Axmеdova m. A. umumiy muxarrirligi ostida

Hududiy-yashash strukturasi «odamlarning yashash hududlariga, ayni bir yoki turlicha yashash joylariga mansubligi bilan bog‘liq holdagi o‘zaro munosabatlarini»³⁸³ ifodalaydi. Strukturaning bu turi tarixda yaxlit, agrar, qishloq jamiyati o‘zidan shaharlarni ajratib chiqargan davrda paydo bo‘lgan. Bu asosan mashg‘ulotlarning yangi turlari: hunarmandchilik, savdogarlik, keyinchalik – intellektual mehnat paydo bo‘lgan davrga to‘g‘ri keladi. Shaharlar faqat savdo-hunarmandchilik emas, mudofaa, ma'muriy-siyosiy, madaniy markazlar sifatida ham paydo bo‘ldi.
Shuni ta'kidlash kerakki, XX asrgacha shahar bilan qishloq o‘rtasida aholining ish bilan ta'minlanganligi, bo‘sh vaqtning hajmi, hordiq chiqarish shakli, bilim darajasi, migratsiyaning xarakteri, mikrosharoitni tanlashdagi erkinlik, ijtimoiy faollik, oilaviy hayotning xarakteri va boshqalar bo‘yicha tavofutlar chuqurlasha boshladi. XX asrda esa shahar va qishloq o‘rtasidagi farqni iloji boricha kamaytirish masalasi qo‘yila boshlandi, vaholanki, qishloqlar qator ustunliklarga ega (ayniqsa ekologik).
Hozirgi zamon jamiyati uchun kasbiy-ma'rifiy strukturaning ahamiyati kattadir. Sotsium qanchalik darajada rivojlangan bo‘lsa, bu struktura shunchalik murakkab va sertarmoq bo‘ladi. Bu tuzilma ijtimoiy mehnatning chorvachilik va dehqonchilik, hunarmandchilik va savdo-sotiq, qishloq xo‘jaligi, aqliy va jismoniy mehnatga bo‘lingach paydo bo‘ldi. Ba'zi kasb-hunarlar vaqt o‘tishi bilan eskirib, kerak bo‘lmay qoladi va ularning o‘rniga ulardan ham ko‘proq kasblar paydo bo‘ladi. Masalan, faqat birgina XX asr davomida deyarli hamma izvoshchilar yo‘q bo‘lib, uchuvchi va kosmonavtlar paydo bo‘ldilar. Uy shveytsarlari yo‘q bo‘lib, ko‘psonli «sekyuriti»lar paydo bo‘ldilar. Ko‘psonli ko‘chirib yozuvchilar o‘rniga kompyuterlarda ishlovchi kotiblar paydo bo‘ldi. Hozirgi zamon jamiyatini yuqori darajali ta'limsiz tasavvur qilish qiyin. Shuning uchun ham uzluksiz ta'lim va tarbiya tizimini zamon talablari asosida rivojlantirish O‘zbekiston taraqqiyotining asosiy ustivorliklaridan biri hisoblanadi.
Islohotlar davrida iqtisodiy bazisda yuz bergan o‘zgarishlar jamiyatning ijtimoiy strukturasiga ham o‘z ta'sirini ko‘rsatdi. Sovet davrida markscha-lenincha nazariyaga ko‘ra jamiyatda ikkita sinf mavjud edi: iqtisodiy asosi davlat mulki bo‘lgan ishchilar sinfi; kolxoz – kooperativ mulkka suyanadigan kolxozchi-dehqonlar sinfi va ijtimoiy qatlam bo‘lgan – ziyolilar. Bunday bo‘linishning birdan-bir mezoni – mulkka bo‘lgan munosabat edi. Asosiy yetakchi kuch – ishchilar sinfi hisoblanib, uning vazifasi butun dunyoda kommunistik jamiyat qurish edi. Mamlakatda chuqur islohotlar amalga oshirilayotgan va ijtimoiy tabaqalashuv jarayonlari kechayotgan hozirgi davrda bunday yondashuvni qabul qilib bo‘lmaydi. Metodologik nuqtai nazardan butun dunyoda tan olingan ijtimoiy stratifikatsiya nazariyasini qo‘llash to‘g‘riroq bo‘ladi. Bu nazariyaga asosan jamiyatda nafakat mulkka munosabatiga ko‘ra, balki boshqa turli ko‘rsatkichlarga asosan farq qiladigan turli ijtimoiy qatlamlarni ajratib ko‘rsatish mumkin. Haqiqatan ham ishchilar sinfi ichida tabaqalashuv jarayoni ketmoqda – masalan, davlat korxonalaridagi ishchilar qator ko‘rsatkichlar bo‘yicha, shu jumladan ish haqiga ko‘ra, xususiy korxonalardagi ishchilardan farq qiladi. Aksionerlik korxonalar paydo bo‘lishi bilan ishchilarda mulkning yo‘qligi bilan bog‘liq asosiy belgi yo‘qoladi. Ishchi endi korxonaning aksiyalariga ega bo‘lishi va shu korxona yoki biror bir boshqa mulkka birgalikda egalik qilishi mumkin.
