Birinci fəsil: Mədəni hücum və mədəni mübadilə

Üçüncü hissə: Düşmənin İslam inqilabına qarşı mədəni hücumda istifadə etdiyi üsullar

1- Gənclər arasında fəsadı, pozğunluğu və yanlış mədəniyyəti yaymaq

Düşmən bu xalqın iman sayəsində birləşdiyini, iman sayəsində dünyanın heç bir böyük gücündən qorxmayan bir rəhbər qazandığını və bəlli uğurlara imza atdığını bildiyinə görə bizim imanımız və İslamımızla düşmən oldular, siyasi və media vasitələri ilə əleyhimizə çalışdılar, onlara görə söyüş, bizə görə isə tərif sayılan adlar qoydular. Onlar bizi fundamentalist adlandırırlar. Biz İslamın prinsip və təməllərinə qayıtmağımızla fəxr edirik. Bu bizim gücümüzün amilidir. Son bir neçə ildə qlobal hegemonizmin bütün təbliğatı xalqımızın İslam inancını aşağılamaq üzərində mərkəzləşmişdir. Bizim xalqımız hər hansı formada İslamı və imanı aşağılayanların günahından keçməyəcək. Çünki İslam bizim xalqımızın hər şeyidir. İslam və iman bizim başucalığımızın və qələbəmizin səbəbkarıdır. Bizim dünya və axirətimizi bu iman islah edəcək.²¹⁵

Düşmən fəsad, pozğunluq və yanlış mədəniyyəti yaymaqla gənclərimizi əlimizdən almaq istəyir. Düşmənin mədəni baxımdan gördüyü iş yalnız mədəni hücum deyil, mədəni bir qırğın və qətliamdır. Bu gün düşmən bizə qarşı bu işi görür.²¹⁶
Bir cəmiyyətin daxili zəifliyinin düşmən hücumuna şərait yaratması doğrudur, amma düşmən öz imkanları ilə sağlam bir cəmiyyəti məcburən həmin zəifliyə sürükləyir. Odur ki, səhvə yol vermək olmaz.²¹⁷
İran xalqının düşmənləri xain və muzdur qüvvələr vasitəsi ilə ictimai rəyi yayındırmağa və İslam inancını gənclərdən almağa çalışırlar.²¹⁸
Bu gün İslam ümməti, o cümlədən bizim xalqımız əleyhinə böyük təxribat planları hazırlayırlar. İqtisadi blokada təxribatdır, apardıqları təbliğat təxribatdır, cəmiyyətimizdə yaradıb gənclərimizi sövq etməyə çalışdıqları fəsad və pozğunluq təxribatdır, yaydıqları yalanların hamısı təxribatdır. Onlar bu quruluşu kökündən məhv etmək, onun möhkəm təməllərini uçurmaq üçün təxribatlar aparırlar.²¹⁹
Mədəni hücumlardan biri mömin gəncləri sivilizasiyanın keşikçisi olan imana təəssübkeş bağlılıqdan daşındırmağa çalışmalarıdır. Ötən əsrlərdə Andalusda bu işi gördülər, gəncləri fəsad və ehtiras dünyasına qərq etdilər, spirtli içkilərə alışdırdılar. Hal-hazırda bu işlər görülür. İndi bəzi adamlar küçədə hicabı dəqiq olmayan bir neçə qadını görür və ürəkləri qan olur. Düzdür, bu da pis işdir, amma əsas pis iş bu deyil. Siz əsas pis işi küçələrdə görmürsünüz. Bir (oğrudan) soruşdular ki, nə edirsən? Cavab verdi ki, nağara çalıram. Dedilər ki, bəs səsi nə üçün çıxmır? Dedi ki, səsi sabah çıxacaq. Əgər siz xalq və mədəniyyət işçiləri Allah eləməmiş, ayıq olmasanız, düşmənin məxfi və peşəkar hücumu nəticəsində mənəvi dəyərlərin dağılmasının səsini elə bir vaxt eşidəcəksiniz ki, daha çarə qılmaq mümkün olmayacaq.

Əgər bizim müharibədə iştirak etmiş bir gəncimizi mühasirəyə alıb, əvvəlcə ona bir video, sonra pozğun filmlərin tamaşa cihazını versələr, ehtirasını təhrik etsələr və sonra da bir neçə məclisə aparsalar, o zaman biz nə etməliyik? Kiminsə enerjinin zirvəsində duran gənci fəsada çəkməsi çətin deyil; xüsusən də fəsad törədənlərin təşkilatı olsa. İndi düşmən bu işi görür. Mənim ölkənin müxtəlif şəhərlərindən xəbərim var. Bu xəbərlər bizə çatır. Elə bir gün yoxdur ki, biz belə xəbərlərdən eşitməyək. Düşməndən başqa kim bu işləri görür?! Gənc şəhvətbazlığa düçar olub öz imanını əldən verir. Əvvəldə bu gənc hətta ağlayır da, lakin tədricən onu yoldan çıxarırlar. Düşmənlər bizim məktəb uşaqlarımızı - 10-12, hətta 7-9-cu sinif uşaqlarını belə fəsada çəkir. Bir nəfər tapırlar. O, narkotik maddələri və pozğun şəkilləri məktəbə aparıb uşaqlar arasında yayır.²²⁰

Hal-hazırda cəmiyyətin gənc nəslini pozğunluğa, əxlaqsızlığa sövq etmək üçün genişmiqyaslı işlər görülür. Bu, mədəni hücumun əsas hissələrindən biridir.²²¹
Mən bilmirəm bu necə mədəniyyətdir?! Qərblilər tərəfindən dünyanın başına gətirilən bu necə bədbəxtlikdir?! Onlar bu mədəniyyəti, ictimai əxlaqa, bəşərin xeyir və zərərinə dair təsəvvürlərini bütün dünyaya ixrac etmək və Qərb mədəniyyətini hamıya qəbul etdirmək istəyirlər. Bu gün baş verən ən böyük cinayətlərdən biri budur.²²²
Bu gün dünyada xüsusi məsələlər üzərində həssaslıq var. Bu gün qadının əri tərəfindən döyülməsinə həssas yanaşılmır. Avropa və Amerikada, ümumi olmasa da, kişilər çox asanlıqla qadınları vururlar. Ailədə kişinin qadına zülm etməsinə dünyada həssas yanaşan yoxdur. Statistika göstərir ki, Amerika və Avropa ailələrində atalar və ərlər çox asanlıqla övladlarını və həyat yoldaşlarını incidirlər. Dünyada bu məsələ üzərində ciddi dayanan yoxdur. Amma eyni zamanda qadının geyimi üzərində həssaslıq var. Əgər bir insan, şəxsiyyət, filosof, bir sistem və siyasət qadının çılpaqlığına qarşı çıxsa, bunu dünya səviyyəsində böyük ajiotaja çevirirlər, çoxlu fəsadlara, çirkin adət və üsullara isə həssas yanaşmırlar. Bir ölkə öz siyasəti olaraq spirtli içkiləri qadağan etdikdə, bu, bütün dünyada rezonans doğurur, onu mürtəce adlandırıb istehzalı təbəssümlə qarşılayırlar.

Bu haranın mədəniyyətidir? Qadının çılpaqlığı və spirtli içkilərin bir ənənə kimi geniş yayılması haraya aiddir? Bu, Avropaya məxsusdur və bu ölkələrin qədim mədəniyyətindən qaynaqlanır. Amma bu gün bu adət-ənənələr dünyanın başqa yerlərində də meyar götürülür və buna qarşı çıxanlar böyük günah etmiş sayılırlar.²²³