minoti sifatida garov yoki zakalat tarzida olingan mablag‘lar, ularga bo‘lgan mulk huquqi boshqa shaxsga o‘tgan paytga qadar;
8) O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining qarorlari asosida, shuningdek O‘zbekiston Respublikasining xalqaro shartnomalariga muvofiq tekinga olingan mol-mulk va xizmatlar;
9) grantlar, insonparvarlik yordami va maqsadli tushumlar;
10) sug‘urta shartnomalari bo‘yicha sug‘urta tovoni (sug‘urta summasi) tarzida olingan mablag‘lar;
11) vositachiga yoki boshqa ishonchli vakilga vositachilik, topshiriq shartnomasi yoki vositachilik xizmatlari ko‘rsatishga doir boshqa shartnoma bo‘yicha majburiyatlarni bajarishi munosabati bilan, shuningdek vositachi yoki boshqa ishonchli vakil tomonidan komitent yoxud boshqa ishonch bildiruvchi uchun amalga oshirilgan xarajatlarning o‘rnini qoplash hisobidan kelib tushgan mol-mulk (pul mukofoti bundan mustasno). Bunday xarajatlar, agar tuzilgan shartnomalar shartlarida bu xarajatlarning o‘rnini qoplash nazarda tutilgan bo‘lsa, vositachidan yoki ishonchli vakildan chegirib tashlanmaydi;
12) moliyaviy ijara (lizing) ob’yektining qiymati o‘rnini ijaraga beruvchi (lizing beruvchi) tomonidan olingan ijara (lizing) to‘lovining qismi tarzida qoplash;
13) mol-mulk ijarasiga doir shartnoma bo‘yicha olingan mol-mulk, bundan moliyaviy ijara (lizing) mustasno;
14) telekommunikatsiya tarmoqlaridagi tezkor-qidiruv tadbirlari tizimining tekin olingan texnik vositalari, shuningdek ulardan foydalanish va ularga xizmat ko‘rsatish bo‘yicha xizmatlar;
15) investor va davlat mulkini boshqarish bo‘yicha vakolatli davlat organi o‘rtasida tuzilgan shartnomaga binoan investitsiya majburiyatlari sifatida kiritiladigan mol-mulk;
16) kredit yoki qarz shartnomalari bo‘yicha mablag‘lar yoki boshqa mol-mulk (mablag‘ jalb qilishni rasmiylashtirish usulidan qat’i nazar, boshqa shunday mablag‘lar yoki boshqa mol-mulk, shu jumladan qarz qimmatli qog‘ozlar), shuningdek bunday jalb qilingan mablag‘larni to‘lash hisobidan mablag‘lar yoki boshqa mol-mulk;
17) konsessiya bitimi bo‘yicha qonun hujjatlariga muvofiq olingan mol-mulk;
18) davlat muassasalari tomonidan barcha darajalardagi ijro etuvchi hokimiyat organlarining qaroriga ko‘ra olingan mol-mulk;
19) O‘zbekiston Respublikasining davlat obligatsiyalari va davlatning boshqa qimmatli qog‘ozlari bo‘yicha olingan daromadlar, shuningdek O‘zbekiston Respublikasi tomonidan va O‘zbekiston Respublikasi yuridik shaxslari tomonidan chiqarilgan xalqaro obligatsiyalar bo‘yicha daromadlar;
20) soliq to‘g‘risidagi qonun hujjatlariga muvofiq hisobdan chiqarilgan penyalarning va jarimalarning summasi.
Yuridik shaxslarning soliq bazasini aniqlashda ushbu shaxslarning jami daromadidan daromad olish bilan bog‘liq barcha xarajatlar chegirib tashlanadi, bundan ushbu bo‘limga ko‘ra chegirib tashlanmaydigan xarajatlar mustasno.
Soliq to‘lovchi tomonidan O‘zbekiston Respublikasida ham, uning hududidan tashqarida ham hisobot (soliq) davri davomida amalga oshirilgan (ko‘rilgan), asoslangan va hujjatlar bilan tasdiqlangan chiqimlari xarajatlar deb e’tirof etiladi.
Asoslangan xarajatlar deganda bahosi pul shaklida ifodalangan, iqtisodiy jihatdan o‘zini oqlagan chiqimlar tushuniladi.
Hujjatlar bilan tasdiqlangan xarajatlar deganda quyidagi hujjatlar bilan tasdiqlangan chiqimlar tushuniladi.
