Türkmenistanym (Watan hakynda goşgy)

 
Kemiň barmy — daýanara il bolsa, 
Kalbyňda ýagşydan ýagşy päl bolsa, 
Goşgy ýazmak — iş etdigiň däl bolsa, 
Elime pil alyp derläp bereýin. 
 

Göwni baý adam men, sadadan-sada, 
Uzak agyr ýoly geçdim pyýada. 
Aman-esen ýaşap ýörsem dünýäde, 
Günde bäş-on setir çyrmap bereýin. 
 
Meý içildi, meýlis diýmän, toý diýmän, 
Sag bol, geldiň Bu gylygy goý diýmän. 
Ýigrimi bäş nämemiş — ine, haý diýmän, 
Asyl ýene çaga meňzäp bereýin... 
 
Adyňy alkyşlap guraýyn söhbet 
 
Adyňy alkyşlap, guraýyn söhbet, 
Ýadasam kuwwatsyň, büdresem söýget. 
Sen penalap dursaň, her günüm sähet, 
Ýa Alla! 
Ýa Huda! 
Özüňden medet! 
 
Ömrüň ýoly agyr, menziller hatar, 
Ýaman gözden-dilden edýärin heder. 
Üstüme abansa bir bela-beter. 
Kän gezek dep etdiň, ýene-de dep, 
Ýa Alla! 
Ýa Huda! 
Özüňden medet! 
 
Eşreti artyk et, hesreti kem et, 
Owaldan dert berme, beräýseň, em et, 
Eger-de ýolumda duş gelse böwet, 
Ýa Alla! 
Ýa Huda! 
Özüňden medet! 
 
Özgä özüň ýalyň ýokdugy magat, 
Ýyllarym hasaply, başym amanat. 
Şükür, kyn günlerde berdiň kanagat, 
Ýa Alla! 
Ýa Huda! 

Özüňden medet! 
 
Egin deňläp barýar gowudyr erbet, 
Arman, arasynda çekmänsiň serhet... 
Çökgün göwni galdyr, doň kalby eret, 
Ýa Alla! 
Ýa Huda! 
Özüňden medet! 
 
Müňde bir adyň bar, birisi Ehat, 
Ömrümiň her güni ullakan sowgat. 
Haýyş edýän, nalyş etmek gabahat, 
Ýa Alla! 
Ýa Huda! 
Özüňden medet! 
 
Ýene Adam hakda 
 
Mydama rysgalyň yzyna düşüp, 
Ömrümizi geçirýäsir ylgaşyp. 
Aýlar aýa, ýyllar ýyla ulaşyp, 
Asyrlar asyra ýelmeşer gider. 
 
Söýgüsin, sögünjin sygdyryp içe, 
Adam durýar mydam adamdan gaça. 
Ahlak bilen ynsap ýukaldygyça, 
Aň bilen düşünje çuňlaşar gider. 
 
Kim elden gün görer, kimseler dilden, 
Ýazylmadyk bir kanun bar ozaldan: 
Halal öz paýynam giderer elden, 
Haram haram bilen çörňeşer gider. 
 
Ine saňa hökmanlaryň ykbaly, 
Gelmek, gitmek hemmeleriň ykbaly. 
Gülenler hiç haçan gülmedik ýaly, 
Wagty geler, bir gün eňreşer gider. 
 
Gülenler bu jepaly Ýere nur seper, 

Wagt diýlen bar zadyň üstüni ýapar. 
Dünýäň döredilişi şeýle bir çeper, 
Döwür döwür bilen ümleşer gider. 
 
Adam ýaşamagyň açaryn bilse, 
Wagtyň hoşlap, iýer-içerin bilse. 
Bir söz bilen, dünýäň geçerin bilse, 
Agyr aladalar ýeňleşer gider. 
 
Goçuň gözelligi şahyna bagly, 
Derejeler däldir pähime bagly. 
Hemme zat sepilýän tohuma bagly, 
Gylyklar ganyňa ornaşar gider. 
 
