Ўзбекистон Республикаси Олий ва ўрта

San’atda janr muammosi. Biz yuqorida san’atning xillarga va turlarga bo‘linishini hamda har bir san’at turi voqelikni estetik in’ikos ettirishda o‘ziga xos mavqega ega ekanini ko‘rib o‘tdik. San’at turlarining o‘zi ham ana shunday muayyan qismlarga bo‘linadi – ularni biz janrlar deb ataymiz. Estetikaga doir adabiyotlarda janrni san’atshunoslik fanlarining muammosi deb hisoblash va uning estetik mohiyati to‘g‘risida engil=elpi to‘xtalib o‘tish hollari ko‘p uchraydi. Bu – noto‘g‘ri yondashuv: estetika san’at xilini, undan kelib chiqadigan turlarni, badiiy asarni atroflicha o‘rgangani holda, san’at turi bilan badiiy asar oralig‘idagi janr muammosiga jiddiy e’tibor qilmay, o‘tib ketolmaydi. CHunki hech bir san’at turi to‘g‘ridan=to‘g‘ri o‘zini namoyon eta olmaydi, faqat janr vositasidagina muayyan san’at turiga oid badiiy asar vujudga keladi.
Avvalo shuni aytish kerakki, janr san’atning ko‘zgusi, har bir janr=ko‘zgu voqelikni o‘z hajmi – in’ikos doirasida aks ettiradi. Masalan, romanning in’ikos doirasi – boshqa, hikoyaniki – boshqa. Biz yuzlab romanlarni, hikoyalarni, natyurmortlarni, qo‘shiqlarni bilamiz. Lekin ularning birortasi ikkinchisini takrorlamaydi. Masalan, ulkan o‘zbek adibi SHukur Xolmirzaevning hikoyalari o‘zaro bir=biridan ham, Said Ahmadning yoki Folknerning hikoyalaridan ham farq qiladi. Ayni zamonda biz ularning hammasini “hikoya” degan nom bilan ataymiz. Ana shu umumiy nom janr deb ataladi. SHundan kelib chiqib, janrni san’atning tarixiy taraqqiyoti mobaynida ko‘plab asarlarda takrorlanadigan, biroq voqelikni san’atkorning o‘ziga xos nigohi bilan o‘ziga xos yo‘lda aks ettiradigan yagona kompozitsion tuzilma, desak xato qilmagan bo‘lamiz.
San’at turlarining janrlarga bo‘linishi ularni tasniflashtirish singari murakkab, “motorni yig‘ganda, doimo bir necha murvat ortib qoladigan” estetik muammo, sababi, bir tomondan janrlarning nihoyatda rang=barangligi bo‘lsa, ikkinchi tomondan, ularning san’at turlaridagi mavqeini belgilashdagi fikrlar xilma=xilligi, ya’ni ko‘p hollarda muayyan janr haqiqatan ham janrmi yoki uning ko‘rinishlaridan birimi degan masala estetiklar oldida ko‘ndalang turadi. Masalan, badiiy adabiyotdagi – janrlar bo‘linishi eng murakkab bo‘lgan san’at turidagi she’r janrini olib ko‘raylik. SHe’r o‘zi, qissa yoki dostondan farqli o‘laroq, alohida janr, lekin ayni zamonda u intim, ijtimoiy, falsafiy, manzaraviy, hajviy janrlarda yozilishi mumkin. Demak, she’r janri yana janrlarga bo‘linadi. Bunday janriy bo‘linish ko‘proq g‘oyaviy=hissiy tabiatga ega: intim she’r – lirik qahramonning ishqiy, sub’ektiv kechinmalarini aks ettiradi, falsafiy she’rda–hikmatli xulosaga, donishmandlikka moyillik birinchi o‘rinda turadi v.h. Ayni paytda bunday she’rlar har xil ko‘rinishlarda yozilishi mumkin; g‘azal, sonet, ruboiy, masal v.b. Endi savol tug‘iladi: she’r – janr, falsafiy she’r – janr bo‘lsa, unda hikmatli satrlardan iborat g‘azal shaklidagi she’r nima? Uni janr nuqtai nazaridan falsafiy she’r deymizmi, yoki g‘azalmi? SHuningdek, Oybekning “Navoiy” asari romanmi yo tarixiy roman janridagi badiiy ijod mahsulimi?
