Ekologik qonun hujjatlarini buzganlik uchun javobgarlik

5. Ekologik jinoyatlar uchun javobgarlik.
O`zbekiston Respublikasining Jinoyat kodeksini 2-moddasiga muvofiq, mazkur Kodeksning maqsadlaridan biri bo`lib tabiiy muhitni jinoiy tajovuzlardan qo`riqlash hisoblanadi. Ushbu Kodeksning 193-204, va 229¹-moddalarida ekologik jinoyatlar uchun jinoiy javobgarliklar belgilangan.

O`zbekiston Respublikasining Jinoyat kodeksini 193-196-moddalarida atrof muhitni muhofaza qilish talablarini buzganlik uchun javobgarlik belgilangan. Ushbu jinoyatlar tarkiblari umumiy ekologik talablarni buzish oqibatida vujudga keladi. Ushbu jinoyatlar barcha tabiiy resurslarni muhofaza qilish bilan bog`liqdir. O`zbekiston Respublikasining Jinoyat kodeksini ekologik jinoyatlar bilan bog`liq bo`lgan mazkur moddalari tabiiy resurslarning huquqiy holatini buzganlik uchun jinoiy javobgarlikni belgilaydi.

O`zbekiston Respublikasining Jinoyat kodeksida belgilangan ekologik jinoyatlar tarkibi ekologik huquqbuzarlik natijasida og`ir oqibatlarning vujudga kelishi bilan bog`liqdir. Bularga insonning o`limi, odamlarning ommaviy ravishda kasallanishi, hayvonlarning qirilib ketishi, ko`p yoki ancha miqdorda zarar yetkazilishi va boshqa og`ir oqibatlar kiradi. Mazkur moddalarda ko`rsatilgan boshqacha og`ir oqibatlar har bir alohida holda ekologik huquqbuzarlikning og`irligini inobatga olgan holda huquqni qo`llovchi organlar tomonidan belgilanishi lozim.

Ekologik jinoyatlar uchun Kodeks eng kam ish haqining yuz baravarigacha jarima, uch yilgacha axloq tuzatish ishlari, uch yilgacha muayyan huquqdan mahrum qilish, olti oygacha qamoq, besh yilgacha ozodlikdan mahrum etish, mol-mulkini musodar etish kabi jazo choralarini nazarda tutadi.

O`zbekiston Respublikasining Jinoyat kodeksini 17-moddasiga muvofiq ekologik jinoyatlar uchun 16 yoshga to`lgan, ushbu Kodeksning 193-196-moddalarida ko`rsatilgan jinoyatlar uchun esa 18 yoshga to`lgan jismoniy shaxslar jinoiy javobgarlikka tortiladilar.