Nebsiniň yzyndan ýetip bilmese, 
Onuň jylawundan tutup bilmese, 
Ynsan kämillige ötüp bilmese, 
Başga jandar bilen deňleşer gider. 
 
Hemmetaraplaýyn häsiýetnama 
 
Ýokary bilimli, adygan işgär, 
Elbetde, perişde däldigi äşgär. 
Umuman alaňda akyl bar, huş bar, 
Samsygrak diýmeseň, başga kemi ýok. 
 
Para alyp, para emlemesi bar, 
Şeýle halymsyrap gürlemesi bar. 
Döwletiň kisesin sermemesi bar, 
Kümsügräk diýmeseň, başga kemi ýok. 
 
Aň gelenok sermese-de altmyşy, 
Arakdan, tirýekden ýokdur gaýtmyşy. 
Umuman alaňda, eden etmişi 
Ýoňsuzrak diýmesek, başga kemi ýok. 
 
Zähmetine bap gelenok baýlygy, 
Il içinde halanmaýar gylygy. 
Umuman alaňda, adamçylygy 

Egsigräk diýmeseň, başga kemi ýok. 
 
O dünýeli gürrüň 
 
Men bu dünýä düşünmeýän halyma, 
Sen o dünýe hakda gürrüň açýarsyň. 
Dowzahdan heder etmän duruňok, 
Käte-käte jennete-de uçýarsyň. 
 
Ikisem meniň-ä gören ýerim däl, 
Bilemok, haýsyna düşjekdigiňi. 
Allaň özi bilsin, bu göwräň bilen, 
Syratdan nähili geçjekdigiňi. 
 
Ýöne bilýän, o ýerlerde 
Aýdym-sazdyr söhbet ýokdur. 
Çöker ýaly kürsi ýokdur, 
Çeker ýaly zähmet ýokdur. 
 
Bu dünýäde ýygnan tyllaň, 
Kömek etmez suwsan pilläň. 
Sämäp durmaz asla kelläň, 
Baş aýlara bufet ýokdur. 
 
Bergiň bolsa, gutaryp git, 
Imanyňy göterip git, 
Garny kemsiz otaryp git, 
Gäwüşäre owkat ýokdur. 
 
Allaň parzyn etmän berjaý, 
Ädim ätdiň bijaý-bijaý. 
Belkem, ýene eliň gijär, 
Emme oňa rugsat ýokdur.  
 
Ýa behişdiň perizady, 
Ýa dowzahyň gyzyl ody, 
Haýsam bolsa, etme dady, 
Söýenere söýget ýokdur. 
 

Öldüňmi, ýok ölüm howpy, 
Hiç hili zat bozmaz keýpi. 
Goýupjyk git gara seýfi, 
Salar ýaly manat ýokdur. 
 
Darykmagyň juda ahmal: 
Ne Gün bardyr, ne-de asman. 
Ne ministr, ne biznesmen... 
Jemgyýet-u-döwlet ýokdur. 
 
Ýüz muşakgat, müň kynçylyk... 
Ýöne hemmä deň kynçylyk. 
Gürlemäge mümkinçilik, 
Gobsunmaga gurbat ýokdur. 
 
Dukanynda söwda bolmaz, 
Bäbekleri hüwdä bolmaz. 
Hiç kişiden peýda bolmaz, 
Gowy ýeri, töhmet ýokdur. 
 
Senem bende, menem bende, 
Del maslahat bolmaz mende. 
Ýaşatsalar, ýaşa munda, 
Başga ýerde rehnet ýokdur. 
 
Balkan pälwanyň aýdanlaryndan 
 
1. 
Kem-kemden, kem-kemden agaryp saçlar, 
Gyrawuň astynda galanda başlar, 
Kelläňe gelýändir şeýle bir pikir: 
—Göwnüm agaranok. 
Şoňa-da şükür. 
 
