beynəlxalq standartın tətbiqi – istifadəçilər tərəfindən beynəlxalq standartın verilmiş tələblərin tam və ya qismən yerinə yetirilməsi ilə standartın yayılma sahəsinə və təsir dairəsinə uyğun verilmiş ölkədə (ölkələrdə) istifadəsidir. Dünya ölkələri beynəlxalq standartların tətbiqinin aşağdakı variantlarını istifadə edirlər.
1-ci variant – beynəlxalq standartın istifadəçi ölkədə (əsasən firmalar səviyyəsində) bilavasitə tətbiqi. Bu halda beynəlxalq standart yenidən tərtib edilmir, orada əlavə işarələr verilmir və ölkənin milli rəsmi dilinə tərcümə edilmir.
2-ci variant – beynəlxalq standart istifadəçi ölkənin milli rəsmi dilinə tərcümə edilir və onun məzmunu birbaşa ölkənin standartlaşdırma üzrə normativ sənədinə daxil edilir. Bu halda standarta heç bir əlavələr edilmir və ondakı tələblər sərtləşdirilmir. Bu, beynəlxalq standartın birbaşa tətbiqi variantıdır.
3-cü variant – beynəlxalq standartın tələbləri istifadəçi ölkədə qismən istifadə edilir. Bu halda standartlaşdırma üzrə milli normativ sənədin yaradılmasında beynəlxalq standart elmi-texniki informasiya mənbəyi kimi istifadə edilir. Bu fakt milli standartlaşdırma üzrə sənədin müqəddiməsində, həmçinin istifadə edilmiş ədəbiyyatın siyahısında öz əksini tapmalıdır. Hazırda MDB ölkələrində yuxarıda göstərilən variantların üçü də istifadə edilir.
