Vİlayət bağçası altıncı cİld

Universitetlər və ölkənin elmi qüvvəsi⁸

Bismillahir-Rəhmanir-Rəhim.

Şübhə yoxdur ki, sizin səmimi toplantınızda sözlə dolu sinələr az deyil. Çoxlarının ən azı öz fikirlərinə görə, deməli və eşitməli sözləri var. Bizim bugünkü məclisimizdə də belə sözlərin yeri boşdur. Amma əfsus ki, vaxt yoxdur. Əgər vaxt olsaydı, mən bütün qocalığıma və hövsələsizliyimə rəğmən, yenə də səbirlə dinləyərdim.
Sözü udmaq

Gənclər bir qədər sözlərini udmağa adət etsinlər. Bu da bir təlimdir. Həyatın mühüm məsələlərində insanın sözü olub demək istədiyi, lakin hər hansı səbəbdən sözünü udmalı olduğu zamanlar çox olur. Bəzi yerlərdə bu, daha böyük xeyirdən irəli gəlir. Buna da adət etsəniz, pis olmaz. Öz yerində inşallah, fürsət olacaq və düşündüyünüzü deyəcəksiniz.

Bizim tarixi mövqeyimiz

Gənclər üçün vacib olan birinci məsələ budur ki, bizim mövqeyimiz, yerimiz haradır? Qısa bir cümlədə demək istəyirəm ki, dünyada və beynəlxalq miqyasda bizim yerimiz istismarçı güc mərkəzlərinin hökmranlığından, fəsad hakimiyyətindən yaranan çirkin, çətin və dərdli hallara əngəl törətməkdir. Bunu əhəmiyyətsiz saymayın. Pul bu gün maddə aləminin ən zərif, ən lətafətli və ən gözəl həqiqətlərini ələ keçirə bilmişdir; əziz gəncimizin burada dediyi incəsənət məsələsi kimi. Bu gün dünya kinosunun ən görkəmli və ən güclü nümunələri Hollivuddadır. Siz görün Hollivud nəyə, kimə xidmət edir? İnkişaf etməkdə olan yazıq bəşəriyyət üçün hansı düşüncəyə, istiqamətə və hansı yuxuya xidmət edir? Mənim nə kino ixtisasım var, nə də Hollivudu yaxşı tanıyıram. Ona görə də, bunu mən demirəm. Bu, iş-peşələri bu sahədə olan şəxslərin sözüdür. Onlar düşünürlər, tənqid edirlər. Mən Hollivudu ən görkəmli kino sənətinin mərkəzi kimi misal çəkdim, yoxsa dunyanın digər kino mərkəzləri də belədir. Tənqidçilər deyirlər ki, bu gün kino sənəti pozğunluğu, puçluğu, şəxsiyyətsizliyi və kobudluğu yayır, xalqları bir-birinə vurub uca və yüksək təbəqənin asudə yaşayışını təmin edir. Çox inkişaf etmiş və modern bir sənət olan kino da belədir, şeir də, hekayə də, rəssamlıq da, incəsənətin digər sahələri də.

Biz və dünyanın ümumi heysiyyəti

İqtisadi güclər dindən də istifadə edirlər, kilsədən də. Bir-iki il bundan öncə mən amerikalı bir yazıçının burada tərcümə və çap olunan bir kitabını oxudum. O həmin kitabda bu güclərin kilsədən istifadəsini şərh etmişdir. Kilsənin adını çəkməklə demək istəmirəm ki, məscid belə deyil. Xeyr, qüdrət, pul və güc mərkəzləri məsciddən, mənəviyyatdan da istifadə edirlər. Pulun dünyaya hökmranlığı çox dəhşətli bir şeydir. Bunun nəticəsi böyük qlobal yoxsulluq, bir neçə milyard insanın aclığı, bəşərin inkişafda olan nəsillərinin səhv və mənəviyyata zidd tərbiyəsi, xalqlara məcbur edilən müharibələr və beynəlxalq təşkilatların oyuncaq edilməsidir. MAQATE misal üçün deyildi və hamı deyir. Bu, bir nümunədir. Bu təşkilat Birləşmiş Millətlər Təşkilatına bağlıdır, atom silahlarının yayılmamasına nəzarət üçün yaradılmışdır. Siz görün onun ölkələrlə rəftarı necədir, onda ayrıseçkilik və siyasi müdaxilə hansı həddədir. Bunlar bugünkü dünyanın böyük çirkinlikləri və problemləridir. Kim bunlarla mübarizə aparsın? Beynəlxalq toplumun böyük heysiyyətindən söhbət gedir. Bu gün bu böyük beynəlxalq heysiyyət formalaşmaqdadır və onun mərkəzi İslam Respublikasıdır. Bunlar barədə fikirləşin. Bunlar keçiləsi və xırda məsələlər deyil.