Ýene bir menzile ýetende ýaşlar, 
Saralyp, seýrekläp başlaýar dişler. 
Öz göwnüňi aldap, edersiň pikir: 
—Wagty gelendir-dä 
Muňa-da şükür. 

 
Çözlenýän ýumak deý gowşaşyp sallar, 
Kem-kemden ýaý berip başlanda biller, 
Uludan dem alyp, edersiň pikir: 
—Aý bolýa-da, nätjek, 
Şuňa-da şükür... 
 
2 
Ölen jaýlananda, baryp bilmeseň, 
Ýa üçi berlende görnüp bilmeseň, 
Duşuňdan geçende ýedisi, kyrky, 
Peýda bolup başlar ünjüdir gorky. 
 
Hossarlaryn görseň sapajaklarsyň, 
Saklap ýören syryň duýlaýjak ýaly. 
Müýnürgäp ýörersiň indi barmaga, 
Özüň öldürensiň diýläýjek ýaly... 
 
Ýaradanyň huzurynda 
 
Kän bolmazdy adyň agzap bilýänler, 
Pyşyrdyda ýatlanardyň her daýym. 
Indi Sensiz, gürrüňem ýok, gepem ýok, 
Diýilýänler çyn bolsun-da, Hudaýym. 
 
Iki söz aýdylsa, biri Alla jan, 
Üç sözi agzasak, biri Ylahym. 
Bu sözleriň nireräkden çykýanyn, 
Özüň aňjak bolaweri, Allahym. 
 
Nämäni eşitsek, şony gaýtalap, 
Toba-tagsyr, Ikatýoga döndük biz. 
Bolmaz bizde saldarlamak — seljermek, 
Sebäbi öz kellämizden dyndyk biz. 
 
Galplyk bilen halys öwrenşip barýas, 
Bu ýagdaýa çydasam men çydaýyn. 
Bizden hiç bir zady geň-taň görme-de, 
Sen bir hüşgär bolaweri, Hudaýym! 

 
Özüň görüp duransyň-la: az däldir — 
Alla diýen beýik ada dulanýan. 
Men şolary görsem, edil ýenjilýän 
Çaga ýaly çabalanýan-towlanýan. 
 
Dillerimiz dem salymda süýjedi, 
Ýöne welin, dile galmady ynam. 
Öte geçýän bolsam, müň bir tobam bar, 
Jandurmazlyk edip, aýdaýýan menem. 
 
Eý, Hudaýym, eý, keremli Biribar, 
Adyň bardyr öz atamyň adynda. 
Sen Hudaýa ynanýarmyň? diýşip, 
Ony gyssap duranlary ýadymda. 
 
Ine, bu gün şol gyssaýan kişiler, 
Adyň agzamaga utananoklar. 
Ine, şeýdip gözlerimiň öňünde, 
Taňryly bolup ýör Taňrysy ýoklar... 
 
Bu bolýan zatlara uwnup-çydaman, 
Hum ýaly çişipdir amanat kelläm. 
Men seni gabanýan bihudalardan, 
Adyňa döneýin, eý, beýik Allam! 
 
Başlangyçlar 
 
Diýseler-de: Adam-adamdan kem däl, 
Ykballar meňzeş däl, rysgallar deň däl. 
Ýeňlesden ýeňlesiň çykmagy geň däl, 
Asylly asylsyz dälden döreýär. 
 
Däri-derman öner ýüz dürli otdan, 
Namys dörär utanç bilen uýatdan. 
Iň nurana zatlar iň ak niýetden, 
Bela-beter gara pälden döreýär. 
 
Näz bar, saz bar bilbil guşuň dilinde, 

Gudrat gördüm ýazyň dogran gülünde. 
Şahyrana zenanlaryň elinde, 
Haly täsin-täsin gölden döreýär. 
 
