Pedagogika tariyxı pán sıpatında. Eń áyyemgi dáwirlerden b e. VII ásirge shekemgi tálim-tárbiya hám pedagogikalıq pikirler. VII ásirden XIV ásirdiń birinshi yarımına shekem Orta Aziyada tárbiya, mektep hám pedagogikalıq pikirler

Birinshi basqısh. 1997—2001-jıllardı óz ishine aldı. Bul basqıshta baǵdarlamanı turmısqa asırıw ushın zárúr bolǵan huqıqıy, ilimiy metodikalıq, qarjı-materiallıq hám basqa da jaǵdaylar jaratıldı. Oqıwshılarǵa beriletuǵın bilim mazmunı qayta qaraldı hám túpten jańalandı, qánigelerdi tayarlaw hám qayta tayarlaw jańa zaman talabına ılayıq shólkemlestirildi. Mámleketlik bilimlendiriw standartı, jańa pedagogikalıq, xabar, baylanıs texnologiyaları islendi hám turmısqa engizildi, oqıw orınlarınıń materiallıq-texnikalıq, oqıw-metodikalıq hám qánigeler bazası tayarlandı. qarjı máseleleri jetilistirildi, básekili ortalıq payda etildi. Reyting hám monitoring sisteması dúzildi, xalıqaralıq baylanıslar rawajlandırıldı, bilimlendiriwge shet el investiciyaların tartıw ilájları islendi, baǵdarlamanı ámelge asırıwǵa baylanıslı anıqlıqlar kiritildi. Baǵdarlamanıń birinshi basqıshındaǵı jumıslardı tabıslı orınlaw ekinshi basqıshındaǵı jobalastırılǵan jumıslardı jemisli baslawǵa múmkinshilik berdi.

Ekinshi basqısh 2001-2005 jıllardı qamtıydı. Bul basqıshta toplanǵan tájiriybeler tiykarında baǵdarlamaǵa anıqlıqlar kiritildi. Akademiyalıq liceyge, kásip-óner kolledjine ótiw tolıq ámelge asırıldı, kadrlar menen támiyinlendi hám olardıń xızmetinde básekili ortalıq payda etildi. Bilimlendiriw mákemeleriniń materiallıq-texnikalıq, oqıw-metodikalıq bazası jetilistirildi, jańa pedagogikalıq, xabar, baylanıs texnologiyaları menen támiyinlendi.