Dæmi um bréf til foreldra/forráðamanna Kæri viðtakandi

Dæmi um bréf til foreldra/forráðamanna

Kæri viðtakandi.

Tilgangur þessa bréfs er að óska eftir stuðningi þínum við þá stefnu sem skólinn leggur til í tóbaksvörnum, barninu þínu og öðrum börnum í grunnskólum landsins til heilla.
Mjög mikilvægt er að virkja foreldra til samstarfs og ábyrgðar í forvarnastarfi í skólum. Til þess að slík stefna verði virk er mikilvægt að allt skólasamfélagið taki höndum saman og vinni að því í sameiningu að framfylgja slíkri stefnu. Stefna skólans er að skólinn sé tóbakslaus.
Það felur í sér að:

Reykingar og önnur tóbaksnotkun er hvorki leyfð á skólalóðinni né á neinum viðburðum tengdum skólanum. Þetta gildir um nemendur, kennara og annað starfsfólk, foreldra og gesti.

Viðhorf foreldra til tóbaksneyslu getur ráðið úrslitum um það hvort börn þeirra byrja að nota tóbak eða ekki. Þetta á bæði við foreldra sem reykja og þá sem ekki reykja. Samkvæmt íslenskum rannsóknum eru unglingar líklegri til að reykja ef foreldrar og/eða vinir þeirra reykja. Mikilvægt er að foreldrar taki virkan þátt í tóbaksvörnum með skýrum skilaboðum um að þau samþykki ekki að börn þeirra byrji að nota tóbak og útskýri fyrir þeim skaðsemi tóbaks. Foreldrar geta hvatt börn sín til heilbrigðs lífsstíls á ýmsan hátt. Það verður best gert með því að vera þeim heilbrigð fyrirmynd og með því að hvetja þau til að hugsa vel um líkama sinn og hvað þau láta inn fyrir sínar varir. Þá er þýðingarmikið að hvetja þau til að hugsa jákvætt, þekkja tilfinningar sínar og líðan, spjalla reglulega við þau og fylgjast með hvað er að gerast í þeirra lífi.
Reykingar eru nátengdar sjálfsmynd ungmenna og félagslegri hegðun þeirra. Ungmenni, sem byrja að reykja, eru oft upptekin af félagslegum þáttum eins og því að passa inn í hópinn eða tilheyra ákveðnum hópi. Fyrir þeim eru langtímaáhrif af reykingum á heilsuna afar fjarlægt umhugsunarefni og engan veginn til þess fallið að duga sem rök fyrir því að þau eigi að sleppa því að reykja eða nota annað tóbak. Þau líta jafnvel á reykingar sínar sem stundargaman sem þau ætla ekkert endilega að stunda til langframa og hafa engar áhyggjur af því að þau gætu orðið tóbaksfíkninni að bráð. Þau telja jafnvel að þau geti auðveldlega hætt hvenær sem er og gera sér ekki grein fyrir að reykingar eru mjög ávanabindandi og erfitt getur reynst að hætta síðar meir þegar þau langar til að hætta.
Skólinn hefur skýra stefnu um að hafa beri samband við foreldra ef börn þeirra eru að nota tóbak á viðburðum tengdum skólanum eða á skólatíma. Með því að grípa sem fyrst inn í fikt við tóbaksnotkun eru meiri líkur á að hægt sé að koma í veg fyrir að barnið verði háð nikótíninu í tóbaki. Þekkt er að flestir, sem stunda reykingar eða aðra tóbaksnotkun, hafa byrjað ungir að árum, oftast fyrir 18 ára aldur. Í nýlegri rannsókn á heilsu og líðan Íslendinga kemur fram að byrji viðkomandi ekki að reykja fyrir tvítugsaldurinn séu mjög miklar líkur — eða 73% — á því að hann reyki aldrei, miðað við reynslu 18-79 ára núlifandi Íslendinga.
Með von um góðar undirtektir og gott samstarf.
Nafn skólans