Damarda at çapsyn gyzgyn ganymyz, 
Baýlyk näme — sagja bolsun janymyz. 
Saçagyň gelşigi mele nanymyz, 
Der saçylan atyz-çilden döreýär. 
 
Ajaýyp nusgalar görersiň ilde, 
Geň zatlar sataşar bu agyr ýolda. 
Işiň  gaýtsa, duşman daşardan däl-de, 
Öz öýüň içinden — duldan döreýär. 
 
Päliň düzet, niýetiňi nur eýle, 
Göwünleri gyrawlatma, gor eýle. 
Bardan bar etmek hiç, ýokdan bar eýle, 
Adamyň özi-de noldan döreýär.  
 
Ýoluň aýagujunda 
 
Ýene gelip Ýerbendime, 
Bakýan guba çöllerine. 
Çagalygym siňdi gitdi, 
Säher öwsen ýellerine. 
 
Ýagyşdan soň şemal turup, 
Ak selinler sygyranda, 
Ak bulutdan inen damja 
Gök ýylakdan syryganda. 
 
Gulagyma eşdilip dur, 
Gamgyn iňňä-iňňälerim. 
Gözýaşymy togap eden, 
Ejem jandan diňlänlerim. 
 
Tamşanyplar synlaýaryn, 
Garagumda Günüň dogşum. 
Ojar ody edil şeýdip 

Ak öýlerde atýar öwşün. 
 
Men şol oduň reňkin aldym, 
Maňlaýyma çoýa-çoýa. 
Garagumuň gerşi ýaly, 
Owurtlarym joýa-joýa. 
 
Üwreldim men çabganyň, 
Päk şemalyň sazy bilen. 
Ýürek şindem bile gopýar, 
Bu sähranyň ýazy bilen. 
 
Guşluk çagy bulutlardan 
Gün çykanda ýyljyraklap, 
Sarsyp gidýär goja kalbym, 
Bilenok ol özün saklap. 
 
Gün ýene-de ýada salýar, 
Atamyzyň ojagyny. 
Men delminip duran, ine, 
Diýip bilmän diýjegimi. 
 
Seret, eýýäm bu jahanda 
Ne atam bar, ne-de enem. 
Dagdan aşak inen Gün dek 
Kem-kem ýaşyp barýan menem. 
 
Tanyş şemal seýran edýär, 
Öwrüm-öwrüm, aşym-aşym. 
Soja ýürek, agla, ýürek, 
Gizlenme sen, gözde ýaşym. 
 
Men hiç-haçan gizlenmedim, 
Takdyr ýaly göni boldum. 
Dünýä diýen ajap atly — 
Ýalançynyň çyny boldum. 
 
Ejizleýär diýjek bolmaň, 
Bu syrygýan ýaşlaryma. 

Men aglaýan, munda soňlap 
Bilmän goýjak işlerime... 
 
Ömür hakda, ölüm hakda 
 
Dünýä gelip ýene ondan gitmeli, 
Ine, munuň özi betbagtlykdyr. 
Demiň alman, iýmän, duýman ýatmaly, 
Hawa, munuň özi betbagtlykdyr. 
 
Gözüň düşmez gözel gelin-gyzlara, 
Guwanma ýok kükräp gelen ýazlara. 
Melul bolma ýokdur aýdym-sazlara, 
Hawa, munuň özi betbagtlykdyr. 
 
Gözüň gaýyp bolar bu dünýäň keşbi, 
Seni jadylamaz hiç zadyň yşky. 
Nämüçin bu hakda ýazýaryn goşgy — 
Sebäp, ynsan ömri az wagtlykdyr. 
 
Geň bolsa-da, şuny unudýas käte, 
Şonuň üçin ýene salýaryn ýada. 
Hiç bir kişi baky däldir dünýäde, 
Muny inkär etmek — peläketlikdir. 
 
