Bugungi kunda shu muammoga e`tiborni qaratish lozimki: “Mafkuraviy tahdidlarning bosh maqsadi mustaqil davlat fuqarolarini o`z qadriyatlaridan begonalashtirib, turli yaltiroq “g`iloflar”ga o`raglan begona mafkuraviy idealarni ularning qalbiga singdirishdan iboratdir”.
Xullas, hozirgi zamonda inson qalbi va ongi uchun kurash nihoyatda murakkab tus olgan. Bu geopolitika va globallashuv jarayonlari bilan qo`shilib, uyg`unlashib ketmoqda. Markaziy Osiyoda ham, unga nisbatan ta`sirlarda ham ana shunday serqirra jarayon, xilma-xil xususiyat, turlicha xatti-harakatlar mavjud. Bularning barchasini anglash, ro`y berayotgan voqea-hodisalarning mag`zini chaqish, mustahkam mafkuraviy immunitetni shakllantirish dolzarb vazifa bo`lib qolmoqda.
Globallashuv jarayoni bilan bog`liq eng muhim ma`naviy tahdidlardan biri bo`lishi mumkin bo`lgani bu mafkuraviy manipulyatsiyadir.
Hozirgi “axborot asri”da globallashuv jarayonlarining jadal sur`atlar bilan kuchayishi va tezlashishi milliy chegaralarning yuvilib ketishiga, ma`naviyat va madaniyatning umumlashuviga hamda jamiyatga tahdid soladigan turli g`oyalarning paydo bo`lishiga olib kelmoqda. Shunday tahdidlardan biri mafkuraviy manipulyatsiya bo`lib, u odamlar ongiga yashirin holda zimdan ta`sir o`tkazadi. Shunig uchun, avvalo, bu tushuncha to`g`risida ma`lumotga ega bo`lish va uning ta`sirini o`rganish lozim.