O`zbekiston Respublikasining Jinoyat kodeksini 193-moddasida ekologiya xavfsizligiga oid norma va talablarni buzganlik uchun javobgarlik ko`zda tutilgan. Ushbu jinoyat sanoat, energetika, transport, qishloq xo`jaligi va boshqa obyektlarni loyihalashtirish, joylashtirish, qurish va ishga tushirib foydalanishda belgilangan ekologik normalarni buzishdan iborat. Mazkur ekologik talablarga obyektlarni joylashtirishda shamol oqimi, sanitar zonalarga oid talablar, zararli moddalarni chiqarib tashlashning yo`l qo`yiladigan doiralari, obyektlarni ekologik ekspertizadan o`tkazish yoki uning salbiy xulosasi bo`lgan taqdirda obyektlarning qurilishi va ishga tushirilishining man etilishi kiradi. Ushbu moddada obyektlarni ishga tushirish uchun qabul qilish qoidalarini buzganlik, ya'ni ekologik talablarga javob bermaydigan obyektlarni ishga tushirish uchun qabul qilish uchun ham javobgarlik belgilangan. Ekologik xavfsizlik qoidalari O`zbekiston Respublikasining “Tabiatni muhofaza qilish tog`risida”gi qonunini 41-moddasida, tabiiy resurslar tog`risidagi qonunlarning tegishli moddalarida hamda qonun osti aktlarida o`z aksini topgan. Ushbu normalarning mohiyati shundan iboratki, obyektlarni qurish, loyihalashtirish, joylashtirish, ishga tushirish faqat tabiatni muhofaza qilish chora-tadbirlari ko`zda tutilgan holdagina amalga oshirilishi mumkin. har bir turdagi obyektlar uchun aniq ekologik xavfsizlik talabi qurilish me'yorlari va qoidalarida, alohida obyekt uchun esa, uning qurish loyihalarida o`z aksini topadi. Jinoyat kodeksining 193-moddasida ko`zda tutilgan jinoyatning obyektiga bo`lib ekologik xavfsizlikni ta'minlashga qaratilgan qoidalar kiradi. Mazkur jinoyatning subyekti bo`lib faqat mansabdor shaxslar hisoblanadi. Ularning qatoriga loyihani tasdiqlovchi, ma'lum bir ishlarga ruxsat beruvchi, yuqorida ko`rsatilgan obyektlarni qabul qilib oluvchi yoki ekologik xavfsizlik talablarining bajarilishini tashkil etuvchi yoxud nazorat qiluvchi mansabdor shaxslar kiradilar. Jinoyatning subyektiv tomoni bo`lib ehtiyotsizlik aybi hisoblanadi. Jinoyat obyektiv tomoni mazkur mansabdor shaxslarning aybli harakati (ishga tushirish bo`yicha ruxsat berish, loyiha talablarini buzib, uni amalga oshirish va hokazo) yoki harakatsizligi (tozalash uskunalarini ta'mirlamaslik, ulardan foydalanmaslik va hokazo) kabilarda ifodalanadi.

Atrof tabiiy muhitni ifloslanganligi to`g`risidagi ma'lumotlarni qasddan yashirish yoki buzib ko`rsatish uchun jinoiy javobgarlik O`zbekiston Respublikasining Jinoyat kodeksining 194-moddasida belgilangan. “Tabiatni muhofaza qilish to`g`risida”gi Qonunning 28-moddasiga muvofiq shunday ma'lumotlarni taqdim etish atrof tabiiy muhitning holati, tabiiy resurslardan foydalanish ustidan kuzatuv, maxsus vakolat berilgan organlar, shuningdek, faoliyati atrof tabiiy muhitning holatini yomonlashtiradigan yoki yomonlashtirishi mumkin bo`lgan korxonalar, tashkilotlar va muassasalar tomonidan amalga oshiriladi. Ushbu kuzatuv ma'lumotlarini, Vazirlar Mahkamasi belgilagan tartibda, Tabiatni muhofaza qilish davlat qo`mitasiga va boshqa organlarga berilishi shart. Bundan tashqari, “Tabiatni muhofaza qilish to`g`risida”gi qonunning 38-moddasiga muvofiq korxona, muassasa va tashkilotlar falokat haqida va uni bartaraf etish yuzasidan ko`rilayotgan chora-tadbirlar to`g`risida mahalliy davlat hokimiyati va tabiatni muhofaza qilish organlariga darhol xabar berishlari shart. “Atmosfera havosini muhofaza qilish tog`risida”gi qonunning 24-moddasida korxonalar, muassasalar va tashkilotlarning atmosfera havosini muhofaza qilish sohasidagi majburiyatlari qatorida chiqariladigan chiqindilar hamda fizikaviy omillarning hisobini yuritish va belgilangan tartibda statistika hisobotini taqdim etish hamda korxonalar va transport kommunikatsiyalarini ta'sir doirasida atrof muhitga hamda aholining salomatligiga zararli ta'sir ko`rsatilishini baholash ko`zda tutilgan. Mazkur jinoyat maxsus vakolatga ega bo`lgan mansabdor shaxs, ya'ni atrof tabiiy muhitning ifloslanganligi to`g`risida ma'lumotlarni yig`adigan yoki yig`ish ustidan nazorat olib boradigan hamda tegishli organlarga taqdim etish bo`yicha ma'sul shaxs tomonidan sodir etiladi. Ushbu moddada mazkur ma'lumotlar turlari aniq qilib berilgan. Bular qatoriga ekologik xalokatlar yoki atrof muhitni radiatsion, kimyoviy va bakteriologik ifloslanishi yoxud aholi salomatligining holatiga doir ma'lumotlar kiradi. Mazkur jinoyatning tarkibi faqat atrof tabiiy muhitning ifloslanganligi to`g`risidagi ma'lumotlarni yashirish yoki buzib ko`rsatish oqibatida aholining ommaviy kasallanishi, hayvonlarning qirilib ketishi yoki boshqa og`ir oqibatlarni kelib chiqishiga sabab bo`lgan taqdirda vujudga keladi. Mazkur jinoyat faqat qasddan sodir etilishi mumkin. Obyektiv tomondan harakat yoki harakatsizlik orqali sodir etiladi.