Ömür diýlen her hiliräk ötýändir, 
Biri utulýandyr, biri utýandyr. 
Iki güýç mydama göreç tutýandyr, 
Biri gowluk, biri gabahatlykdyr. 
 
Nebse jylaw salyň, pes tutup päli, 
Gözleri gapmasyn bu dünýäň maly. 
Kä kişiniň kalby baýlykdan doly, 
Kä kişiniň ýüreginde gytlykdyr. 
 
Şeriň saňa süýkenjirän mahaly, 
Ýuwutjak bol dyňzap gelen gahary, 
Göriplikdir göwünleriň zäheri, 
Ýüregiň şöhlesi mylakatlykdyr. 

 
Sen bir doglup, bir gezegem ýaşýan zat, 
Ajal saňa iň bir ýeňil düşýän zat, 
Ömri söýmek — ömre ömür goşýan zat, 
Şol ömrüň şiresi — sahawatlykdyr. 
 
Içiň gysyp, höwür küýsän mahalda, 
Bazara bar, göwnüň açar mähelle. 
Hiç närsäni geňlemeýän jahanda, 
Jandan başga barja zatlar satlykdyr. 
 
Jan süýjüdir, ömür bäş-on günlükdir, 
Bak-bakjaň aňrysy giden tümlükdir, 
Ýalançy dynuwsyz gel-hä — gellikdir, 
Şonça-da dannawsyz git-hä gitlikdir. 
 
Beýnini işe sal hem-de pikir et, 
Barlygyňda bir dem jykyr-jykyr et, 
Bu dünýäni göreniňe şükür et, 
Ony elden bermek — bedähetlikdir. 
 
Bir gün gidýär, kim gelse bu meýdana, 
Goşgy galýar, bolsa eger dürdäne, 
Ýagşylyk et, dirikäň bu dünýäde, 
Şondan başga zatlar bir manatlykdyr.  
 
Durmuşyň döreden goşgusy 
 
Dünýäniň kän sowalyna, 
Men gaty az jogap tapdym. 
Haýran galdym jemalyna, 
Gudrat gördüm — togap tapdym. 
 
Ýigrendigim hile-tilsim, 
Çynym bilen güldüm gülsem, 
Erkek bolup aglan bolsam, 
Aglamaga sebäp tapdym. 
 
Arzan düşýän aşy peýläp, 

Topulmadym iki elläp. 
Ejiz görsem, şony goldap, 
Belki, az-kem sogap tapdym. 
 
Çölde görýän öz keşbimi, 
Bar her zadyň meňzeşligi. 
Hydyr gören giňişligi, 
Öz kalbyma kybap tapdym. 
 
Nähak şarpyk degýär gaty, 
Kän küýsedim adalaty. 
Ynsanlygyň alamaty — 
Haýa bilen ynsap tapdym. 
 
Hemaýatam adamlarda, 
Kyýamatam adamlarda. 
Bu çarkandak ýodalarda, 
Eşretden kän azap tapdym. 
 
Durmuş süýji, dünýä pany, 
Ine, ömür bäş nogsany, 
Damja suwy, döwüm nany, 
Gara ýeri gazap tapdym. 
 
Oýnatdyrman, oýnap duran, 
Ädimiňi synlap duran, 
Her demiňi sanap duran, 
Pelek atly hasap tapdym. 
 
Çig süýt emen galýar ahmal, 
Ine, kysmat, ine ykbal. 
Biler bolsaň, dostumy däl, 
Duşmanymam gözläp tapdym. 
 
Aýlawym ýok, men bir göni, 
Aýyplama, ömrüm meni. 
Geň bolsa-da, ahyr çyny, 
Öň kän ýalan sözläp tapdym. 
 

Umumy temadan 
 
Pis gowyny gözläp nätsin, 
Elbetde, pis-pisi tapar. 
Adamlaryň gowşak ýerin, 
Olaň gara nebsi tapar. 
 
