Simvolik interaksionizm - insanın sosial davranışı haqqında sosioloji nəzəriyyələrə, ilk
növbədə məşhur Amerika filosofu, sosioloqu və psixoloqu C.Midin konsepsiyasına istinad
edir. Bu nəzəriyyədə sosial prosesin qanunauyğunluğu interaksiya kimi, konkret sosial
situasiya çevrəsində adamların qarşılıqlı təsiri kimi təfsir olunur. Sosial situasiya sadəcə olaraq
kontekst deyil, qarşılıqlı təsirin önəmli faktorudur. İnsan mənsub olduğu mədəniyyətin simvolik vasitələrinə əsaslanaraq situasiyanı şərh edir. Simvolik interaksionizm başlıca
məziyyət kimi insanaməxsus simvolik vasitələri - nitq, jest, mimika və s. ayırd etmiş və
ünsiyyət prosesində onların rolunu açıqlamışdır.
Simvolik interaksionizm çərçivəsində davranışın rol nəzəriyyəsi (T.Sarbin, E.Qofman,
R.Linton və b.) ətraflı öyrənilmiş, insanın şəxsi norma və sərvətlərinin mənbəyi kimi referent
qrupun xüsusiyyətləri araşdırılmışdır (Q.Nyukom, M.Şerif, Q.Kelli).