O`zbekiston Respublikasining Jinoyat kodeksini 195-moddasida atrof tabiiy muhitning ifloslanishi oqibatlarini bartaraf qilish choralarini ko`rmaslik uchun javobgarlik belgilangan. “Tabiatni muhofaza qilish tog`g`risida”gi Qonunning 47-moddasi oltinchi xat boshiga muvofiq atrof tabiiy muhitni tiklash, unga zararli ta'sir oqibatlarini bartaraf etish choralarini ko`rmaganlikda aybdor bo`lgan shaxslarning javobgarlikka tortilishi ko`zda tutilgan. O`zbekiston Respublikasining Ma'muriy javobgarlik to`g`risidagi kodeksini 95-moddasida tabiiy muhitni tiklash, tabiiy zaxiralarni qayta hosil qilish va tabiiy muhitga zararli ta'sir ko`rsatish oqibatlarini bartaraf etish choralarini ko`rmaganlik uchun ma'muriy javobgarlik belgilangan. O`zbekiston Respublikasining Jinoyat kodeksini 195-moddasida atrof tabiiy muhit ifloslangan joylarni dezaktivatsiya qilish yoki boshqacha tarzda tiklash choralarini ko`rmaslik yoki bunday ishlarni yetarli darajada bajarmaslik uchun jinoiy javobgarlik nazarda tutilgan. Mazkur jinoyatning tarkibi, agar ushbu huquqbuzarlik odamlarning ommaviy ravishda kasallanishi, hayvonlarning qirilib ketishi yoki boshqa og`ir oqibatlarga sabab bo`lsa, hosil bo`ladi. Ushbu jinoyatning obyekti bo`lib atrof tabiiy muhitning ifloslanishi oqibatlarini bartaraf qilish bo`yicha belgilangan tartibi hisoblanadi, uning subyekti bo`lib esa, korxonaning atrof tabiiy muhitning muhofaza qilish majburiyatni bajarish uchun mas'ul bo`lgan mansabdor shaxslar hisoblanadilar. Obyektiv tomondan, bu jinoyat harakat yoki harakatsizlik natijasida sodir etiladi, subyektiv tomondan esa, ehtiyotsizlik oqibatida sodir etiladi