Süýt-süýt diňe gaýmak bolsa, 
Em tapylsyn emgek bolsa, 
Tirkeşýäniň tomzak bolsa, 
Iň ýakymsyz ysy tapar. 
 
Biliň guşap, goluň çyzgap, 
Özüňi tap gözläp-gözläp. 
Namart kişi özün gizläp, 
Ýoldaşyndan kössi tapar. 
 
Arzuw-yhlas ýerde ýatmaz, 
Düzüw bolsa päl-niýetler. 
Taňry gargan bidöwletler, 
Toýy gözlär — ýasy tapar. 
 
Ýigit geler iş üstünden, 
Gyz ýylgyrar gaş astyndan, 
Çyn yzçylar daş üstünden, 
Ýöräp giden yzy tapar. 
 
Ylham alyp höwesinden, 
Sorup ýazyň howasyndan, 
Ak çabganyň owazyndan, 
Sazandalar sazy tapar. 
 
Geregime däl tylla tagt, 
Gözleýänim başga bir bagt. 
Söýdügine duşan ýigit, 
Kyrk çillede ýazy tapar. 
 
Bak jahana aklyň durlap, 
Kimler oýnap, kimler arlap, 

Kimler bolsa derläp-derläp, 
Iýiljek nan-duzy tapar. 
 
Gyzylaýak 
 
Beýik derýaň kenarynda, 
Bag hellewlär her ýanyňda. 
Jahyllygyň humarynda, 
Başym silkip gezen ýerim. 
 
Gowga köpdi juwan başda, 
Ol döwürler galdy daşda. 
Hany, ýoldan maşyn geçse, 
Göge galan tozanlaryň. 
 
Amyderýaň üsti ümür, 
Zaman zabun, heňňam agyr, 
Gözlerimden gitmez ömür, 
Çit köýnekli gözleriň. 
 
Ümezläp dur hanha Köýten, 
Saýaladym, bolduň Watan. 
Ýada düşýär sapyn tutan 
Kündelerim, azallarym. 
 
On üç ýaşdan ýaňy ätläp, 
Ýer açardyk hyşa otlap. 
Ýazylypdy seni ýatlap, 
Kän-kän goşgy-gazallarym. 
 
Synlap durun gözýetimi, 
Kabul eýle hormatymy. 
Dogduk depäň gymmatyny, 
Şeýle ýiti syzan ýerim. 
 
Baýyr 
 
Dynç alypdym düşläp sende, 
Uzyn gije, ýaşyl baýyr. 

Garalýardy onda-munda, 
Mähnet-mähnet daşyň, baýyr. 
 
Keremlidi giň — gujagyň, 
Gara daglar — ýassangyjyň. 
Dagyň başky basgançagy, 
Gül-pürçükdi durşuň, baýyr. 
 
Daşyň çola, howaň päkdi, 
Myhmanlaryň ikiçäkdi. 
Behiştden kem ýeri ýokdy, 
Bu sapaly gerşiň, baýyr. 
 
Açyk göwün, güler ýüzli, 
Sag bol, myhman aldyň bizi. 
Bozdy az-kem keýpimizi, 
Daňdan ýagan ýagşyň, baýyr. 
 
Ýalňyz ýyldyz gitmän uka, 
Göz gypýardy ýanymdaka, 
Ýok, bolupdy şeýle waka, 
Däl bu meniň düýşüm, baýyr. 
 
Uçdy huşum oýnap bili, 
Duýgy serhoş, hyjyw däli. 
O mahallar ýetmiş däldi, 
Otuz bäşdi ýaşym, baýyr. 
 
Maýmyn oýunlary 
 
Ýöre diýse, ýöräp berdi, 
Towus diýse, towsup berdi. 
Her günde öz eýesine 
Müň bir dürli öwsüp berdi. 
 
Ýylgyrdy ol, ýylgyr diýse, 
Göwnesin-u-göwnemesin. 
Ýogsam döwüm çörek ýokdy, 
Onsoň nädip oýnamasyn. 