Soliq bazasini aniqlashda chegirib tashlanmaydigan xarajatlar jumlasiga quyidagilar kiradi:
1) qonun hujjatlariga muvofiq vakolatli organ tomonidan belgilangan moddiy qimmatliklarning tabiiy kamayishi normalaridan, ular mavjud bo‘lmaganda esa, soliq to‘lovchi tomonidan belgilangan normalardan ortiqcha tovarlar yo‘qolishi;
2) umumiy ovqatlanish korxonalariga yoki boshqa tashkilotlarga joylarni tekin berish xarajatlari, ushbu korxonalar va tashkilotlar uchun kommunal xizmatlarning qiymatini to‘lash;
3) jismoniy shaxsning moddiy naf tarzidagi daromadlari hisoblangan xarajatlari;
4) dala (safar) ta’minoti, xodimning shaxsiy avtotransportidan xizmat maqsadlarida foydalanganlik uchun qonun hujjatlarida belgilangan normalardan ortiqcha to‘lovlar;
5) pensiyalarga ustamalar va qo‘shimcha to‘lovlar;
6) ko‘rsatilgan moddiy yordam;
7) xayriya yordami tarzida berilgan mablag‘lar, bundan metsenatlik ko‘magini ko‘rsatish uchun yo‘naltirilgan mablag‘lar mustasno;
8) qonun hujjatlarida nazarda tutilgan normalardan ortiqcha tarzda atrof-muhitni ifloslantirganlik va chiqindilar joylashtirganlik uchun kompensatsiya to‘lovlari;
9) loyihalar va qurilish-montaj ishlaridagi kamchiliklarni, ob’yekt yonidagi omborga tashib keltirilguniga qadar yuz bergan buzilishlar va deformatsiyalarni bartaraf etishga doir xarajatlar, korroziyaga qarshi muhofazadagi nuqsonlar tufayli taftish o‘tkazish (asbob-uskunalarni qismlarga ajratish) xarajatlari hamda ushbu xarajatlarning o‘rnini kamchiliklar, buzilishlar yoki zararlar uchun javobgar bo‘lgan mahsulot yetkazib beruvchi yoki boshqa xo‘jalik yurituvchi sub’yektlar hisobidan qoplash imkoni bo‘lmagan miqdordagi boshqa shunga o‘xshash xarajatlar;
10) aybdorlari aniqlanmagan talon-taroj qilishlar va kamomadlardan yoki aybdor taraf hisobidan zarur summalarning o‘rnini qoplash imkoni bo‘lmagan taqdirda ko‘rilgan zararlar;
11) boshqa shaxslar uchun to‘langan soliqlar;
12) soliq tekshiruvlari natijalari bo‘yicha qo‘shimcha hisoblangan soliqlar va yig‘imlar;
13) soliq to‘lovchining tadbirkorlik faoliyatini amalga oshirish bilan bog‘liq bo‘lmagan tadbirlarga (sog‘liqni saqlashga oid, sport va madaniy tadbirlar, dam olishni tashkil etish hamda boshqa shunga o‘xshash tadbirlarga) doir xarajatlari, bundan tadbirlarni o‘tkazishga doir majburiyatlar qonun hujjatlari bilan soliq to‘lovchining zimmasiga yuklatilgan hollar mustasno;
14) kasaba uyushmalari qo‘mitalariga yordam ko‘rsatish;
15) mahsulot ishlab chiqarish bilan bog‘liq bo‘lmagan xizmatlar (shaharlarni va shaharchalarni obodonlashtirish bo‘yicha xizmatlar, qishloq xo‘jaligiga yordamlashish va xizmatlarning boshqa turlari) ko‘rsatganlik uchun qilingan xarajatlar;
16) ushbu bo‘limda nazarda tutilgan hollardan tashqari soliq solinmaydigan daromad olish bilan bog‘liq xarajatlar;
17) haqiqatda xizmatlar ko‘rsatmasdan, tovarlarni jo‘natmasdan turib amalga oshirilgan operatsiyalar bo‘yicha xarajatlar, agar bunday fakt sudning qonuniy kuchga kirgan qarori bilan aniqlangan va unda ushbu xarajatlarni amalga oshirgan soliq to‘lovchining nomi ko‘rsatilgan bo‘lsa;
18) daromad olishga qaratilgan faoliyat bilan bog‘liq bo‘lmagan xarajatlar, agar qonun hujjatlariga muvofiq bunday xarajatlarni amalga oshirish majburiyati soliq to‘lovchining zimmasiga yuklatilmagan bo‘lsa;
19) budjet tizimiga kiritilishi lozim bo‘lgan (kiritilgan) penyalar, jarimalar va boshqa sanksiyalar;
20) sotib olishga, ishlab chiqarishga, qurilishga, montaj qilishga, o‘rnatishga doir va amortizatsiya qilinadigan aktivlarning qiymatiga qo‘shiladigan boshqa xarajatlar, shu jumladan qo‘shimcha qurish, qo‘shimcha jihozlash, rekonstruksiya qilish, modernizatsiya qilish, texnik jihatdan qayta jihozlash hollarida amalga oshiriladigan, amortizatsiya chegirmalari vositasidagi xarajatlar jumlasiga kiritiladigan xarajatlar;
21) soliq to‘lovchining amortizatsiya qilinmaydigan mol-mulkning boshlang‘ich qiymatiga buxgalteriya hisobi to‘g‘risidagi qonun hujjatlariga muvofiq kiritiladigan xarajatlari;
