Umumta’lim maktablari I-IV sinf o’quvchilarini jismoniy tarbiya

1-4 sinflarda dars o’tkazish uslubiyoti.

REJA:

1. 
   Umumta’lim maktablari I-IV sinf o’quvchilarini jismoniy tarbiya
   
2. 
   O’quvchi-yoshlar yuqorida bayon etilgan jismoniy tarbiya vositalari
   
3. 
   Tanadagi a’zolarning mehnat va jismoniy mashqlar
   

Umumta’lim maktablari I-IV sinf o’quvchilarini jismoniy tarbiya darslari jarayonidagi harakat faoliyati va ish qobiliyatini o’rganish va ularni yanada yaxshilash yuzasidan amaliy tavsiyalar berish ishimizning asosiy maqsadidir.

O’zbekiston sharoitida ijtimoiy-mehnat va sog’liqni saqlash tizimidagi barcha tadbirlar aholining sog’lom turmush tarzini yaxshilash, ularning mehnat qobiliyatini oshirish hamda uzoq yillar sog’lom yashashga qaratilganligi bilan muhim ahamiyatga egadir.
Sanoat ishlab chiqarishi, qurilishlar, qishloq va suv xo’jaligidagi mehnat faoliyatlarda jismonan barkamol bo’lishni taqozo etadi. Shu sababdan kishilarning sog’lig’ini mustaxkamlash, mehnat qobiliyatlarini takomillashtirish va mehnat samaradorligini oshirish yo’lida jismoniy tarbiya va sportga katta e’tibor berilmoqda.
O’zbekiston Respublikasi Vazirlar Mahkamasining «O’zbekistonda jismoniy tarbiya va sportni yanada rivojlantirish chora-tadbirlari to’g’risida»gi qarori (27 may 1999 y.) faqat sportnigina rivojlantirish, u bilan bog’liq, bo’lgan muammolarni (sport inshootlarini yaxshilash, kadrlar tayyorlash, xalqaro sport maydonlarida g’alabalarga erishish va hakozo.) hal qilish bilan chegaralanmaydi. Aksincha, aholining salomatligini yaxshilash, o’quvchi yoshlarning jismoniy barkamolligini ta’minlash, mehnatkash ishchi-xizmatchi va ziyolilarni jismoniy tarbiya va sport bilan muntazam shug’ullanishga jalb etishga qaratilgandir.
Mamlakatda o’quvchilar o’rtasida jismoniy tarbiyani ommalashtirishning asosiy maqsadi shundaki, insonlarning doimo sog’lom bo’lishi, bolalikdan jismoniy tarbiya bilan shug’ullanishga odatlantirish, iqtidorli yoshlarni sportga safarbar etish, sportchilarning jahon sport maydonlarida ishtirok etishi hamda yutuqlarni qo’lga kiritib, O’zbekiston shuhratini jahonda yanada kengaytirishga qaratilgan.
Ikkinchi tomondan esa, hozirgi davr texnika taraqqiyoti natijasida ko’pchilik mutaxassislarning o’tirib ishlashi, ijod qilishi kam harakat qilishiga olib kelmoqda. Bu o’z navbatida qon aylanish tizimining o’ta susayishi, ya’ni gipodinamiya kasalligiga chalinishiga sabab bo’lmoqda.
Uchinchidan esa, tamaki chekish, turli giyohlar va spirtli ichimliklarni yoshlikdan ko’p iste’mol qilish, turli xil yuqumli kasalliklarning (gripp turlari) kelib kirishi hamda shunga o’xshash turli xil sabablar orqali kasalmand kishilar ko’paymoqda.
To’rtinchidan - maktabgacha tarbiya muassasalari, barcha turdagi o’quv yurtlarida jismoniy tarbiya darslarining saviyasi pastligi, ommaviy sog’lomlashtirish jismoniy tarbiya - sport tadbirlariga yoshlarni ommaviy ravishda jalb etishining qoniqarsizligi 60-70 foiz o’quvchi-yoshlarning jismoniy tarbiya dasturi talablari hamda «Alpomish va Barchinoy» maxsus testlari normativlarini o’z vaqtida bajara olmasligi ma’lum bo’lmoqda.
Yuqorida ta’kidlangan eng muhim muammolar tarkibida yana juda ko’p kamchiliklar oqimi davom etmoqda. Bularning mazmuni va negizida jismoniy tarbiya, jismoniy rivojlanish hamda jismoniy tayyorgarlik kabi ijtimoiy-tarbiyaviy jarayonlarning chuqur singib ketmaganligi aynan namoyon bo’lmoqda.
Jismoniy tayyorgarlik tushunchasi shundan iboratki, har bir inson, ayniqsa-mehnatkashlar (aqliy va jismoniy sohada) va o’quvchi-yoshlarning har qanday mehnatga yaroqliligi (qobiliyati), doimo tayyor bo’lib turishi, jismonan baquvvat, chiniqqan bo’lishidagi faol harakatlardir. Bunday amaliy faoliyatlar faqat jismoniy mehnat va jismoniy mashqlarni bajarish yo’li bilan vujudga keladi va mustahkamlanadi.
Xalq orasida «Sog’liq pulga topilmaydi» degan naql bor. Bu haqiqatdir. Kasallikka chalingan kishilar buni yaxshi idrok etishadi.
Buyuk alloma Abu Ali Ibn Sino sog’liqni saqlash va uni mustahkamlashda jismoniy mashqlarni (badan tarbiyani) har qanday doridan ustun qo’yadi.
Qadimgi davrlarda falsafachilar salomatlikni ulug’laganlar. Bir badavlat kishi falsafachidan so’radi: «Inson hayotida eng ulug’ narsa nima, davlatmi yoki shon-shuhrat ? » U kishi shunday javob qilibdi: «Na boylik va na shon-shuxrat insonni baxtli qila olmaydi. Salomatlik baxt va quvonchning bir manbaidir». Haqiqatan ham insonlarga eng katta baxt, shodlik, quvonch keltiruvchi narsa sog’liqdir. Sog’liqdan ortiq qimmatli narsa yer yuzida yo’q. Bu qat’iy va haqiqiy (ob’yektiv) xukmdir.
Inson salomatligi haqida mulohaza yuritilsa, albatta uni doimo saqlash, imkoniyat darajasida rivojlantirish lozim bo’ladi. Bunda jismoniy tayyorgarlik (tayyorlash) eng ustivor tadbir bo’lmog’i zarur.
Boshida ta’kidlanganidek, jismoniy tayyorgarlik ko’rish- shug’ullanuvchilarning (tarbiyalanuvchilarning) eng avvalo yoshi, jinsi va jismoniy holati (kasal yoki sog’lomligi) e’tiborga olinadi. Shu asosda beriladigan (bajariladigan) mashqlarning turkumi (kompleks), miqdori va bajarish usullari belgilanadi.
Ta’kidlanganidek shug’ullanuvchilarning yoshi, jinsi va jismoniy holatlariga qarab o’tkaziladigan mashg’ulotlarning ko’lami g’oyat keng. Ularning har biri alohida mavzudir. Shu sababdan jismoniy tayyorgarlikning umumiy xususiyatlarigagina qisman to’xtalish zarurdir.
