Toshkent moliya instituti «iqtisodiyot» kafedrasi

Talabaga tavsiya!
Hech qaysi adabiyotda tayyor kurs ishi bo’lmaydi!
Kurs ishi talabaning mustaqil izlanishlari mahsuli bo’lishi kerak
Adabiyot bilan ishlashda darsliklar, o’quv qo’llanmalar va nasr etilgan iqtisodiy jurnallarning chop etilgan vaqtiga alohida ahamiyat berish zarur. Chunki ularda bayon etilgan ayrim masalalar, keltirilgan amaliy ma’lumotlar, amaliyot bilan bog’liq u yoki bu ko’rsatmalarga asos bo’lgan me’yoriy materiallar eskirgan bo’lishi mumkin. Shu sababli adabiyotlarni to’plashda eng yangi nashrlardan (oxirgi 3-5 yillar ichida nashr etilgan) foydalanish, mustaqil izlanishlar asosida tuzilgan adabiyotlar ro’yxatini esa kurs ishi rahbari bilan birgalikda ko’rib chiqish va, zarur bo’lsa, rahbarning tavsiyasi bilan to’ldirish lozim.
Talabalarga yaqindan yordam berish maqsadida mazkur uslubiy qo’llanmaga kurs ishini bajarish bo’yicha asosiy va qo’shimcha adabiyotlar ro’yxati ilova qilingan (2-ilovaga qarang).


III. KURS ISHI REJASINI TUZISH

Kurs ishi rejasini talaba asosiy adabiyotlar bilan tanishib chiqqandan so’ng tuzishi maqsadga muvofiq. Reja mavzuning asosiy savollarini aks ettirib, qisqa bo’lishi (oddiy reja) yoki har bir savolni aniqlashtirgan, kichik savollarga ajratgan holda, kengaytirilgan (murakkab reja) bo’lishi mumkin.

Reja ilmiy rahbar bilan kelishgan holda tuzilishi kerak. Rejaning savollari ma’lum bir tartibda, mantiqiy ketma-ketlikda qo’yilishi lozim. Rejada talabaning ijodiy yondoshuvini, ilmiy tahlillari va tashabbusini talab qiladigan savollarning qo’yilishi juda muhim bo’lib, bu kurs ishining qiymatini yanada oshiradi.
Kurs ishi ustida ishlash jarayonida reja talaba tomonidan birmuncha o’zgartirilishi, aniqlashtirilishi va kengaytirilishi mumkin.

Talabaga tavsiya! Kurs ishi rejasini tuzishni yuqori kursda o’qiydigan do’stingizga yoki partadosh talaba-qizga ishonmang! “Tanasi boshqa – dard bilmas!”

Kurs ishi rejasini tuzishda biron-bir qolipning, yagona shaklning bo’lishi mumkin emas. Lekin aksariyat mavzular uchun tuzilgan rejalar savollari o’rganila­yotgan mavzuning nazariy va tashkiliy-huquqiy asoslarini, izlanish ob’ektidagi amaliyot holati tahlilini, izlanish uchun asos qilib tanlangan muayyan ijtimoiy-iqtisodiy munosabatlarni takomillashtirish va samaradorligini oshirish yo’llarini qamrab olishi kerak. Kurs ishi rejasi mantiqan ketma-ketlikda 4 ta savoldan oshmasligi kerak. Talabga muvofiq kurs ishining 1-2 savollari talaba tomonidan mustaqil o’rganilgan adabiyotlar soni kamida 5 ta bo’lishi kerak va bu foydalanilgan adabiyotlar ro’yxatida keltirilishi kerak. 3-4 savollar esa ko’proq amaliyot bolan bevosita bog’langan bo’lishi va uni yoritishda mavzuga doir nashr qilingan iqtisodiy jurnallarda chop etilgan kamida 4 ta maqoladan foydalanishi hamda bu ham foydalanilgan adabiyotlar ro’yxatida keltirilishi shart.
Kurs ishinig mazmuni va hajmiga ma’lum chegaralar qo’yilgan, ya’ni kurs ishi asosiy qismi 12-15 bet hajmida bajarilishi kerak, shunday ekan, rejada ham shu hajm doirasida yoritib berish mumkin bo’lgan savollar qo’yilishi maqsadga muvofiq.
Xulosa qilib aytganda, talabaning qiziqishlaridan, fikrlash doirasining kengligidan, to’plangan adabiyotlar va amaliy ma’lumotlarning ko’lamidan, talabaning ilmiy izlanishlarga bo’lgan layoqatidan kelib chiqqan holda, kurs ishi rejalari turli-tuman, cheklanmagan variantlarda, ixtiyoriy talqinda bo’lishi mumkin. Muhimi, ishlab chiqilgan reja tanlangan kurs ishining mazmun-mohiyatini, maqsad va vazifalarini ochib berishi, o’rganilgan muammo yuzasidan mustaqil xulosalarni shakllantirishga xizmat qilishi kerak. Ushbu Ko’rsatmalardan foydalanuvchilarga amaliy yordam sifatida bir necha mavzu bo’yicha tuzilgan kurs ishi rejalari namunalari qo’llanmaning 3-ilovada keltirilgan.