O`zbekiston Respublikasining “Tabiatni muhofaza qilish to`g`risida”gi Qonunini 14-moddasiga binoan, xo`jalik faoliyatining atrof tabiiy muhitga zararli ta'siri atrof tabiiy muhit sifati, aholining ekologik jihatdan xavfsizligi, tabiiy resurslarni tiklash va muhofaza qilishni kafolatlovchi normativlar hamda standartlar bilan cheklanib qo`yiladi. Masalan, atmosfera havosida va suvlarda ifloslantiruvchi moddalar va biologik organizmlarning inson va atrof tabiiy muhit obyektlari uchun yo`l qo`yiladigan darajada to`planish normativlari belgilanadi. Ushbu normativlardan kelib chiqqan holda, har bir ifloslantiruvchi moddalar, biologik organizmlar chiqaruvchi doimiy manbalar (korxona, tashkilot, ularning obyektlari) uchun yo`l qo`yiladigan doiradagi normativlari belgilanadi. Bundan tashqari, atmosfera havosiga va suv obyektlariga zararli moddalar va biologik organizmlarni chiqarish Tabiatni muhofaza qilish davlat qo`mitasi organlarining ruxsati asosida amalga oshiriladi. Demak, atrof tabiiy muhitga zararli moddalar va biologik organizmlarni ruxsatsiz chiqarish yoxud belgilangan normativlardan ortiq chiqarish noqonuniy hisoblanadi.

O`zbekiston Respublikasining Yer kodeksini 79-moddasiga muvofiq, yerlarni muhofaza qilish maqsadida ularni ishlab chiqarish, kimyoviy va radioaktiv moddalar bilan ifloslanishidan, suv va shamol eroziyasidan, sho`rlanishidan va boshqa salbiy toifadagi buzilishlardan yuridik va jismoniy shaxslar himoya qilishlari shart. Ushbu Kodeksning 81-moddasiga muvofiq, kimyoviy va radioaktiv moddalar bilan ifloslanish natijasida ekologiya va sanitariya-gigiyenaga oid talablarga javob beradigan mahsulot olish ta'minlanmayotgan yer uchastkalari qishloq xo`jaligi oborotidan chiqarilishi va konservatsiya qilinishi lozim. Yerlarni buzish sifatida keyinchalik xo`jalik uchun foydalanishga to`sqinlik qiluvchi uning foydali xususiyatlarini to`liq yoki qisman yo`qotishga olib keluvchi harakatlar tushunilishi lozim. Asosan, qishloq xo`jaligi yerlari ulardan noto`g`ri foydalanish (noto`g`ri sug`orish, kimyoviy moddalarni me'yoridan ortiq qo`llash va boshqalar) natijasida buzilishi mumkin.

O`zbekiston Respublikasining Jinoyat kodeksini 196-moddasida ko`zda tutilgan jinoyat obyekti yer, suv va atmosfera havosining ifloslanishdan muhofaza qilishni belgilangan tartibi. Mazkur jinoyatning subyekti bo`lib, ham mansabdor shaxslar, ham fuqarolar hisoblanadilar. Jinoyat ehtiyotsizlik yoki qasddan sodir etiladi. Jinoyatning obyektiv tomoni aybli harakat yoki harakatsizlikdir.

O`zbekiston Respublikasining Jinoyat kodeksini 197-moddasi yer, yer osti boyliklaridan foydalanish shartlarini yoki ularni muhofaza qilish talablarini buzganlik uchun javobgarlik belgilaydi. Mazkur moddada belgilangan jinoyatning obyekti yerdan va yer osti boyliklaridan foydalanishning belgilangan tartibi. Yerlardan foydalanish shartlari O`zbekiston Respublikasining Yer kodeksida belgilangan. Jumladan, O`zbekiston Respublikasining Yer Kodeksini 40-moddasida yer egasi, yerdan foydalanuvchi va ijarachi yer uchastkasidan belgilangan maqsadlarda oqilona foydalanishi, tuproq unumdorligini oshirish, ishlab chiqarishda tabiatni muhofaza qiluvchi texnologiyalarni qo`llashi, o`z xo`jalik faoliyati natijasida hududda ekologik vaziyatning yomonlashuviga yo`l qo`ymaslik va boshqa majburiyatlar ko`zda tutilgan. Bundan tashqari, shunga o`xshash boshqa majburiyatlar mazkur kodeksning 48, 79 va boshqa moddalarida mustaxkamlangan. Agar ushbu talablarni bajarmaganlik natijasida og`ir oqibatlar vujudga kelsa, mazkur moddada ko`zda tutilgan jinoyat sodir etilgan deb hisoblanadi. Yerdan foydalanish qoidalarining buzilishi natijasida odamlarning kasallanishi, hayvonot va o`simlik dunyosining nobud bo`lishi, qishloq xo`jaligi ekinlari hosildorligining keskin pasayib ketishi og`ir oqibatlar toifasiga kiradi.

