Qolipning hajmini belgilash. Kerakli miqdorda tortib olingan massa qolip teshigiga solinadi, bunda puanson qolip tubi hisoblanib eng pastki nuqtada joylashgan bo‘ladi. So‘ng massa qolipning yuzasi bilan bir tekislikda joylashguncha pastki puanson bir me’yorda asta-sekin ko‘tariladi va shu nuqtada mahkamlab qo‘yiladi.
YUqori puansonni moslashtirish. Qolip hajmini moslashtirib bo‘lgach, yuqori puanson asta-sekinlik bilan qolip tomonga tushiriladi, natijada massa taxtakachlanadi. Taxtakachlangan tabletka quyi puanson yordamida itarib chiqariladi va tabletkaning tashqi ko‘rinishi hamda qattiqligi tekshiriladi. Agar hosil bo‘lgan tabletka tez uqalanuvchan va etarli qattiqlikka ega bo‘lmasa, bosimni oshirish maqsadida yuqori puanson oldingidan ko‘proq darajada pastga tushiriladi. Agar tabletka qattiqligi ortib, suvda parchalanmasa, bu bosim ortib ketganidan dalolat beradi. U holda yuqori puanson bir oz yuqoriga ko‘tariladi. SHu tarzda olinadigan tabletka DF talabiga javob beradigan bo‘lguncha yuqori puanson moslab boriladi. So‘ngra shu holda mahkamlanadi.