22) chegirmalar jumlasiga kiritish normalari belgilangan xarajatlarning mazkur normalar qo‘llanilgan holda hisoblab chiqarilgan chegirmaning eng yuqori summasidan ortiq bo‘lgan summa;
23) shakllantirilishi ushbu bo‘limda va (yoki) qonun hujjatlari talablarida nazarda tutilmagan zaxiralarga, zaxira fondlari va boshqa fondlarga ajratmalar, bundan nazarda tutilgan normalar doirasidagi xarajatlar mustasno;
24) soliq to‘lovchi tomonidan hisoblangan dividendlar summalari;
25) soliq to‘lovchi tomonidan boshqa shaxslarning foydasiga to‘lanadigan ixtiyoriy sug‘urta badallari;
26) soliq to‘lovchi tomonidan ushbu Kodeksning 310-moddasiga muvofiq soliq solish maqsadlarida xarajatlar deb e’tirof etiladigan xarajatlarning summasidan ortiqcha hisoblangan foizlar va ayrim chiqimlar;
27) tekin berilgan mol-mulkning (xizmatlarning) qiymati va bunday berish bilan bog‘liq bo‘lgan (shu jumladan qo‘shilgan qiymat solig‘i summasi kiritilgan) xarajatlar, bundan O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining qaroriga ko‘ra mol-mulkni o‘tkazish, shuningdek telekommunikatsiya tarmoqlaridagi tezkor-qidiruv tizimining texnik vositalarini o‘tkazish va ulardan foydalanish bo‘yicha xizmatlar ko‘rsatish mustasno;
28) ishonchli boshqaruv muassisining ishonchli boshqaruv shartnomasini bajarish bilan bog‘liq bo‘lgan xarajatlari, agar ishonchli boshqaruv shartnomasiga ko‘ra muassis naf oluvchi bo‘lmasa;
29) notijorat tashkilotlariga va xalqaro tashkilotlarga to‘lanadigan badallar, yig‘imlar va boshqa to‘lovlar, bundan bunday badallarni, yig‘imlarni va boshqa to‘lovlarni to‘lash qonun hujjatlarida (shu jumladan chet davlatlarning qonun hujjatlarida) nazarda tutilgan va (yoki) ushbu badallarni, yig‘imlarni va boshqa to‘lovlarni to‘lagan soliq to‘lovchilar tomonidan faoliyatni amalga oshirishning sharti yoxud mazkur tashkilotlar tomonidan soliq to‘lovchilar o‘z faoliyatini yuritishi uchun zarur xizmatlar taqdim etishning sharti bo‘lgan hollar mustasno;
30) soliq to‘lovchi tomonidan tashkil etilgan zaxira mablag‘lari hisobiga amalga oshirilgan xarajatlar, agar bunday zaxiralarni tashkil etishga doir xarajatlar qonun hujjatlarida belgilangan tartibda chegirmalar jumlasiga kiritilgan bo‘lsa;
31) mol-mulk narxining pasayish (qadrsizlanish) summalari;
32) oddiy shirkat shartnomasi doirasida sheriklar (ishtirokchilar) tomonidan shartnoma sheriklarining (ishtirokchilarining) umumiy mulkdagi ulushni qaytarish yoki bunday mol-mulkni bo‘lish chog‘ida ko‘rilgan zararlar;
33) soliq to‘lovchilarning konsolidatsiyalashgan guruhi ishtirokchisi tomonidan ushbu guruhning mas’ul ishtirokchisiga soliqni (bo‘nak to‘lovlarini, joriy to‘lovlarni, penyalarni, jarimalarni) ushbu Kodeksda soliq to‘lovchilarning konsolidatsiyalashgan guruhi uchun belgilangan tartibda to‘lash uchun berilgan pul mablag‘lari, shuningdek soliq to‘lovchilar konsolidatsiyalashgan guruhining mas’ul ishtirokchisi tomonidan shu guruhning ishtirokchisiga ushbu soliq to‘lovchilar konsolidatsiyalashgan guruhi bo‘yicha to‘lanishi lozim bo‘lgan soliq (bo‘nak to‘lovlari, joriy to‘lovlar, penyalar, jarimalar) summasi aniqlashtirilishi munosabati bilan berilgan pul mablag‘lari;
34) tovar-moddiy qimmatliklarni yaroqsizligi sababli (saqlash muddati o‘tganligi, jismoniy va (yoki) ma’naviy eskirganligi, shunga o‘xshash boshqa sabablarga ko‘ra) hisobdan chiqarishdan ko‘rilgan zararlar, bundan favqulodda holatlar (tabiiy ofat, yong‘in, avariya, yo‘l-transport hodisasi va hokazolar) oqibatida ko‘rilgan zararlar mustasno);
35) muddati o‘tgan va kechiktirilgan kreditlar (qarzlar) bo‘yicha muddatli qarz uchun kredit shartnomasida nazarda tutilgan stavkalardan ortiqcha foizlar;
36) xo‘jalik shartnomalari shartlarini buzganlik uchun to‘langan yoki tan olingan jarimalar, penyalar va sanksiyalarning boshqa turlari.
Soliq stavkalari quyidagi miqdorlarda belgilanadi³ (4-jadval):