Og’iz bo’shlig’ida uch juft yirik bo’lak bezi; quloq oldi (I), jag’ osti (II) va til osti (III) bezlari, shuningdek til yuzasida va tanglay bilan yuzning shilliq pardalarida joylashgan ko’pincha mayda bezlarning yo’llari og’iz bo’shlig’iga ochiladi.
HALQUM
Halqum (pharynx) bosh va bo’yin sohasida joylashgan toq a’zo bo’lib, hazm va nafas tizimiga kiradi. U voronkasimon shaklda bo’lib uzunligi 12-14 sm. Halqum yuqorida kalla asosiga (ensa suyagi halqum bo’rtig’i, ponasimon suyak qanotsimon o’simtasining medial plastinkasi) birikadi. Pastda u VI-VII bo’yin umurtqalari sohasida qizilo’ngachga o’tib ketadi. Kalla asosiga birikkan yuqori devorini halqum gumbazi (fornix pharyngis) deyiladi. Halqumning orqa yuzasi bo’yin umurtqalari oldida joylashgan mushaklar va bo’yin fastsiyasiga tegib turadi. Halqumning orqa devori bilan bo’yin fastsiyasi o’rtasida bo’sh biriktiruvchi to’qima bilan to’lgan halqum orqa sohasi (spatium retropharyngeale) joylashgan. Halqumning ikki yon tomonida bo’yinning tomirli-nervli dastasi (uyqu arteriyasi, ichki bo’yinturuq vena va adashgan nerv) yotadi. Halqumning old tomonida burun bo’shlig’i, og’iz bo’shlig’i va hiqildoq joylashgan bo’lib, nafas yo’li hazm yo’li bilan kesishadi. Bu a’zolarga nisbatan halqumda uch: burun, og’iz va hiqildoq qismi tafovut qilinadi.