Malakalarning darajasi bo‘yicha ham tabaqalashuv jarayoni yuz bermoqda. Jismoniy mehnat bilan shug‘ullanuvchi ishchilar yangi texnika va texnologiya bilan ishlovchi ishchilardan farq qiladi. Jismoniy ishni aqliy ish bilan birga olib boruvchi «zangori yoqalilar» deb ataluvchi qatlam ham paydo bo‘ldi. Ishlab chiqarishning zamonaviylashuvi natijasida aqliy mehnat bilan shug‘ullanuvchi «oq yoqalilar» deb ataluvchi injener-texnik ishchilar, boshqaruvchilarning ham soni borgan sari oshib bormoqda. Industrial mehnat ko‘rsatkichlari bo‘yicha ham ishchilar qatlamlarga ajralmoqda. Agrar sektorda ham xuddi shunday jarayon yuz bermoqda. Hozirgi fermer (dehqon) maqomi moddiy daromadi bo‘yicha kolxozchidan farq qiladi. Qishloqlardagi kichik korxonalarda ishlovchi ishchilar shahar ishchilaridan farq qiladi va boshqalar. Ammo hozirgi davrning asosiy xususiyatlaridan biri shundaki, ishlab chiqarish sohasida ham, xizmatlar ko‘rsatish sohasida ham xususiy mulkka ega bo‘lgan ijtimoiy qatlamning paydo bo‘lmoqda. Intellektual mulkka ega bo‘lganlar esa, alohida o‘rinni egallaydi. Bular hali kichik qatlam bo‘lsalar ham, bozor iqtisodiyoti munosabati shakllanishi sharoitida ular katta kelajakka ega. Ular nafaqat ishlab chiqarish sohasida, balki siyosiy sohaga ham, madaniyatni rivojlantirishga ham o‘z hissalarini qo‘shishlari kerak. Xuddi shu qatlam yangi munosbatlarning shakllanishi asosida «o‘rta sinf»ga aylanuvchi, shakllanib borayotgan o‘rta qatlamning negizi bo‘ladidir. «O‘rta qatlamlarning qimmati shundaki, ular mexanik tarzda davlat yordamida yoki inqilobiy tadbirlar (quyi sinfga xos bo‘lgan) orqali boyib ketish mumkin emasligini anglab yetadilar. Ularning ma'naviy qarashlarining asosi: iqtisodiy farovonlik organik ravishda mehnatsevarlik, kuch-g‘ayrat, tadbirkorlik va ma'rifatga bog‘liqdir», - deb uqtiradi S.L.Frank³⁸⁴. Faqat o‘rta sinfgina fuqarolik jamiyatning asosini tashkil qilib, hozirgi zamon rivojlangan mamlakatlarida siyosiy barqarorlikni saqlab turadi. Bizning mamlakatimizda shakllanadigan jamiyat ham xuddi shunday bo‘lishi kerak.
Yangi jamiyatning shakllanishi jarayonida va unga yo‘ldosh «o‘tish inqirozi» chog‘ida odamlarning mulkiy tabaqalashuvi chuqurlashadi. Bir tomondan, boylar «yangi o‘zbek»lar paydo bo‘ladi, boshqa tomondan esa odamlarning ko‘plab qismini yashash darajasi pasayadi. Boylar va kambag‘allar o‘rtasidagi yashash tarzining farqi jamiyatda noroziliklarni vujudga keltiradi. Buning oldini olish uchun kuchli ijtimoiy siyosat olib borishga to‘g‘ri keladi. Bunday ijtimoiy siyosatning mohiyati taqsimlash, tenglashtirish yo‘li bilan borishdan iborat emas. Ijtimoiy siyosat mohiyatiga asosan, birinchidan, mehnat faoliyati bilan shug‘ullanuvchilar uchun o‘zlarini va oilalarini boqishi, tashabbus ko‘rsatishi, tadbirkorligi, bilimlarini qo‘llashi va boshqalar uchun bir xil sharoitlarni yaratish zarur; ikkinchidan esa, mehnat haqi belgilab qo‘yilgan odamlarga, ya'ni byudjet sohasida ishlovchilarga, inflyasiya darajasiga qarab haq to‘lash kerak bo‘ladi. Uchinchidan, pensionerlar, o‘quvchi (talaba)lar, ishsizlarni ijtimoiy himoya qilish zarur. Va nihoyat, ko‘p bolali va kam ta'minlangan oilalarga moddiy yordam berish lozim.