Şakir Musayev
116
BÖLMƏ II
MƏHKƏMƏ-TİBB EKSPERTİNİN (MƏHKƏMƏ-
TƏBABƏTİ SAHƏSİNDƏ MÜTƏXƏSSİSİN)
PROSESSUAL HƏRƏKƏTLƏRDƏ İŞTİRAKININ
TƏŞKİLATİ VƏ METODİK ƏSASLARI
FƏSİL 6. İSTİNTAQ VƏ MƏHKƏMƏ
HƏRƏKƏTLƏRİNDƏ MƏHKƏMƏ-TİBB
EKSPERTİNİN (MÜTƏXƏSSİSİN) İŞTİRAKININ
ÜMUMİ QAYDALARI
Cinayət mühakimə icraatında məhkəmə-tibbi biliklərdən
istifadənin praktiki formalarının təşkilati və metodik əsasları müxtəlif
təkmilləşdirmə dərəcəsinə malikdir. Məhkəmə-tibbi ekspertizanın
hüquqi nizamlanması, təyini, təşkili və icrası, hadisə yerinə və meyitə
baxışın, ekshumasiyanın keçirilməsi və şəxsin müayinəsi kimi
istintaq hərəkətlərində mütəxəssislərin iştirakı məsələləri daha ətraflı
elmi işlənilərək lazımi qaydaya salınmışdır. Son illərdə alimlər və
praktiki işlə məşğul olan mütəxəssislər tərəfindən istintaq
eksperimentinin keçirilməsində
məhkəmə-tibbi xidmətin
imkanlarından istifadə olunmasına xüsusi diqqət xeyli artmışdır.
Xüsusən kütləvi insan qırğınlarına səbəb olan müxtəlif ekstremal
şəraitlərdə meyitlərin tanınması işinin təşkilində məhkəmə-tibbi
xidmətin rolu və vəzifəsi böyük elmi maraq yaratmışdır. Bununla
yanaşı, ekspertlərin (mütəxəssislərin) məhkəmə-tibb fəaliyyətinin
təcrübədə geniş yayılmış digər formaları dindirilmə keçirilməsində,
müqayisəli müayinə üçün nümunələrin götürülməsində və ifadələrin
yoxlanılmasında iştirakı məhkəmə-tibbi ədəbiyyatlarda lazımi
dərəcədə öz əksini tapmamışdır və hərtərəfli öyrənilməmişdir.
Məhkəmə-təbabəti və kriminalistikaya aid dərslik və
monoqrafiyalarda məhkəmə-təbabəti sahəsində mütəxəssisin istintaq
hərəkətlərində iştirakına dair ətraflı metodik məlumatlar yoxdur.
Məhkəmə tibbi fəaliyyətin bu aspektlərinə aid məlumatlara ümumi və
yaxud az yer verilmişdir.
| 
