1. İdrak fəlsəfi təhlilin predmeti kimi. İdrak nəzəriyyəsi (qnoseologiya) idrakın mənşəyi və mahiyyəti, əldə edilən biliyin yaranması prosesi, onun əsası və meyarı, idrakın pillələri və üsulları haqqında fəlsəfi təlimdir. İdrakın müxtəlif səviyyələrinə uyğun olaraq qnosologiya iki hissədən – inikas nəzəriyyəsi və elmi tədqiqatın metodologiyasından ibarətdir. Fəlsəfəyə «İdrak nəzəriyyəsi» terminini ilk dəfə 1854-cü ildə C.Ferrey daxil edib.
İdrak nəzəriyyəsini fəlsəfənin əsas məsələsinin ikinci tərəfinə verilən cavabla izah edirlər. Başqa sözlə, insan şüurunun xarici aləmi dərk edib etməmək qabiliyyətinə malik olması əsas götürülür.
İdrak nəzəriyyəsi dünyanın obyektiv surətdə mövcud olmasını və onun insan şüurunda əks olunmasını əks etdirir. Yəni, reallığın predmet və hadisələri, onların xassə və münasibətləri insanların hiss üzvlərinə təsir göstərərək, onlarda müvafiq duyğu və qavrayışlar formalaşdırır ki, nəticədə anlayışlar və məntiqi təfəkkürün digər formaları yaranır. Belə ki, insanın biliklərinin mənbəyi ətraf aləmdən qaynaqlanır və predmet və proseslərin spesifikası təfəkkürdə əks olunur.
İdrak insanın yeni bilik əldə etməsi olmaqla onun sosial mühitə tam inteqrasiya olunmasının vacib elementidir. Bu baxımdan yanaşdıqda idrakın səfərbəredici və inteqrasiyaedici bir funksiya daşıdığını qeyd etmək olar.
İdrakın fəlsəfi dərki üçün bir sıra kateqoriyaların izahı vacibdir. Bunlardan vacib olanları sistem, struktur kateqoriyalarıdır. Sistem yunanca bütöv, tam sözündən olub ayrı-ayrı hissələrdən, çoxsaylı elementlərdən ibarət çoxluğu ifadə edir.
Struktur obyekti, predmeti, prosesi tam edən elementlərin nisbətən sabit vəhdəti və onların əlaqə və münasibətlərini ifadə edən məfhumdur.
İnsanın onu necə qəbul edib etməməsindən asılı olmayaraq real olan şeylər, hadisələr, proseslər və s. idrak obyektidir.
İdrakın subyekti qismində həm ayrıca insan (fərd), həm də müxtəlif qruplar (və yaxud, bütövlükdə cəmiyyət) çıxış edə bilər. Məhsuldar idrak fəaliyyəti yalnız idrak prosesində subyektin aktiv rolu ilə geçəkləşə bilər.
İdrakın obyekti–hər şeydir. Obyekt həm maddi şeylər (kimyəvi element, fiziki cisim, canlı orqanizm), həm də sosial hadisələr (cəmiyyət, insanların qarşılıqlı münasibətləri, onların davranış və fəaliyyəti) ola bilər. Beləliklə, idrakın obyekti ya praktiki, ya da idrak prosesinin gedişində mənimsənilən və insandan asılı olmadan mövcud olmayan şeylər, hadisələr, proseslərdir.