 
Gap diýdi-de, gant oklady, 
Maýmyn gapdy hoşal bolup. 
Ýarandy öz eýesine, 
Her ýerlerin gaşan bolup. 
 
Käte näzin çekdirýärdi, 
Käte bolsa aýnaýardy. 
Garaz, näme oýna diýse, 
Kemin goýman oýnaýardy. 
 
Bir gün bolsa duýman durka. 
Eýesinden buýruk boldy, 
Bu gezekkiň oýnamaly 
El-aýak däl, guýruk boldy. 
 
Nätsin pahyr, başyn ýaýkap, 
Galdyrdy-da guýrugyny, 
Uýat ýerin mazamlady, 
Berjaý edip buýrugyna. 
 
Utanjyndan gözün ýumdy, 
Ýüzün sowdy bar halaýyk. 
Kimse üçin oýundy bu, 
Kimler üçin — bihaýalyk. 
 
Üçlemeler 
 
Diňe iliň kemin däl-de, 
Öz keminem duýup bilýän 
Goçaklarmyz aman bolsun. 
 
Özüne däl, özgelere, 
Sen beýiksiň diýip bilýän 
Gerçeklermiz aman bolsun! 
 
Aglap duran bir biçärä, 
Ýüregini gyýyp bilýän 
Är kişiler aman bolsun. 

 
Özün söýse söýsün welin, 
Başgany-da söýüp bilýän 
Zor kişiler aman bolsun. 
 
Özi ýaly bir bendäni, 
Aldamagy aýyp bilýän 
Merdanalar aman bolsun. 
 
Hakykatyň hatyryna, 
Gara başyn goýup bilýän 
Goç ýigitler aman bolsun. 
 
Haramlaşýan heňňamlarda, 
Diňe halal iýip bilýän 
Mähribanlar aman bolsun. 
 
Diline däl, durmuşynda, 
Nebsine haý diýip bilýän 
Gahrymanlar aman bolsun. 
 
Ojagyma 
 
Ata mähriň çoýdy meni, 
Başda doglup-döränimden. 
Göz degmesin, saýa tapdym, 
Nowça goşa Çynarymdan. 
 
Ömür maňa mähribandyr, 
Ýüregimde arzuw kändir, 
Agtyk topla, çowluk öndür, 
Delalat tap dermanyndan. 
 
Aňrymyza mynasyp bol, 
Ölçäp iýme, bihesip bol, 
Bolsaň diňe binesip bol — 
Bu dünýäniň haramyndan. 
 
Şahalaryň ýaýyp neslim, 

Adymyzy alyp gitsin. 
Üşäniňde ýyly ýetsin, 
Alla atly ýaranyňdan. 
 
Gyzgyn mähriň sowamasyn, 
Neberämiz ownamasyn, 
Göripleriň baýnamasyn, 
Çyk, bar bolsa armanyňdan.  
 
Et kombinatynyň işçisi bilen gürrüň 
 
Men gürrüň gozgadym şygryýet hakda, 
Ol söze başlady çalgy daşyndan. 
Joşguny, hyjuwy haýran galdyrýar, 
Juda hoşal borly edýän işinden. 
 
Men taryp edýärin ysly bägüli, 
Ol gür berýär goýny pudarlaşyndan. 
Bäş gezekki çempiona meňzeýär, 
Äpet göwrä syn edeňde daşyndan. 
 
Indi men geçýärin aýdyma-saza, 
Onuň baş temasy paltadyr pyçak, 
Diýýär: Iri mallar soýulýan wagty, 
Paltaň ähmiýeti uludyr niçik. 
 
Men bu gezek söhbet açjak bolýaryn, 
Tamdyryň, gyjagyň tary hakda. 
Ol janygyp gürrüň berýär... düýäniň 
Damagny çalmagyň täri hakda. 
 
