Yeraltı suların elektrik keçiriciliyi. Məlum olduğu kimi kimyəvi təmiz su (distillə olunmuş) elektrik keçirmir. Suyun bu xassəsi onda həll olan duzların miqdarından asılıdır. Yüksək minerallaşmaya malik sular isə elektrolit adlanır və suyun elektrik keçiriciliyi onun minerallaşma dərəcəsi haqqında fikir yürütməyə imkan verir. Suyun elektrik keçirmə qabiliyyətinin geofiziki tədqiqatlar və buruq-qazma işlərində böyük əhəmiyyəti var.
Yeraltı suların radioaktivliyi. Bütün yeraltı sular bu və ya digər dərəcədə radioaktivliyə malikdirlər. Onların radioaktivliyi radiumun parçalanmasının son məhsulu olan radon qazının (Rn) və cüzi miqdarda radium duzlarının olması ilə meydana çıxır. Suların radioaktivliyi Küri, Max. vahidi (M.V.) və ya eman ilə ifadə olunur (1 M.V.=3,6 eman). Radioaktiv sulardan yalnız radonlu (Rn) sular balneoloji əhəmiyyətə malikdir. Suyun tərkibində radon Rn>3,5 M.V. olduqda belə sular radonlu sular adlanır.