Umumiy jismoniy tayyorgarlik deganda, har bir shug’ullanuvchining jismonan barkamolligi tushuniladi, ya’ni tez harakat qilish, turli xil mehnatlarni yengil bajara olish, yengil, chaqqon, kuchli va boshqa jismoniy sifatlarga ega bo’lishdir. Bunday fazilatlar va jismoniy sifatlarga ega bo’lish uchun esa har doim jismoniy tarbiya bilan shug’ullanish lozim bo’ladi. Bunda kundalik rejimga (ertalab, kechki bo’sh payt, dam olish kuni va h.k.) jismoniy tarbiya mashg’ulotlarni kiritish shartdir.
O’z o’rnida ta’kidlash lozimki, umumta’lim maktablari, akademik litseylar, kasb-hunar kollejlari va oliy ta’lim muassasalaridagi jismoniy tarbiya dasrlari umumiy jismoniy tayyorgarlik darajasini to’la bera olmaydi. Chunki haftada 1-2 soatlik darslar mushak va bo’g’inlarga to’la kuch, harakatchanligini butun hafta davomida saqlashini ta’minlay olmaydi. Jismoniy tayyorgarlikka ega bo’lish uchun esa har kuni ertalab va kechki paytda jismoniy tarbiya va sportning u yoki bu turi bilan astoydil shug’ullanishni taqozo etadi. Buning o’rnini sport to’garaklari va sport musobaqalarigina bosishi (egallash) mumkin. Ya’ni jismoniy tayyorgarlikning asosiy yo’li har kungi jismoniy tarbiya yoki sport to’garaklari mashg’ulotlarida (haftada 3-4 marta) ishtirok etish hisoblanadi.
Jismoniy tarbiya nazariyasi va amaliyotida umumiy jismoniy tayyorgarlikning asosiy manbalari sifatida gimnastika, yengil atletika, suvda suzish, futbol sport o’yinlari, xalq milliy harakatli o’yinlari, sayyohatlar (turizm) tan olinadi.
O’quvchi-yoshlar yuqorida bayon etilgan jismoniy tarbiya vositalarini (sport turlari) darslar, mashg’ulotlar va musobaqalar orqali yaxshi tasavvur etishadi. Qolaversa, sport turlari bo’yicha davlat tilida yangidan nashr etilayotgan o’quv-uslubiy qo’llanmalar ko’paymoqda. Shu sababdan ularning umumiy jismoniy tayyorgarlikni tarbiyalashdagi mazmunlari hamda mohiyatlari haqida batafsil to’xtalishga hojat yo’q.
Xulosa qilib aytganda umumiy jismoniy tayyorgarlikning belgisi va natijalari quyidagi yo’nalishlarda ma’lum bo’ladi, ya’ni:
- Jismoniy mehnat qilishda tezda toliqmaslik, charchamaslik.
- Ob-havoning issiq-sovug’iga chiday olish.
- Turli xil kasalliklarga tezda chalinmaslik.
- Jismoniy mashqlarni (qo’lda tortilish, tirsaklarni yotgan holda bukib-yozish, tez yugurish) erkin bajara olish.
- Futbol, bosketbol, voleybol, tennis kabi sport o’yinlarida ishtirok etish.
- O’zi sevgan sport turi bilan shug’ullanish.
- O’rta va uzoq masofalarga yugurishda charchamaslik, chidash, suvda ko’p suzish va hakozo.
Jismoniy tayyorgarlik, jismoniy barkamollik bilan egizak, desa bo’ladi. Ularning mujassamligi va samaralari maxsus jismoniy tayyorgarlikka yetaklaydi.
Maxsus jismoniy tayyorgarlik jismoniy sifatlar bilan tutashib ketadi. Jismoniy sifatlar faqat sportdagina emas, balki ijtimoiy-turmush madaniyatimizda ham o’ziga xos xususiyatlarga egadir.
Maxsus jismoniy tayyorgarlik;
Bu tushuncha asosan inson tanasining ma’lum bir qismini (qo’llar, oyoqlar, bel va hakozo.) jismoniy jihatdan mustahkamlash, rivojlantirish harakat faoliyatlarni ixchamlashtirish, tezlashtirish kabi jihatlarga qaratilishi bilan alohida o’ringa egadir.
Yurtimizda, ijtimoiy-madaniy turmush sharoitimizda jismoniy tayyorgarlik muhim ahamiyatga egadir. Ayniqsa mehnat jarayonida qo’llar, oyoqlar, bel, bo’yin, yelka va boshqa a’zolarning tez ishlashi, o’tirib, egilib, tik turib ishlash yoki yuklarni ko’tarish kabi jismoniy mehnatlarni oson yo’l bilan bajarish, ularga chiday bilishni hayot taqozo etadi. Shu asosda sanoat ishlab chiqarishlari va boshqa turdagi mehnatlarda kasb-hunarga moslashtirib (o’tirib ishlaydiganlarga tez harakat qilishi va hakozo.) maxsus mashqlar berib boriladi. Bu jarayon ham o’z navbatida maxsus jismoniy tayyorgarlikning bir yo’nalishidir.
Maktabda o’quvchilarning yoshi, harakatchanligi va salomatliklarini e’tiborga olgan holda turli xil harakatli o’yinlarni («kim tez boradi», «to’pga yetib ol» va hakozo.) o’tkaziladi. Bu asosan tez yurish, yugurish, burilish kabi harakatchanlikni tarbiyalashga qaratiladi. O’tirgan, yotgan va turgan holda turli xil gimnastika mashqlarini bajarish bilan qomatni (gavdani) to’g’ri o’stirish, umurtqa pog’onalari, qo’l, oyoq, bo’yin, panja va boshqa bo’g’inlarning harakatchanligini tarbiyalash amalga oshiriladi. Kichik to’plarni otish, ilib olish, bir-biriga uzatish, mo’ljalga (doira, devor va hakozo.) otib tushirish (tekkizish) kabi xilma-xil mashqlar, o’yinlar orqali esa tez harakat qilish, chamalash (ko’z harakati) kabi faoliyatlarni o’stirish bilan birga, sport o’yinlari haqida tushunchalar hosil qilinadi va ularni sportga qiziqish havasini uyg’otiladi.
Umuman olganda barcha bolalar uchun ishlab chiqilgan «Jismoniy tarbiya» dasturining mazmuni bolalarni jismoniy tarbiyalash, ularning maxsus (harakatchanlik, muvozanat saqlash, qomatni rostlash va h.k.) jismoniy tayyorgarliklarini shakllantirishga qaratilishi bilan e’tiborga loyiqdir. O’quv yurtlardagi (boshlang’ich ta’lim I-IV sinf, umumta’lim V-IX sinf, akademik litsey, kasb-hunar kolleji, o’rta maxsus va oliy o’quv yurtlari) «Jismoniy tarbiya» dasturi o’quvchi-yoshlarning yoshi, jinsi, salomatligi va jismoniy holatlarini hisobga olgan holda ishlab chiqilgan. Shu sababdan ularga umumiy jismoniy tayyorgarlik (jismonan zaifroq, kasalmand o’quvchilar uchun) alohida olib boriladi. Jismonan sog’lom va sport turlariga ishqiboz o’quvchi yoshlarga esa qo’shimcha ravishda maxsus jismoniy tayyorgarlik mashqlari berib boriladi. Bu jarayonlar iqtidorli yoshlarni sport bilan shug’ullanishlariga safarbar etadi.2,4
Jismoniy tarbiya dasrlarida jismoniy tayyorgarlikni tarbiyalash jarayonlari o’quvchilarning layoqatlariga qarab quyidagi yo’nalishlarda olib boriladi (olib borilishi kerak):