Bu boradagi tadqiqotlarning so‘nggi xulosasi tizimli tahlil natijalari bo‘lib, unga ko‘ra janrlar bosqichma=bosqich bo‘linish tabiatiga ega²⁰. YA’ni, roman ham janr, tarixiy roman ham janr, hajviy roman ham janr v.h. Darhaqiqat, hozircha san’at turlarining bundan qulayroq janriy bo‘linishini tasavvur qilish qiyin. To‘g‘ri, ba’zi estetiklar, janr va uning ko‘rinishlari degan atamani qo‘llashni taklif etishadi, komediya – janr, kinokomediya – janrning bir ko‘rinishi yoki shakli. Lekin bunday, deylik, tarixiy romanni–roman janrining tarixiy ko‘rinishi deb atashimiz noamaliy va sun’iy ekanini hamma yaxshi his qilsa kerak. Buning ustiga, shunday asarlar borki, ular bir necha janrga birvarakay taalluqli bo‘lishi mumkin. Masalan, Fitratning “Qiyomat” asarini ham hikoya, ham hajviy hikoya, ham xayoliy hikoya tarzida janrlarga bo‘lishimiz mumkin. Ba’zan ikki alohida, hatto bir=biriga qarama=qarshi janr birlashib, yangi janrni tashkil etganini ko‘ramiz. Masalan, teatr san’atida tragikomediya janri mavjud. SHuningdek, bir janr ikki va undan ortiq san’at turiga “xizmat” qilishi mumkin. Masalan, telefilm ham kino, ham televidenie san’atida, manzara janri esa, ham rassomlik ham badiiy adabiyotda qo‘llaniladi. Farq shundaki, ular badiiy asarni o‘zlari taalluqli bo‘lgan san’at turlari talablari vositasida yaratilishini ta’minlaydilar.
Umuman, san’at tarixida janrlarning doimiy o‘zgarib turishi–yangilanishi, eskirishi, ko‘payishi, iste’moldan chiqib ketishi kabi hollarni tabiiy deb hisoblash kerak. CHunki jamiyat taraqqiyoti, inson shaxsining cheksiz darajadagi o‘zgarib borishi an’anaviy janrlardan kechish va yangilarini yaratishni talab qiladi. Masalan, keyingi ikki asr mobaynida she’riy roman, she’riy qissa, she’riy novella janrlari vujudga kelgani holda, o‘nlab “eskirgan” she’riy janrlar iste’moldan chiqib ketdi. Biroq, bunday hodisalarning hech biri qandaydir ko‘rsatmalar yoki qonunlar talabi asosida ro‘y bermaydi, balki san’atning demokratik xususiyatidan kelib chiqqan holda, san’atkor va badiiy asarni idrok etuvchi o‘rtasidagi bir=birini tushunishning pirovard natijasi sifatida voqe bo‘ladi.
SHunday qilib, biz mazkur bob mobaynida san’at xillari, turlari va janrlarini tasniflashtirishdek murakkab masalalarni baholi qudrat ko‘rib o‘tdik. Bizning ba’zi mulohazalarimiz, ilmiy xulosalarimiz umumjahoniy ildizga ega bo‘lgan milliy estetikamizda bu boradagi dastlabki nazariy yondashuvlardir. Biroq ularni mutlaqlashtirishdan yiroqmiz, asosiy maqsad talabalar va domlalarda mustaqil fikrlash malakasini yuksaltirishdan iborat.