İnformasiya və informatika
İnformatika – informasiya proseslərinin (informasiyanın toplanılması,
saxlanılması, ötürülməsi və emalı) avtomatlaşdırılmasında istifadə olunan kompüter
texnikası vasitələri və metodlarından bəhs edən tətbiqi elm sahəsi kimi
formalaşmışdır. Başqa sözlə, informatika informasiyanın yaradılması, saxlanılması,
ötürülməsi, qəbulu və emalı üçün üsul və vasitələri öyrənir. “İnformasiya” və
“avtomatika” sözlərinin birləşməsindən yaranmış “İnformatika” termini 1960-cı ildə
fransız mütəxəssisləri tərəfindən elmə daxil edilmişdir. İnformatika – informasiya
proseslərinin avtomatlaşdırılmasını və onlardan istifadə texnikalarını, metodlarını
öyrənən elm sahəsi kimi geniş yayılmışdır.
Elmin predmeti dedikdə elmin öyrəndiyi sahə nəzərdə tutulur. İnformatika
elminin predmeti isə informasiyadır. İnformasiya latın mənşəli söz olub (informatio)
məlumat, xəbər, fakt sözləri ilə eyniləşdirilir. Başqa sözlə, informasiya dedikdə ətraf
aləmdən aldığımız biliklər, kitabdan, qəzetdən aldığımız məlumatlar, televiziyadan,
radiodan eşitdiyimiz xəbərlər və s. nəzərdə tutulur. İnformasiya sözünü bəzən
verilən, bilik kimi sözlərlə də eyniləşdirirlər. Onlar bir-birilə sıx bağlı olsa da,
aralarında cüzi fərqləri nəzərə almaq lazımdır.
Verilənlər (ing. “data”, lat. “datum” – fakt) – texniki vasitələrlə saxlanılması,
emal edilməsi və ötürülməsi üçün formal şəkildə təsvir olunan (kodlaşdırılan)
məlumatdır.
İnformasiya – verilənlərin faydalı məzmunudur. Qavranılma şkalası ilə
verilənlər və bilik arasında aralıq mövqe tutur Bilik – dərkolunma vasitəsilə alınan
informasiyadır.
Bilik elə informasiyadır ki, onun əsasında məntiqi mühakimələr yolu ilə
müəyyən çıxarışlar və təkliflər alına bilər. Yəni, biliklər bizə yeni çıxarışlar etməyə,
yeni təkliflər almağa imkan verir.
İnformasiya mübadiləsi siqnalların hesabına həyata keçirilir.
İnformasiya mübadiləsi zamanı əsas iştirakçı subyektlər informasiya
mənbələri və informasiya qəbulediciləri hesab olunurlar.
3
İnformatikada fakt, məlumat, xəbər terminləri çox vaxt “verilənlər” sözü ilə
ifadə olunur. Verilən dedikdə qeydə alınmış siqnallar nəzərdə tutulur. Verilənlər
bəzən həqiqətdə mövcud olmayan anlayışları da ifadə edə bilər. İnformasiya isə
qəbul edilmiş siqnallardır. Bir verilən o vaxt informasiyaya çevrilə bilər ki, o
hökmən hər hansı bir mənanı ifadə etməlidir. Bilik isə qərarqəbuletməyə imkan
verən sistemləşdirilmiş informasiyadır.
Verilənlərin ümumi halda ad, qiymət, tip və struktur xarakteristikaları vardır.
Tipinə görə verilənləri əsasən 4 qrupa ayırırlar:
• hesabi (və ya rəqəm tipli)
• mətn (və ya simvol tipli)
• məntiqi tipli
• göstərici tipli
Hesabi verilənlərdə qiymət rəqəmlərlə ifadə olunur (Məs., “kütləsi – 4 kq”).
Mətn tipli verilənlərdə qiymət sözlə (simvollarla) ifadə olunur (Məs., “rəng-qara”).
Məntiqi verilənlərdə qiymət məntiqi kəmiyyətlə ifadə olunur (məs., “18
ədədinin tək ədəd olması doğru deyil”).
Göstərici tipli verilənlərdən isə proqramlaşdırmada yaddaş ünvanları ilə
işləmək üçün istifadə olunur.
İnformatika elminin aşağıdakı tərkib hissələri mövcuddur:
Hardware (aparat təminatı) – Elektron hesablama maşınları (EHM) və onların
quruluşu, tərkib hissələri, onlardan istifadə qaydalarını öyrənən bölmədir.
Software (proqram təminatı) – EHM-lərdə istifadə olunan bütün proqramları,
onların təsnifatını və istifadə qaydalarını öyrənən bir bölmədir.
Brainware – Məsələnin kompüterdə həlli üçün lazım olan alqoritmlərin
qurulması, onlardan istifadə qaydalarını öyrənən bir bölmədir.
Dostları ilə paylaş: |