• 
  tez yugurish (30, 60, 100 m.);
  
• 
  uzunlikka sakrash;
  
• 
  to’siqlardan (ariq, soy, chuqurlik, g’ov va h.k.) yugurib va sakrab o’tish;
  
• 
  to’pni (koptok) uzoqqa yoki mo’ljalga otish;
  
• 
  turnikda tortilish (3-4 marta);
  
• 
  kurash, boks elementlarini tez bajarish;
  
• 
  sport o’yinlarining elementlarini bajarish;
  
• 
  darvozaga to’pni tepib kiritish, to’pni tez yuritish va h.k.
  

Maxsus jismoniy tayyorgarliklarning ijobiy ta’siri, topshiriqlar va vazifalarning bajarilishini o’qituvchilar sinov-tajribalar orqali amalga oshiradi. Ko’rsatkichlar va natijalar ijobiy bo’lsa va o’sish (rivojlanish) darajalari yaxshi bo’lganda ularga yanada qo’shimcha mashqlar vazifa qilib berilishi mumkin. O’quvchi-yoshlar bilan bunday munosabatda bo’lish, maxsus ishlash jarayonlari ularni sportga jalb etish va komandalar tuzishga bevosita yordam beradi.

O’quvchi-yoshlar o’quv va sport mashg’ulotlari hamda musobaqalarda egallagan malakalarini doimo takomillashtirib borishlari, keyingi ish jarayonlarida bundan maqsadli foydalanishlari lozim bo’ladi. Yuqorida ta’kidlangan jismoniy tarbiya vositalari (turli xil mashqlar), qo’llaniladigan usullar jismoniy tayyorgarlikka asos bo’la oladi. Ya’ni tezlik, chaqqonlik, epchillik, kuchlilik, egiluvchanlik, chidamlilik kabi jismoniy sifatlarning ilk bor shakllanishi va ularni mukammallashtirishga nazariy va amaliy jihatdan yo’l ochib beradi. Boshqacha aytganda yoshlarni maxsus jismoniy tayyorgarlik va jismoniy sifatlarga ega bo’lish haqidagi bilimlar bilan qurollantiradi.

