Maddə 121. Həbsxanalarda cəzanın icrası şərtləri
121.1. Təsərrüfat və məişət xidməti işi üçün cəlb olunmuş şəxslər istisna olmaqla məhkumlar həbsxanada ümumi kameralarda saxlanılırlar. Zəruri hallarda məhkumlar həbsxana müdiriyyətinin əsaslandırılmış qərarı ilə birnəfərlik kameralarda saxlanıla bilərlər.
121.2. Həbsxanada məhkumlar kameralar üzrə bu Məcəllənin 72.1—72.3 və 72.5-ci maddələrinin tələblərinə əməl olunmaqla yerləşdirilirlər. Ümumi və ciddi saxlanma şəraitində saxlanılan şəxslər, ömürlük azadlıqdan məhrum etmə növündə cəzaya məhkum olunmuş şəxslər və təsərrüfat və məişət xidməti işi üçün həbsxanada saxlanılan məhkumlar bir-birindən təcrid olunmuş halda və ayrılıqda saxlanılırlar.
121.3. Həbsxanalarda ümumi saxlanma şəraitində məhkumlar:
121.3.1. ərzaq məhsulları və ən zəruri mallar əldə etmək üçün ayda iyirmi beş manatadək miqdarda pul xərcləyə bilərlər;
121.3.2. il ərzində qısa müddətli dörd görüş və uzun müddətli iki görüş almaq hüququna malikdirlər;
121.3.3. il ərzində altı bağlama, sovqat və ya banderol almaq hüququna malikdirlər;
121.3.4. hər gün bir saat gəzinti hüququna malikdirlər.
121.4. Məhkumlar cəzanın icrası qaydalarını pozmadıqda və əməyə vicdanla yanaşdıqda, həbsxanada çəkilməsi müəyyən olunmuş cəza müddətinin ən azı yarısını çəkdikdən sonra onların saxlanılması şəraiti yaxşılaşdırıla bilər. Bu halda məhkumlar əlavə olaraq:
121.4.1. ərzaq məhsulları və ən zəruri mallar əldə etmək üçün ayda on beş manatadək miqdarda pul xərcləyə bilərlər;
121.4.2. il ərzində uzun müddətli bir görüş almaq hüququna malikdirlər;
121.4.3. il ərzində altı bağlama, sovqat və ya banderol almaq hüququna malikdirlər.
121.5. Həbsxanalarda ciddi saxlanma şəraitində məhkumlar:
121.5.1. ərzaq məhsulları və ən zəruri mallar əldə etmək üçün ayda on beş manatadək miqdarda pul xərcləyə bilərlər;
121.5.2. altı ayda bir bağlama, sovqat və ya banderol almaq hüququna malikdirlər;
121.5.3. altı ayda bir qısa müddətli görüş almaq hüququna malikdirlər;
121.5.4. hər gün bir saat gəzinti hüququna malikdirlər. (14, 16)
Dostları ilə paylaş: |