Аҳоли сони ва такрор барпо бўлиши

Tug‘ilishning umumiy koeffisienti yuqorida qayd etilganidek promilleda hisoblanadi. Bu koeffisientdan tug‘ilish darajasini ifodalashda ko‘proq foydalaniladi. Uning yordamida ma’lum hudud yoki avlodlardagi tug‘ilishda ro‘y berayotgan o‘zgarishlar umumiy tarzda o‘rganilishi mumkin. Lekin tug‘ilishning umumiy koeffisienti tug‘ilish darajasini ifodalashda biroz dag‘alliklarga yo‘l qo‘yadi. Chunki bu ko‘rsatkichga aholining yosh va jinsiy tarkibi bevosita ta’sir etadi. Agar o‘rganilayotgan hudud aholi tarkibida farzand ko‘rish yoshiga yetmagan bolalar (0-14) va farzand ko‘rish yoshidan o‘tgan keksalar (60 va undan yuqori yoshdagi aholi guruhi) salmog‘i yuqori bo‘lsa, tug‘ilish umumiy koeffisientining biroz past darajada ifodalanishiga olib keladi.

Demograf olimlar B.S.Urlanis, V.A.Borisovlar tomonidan tug‘ilish darajasini tug‘ilish umumiy koeffisienti yordamida baholash mezoni aniqlangan. Umumiy mezon bo‘yicha o‘rganilayotgan hudud yoki aholi guruhida tug‘ilishning umumiy koeffisienti 16-promilledan kam bo‘lsa, tug‘ilish darajasi past: 16-24 promille bo‘lsa-o‘rta, 25-29 promille bo‘lsa o‘rtadan yuqori, 30-39 promille bo‘lsa yuqori va 40 promilledan baland bo‘lsa tug‘ilish darajasi juda yuqori hisoblanadi¹.

Tug‘ilishning maxsus koeffisientlari tug‘ilish darajasidagi o‘zgarishlarni aniq ifodalaydi, tug‘ilishni atroflicha o‘rganishda qo‘llaniladi. Ushbu koeffisient alohida erkaklar va ayollar guruhiga nisbatan hisoblanishi mumkin. Demografik tadqiqotlarda asosan reproduktiv yoshdagi (15-49 yosh) ayollarga nisbatan qo‘llaniladi. Tug‘ilishning maxsus koeffisientida har 1000 ta 15-49 yoshdagi ayollarga nisbatan tug‘ilgan bolalar soni aniqlanadi va quyidagicha ifodalanadi:
*1000
F_15-49-tug‘ilishning maxsus koeffisienti
N_15-49-o‘rganilayotgavn davrda 15-49 yoshni ayollarda tug‘ilgan bolalar soni
T-o‘rganilayotgan davr (yil)
W-reproduktiv yoshdagi ayollarning o‘rtacha soni (15-49 yosh, tug‘ilish darajasi past davlatlarda 15-44 yoshdagi ayollar olinadi).