Jismoniy tayyorgarlikning xususiyatlari

Insoniyat paydo bo’lib, ijtimoiy tuzilmalarning (farmatsiya) o’zgarishi, rivojlanishi natijasida ularning mehnat va ijtimoiy turmushda eng asosiy o’rinni egallagan jihatlardan biri jismoniy jihatdan har tomonlama rivoj topish ustun bo’lgan. Bu albatta tabiiy bir holdir. Chunki hayvonlarni ov qilish yoki ularning hujumiga qarshi turish (ibtidoiy jamoa tuzumi). Yer va mulk egasi bo’lish, ishlab chiqarish jarayonlarini takomillashtirish ma’lum darajada tengsizlikni (feodalizm davri) vujudga keltirgan. Bunday jarayonlar urug’lar, qabilalar, davlatlarning o’zaro urushlariga sabab bo’lgan. Barcha ko’ngilsiz, noxush voqealardan xolos bo’lish, qarama-qarshiliklarni yengish yoki ularga bardosh berish uchun jismoniy qobiliyatlarga (kurash, mushtlashish, nayza sanchish, qilichlashish, kamondan o’q otish va hakozo.) ega bo’lishni taqozo etgan. Natijada barcha joylarda jismoniy chiniqish va tayyorgarlik jarayonlarining u yoki bu turi hamda usullariga alohida e’tibor berilgan. Ularni Markaziy Osiyo, ayniqsa hozirgi O’zbekiston hududlarida yashab o’tgan avlod-ajdodlar misolida ham ko’rish mumkin. Bundan uch ming yillar avval yashagan Zardushtiylar (hozirgi Xorazm vohasi va uning atroflari) hayoti haqida «Avesto» (Zardushtiylar qomusi) kitobi dalildir. Unda faqat xudoga sig’inish va janglarda g’olib chiqishgina tasvir etib qolinmasdan, balki ijtimoiy-tarbiyaviy jihatlar, ayniqsa ma’naviy-ma’rifiy madaniyat ham yuksak darajada o’z ifodasini topgan. Uning negizida esa bolalikdan odob, mehnat qilish, jismonan chiniqtirish masalalari ustivor turadi.
«Alpomish» dostonida qadimgi avlodlarning madaniy urf-odatlari, oriyat uchun o’z jonini ham ayamaslik, Vatan, el-yurt uchun jasorat ko’rsatish hislatlari kuylanadi. “Alpomish” timsolida kurashda yengilmaslikka, chavandozlikda chidamlilik, kamondan o’q otishda mahorat, kuch va merganlik kabi jismoniy sifatlar o’z ifodasini topgan. Shuningdek «To’maris afsonasi»da (tarixiy shaxs-ayol, taxminan eradan avvalgi V-VII asrlar) xotin-qizlarning Vatan uchun kurashi, oriyat uchun qasos olish kabi xislatlar, jasoratlar bayon etiladi. Shunga o’xshash voqealiklar va afsonalari «Go’ro’g’li» turkumidagi xalq og’zaki ijodi durdonalari, «Qirq qiz», «Kun tug’mish», «Tohir va Zuhra» dostonlarida ham uchratish mumkin.
Ayniqsa, hunarni egallash, harbiylikdagi jasorat ko’rsatish kabi maxsus tayyorgarlik jarayonlari buyuk sarkarda Amir Temur va uning sulolalari (Mirzo Ulug’bek, Bobur va hakozo.) hayotida amaliy jihatdan o’z mazmuniga ega bo’lgan. Sharq she’riyatining sultoni, Hazrati Alisher Navoiyning «Hamsa» (besh jildli kitob) asarida va undan keyingi davrlarda ijod etgan shoirlar, falsafachilar, solnomachilar (tarixchilar) va boshqalarning asarlarida qahramonlik, jangovorlik, kasb-hunar egalari to’laqonlik bilan tasvirlangan.
XIX asr oxirlari va XX asr boshlarida Ahmad polvon, Hoji Abla, Hojimurod polvon kabi shaxslar butun Markaziy Osiyoda kurashlarda qatnashib yelkasi yerga tegmagan. Bunday tarixiy shaxslar yurtimizning barcha hududlarida mavjud bo’lgan.
Umuman olganda jangovorlik, qahramonlik, kasb-hunar va oriyat yo’lida maxsus xizmatlar, tayyorgarlik faoliyatlar cheksiz ko’p va keng bo’lganligi haqida tarxiy manbalar, badiiy asarlar, tasvirlarda ularni uchratish mumkin.
Xulosa qilib aytganda barcha jangovorlik va ijtimoiy-madaniy jarayonlardagi tadbirlar mazmunida iqtidorli kishilarni maxsus jismoniy tayyorlash tadbirlari keng miqyosda olib borilgan. Bu meroslar bizning davrimizgacha yetib kelib, ularning shakllari, mazmunlari va mohiyatlari hozirgi davr talablari asosida takomillashtirilmoqda.
Inson tanasining barcha a’zolari tabiiy va sun’iy harakatlarni baja-rish qobiliyatiga ega. To’qima va xujayralardagi fiziologik, kimyoviy o’zgarishlar (ish faoliyatlar) qon aylanishi va tanani oziqlantirishda xizmat qiladi. Uning ish faoliyatini yuritishda esa o’pka (havo almashish, bosimni qanday va hokazo), yurak va boshqa ichki a’zolarning xizmati hamda o’zaro bog’liqliklari harakat faoliyatlarni ishga soladi. Bosh miya va yurak-qon aylanish tizimi ularning barchasini yo’lga soladi. Bunday anatomik-fiziologik tuzimlar, faoliyatlar eng murakkab va tabiat inom etgan xizmatdir.
Bunday faoliyatlarning tabiiy ravishda davom etishida sun’iy (maqsadli) faol harakatlar muhim ahamiyatga egadir. Shu o’rinda misol: Bola tug’ilishi bilan qo’l-oyoqlarni har xil harakatlantiradi. Kunlar, oylar va yillar o’tishi bilan esa bu jarayonlar o’sadi, kengayadi, harakat turlari (o’tirish, emaklash, tayanish, tortish, yurish va hokazo) rivoj topadi. Bunda tabiiy faol harakatlarni rivojlantirishda ota-onalarning yordami (sun’iy harakatlar qildirish: suyash, yurgizish, buyumlarni ushlatish va hokazo) asosiy o’rinda turadi.