Ümidlə dayanmaq

İslam Respublikasının sarsılmaz vücuduna davamlı olaraq vurulan qamçıların səbəbi budur. Çünki biz dayanmışıq; təbii ki, ümidsiz yox, ümidlə. Bəziləri dayanmışlar və deyirlər ki, biz son damla qanımıza qədər duruş gətirəcəyik. Əlbəttə, biz də lazım olsa, son damla qanımızı da verərik, amma bilirik ki, son damla qana ehtiyac olmayacaq.

İran İslam Respublikasının strateji gücü

Biz inkişaf etmiş və bacarmışıq. İnqilabın bizim üçün təsvir etdiyi istiqamətlərdə nəzərəçarpacaq şəkildə irəliləmişik. Dünyanın siyasi güc mərkəzləri açıq-aşkar deyirlər ki, İran regional gücə çevrilmişdir, əgər filan-filan işləri görməsək, qlobal gücə çevriləcək. Bu, zarafatdırmı?! Bu, azdırmı?! Siz elə bilirsiniz ki, elmi cəhətdən inkişaf etmiş postmodern dünyada xalqın dayağı ilə bir dövlətin qurulub belə mövqe qazanması asandır?! Bu gün bu, baş tutmuşdur. Burada ucaldılan bu çadırın İslam torpaqlarında olan ipləri və dərin mıxları digər ölkələrdə yerə bərkidlmişdir. Bizim müxtəlif xalqlar arasında strateji gücümüz var. Siz inşallah, daha geniş işlərə başlayanda, ölkələrə səfər edəndə, xalqların arasına çıxanda bunu daha artıq hiss edəcəksiniz. İslam Respublikası müsəlman xalqların ürəyində özünə yer açmışdır. Biz bəzi məsələlərə adət etmişik. İranın prezidentləri qalxıb başqa ölkələrə gedirlər, onları qarşılayan xalq heç bir ölkə prezidenti üçün təsəvvür olunmayan izdiham yaradır. Bu, bir həqiqətdir. Mən də prezident olarkən başqa ölkələrə səfər edirdim, onda da belə idi. Məndən sonrakı və daha sonrakı prezidentlər də müxtəlif ölkələrə getdilər və xalqlar onlara sevgi bildirdilər. Bu, həmin prezidentin hünəri deyil, böyük hərəkətin hünəridir. Bu, təlatüm yaradan hərəkətin, sizin heysiyyətinizin, İslam Respublikası quruluşunun hünəridir. Bizim mövqeyimiz belədir. Biz şeytan qurumlarının mərkəzləşmiş iqtisadi gücünün özü üçün yaratdığı yanlış təməllərə əngəl törədə bilərik. Dünyada müharibə, qəhətlik və böhran yaradırlar. Avropada yaşayan bir amerikalı və yəhudi iş adamı Malayziya, İndoneziya, Filippin və Taylandı müflis edə bildi. Pulun gücünə baxın! Buna əsasən, iqtisadi güclər böhran yarada bilirlər. Böhran yaratmaq, müharibə törətmək, İsrail kimi kobud və qəddar dövlətlər qurmaq bunların işidir.

Müstəmləkə quruluşuna qarşı maneə

Bunlara mane olmaq lazımdır. Kim bacarar? Canlı və yorulmaz beynəlxalq toplumun ürəkdən gələn imana söykənən heysiyyəti. İnsanı yorulmağa qoymayan budur. Dini təravətli imandan başqa hər şey yorulasıdır. Bu həmin güclərə maneə törədib düzəldə və nəhayət, ortadan götürə bilər. İnşallah, İmam Mehdinin (ə) ədalətli dövlətində bu işlər baş tutacaq. Lakin biz də onun üçün hazırlıq görmək istəyirik; əgər iradəmiz, əzmkarlığımız, müqavimətimiz və siyasətimiz olsa. Bu işlər üçün həm müqavimət, cəsarət və qüvvə lazımdır, həm də ağıl və siyasət. Bunlar əl altında olan və bitirilməsi asan işlərdən deyil, amma mümkündür. İndiyə qədər də mümkün olmuşdur. Bu gün nüvə məsələsinin həll olunduğu İslam Respublikası quruluşu həmin quruluşdur ki, yarandığı birinci gün dünya hegemonları nə təsəvvür edirdilər və nə də təsəvvür edirdilərsə, bu ölkənin elmi sahələrdə inkişaf edə bilməsinə zərrə qədər razı idilər. Gənclərin biri indi dedi ki, bizim inqilabımızın əvvəllərində universitetlərdə müəllim problemi var idi, həkim problemi var idi, mütəxəssis problemi var idi, amma bu gün ölkəmiz elmi cəhətdən inkişaf etmişdir. Əlbəttə, biz öz işlərimizi azaltmamalıyıq. İndiyə qədər əldə edilənlər əldə edilməsi lazım olanlara və bizim bacarıqlarımıza nisbətən çox azdır.

