Dual ta’limni tashkil etish va uning bosqichlarini

Professional ta’lim tizimida dual ta’limni tashkil etish tartibi to‘g‘risida
NIZOM
1-bob. Umumiy qoidalar
1. Ushbu Nizom professional ta’lim tizimida dual ta’limni tashkil etish tartibini belgilaydi.
2. Mazkur Nizomda quyidagi asosiy tushunchalar qo‘llaniladi:
tashkilot — professional ta’lim muassasasi bilan dual ta’lim asosida kadrlar tayyorlash bo‘yicha shartnoma tuzgan yuridik shaxs;
dual ta’lim dasturi — professional ta’lim muassasasi va tashkilotda ta’lim oluvchining muayyan kasb yoki mutaxassislik bo‘yicha kasbiy faoliyatini va mehnat vazifalarini bajarishiga qaratilgan davlat ta’lim standarti, o‘quv rejasi, o‘quv dastur (modul)lari, o‘quv va ishlab chiqarish amaliyoti dasturlaridan iborat hujjatlar to‘plami;
ish joyi — dual ta’limda ta’lim oluvchiga tashkilotning ichki tartib-qoidalari, tegishli vazifalari hamda ta’lim dasturlariga muvofiq amaliy ko‘nikma va malakalarni egallash uchun belgilangan ish o‘rni;
o‘quv-amaliy qism — dual ta’lim dasturiga muvofiq professional ta’lim muassasasida o‘tkaziladigan amaliy mashg‘ulotlar va o‘quv amaliyoti;
ustoz — ta’lim jarayonining ishlab chiqarish bilan bog‘liq amaliy qismini o‘tkazish uchun tashkilot tomonidan o‘quvchi(lar)ga biriktirilgan mas’ul shaxs;
shartnoma — tashkilot va professional ta’lim muassasasi hamda tashkilot va o‘quvchi o‘rtasida dual ta’limni amalga oshirish uchun tuzilgan hujjat.
3. Dual ta’lim tashkil etiladigan professional ta’lim muassasalari tizimida professional ta’lim muassasalari bo‘lgan vazirliklar va idoralar bilan kelishilgan holda O‘zbekiston Respublikasi Oliy va o‘rta maxsus ta’lim vazirligi (keyingi o‘rinlarda — vazirlik) tomonidan belgilanadi.
4. Dual ta’lim bo‘yicha o‘quvchilarni o‘qishga qabul qilish O‘zbekiston Respublikasi ta’lim muassasalariga o‘qishga qabul qilish bo‘yicha davlat komissiyasi tomonidan tasdiqlangan qabul parametrlari doirasida Professional ta’lim muassasalariga o‘qishga qabul qilish tartibi to‘g‘risidagi nizomga muvofiq amalga oshiriladi.
5. Kunduzgi, kechki va sirtqi ta’lim shaklida ta’lim olayotgan o‘quvchilarning dual ta’limga o‘qishini ko‘chirish taqiqlanadi.
Professional ta’lim muassasasi va tashkilot o‘rtasida tuzilgan shartnoma bekor qilinganda o‘quvchi(lar) o‘qishi mos ta’lim darajasidagi kunduzgi, kechki va sirtqi ta’lim shakliga o‘tkaziladi.