5- tajriba ishi Mavzu: Sig’imdagi suyuqlik sathini o’lchash va rostlash asbobini o’rnatish va sozlash suyuqlik va sochiluvchan moddalarning sathini o’lchash

5- tajriba ishi
Mavzu: Sig’imdagi suyuqlik sathini o’lchash va rostlash asbobini o’rnatish va sozlash

SUYUQLIK VA SOCHILUVCHAN MODDALARNING SATHINI O’LCHASH.

Suyuqlik va sochiluvchan moddalar sathini o’lchash sanoat texnologik jarayonlarini avtomatlashtirishda muhim ahamiyatga ega. Sathni o’lchash moddaning sig’imdagi miqdorini aniqlash va texnologik jarayondagi ishlab chiqarish uskunasida sath holatini nazorat qilishdan iborat.

Ishlash tavsifi jihatidan sath o’lchagichlar uzluksiz va uzlukli (releli) bo’ladi.

Releli sath o’lchagichlar modda muayyan sathga erishganda ishlay boshlaydi, bu asboblar signalizatsiya maqsadida ishlatiladi va sath signalizatorlari deyiladi.

Sath o’lchagichlar ishlash prinsipi va o’zining to’zilishi jihatidan bir-birlaridan farq qiladi. Sath o’lchagichlarning xilma-xilligi sig’im chegaralarining ko’pligi, ishlatish sharoitlarining har xilligi va o’lchanayotgan moddalarning turlicha fizika kimyoviy xususiyatlari bilan tavsiflanadi. Masalan, suyuqlik sathini o’lchashga mo’ljallangan ko’pgina asboblar sochiluvchan moddalar sathini o’lchash uchun yaroqsiz, usti ochiq sig’imlarda ishlatiladigan asboblar esa yuqori bosimda ishlaydigan sig’imlar uchun yaroqsizdir.

Sathni nazorat qilish asbobi to’zilishi bo’yicha shkalali va shkalasizlarga bo’linadi. Bu asboblar, odatda, ikkilamchi asboblar bilan birga ishlaydi yoki sathning chegarasi haqida mustaqil signal beradi.

Ishlash prinsipiga ko’ra sathni o’lchaydigan asboblar quyidagi guruhlarga bo’linadi: ko’rsatish oynasi; qalqovichli; gidrostatik; elektrik; radioizotopli; ultratovushli; vaznli va boshqalar.

Kimyo, issiqlik elektr stantsiyalari va oziq-ovqat sanoatida bu sath o’lchagichlar bir qator talablarni qanoatlantirmaydi. Bunga sabab ko’pchilik ishlab chiqarish uskunalarining yuqori bosim va haroratlarda ishlashi hamda nazorat qilayotgan moddalarning xususiy xossalaridir (tajovuzkor, zararlilik, o’ta qovushqoqlik va hokazo).

Texnologik jarayonlarni avtomatlashtirishda turli talablarga muvofiq suyuqlik sathini o’lchashning turli usullari ishlatiladi. Agar ko’rsatishlarni masofaga uzatish kerak bo’lmasa, suyuqlik sathi talab qilingan aniqlik bilan ko’rsatish oynalari yoki ko’rsatuvchi difmanometr - sath o’lchagichlar yordamida o’lchanishi mumkin. Ko’rsatish oynasi orqali sathni o’lchash tutash idishlar prinsipiga asoslangan. Ko’rsatish oynasining materiali va birikma to’zilishi sathni nazorat qilish kerak bo’lgan suyuqlikning bosim va haroratiga va 300 haroratga mo’ljallangan.