Təxribatın kökləri

Bir neçə gün bundan qabaq burada müəllimlərin iclası keçirildi. Müxtəlif fənn müəllimlərindən olan bir neçə nəfər mənim həmişə ürəkdən və möhkəm inandığım məsələ üzərində təkid göstərdilər. Dedilər ki, İslam Respublikası quruluşunun istedadı və bacarığı bunlardan çoxdur. Biz bacarırıq. Bizim yerimiz budur. Əgər bu gün əleyhimizə çalışdıqlarını, işlədiklərini, təxribat hazırladıqlarını və hücum etdiklərini görürsünüzsə, bu mövqeyə görədir. Bu, birinci məsələ.

Güc istehsalı strategiyası

İkinci məsələ budur ki, bu problem qarşısında necə uğur qazana bilərik? Bu siz gənclərə sıx bağlı bir məsələdir. Müxtəlif sahələrdə yaratmalı olduğumuz qüvvələr arasında birinci yerdə elm durur. Universitetlər bu sahədə məsuliyyət daşıyır. Cənabların biri burada dedi ki, gəlin MAQATE adlanan nüvə silahlarının yayılmaması müqaviləsinin yerinə, dünyada bu silahların məhv edilməsi məsələsini müzakirəyə çıxaraq. Bu, çox yaxşı və maraqlı ideyadır, deməsi də çox asandır. Amma bir beynəlxalq müqavilə bir neçə nəfərin sözü ilə bağlanmır. Bunu bir beynəlxalq müqavilə formasına çıxarmaq üçün güclü dəstək lazımdır. O zamanın birinci dərəcəli iki gücü olan ABŞ və SSRİ oturub silahların məhv edilməsinə dair razılaşdılar, amma əməl iradəsi olmadığından alınmadı. Kim silahların məhv edilməsi adlı bir müqaviləni ortaya qoyub dünya ölkələrini bu müqaviləyə əməl etməyə məcbur edə bilər? Əlbəttə, mütləq silah gücünə məcbur etmək yox, siyasət gücünə, hakim mədəni müzakirə və milli şəxsiyyətin qələbəsi gücünə. Bunu yalnız qüdrətli bir ölkə edə bilər.

Qüdrətin bazisi: elm

Qüvvə əldə edin. Əgər İslam İranı elmi sahədə öz sözünü dünyanın birinci sözləri səviyyəsinə qaldıra bilsə, iş mümkün olar. Çünki elm sərvət də yaradır, hərbi güc də, özünəinam da. Mən dəfələrlə demişəm, yenə də deyirəm və dəfələrlə təkid edəcəyəm ki, siz əziz xalqın gələcək qüdrətinin təməli və bazisi elmi qüvvədir.

Universtetləri sıradan çıxarmaq təxribatına qarşı mübarizə

Universitetlərə ciddi baxmaq lazımdır; həm siz tələbələr, həm müəllimlər. Bilin ki, universitetlərimizi sıradan çıxarmaq üçün planlar var. Siz kədərlənirsiniz ki, tədqiqat mərkəzlərinin büdcəsini gec verirlər. Çox yaxşı, bunu düzəltmək, bununla maraqlanmaq olar. Amma bəziləri çalışır və təxribat hazırlayırlar ki, ümumiyyətlə, dərsləri və tədqiqat mərkəzlərini bağlasınlar, tələbəni elmə və öyrənməyə həvəssiz etsinlər. Bu təxribata qarşı mübarizə aparmaq lazımdır. Bu mübarizə həm hökumətin və məmurların işidir, həm siz birliklərin, həm də nüfuzlu və görkəmli şəxslərin.

İlahi! Bu ramazan ayında bizim qəlblərmizi Özünlə daha tanış və Özünə daha yaxın et!

İlahi! Gənclərin qəlbinə lütf göstərib şəffaflıqla və mənəviyyatla bəzədiyin nurluluğu bizim İslam ölkəmizin əziz gəncləri üçün həmişə qoru!

İlahi! Bizim gənclərimizin dualarını qəbul et, onların istəklərini həyata keçir!

Bizim yaxşı tələbə gənclərimizlə ölkəmizin digər gəncləri arasında əlaqəni günbəgün artır! Bu, dostların birinin sözü idi və mən onu dua ilə təsdiqləmək istədim.

Allahın salamı və rəhməti olsun sizə!