İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr Birinci cild

Tənbəllik və rahatlıq istəyi; mühüm elmi kəşflərə maneə

"Çətin iş" məsələsinin əksi tənbəllikdir. Tənbəlliyin və problemsiz həyat istəyinin sizi aldatmasına qoymayın. Tənbəllik olsaydı, bu mühüm elmi kəşflərin heç biri baş verməzdi. Böyük kəşf sahiblərinin və ixtiraçıların həyatını oxuyun, görün necə yuxunu özlərinə haram etmiş, çətinlikləri asanlaşdırmış, problemlərlə uyğunlaşmış və gedib əsaslı nöqtəyə çatmışlar. Əlbəttə, bu uğurlar çox yerdə, bəlkə demək olar ki, əksər yerlərdə sonda onlar üçün faydalı da olmuşdur; maddi fayda, rifah, ad-san, pul və bu kimi amillər gətirmişdir. Lakin əvvəldə onların məqsədi belə şeylər olmamışdır; gedib bir məsələnin və bir işin məğzini öyrənmək istəmişlər. Bunu sizə qəti bir tövsiyə kimi deyirəm.²⁹⁷