Yer osti boyliklaridan foydalanish talablari O`zbekiston Respublikasining “Yer osti boyliklari to`g`risida”gi Qonunning 13-15, 18, 24-25, 29, 30-33, 36-38-moddalarida o`z aksini topgan. Masalan, yer osti boyliklaridan foydalanuvchilarga yer osti boyliklaridan foydalanish bilan bog`liq bo`lgan ishlarning bexatar olib borilishi, atrof tabiiy muhitni, binolar va inshootlarni yer osti boyliklaridan foydalanish bilan bog`liq bo`lgan ishlarning zararli ta'siridan muhofaza qilish majburiyatlari yuklatilgan. Agar yer osti boyliklaridan foydalanish qoidalaring buzilishi natijasida odamlarning kasallanishiga, hayvonot va o`simlik dunyosini nobud bo`lishiga, foydali qazilmalarni qazib olishning to`xtatilishiga va boshqa og`ir oqibatlarga olib kelsa, mazkur moddada ko`rsatilgan jinoyat sodir etilgan deb hisoblanishi lozim. O`zbekiston Respublikasining Jinoyat kodeksini 197-moddasida belgilangan jinoyatning subyekti mansabdor shaxslar va fuqarolar hisoblanadilar. Mazkur jinoyat qasddan yoki ehtiyotsizlik orqasidan sodir etilishi mumkin. Jinoyatning obyektiv tomoni harakat (man etilgan talablarni sodir etish) yoki harakatsizlik (qonun hujjatlarida belgilangan majburiyatlarni bajarmaslik) bilan tafsiflanadi.

O`zbekiston Respublikasining Jinoyat kodeksini 198-moddasida ekinzor, o`rmon yoki boshqa dov-daraxtlarga shikast yetkazish yoki ularni nobud qilish uchun jinoiy javobgarlik belgilangan. Ushbu moddaning birinchi qismida olovga ehtiyotsizlik bilan munosabatda bo`lish natijasida ekinzor, o`rmon yoki boshqa dov-daraxtlarga shikast yetkazish yoki ularni nobud qilish natijasida ko`p miqdorda zarar yetkazilsa yoki boshqa bir og`ir oqibatlar vujudga kelsa, jinoiy javobgarlikka tortish belgilangan. O`zbekiston Respublikasining “O`simlik dunyosini muhofaza qilish va undan foydalanish to`g`risida”gi qonunining 10-moddasiga muvofiq, o`simlik dunyosi obyektlaridan foydalanish joylarida yuridik va jismoniy shaxslar yong`in xavfsizligiga rioya etishlari va yong`inga qarshi tadbirlarni amalga oshirishlari, yong`in chiqqan hollarda esa, uni o`chirish chora-tadbirlarini ko`rishlari shart. Xuddi shunday majburiyat O`zbekiston Respublikasining “O`rmon to`g`risida”gi qonunini 30 va 32-moddalarida mustaxkamlangan. Ushbu jinoyatning obyekti o`rmonlarda va o`simlik dunyosi joylashgan joylarda yong`inga qarshi xavfsizlikning belgilangan talablaridir. Ushbu jinoyatning subyekti fuqaro va mansabdor shaxslar bo`lishi mumkin. Subyektiv tomondan, bu jinoyat faqat ehtiyotsizlik orqasidan sodir etiladi. Obyektiv tomondan, harakat yoki harakatsizlik oqibatida sodir etiladi.