Inson ulg’ayishi bilan kundalik ijtimoiy turmush va mehnat jarayonlarida turli tuman faol harakatlarni bajarish, taqdirlash bilan ularga ko’nikib qoladi. Ayniqsa jismoniy mehnat qilishning turlari va mazmuni doimo taqdirlanishi (ekin maydonlarini chopish, haydash, sug’orish, hosilni yig’ib olish yoki asbob-uskunalarni ishlatish, avtomashina, poyozd haydash va hokazo) ularni bir zaylda faol harakat qilishga ko’niktirib qo’yadi. Natijada tanadagi ba’zi bir a’zolar (bo’g’inlar, umurtqa pog’onalari va hokazo) asosiy faoliyatlardan (egilish, burilish, o’tirib-turish va hokazo) chetda qolishi, tanada og’riqlar, noqulayliklar keltirib chiqaradi. Bunga o’xshash voqeliklar, jarayonlar ish kasbi yuzasidan odamlarda har xil bo’lishi mumkin. Ayniqsa, hozirgi texnika taraqqiyoti davrida ko’pchilik kishilar, shuningdek o’quvchilar kompyuter tizimida ko’p vaqtlarini o’tirib o’tkazadi. Bu faqat ko’rish a’zolarinigina emas, bo’yin, yelka, bel, oyoq va boshqa a’zolarning ham harakatsizlikdan charchashiga olib boradi. Bunday holatlar qon tomirlarning harakat faoliyati susayishi va yurak urish tartibini kamaytirishga olib keladi. Jahon tibbiyot hamjamiyatining rasmiy ma’lumotlariga qaraganida qon bosimining pasayishi (gipodinamiya), yurak qon tomirlari kasalliklari bo’yicha xastalanganlarning soni AQShda ko’p uchraydi. Bu kasallikka duch bo’lgan va vafot etganlar soni har yili bir necha yuz ming kishini tashkil etadi. Buning asosiy sababi AQSHda texnikaning rivojlanishi, ularda millionlab kishilarning xizmat qilish, jismoniy mashqlar bilan kam shug’ullanishidir.
Bunday salbiy oqibatlarni yaxshi tushungan Germaniya, Yaponiya va boshqa bir qator mamlakatlarda (ular xam texnik rivojlanishda AQShdan qolishmaydi) mehnat jarayonida kuniga 2-3 marotaba (15-20 daqiqa davomida) maxsus (professional) ishlab chiqarish gimnastika mashqlari trenajyorlarda mashqlar, tennis va boshqa milliy sport turlari qismlari (elementlar) va harakatli o’yinlari maqsadli o’tkazib boradi. Bu o’z navbatida dam olish, harakatdan uzilib qolgan mushaklarni ishga solish, tana a’zolarini mustahkamlashga xizmat qiladi.
E’tibor etish lozimki, sobiq Ittifoq davrida Toshkent, Samarqand,Farg’ona, Navoiy va boshqa shaharlardagi yirik ishlab chiqarish korxonalarida oraliq (tanaffus) jismoniy tarbiya lahzalari (fizkultpauza, fizkultminut va hokazo.) tashkil qilinar edi. Shu asosda ishchilarning mehnat qobiliyatlari qayta tiklanar edi. So’nggi yillarda bu odatlar u yoki bu sabablar bilan to’xtatildi. Natijada ish qobiliyatini tiklovchi jismoniy mashqlarning mohiyatiga borgan kishilargina yolg’iz ravishda o’zlari bilgancha mashq bajarishga o’tmoqda.
Yuqorida ta’kidlanganidek, tananing salomatligi va ish faoliyatini ta’minlovchi mashqlar kasb yo’nalishi bilan bo’ladi. Qaysi soha va yo’nalishda bo’lmasin jismoniy mashqlar (gimnastika, harakatli o’yinlar, trenajyor mashqlari va hokazo.) tana a’zolarining ish mohiyatini tezlashtiradi. Bu esa yurak, qon tomirlarining urishini oshiradi. Mashqlarning bajarilish miqdori, hajmi va tezligiga qarab yurak urishi ham tezlashadi.
Ma’lumki yurak urishi instilarda doimo bir xil bo’lmaydi. Eng avvalo salomatlik va jismoniy chiniqishi bilan bevosita bog’liq bo’ladi.
Tibbiyot fanlarining asoslashiga, jismonan chiniqqan va sport yoki maxsus jismoniy mashqlar bilan doimiy shug’ullanuvchi yoshlarning yuragi tinch turgan paytida har daqiqada 60-65 marta uradi. Faol harakatlar va jismoniy mashqlar (yugurish, sakrash, sport o’yinlari, suvda suzish va hokazo.) bilan shug’ullanish jarayonida yuqoridagi ko’rsatkichlar 80-90 atrofida bo’lishi mumkin.
Jismoniy mashqlar, sport turlari bilan shug’ullanmaydigan yoshlarning yuragi har daqiqada tinch holda 70-75 marta uradi va 5-10 daqiqa jarayonida yugurish, sakrash, jismoniy mashq qilish davomida esa bu ko’rsatkich 100-110 ga chiqib ketadi. Bu yurak-qon tomirlari ish faoliyatiga ortiqcha yuk hisoblanadi. Tabiiyki bunday hollarda nafas olish ham tezlashib ketadi. Jismonan chiniqqan yoshlarda jismoniy mashqlarni bajarish jarayonida ularning nafas olish darajasi odatdagidan (tinch holda) 3-4 baravar oshsa, jis-moniy mashq qilganlarda 7-8 baravar oshib ketadi. Bu hol ham nafas yo’llarini qisish, bo’g’ilishi va holsizlanishiga olib keladi.
Bulardan shunday xulosa qilish lozimki, sinf xonasida ko’p vaqt o’tirish tana a’zolarida (o’pka, yurak, qon tomirlari va hokazo) fiziologik salbiy o’zgarishlarga olib boradi. Bu esa salomatlikning pasayishi xarakat qobiliyatining susayishiga sababchi bo’ladi. Shu sababli, barcha o’quvchi-yoshlar, ijodkorlar o’zlari sevgan sport turlari, jismoniy mashqlar, sog’lomlashtirish jarayonida shug’ullanishi lozim bo’ladi.

