Mübarizə tədbirləri. 1. Alaqlarla müntəzəm olaraq mübarizə aparılmalıdır.
2. Məhsul yığıldıqdan sonra bitki qalıqları sahədən çıxarılmalı və dərin dondurma şumu aparılmalıdır.
3. Bitkinin inkişafını sürətləndirmək məqsədilə üzvi və mineral gübrələr vaxtında verilməlidir.
4. Vegetasiya dövründə tırtıl və yumurtalar əllə yığılıb məhv edilməlidir.
5. Xəstəlik törədən mikrobioloji preparatlardan istifadə edilməsi məsləhətdir.
6. Kimyəvi mübarizədə Karate Zeon (0,1 l/ha), Koru-alfa 5 (0,2 l/ha), Dentiz 2,5% (0,3 kq/ha) preparatlarının emulsiyası ilə çiləmə aparılması məsləhət bilinir
Turp ağ kəpənəyi (Pierisrapae L.) - Kəpənəklər (Lepidoptera) dəstəsi, ağ kəpənəklər (Pieridae) fəsiləsinə mənsubdur.
Yetkin kəpənək kələm ağ kəpənəyinə oxşardır, ancaq ondan kiçikdir (40 mm).
Yumurtası çəlləkvaridir, açıq sarımtıl rəngdədir. Tırtıllar yaşılımtıl rəngdədir, uzunluğu 20-25 mm-dir. Zərərverici pup halında quru çöplər üzərində qışlayır.
Dişi fərd yumurtasını yarpağın alt və üst səthinə tək-tək qoyur. Yumurtanın embrional inkişafı 5-10 gündür. Tırtılın inkişafı 20-30 gündə başa çatır. ildə 4-5 nəsil verir.
Zərərvericinin fəaliyyəti nəticəsində məhsulun kəmiyyəti azalır, əksər halda zədələnmiş kələm başı çürüyür və onu uzun müddət saxlamaq olmur.
Mübarizə tədbirləri. Kələm ağ kəpənəyinə qarşı aparılan mübarizə tədbirləri bu zərərvericiyə qarşı da tətbiq edilə bilər.
Birəciklər – Böcəklər (Coleoptera) dəstəsi, yarpaqyeyənlər (Chrysomelidae) fəsiləsinin nümayəndəsidir.
Bir neçə növü vardır: ağayaq, zolaqlı, göy və qara birəcik. Birəciklər atlandırıcı ayaqlara malik olan 2-3 mm böyüklükdə böcəklərdir. Yumurtası ovalvaridir, sarı rəngdədir. Böyüklüyü 0,3-0,4 mm-dir.
Sürfəsi açıq sarıdır və 3 cüt döş ayağı vardır. Pupu sərbəstdir, sarımtıldır.
Zərərverici yetkin halda torpağın üst qatında və bitki qalıqları altında qışlayır.
Mayın əvvəlində qışlamadan çıxan böcəklər əvvəlcə yabanı xaççiçəkli bitkilərlə qidalanır, sonra isə mədəni bitki üzərinə keçir.
Zərərvericinin yetkini və sürfələri kələm bitkisinin yarpaqları ilə qidalanaraq, nəticədə yarpaqlarda yara kimi kiçik çökəkciklər əmələ gəlir. Bir müddətdən sonra çökəkciklər deşilir. Zərərverici il ərzində 2 nəsil verir.
