Peşədaxili münasibətlər prinsipi. Psixoloq öz həmkarları ilə qarşılıqlı münasibətlərində səmimi olduğunu göstərməlidir.
Əməyin ödənilməsi prinsipi. Peşəkar təcrübədə psixoloqun əməyinin ödənilməsi ilə bağlı maliyyə məsələləri peşə standartlarına, müraciət edənin və peşənin maraqlarına uyğun həll edilir.
Testin nəticələrinin məxfiliyi prinsipi. Psixoloji testlərin və digər tədqiqat metodlarının nəticələri sınanılan şəxsin xəbəri olmadan kütləvi nəşrlərdə əks oluna bilməz.
Testin interpretasiyası prinsipi. Testin qiymətinin nəticələri, o cümlədən test materialları yalnız o şəxslərə verilə bilər ki, onlar həmin nəticələri interpretasiya etmək və onlardan lazımi səviyyədə istifadə etmək qabiliyyətinə malik olsunlar.
Testin nəşri prinsipi. Psixoloji testlər kommersiya nəşri üçün yalnız o nəşriyyatlara verilə bilər ki, onlar həmin testləri peşəkarlıqla iş apara bilən mütəxəssislər arasında yayılmasını təmin etməyə zəmanət vermiş olsunlar.
Tədqiqatlarda ehtiyyatlilığın gözlənilməsi prinsipi. Psixoloqun tədqiqatları insanlara ziyan vurmamalıdır. Şəxsiyyətin eneıji və imkanlarını qiymətləndirmək üçün psixoloq alternativ üsulların tətbiqinə görə məsuliyyət daşıyır. Hər bir şəxsin üzərində aparılan tədqiqat onun razılığına əsaslanmalı, bu zaman həmin şəxsin şərəf və ləyaqətinə hörmət bəslənilməli, etik məsuliyyət gözlənilməlidir.
Nəşrlərin əhəmiyyəti prinsipi. Psixoloji tədqiqatın nəticələri çap olunarkən təcrübəçi və müəllif nəşr üçün prinsipial əhəmiyyətli şəxs olduğuna görə, onun adı siyahıda birinci yerdə yazılmalıdır. Çap olunmuş ədəbiyyatlar vasitəsilə tədqiqata birbaşa və ya dolayısı təsir göstərmiş materialların müəlliflərinin hüquqları qorunur. Onların adı sitatlarla qeyd olunmalıdır.
Təşkilat qarşısında məsuliyyət prinsipi. Psixoloq tabe olduğu təşkilatın və ya institutun hüquqlarına hörmətlə yanaşmalıdır. Psixoloq tərəfindən hazırlanmış və istifadə olunan materiallar onun üzv olduğu təşkilatın mülkiyyəti hesab edilir.