Bolalar va o’smirlar organizmining anatomik va fizologik xususiyatlari;

Organizm funksiyalarining rivojlanishida markaziy nerv sistemasi va, avvalo, uning oliy bo’lagi-bosh miya po’stlog’i yetakchi rol o’ynaydi. Jinsiy yetilish davriga kelib, nerv sistemasining anatomik rivojlanishi deyarli batamom tugallanadi. Miyadagi harakat analizatori yadrosi-ning yetilish jarayoni 12-13 yoshlarga kelib tugallanadi.
Katta yarim sharlar funksiyalarining qaytadan qurilishi bolalarning xulq-atvori, psixikasida o’z aksini topadi. O’smirlik yoshida bolalarning umumiy psixik qiyofasi ayniqsa tez o’zgaradi. Bolada o’z-o’zini namoyon qila borish jarayoni boshlanadi. O’smirlarda ma’lum bir faoliyat turida o’z kuchini sinab ko’rish, biror bir natijaga erishish ishtiyoqi paydo bo’ladi. O’smir turli-tuman narsalarga qiziqa boshlaydi, lekin bu qiziqishlar hali yetarlicha barqaror bo’lmaydi.
8-10 yoshda tafakkur va xotirada muhim o’zgarishlar ro’y beradi. Ta’lim va tarbiya jarayonida mantiqiy fikr yuritish va abstrakt tafakkur qilish qobiliyati rivojlanadi. O’rganilayotgan harakatlarga tanqidiy yondashish paydo bo’ladi. Xotira ishidagi o’zgarishlar shunda ifodalanadiki, esga olish ancha kichik yoshda bo’lganidek konkret hodisalardan umumiy xulosalar chiqarishga qarab bormaydi, balki umumiy tasavvurlardan borliqdagi konkret hodisalarning ayrim detallarini xotirada tiklashga qarab boradi. Shuning uchun bu yoshda sport turlari elementlari o’rganishni (texnikani bajarish detallariga alohida e’tibor bergan holda) yaxlit uslub asosida olib borish maqsadga muvofiqdir.
Bolalarda harakatlarni eslab qolish qobiliyati yosh oshib borgan sari ham miqdor, ham sifat jihatidan o’zgaradi. Bolalarning eslab qolish qobiliyati 7 yoshdan 12 yoshgacha bo’lgan davrda juda tez o’sib boradi. Bu davrda erkin harakatlar koordinatsiyasi ancha yaxshilanadi. Harakatlarga avvalgiga qaraganda kam kuch sarflanadi va ular tobora harakatlarni aniq va tez bajariladigan bo’lib boradi. 9-10 yoshli bolalar futbol o’yinining eng oddiy usullarini nisbatan oson o’zlashtirib oladilar, shu bilan birga, kattaroq yoshda ularni yanada takomillashtirish ishi ancha muvaffaqiyatli bo’ladi. 13-14 yoshli o’smirlarda koordina-siya bo’yicha murakkab harakatlarni o’rganishda pubertat davrining tormozlovchi ta’siri sezilarlidir. Bolalar bilan ishlovchi murabbiy va pedagoglar shuni hisobga olishlari kerakki, bolalar sport turlari bilan qancha erta shug’ullana boshlasa, ularda shug’ullanuvchilar imkoniyatlariga mos bo’lgan harakat ko’nikmalari shunchalik tez va oson hosil qilinadi.
Bola yoshligidan sport bilan shug’ullansa, bu – organizmning shakllanishiga ijobiy ta’sir ko’rsatadi. Bu ta’sir ikki xil namoyon bo’ladi: morfologik o’zgarishlar – bunda antropometrik belgilar tez o’sadi; funksional o’zgarishlar – bunda ishchanlik qobiliyati o’sadi.
Jismoniy mashqlarning suyak tizimi rivojlanishiga ta’siri ayniqsa sezilarlidir (bolalik yoshida suyak tizimida juda ko’p o’zgarishlar bo’ladi). Masalan, juda ko’p tadqiqotlar bolalar umurtqa pog’onasining juda ham qayishqoqligi va uzoq vaqt zo’riqish natijasida noto’g’ri holatda bo’lishi tufayli qiyshayib qolishi mumkinligidan dalolat beradi. 8-9 yoshli bolalarning umurtqa pog’onasi juda ham harakatchan bo’ladi. Bolalarda bo’yin va ko’krak qafasi bukiklari maktab yoshiga kelib qotadi. Bel bukiklari esa faqat balog’at yoshiga yetish davriga kelib to’liq qotadi. Umurtqa pog’onasining qiyshayishi tufayli kuzatiladigan qaddi-qomatdagi buzilishning ko’pchiligi 11-15 yoshlarda ro’y beradi. Bu yoshda umurtqa pog’onasining to’g’ri rivojlanishi uchun umurtqa mushaklarini mustahkamlashga yordam beruvchi mashqlar bajarishni topshirish juda muhimdir.