Ushbu moddada ko`rsatilgan ko`p miqdorda zarar yetkazish deganda, eng kam ish haqining yuz baravaridan uch yuz baravarigacha miqdordagi zarar tushuniladi. Boshqa og`ir oqibatlar deganda, dov-daraxtlarning katta maydonda tiklab bo`lmaydigan darajada nobud qilinishi tushuniladi.

Ushbu moddaning ikkinchi qismida o`rmon yoki boshqa dov-daraxtlarni qonunga xilof ravishda kesib, ko`p miqdorda zarar yetkazilganlik uchun jinoiy javobgarlik belgilangan. Daraxtlar va boshqa dov-daraxtlarni, shu jumladan o`rmonlarda, kesish uchun foydalanish o`simlik dunyosidan maxsus foydalanish toifasiga kiradi va buning uchun o`rmon xo`jaligi yoki tabiatni muhofaza qilish organlari bilan kelishilgan holda mahalliy davlat hokimiyati organlarining ruxsatiga binoan, amalga oshirish mumkin. O`zbekiston Respublikasining Jinoyat kodeksini mazkur moddasida dov-daraxtlarni qonunga xilof ravishda kesish deganda, ruxsatsiz yoki ruxsati bo`la turib, uning talablarini buzgan hg`olda dov-daraxtlarni kesish tushuniladi.

Ushbu moddaning ikkinchi qismida ko`zda tutilgan jinoyatning obyekti o`rmon va boshqa dov-daraxtlarni kesishning belgilangan tartibidir. Subyektiv tomondan, qasddan yoki ehtiyotsizlik aybi bilan sodir etiladi. Ushbu jinoyat obyektiv tomondan faqat harakat orqali sodir etilishi mumkin.

Mazkur moddaning uchinchi qismida ekinzor, o`rmon yoki boshqa dov-daraxtlarga shikast yetkazish, ularni payxon qilish, nobud qilish uchun jinoiy javobgarlik belgilangan. Ushbu jinoyat ekinzor, o`rmon yoki boshqa dov-daraxtlarga shikast yetkazish, ularni payxon qilish, nobud qilish, noqonuniy ravishda mol boqish yoki mollarni haydab o`tish, avtomobil yoki qishloq xo`jaligi va boshqa texnikani haydab o`tishda yoxud ekinzorlarda qurilish va boshqa ishlarni amalga oshirishda sodir etilishi mumkin. Ushbu jinoyatning obyekti o`rmonlarda va boshqa ekinzorlarda mol boqish va pichan o`rish, daraxtlarni va boshqa ekinzorlarni muhofaza qilishning belgilangan tartibidir. Ushbu jinoyatning subyekti fuqarolar va mansabdor shaxslar hisoblanadi. Mazkur jinoyat subyektiv tomondan qasddan yoki ehtiyotsizlik orqasidan obyektiv tomonidan esa harakat yoki harakatsizlik bilan sodir etiladi.

Mazkur moddada belgilangan jinoyatlar oqibatida yetkazilgan zararni aniqlashda O`zbekiston Respublikasi Vazirlar Mahkamasining 1995 yil 27 iyuldagi 293-sonli “O`zbekiston Respublikasi o`simlik dunyosiga yetkazilgan ziyonni undirish bo`yicha miqdorini hisoblash uchun taksalarni tasdiqlash to`g`risida”gi qarori qo`llanilishi lozim.

