TƏFSİR ÜSULU VƏ TARİXİ 142
Qissələrin təkrar edilməsi məsələsinə gəlincə burada əsas
məqsəd insanların bu qissələrdən ibrət almasını təmin etməkdir.
Bu qissələrdəki hadisələri insanlara müxtəlif vəsilələrlə göstərmək
üçün onların təkrar edilməsinə ehtiyac vardır. Hz. Adəm qissəsi
Bəqərə, Əraf, Hicr, İsra, Kəhf və Taha surələrində təkrar edilmiş-
dir. Bu qissə Bəqərə surəsində Allahın nemətlərini, Əraf surəsində
Allahın bu nemətlərinə qarşı insanların az şükür etməsini, Hicr
surəsində Allahın insanı torpaqdan, cinləri isə atəşdən xəlq etdiyini
və bu iki maddənin bir-birindən üstün olmadığını, İblisin özünü
Adəmdən üstün görməsinin cəhalət və aldanma olduğunu, İsra
surəsində insanların fitnələrini, Kəhf surəsində isə insanın düşməni
olan İblis və onun cinsindən olanlarla dost olmanın necə yanlış ol-
duğunu, Taha surəsində də insanın zəif nöqtələrini və bu zəifliyinə
görə hər zaman Allahın yardımına möhtac olduğunu xatırladır.