Bolalik yoshida suyak qotish jarayoni hali tugallanmagan bo’lishini hisobga olish kerak. 9-11 yoshlarga kelib, odatda, qo’l barmoqlarining suyagi, bir oz keyinroq, 10-13 yoshlarda bilak va jag’ suyaklari, 14-16 yoshlarda bilak va jag’ suyaklari qotadi. 14-16 yoshlarda epifizar kemirchaklarda, umurtqa pog’onalari orasidagi disklarda suyak qotish zonalari paydo bo’ladi.
Bolalar skeletining jadal rivojlanishi ularning mushaklari, paylari va bog’lovchi bo’g’in apparatining shakllanishi bilan mustahkam bog’langan.
Bolada 8 yoshda mushaklar og’irligi gavda og’irligining 27% ini, 12 yoshda –29,4% ini, 15 yoshda – 32% ini, 18 yoshlarga kelib esa 44,2% gacha tashkil etadi. Mushaklar og’irligining ortishi bilan birga ularning funksional xossalari ham takomillashib boradi.
Mushaklarning funksional xossalari 7 yoshdan 10 yoshgacha bo’lgan davrda jiddiy o’zgaradi. 14-15 yoshli bolaning mushaklari o’zining funksional hossalariga ko’ra katta yoshli kishining mushaklaridan unchalik farq qilmaydi. 11 yoshdan 19 yoshgacha bo’lgan davrda yoshlarning mushak kuchi bir tekisda rivojlanib bormaydi. 13 yoshdan 15 yoshgacha mushak kuchi eng ko’p o’sadi. Asosiy kuch ko’rsatkichlari 73,2 dan 103,2 kg gacha, ya’ni 30 kg ga ortadi. 15-17 yoshda absolyut mushak kuchi kam o’zgaradi, faqat 16-20 yoshlarda u katta kishiga xos bo’lgan darajaga yetadi. 17-19 yoshli yoshlarda asosiy kuch miqdori tegishlicha 126; 136,3; 159,1 kg ga yetadi. Asosiy kuch ko’rsatkichlarining o’rtacha yillik o’sishi yoshlarda 12,3 kg ni tashkil etadi. 12 yoshdan 18 yoshgacha mushak kuchining o’sishini ko’rsatuvchi maksimal miqdor tovon mushaklari bilan ifodalaniladi (2,5 marta).
Bolalar va o’smirlarning organizmi tezlik yuklamalariga yaxshi moslashadi. Shuning uchun 8 yoshdan 15 yoshgacha bo’lgan davr tezlikni va kuch sifatlarini rivojlantirish ham yosh ortgan sari qat’iy oshib boradi. Ular 13 yoshdan 16 yoshgacha eng yuqori darajada rivojlanadi. Bu davrlarda turgan joydan balandlikka sakrash natijalarining yillik o’sish ko’rsatkichlari tegishlicha 3,7 va 6,2 sm ga tengdir. 11 yoshdan 19 yoshgacha bo’lgan davrda sakrash balandligi 24 sm ga ortadi.
Bolalarda chaqqonlikning yoshga qarab rivojlanishi 10 yoshgacha ancha jadal bo’ladi. Keyingi yillarda chaqqonlik harakat apparati funksional imkoniyatlarining qat’iy ortishi hisobiga anchagina rivojlandi.
Kichik maktab yoshi (7-11 yosh) egiluvchanlikni rivojlantirish uchun eng qulay yoshdir. Xuddi shu yoshlarda bo’g’imlardagi harakatchanlik bilan mushaklarning baquvvat bo’lishi o’rtasida optimal nisbat kuzatiladi.
Maksimal tezlikning 75% ga to’g’ri keladigan tezlik bilan yugurish uzunligi bo’yicha aniqlanadigan chidamlilikning eng ko’p o’sishi 13-14 yoshlarda kuzatiladi, 15-16 yoshda chidamlilik kamayadi. Bu maksimal tezlikning o’sishi va buning natijasida ish quvvatining ortishi bilan tushuntiriladi. 17 yoshda o’smirlarda chidamlilik yana ortadi.
O’quvchilarning tashqi tuzilishi va ko’rinishini tekshirishda asoan bo’g’inlar suyaklarning holati (to’g’ri yoki qiyshiqligi), ba’zan terisining tozaligi (kasallik alomatlari yoki yaralar boshlanishi) jiddiy ravishda tekshirib ko’riladi. Illati bor o’quvchilarni maxsus guruhlarga ajratish yoki qo’shimcha tekshirish, ko’rikka yuboriladi.
Ko’rik-sinov va tekshirishda bo’yi, ko’krak, bo’yin, qo’llar va oyoqlarning uzunligi, toz va boshqa a’zolar o’lchanadi va o’quvchining maxsus hisob kartochkasiga yoziladi. Shuningdek, vena qon tomiri, yurak urishi, nafas olish tezligi ham o’lchanadi. Bunday hollarda o’quvchilarni turli faol harakatlar qilishga (joyda yurish, yugurish, sakrash va hokazo.) da’vat etiladi.