O`zbekiston Respublikasining Jinoyat kodeksini 199-moddasida o`simliklar kasalliklari va zararkunandalari bilan kurashish talablarini buzganlik uchun jinoiy javobgarlik belgilangan. “Tabiatni muhofaza qilish to`g`risida”gi Qonunning 42-moddasiga muvofiq yuridik va jismoniy shaxslar kimyoviy moddalarni saqlash, tashish, qo`llash chog`ida ekologiya talablariga rioya qilishlari, ularni qo`llashning zararli oqibatlarini oldini olish va bartaraf etish chora-tadbirlarini ko`rishlari shart. O`zbekiston Respublikasida qo`llanilishi ruxsat etilgan kimyoviy moddalar ro`yxati Vazirlar Mahkamasi qoshidagi maxsus komissiya tomonidan tasdiqlanadi. O`simliklar kasalliklari yoki zararkunandalari bilan kurashish chora-tadbirlari amalga oshirilganda, inson salomatligini ta'minlovchi sanitariya va gigiyena qoidalariga hamda o`simlik, hayvonot dunyosi, shuningdek atrof tabiiy muhitning boshqa obyektlarini muhofaza etish talablariga rioya etilishi lozim. Xususan, “O`simlik dunyosini muhofaza qilish va undan foydalanish to`g`risida”gi Qonunning 24-moddasida, “Hayvonot dunyosini muhofaza qilish va undan foydalanish to`g`risida”gi Qonunning 33-moddasida o`simliklarni himoya qilish vositalari va boshqa dorilarini qo`llash paytida o`simlik hamda hayvonot dunyosi obyektlari o`sadigan (yashaydigan) muhitni muhofaza qilish talablari hisobga olinishi to`g`risidagi qoidalarga rioya etish majburiyati mustaxkamlangan. Mazkur jinoyatning obyekti o`simliklar kasalliklari yoki zararkunandalari bilan kurashish bo`yicha belgilangan tartib hisoblanadi. Ushbu jinoyatning subyekti fuqarolar va mansabdor shaxslar hisoblanadi. Obyektiv tomondan, harakat bilan sodir qilinadi. Subyektiv tomondan esa ehtiyotsizlik yoki qasddan sodir etilishi mumkin. Ushbu moddada nazarda tutilgan og`ir oqibatlar deb odamlarning zaxarlanishi oqibatida kasal bo`lishi, o`simlik va hayvonot dunyosi obyektlarining ko`p miqdorda nobud bo`lishini tushunish lozim.

O`zbekiston Respublikasining Jinoyat kodeksini 200-moddasida veterinariya yoki zootexnika qoidalarini buzish hayvon yoki parrandalar epidemiya (epizootiya)sining tarqalishiga, ularni yalpi qirilib ketishiga yoki boshqa oqibatlarni kelib chiqishiga sabab bo`lganda jinoiy javobgarlik belgilangan. O`zbekiston Respublikasining 1993 yil 3 sentabrdagi “Veterinariya to`g`risida”gi Qonunining 12 va 18-moddalarida veterinar xizmati hamda hayvonlar egalarining veterinariya bo`yicha majburiyatlari belgilangan. Veterinariya va zootexnika qoidalari hayvonlarni yuqumli kasalliklarining oldini olish yoki ular kasallikka chalingan taqdirda kasallanish oqibatlarini bartaraf etish hamda kasallik tarqalishiga qarshi chora-tadbirlarni o`z ichiga oladi. hayvonlarning yalpi kasallanishi oqibatida ularning mahsuloti orqali insonlarning salomatligiga yuqumli bo`lgan brutsellez, salmonellez va boshqa yuqumli kasalliklar bilan zarar yetkazilishi mumkin. Mazkur jinoyatning obyekti veterinariya yoki zootexnika ishlarini amalga oshirishning belgilangan tartibidir. Ushbu jinoyatning og`ir oqibatlariga insonlarning yuqumli kasalliklar bilan kasallanishi, hayvon va parranda mahsulotlarining yaroqsiz bo`lishi, yuqumli kasalliklarga qarshi kurashish uchun sarflangan hrajatlarni kiritish mumkin Bu jinoyat subyektiv tomondan, qasddan yoki ehtiyotsizlik orqasidan sodir etilishi mumkin. Obyektiv tomondan esa, ushbu jinoyat hrakat yoki hrakatsizlik bilan sodir etiladi.

