Mustaqillik sharoitida arxiv ishining istiqbolli ravnaqi masalasi muxim o’rin tutadi. Zero, moziy saboqlari, o’tmish tajribalarini arxiv materiallari asosida o’rganishning nafaqat nazariy, balki dolzarb amaliy axamiyati bor. Albatta, arxiv materiallariga eng ko’p murojaat qiluvchilar — tarixnavislar, moziyshunoslardir. Mustaqillik davridagi tarixiy tadqiqotlarning aksariyati arxiv materiallariga asoslangani va yangicha, xolis tarixiy taraqqiyot kontseptsiyasi zaminida yaratilayotgani tufayli bugun tariximizga qiziqish tobora ortayotir. Shuningdek, arxiv xujjatlaridan foydalanuvchilar sirasiga o’zi tadqiq etayotgan muammo tarixini o’rganmoqchi bo’lgan muayyan soxa tadqiqotchilari — iqtisodchilar, xuquqshunoslar,adabiyotshunos va san`atshunoslar, fan va texnika tarixi mutaxassislari, umuman, tabiiy fanlar soxasi vakillari xam kiradi. Bu jabxa tadqiqotchilari uchun arxiv materiallari fan ufqlarini kengaytirish, uni yangi dalil isbotlar bilan boyitish, jamiyat xayoti, insoniyat tafakkuri taraqqiyoti jarayonining turfa xil jixatlarini mutlaqo yangicha va nisbatan to’g’ri baxolash bobida ma`lumotlar manbai bo’lib xizmat kiladi.