Nahara oturdyk ahyrsoňunda, 
Çala dile aldym Bissimilläny. 
Ol bolsa çöpürlek gollaryn çyzgap, 
Maýdalap başlady bişen kelläni. 
 
Köýtendagyň depesine dyrmaşan 
 
...Köýtendagyň depesine dyrmaşan 

Aý gädilip, dogjak-dogjak bolýardy. 
Derýanyň üstüne abanan bulut 
Derläp, çişip ýagjak-ýagjak bolýardy. 
 
Gapdaldaky güwläp duran Jeýhuna 
Meňzäp çyrpynýardy Lebap bahary. 
Alysdan atylan suwmonjugynyň 
Maňlaýymyza şaplap degen mahaly. 
 
Tisgindik-de birek-birege bakan 
Aňlamazdan 
Ýarym ädim ätdik biz. 
Hem-ä bir-birege ýakyn ýalydyk, 
Hemem bir-birege entek ýatdyk biz. 
 
Adyny agzadym özüm eşitmän, 
Täsin seda çykdy gyzyň dilinden. 
Ine-de, ömrümde ilkinji gezek 
Durup bilmän tutdum gyzyň elinden... 
 
Gyz wiý diýip tirpinse-de näzirgäp, 
Howlukmady elin çekip almaga. 
—Toba... 
Aý, ýaşuly, utanaňokmy 
Indi o zatlary ýada salmaga? 
 
Dogry diýýäň, utanylýar azajyk, 
Böwrüňe dürtüp dur utanjyň-haýaň. 
Ýöne, nätjek, indi geljek bilen däl — 
Mahal-mahal geçmiş bilen ýaşaýan. 
 
Şeýle döwür boldy 
 
Şeýle döwür boldy: 
Ýoldaşlar bolup 
Söýdük hem haladyk 
Köpçülikleýin. 
 
Tebigaty boýun egdirdik — 

Ýagny 
Birkemsiz taladyk 
Köpçülikleýin. 
 
Ýekelikde bagtly bolmak adyl däl, 
Onsoň bagtly bolduk 
Köpçülikleýin. 
 
Käteler aç ýatdyk şeýle agzybir, 
Käte-de aç öldük 
Köpçülikleýin. 
 
Köpçülige goşulmasa kimde-kim, 
Temmisini berdik 
Köpçülikleýin. 
 
Ýagny ýa Sibire, ýa-da Syrderýa 
Ýesir edip sürdük 
Köpçülikleýin. 
 
Hiç kişi garamat götermez ýaly 
Ýolbaşçylyk etdik 
Köpçülikleýin. 
 
Öz gününi görýän ýekebarany 
Synp hökmünde atdyk 
Köpçülikleýin. 
 
Kimi başlyk görkezseler ýokarda, 
Oňa biz, elbetde, 
Bir adam deýin, 
Iň ýokary işeňňirlik görkezip, 
Ser berdik, saýladyk 
Köpçülikleýin. 
 
Plany doldurdyk ähli babatda, 
Alym ýetişdirdik 
Köpçülikleýin. 
 

Sowatlyny, bisowady deň tutup, 
Garyp-gatyşdyrdyk 
Köpçülikleýin. 
 
Ozal Magtymguly bardy türkmende 
Tutuş halky ruhy bilen ekleýen. 
Bir onuň ýeterlik däldigi üçin, 
Biz şahyr öndürdik 
Köpçülikleýin.  
 
Zehinler hakynda alada etdik: 
Bagşylar köpeldi 
Kömelek deýin. 
 
Kemsitmän 
Işlemän iýýänleri-de 
Toplap taýýarladyk 
Köpçülikleýin. 
 
Ýetmiş ýyllap bagtly ýoldan ýöredik, 
Hem-de öňe gitdik 
Bir adam deýin... 
 
Bu ýoluňyz dogry ýol däl diýdiler —