Antropometrik o’lchovlar:

Antropometrik o’lchov tushunchasi, asosan maxsus asbob-uskunalar, o’lchov vositalari texnik qurollar orqali odam tanasining tuzilishi, og’irligi, uzunliklar, mushaklarning kuchlari, qon tomiri urishi tezligi, nafas olishini chuqurligi va boshqa inson omillari aniqlanadi. Bunday o’lchovlar bilan tibbiy ko’rik, sinov o’tkazish va nazorat qilib borish ancha vaqt va mutaxassislar sonining ko’p bo’lishini taqazo etadi.
Spirometriya (puflab to’ldirish) asbobi orqali nafas olishning chuqurligi, o’pka sig’imining hajmi aniqlanadi. Tajribalarga qaraganda jismoniy jihatdan chiniqmaganlarning o’pkadan davo sig’imi-3800-4200 sm 3, o’quvchi qizlarda 5000 sm 3 gacha bo’lishi aniqlangan.
Mushaklarning kuchi dinamometriya, stanometriya kabi asboblar bilan o’lchanadi.
Yelka mushaklarining kuchini o’lchashda gantelni (3 kg) ma’lum vaqtgacha ushlab turish yoki ularni ko’proq ko’tarish (baland va yonga) bilan belgilanadi. Ya’ni kim ko’proq ko’tarsa uning kuchi ko’p bo’ladi.
Yugurish, suvda suzish va boshqa sport turlarida bajarilgan faol harakat-larning natijasida sekundomer, elektron hisoblash mashinalari (EXM) orqali o’lchanadi. Sakrash, uloqtirish, irg’itish kabi turlarda asosan ruletkalar orqali o’lchanadi.
Umuman olganda tashqi ko’rinishi va tana a’zolarining funksional faoliyatlarini doimiy ravishda o’lchab-tekshirib borish natijalari o’quvchilarning jismoniy chiniqishi, rivojlanishi hamda mahorat yuritishida muhim tarbiyaviy ahamiyatga egadir. Ma’lumki, insonlarning ish qobiliyati, ayniqsa o’quvchilarning aqliy mehnat, o’quv jarayonlarida tananing (organizmning) ish qobiliyati asosiy o’rinda turadi. Bunda yurak va qon tomirlarining urishi, mehnatga tayyorgarligi muhim ahamiyat kasb etadi. Yurak va tomirlarining funksional harakatini o’lchashda turli hil vositalar va usullardan foydalaniladi, ya’ni:
Vena qon tomirlarini barmoqlar bilan bosib turib, 10 soniya (sekund) davomida necha marta urishi aniqlanadi. Masalan shu vaqt ichida 12 marta tomir urildi, deylik. Bir daqiqada (60 soniya) yurak urishini (qon tomiri orqali) aniqlash uchun 12 x 6 q 72 usulidan foydalaniladi. Demak, tekshiruvchining tinch holatda turishdagi yurak urishi 72 marta ekanligi aniq bo’ladi. Bu tibbiy jihatdan normal holatdir. Ya’ni sog’lom kishilarda tinch holda yurak tizimi urish darajasi 70-80 tani tashkil qiladi. Joyida sakrash va boshqa shunga o’xshash mashqlarni 5 daqiqa davomida bajarganda yuqoridagi ko’rsatkich 120-130 tani va undan ham ortiqroq sonni ko’rsatishi mumkin. Sport bilan shug’ullanuvchilarda bu ko’rsatkichlar ancha past bo’lishi kuzatilgan.
Tibbiy xodimlar yurak va qon aylinishi tizimi faoliyatlarini tonometr (tovush eshitishni o’lchash) va metronom (chizish-qiyshiqliklar belgisi) orqali aniqlaydilar. Bu usulda balandlikka (45-50 sm) chiqish, tushish, yugurish, ba’zi yengil va murakkab mashqlarni bajarish yo’li bilan o’tkaziladi. Bunday hollarda harakat oldi, harakat jarayoni, harakatdan keyin tez va 5 daqiqa o’tgach o’lchanadi. Bu usullarda tonometr va metranom texnik vositalari aniq ko’rsatkichlarni bera oladi.
Keyingi yillarda tibbiy ko’rik va nazoratlarni o’tkazishda eng yangi texnik vositalardan (EXM, kompyuterlar, diagnoz qo’yish texnik asboblar va hokazo) maqsadli foydalanilmoqda. Xulosa qilganda, shifokorlarning tanani tashqi tekshirish va a’zolarning jismoniy holatlarini aniqlashda turli usullar hamda maxsus texnik asbob-uskunalardan foydalanilmoqda. Bular o’quvchilarning salomatligini belgilash va jismoniy tarbiya va sport bilan erkin shug’ullanishlariga yo’l ochib bermoqda.