O`zbekiston Respublikasining Jinoyat kodeksini 201-moddasida xo`jalik faoliyatida o`simliklarni hmoya qilishning kimyoviy vositalari, mineral o`g`it, o`sish biostimulyatori yoki boshqa kimyoviy dorilarni ishlab chiqarish, saqlash, tashish yoki ulardan foydalanish qoidalarini buzganlik uchun jinoiy javobgarlik ko`zda tutilgan. O`zbekiston Respublikasining “Tabiatni muhofaza qilish to`g`risida”gi Qonunini 42-moddasida kimyoviy moddalarni ishlab chiqarish, saqlash, tashish, qo`llash chog`ida ekologiya talablariga belgilangan normativ va qoidalarga rioya qilish,ularni qo`llashning zararli oqibatlarini oldini olish va bartaraf etish chora-tadbirlarini ko`rish bo`yicha yuridik hamda jismoniy shaxslarning majburiyati belgilangan. Mazkur moddada belgilangan jinoyatning obyekti xo`jalik faoliyatida o`simliklarni himoya qilishning kimyoviy moddalarni ishlab chiqarish, saqlash, tashish yoki ulardan foydalanishning belgilangan qoidalari hisoblanadi. Ushbu jinoyatning subyekti bo`lib fuqarolar va mansabdor shaxslar hisoblanadilar. Obyektiv tomondan, bu jinoyat harakatsizlik yoki harakat bilan sodir etiladi. Ushbu jinoyat subyektiv tomondan qasddan yoki ehtiyojsizlik orqasidan sodir etiladi. Mazkur moddada ko`zda tutilgan og`ir oqibatlarga odamlarning ommaviy kasallanishi, hayvonlarning qirilib ketishi, xosillar va ekinlarning nobud bo`lishini, ichimlik suvining zaharlanishini kiritish mumkin.

O`zbekiston Respublikasining Jinoyat kodeksini 202-moddasi hayvonot va o`simlik dunyosidan foydalanish tartibini buzganlik uchun jinoiy javobgarlikni belgilaydi. Ushbu moddaning birinchi qismiga muvofiq, ovchilik, baliqchilik yoki noyob hayvonlarning yoki shifobaxsh, oziq-ovqat va dekorativ o`simliklardan yoxud muhofaza qilinadigan hududlarda hayvonot va o`simlikdan foydalanish tartibi va shartlarini buzganlik uchun jinoiy javobgarlik belgilangan. Mazkur jinoyat, agar ancha miqdorda (eng kam ish haqining o`ttizdan yuz baravarigacha) ziyon yetkazilsa, tugallangan deb hisoblanadi. Mazkur moddada ko`zda tutilgan qoidalar O`zbekiston Respublikasining “O`simlik dunyosini muhofaza etish va ulardan foydalanish to`g`risida”gi, “Hayvonot dunyosini muhofaza etish va ulardan foydalanish to`g`risida”gi, “O`rmon to`g`risida”gi qonunlarida, Vazirlar Mahkamasining 1991 yil 10 aprel 95-sonli qarori bilan tasdiqlangan “O`zbekiston Respublikasi hududida ov qilish, ovchilik-baliq ovlash xo`jaligini yuritish to`g`risida”gi Nizomida, Tabiatni muhofaza qilish davlat qo`mitasi tasdiqlagan “O`zbekiston Respublikasi hududida ov qilish va baliq tutish qoidalari”da o`z aksini topgan. hayvonot va o`simlik dunyosidan foydalanishning umumiy talablariga ruxsatnoma asosida maqsadli hamda ruxsatnomada ko`zda tutilgan miqdor va turlarda foydalanish kiradi.

Agar hayvonot va o`simlik dunyosidan foydalanish qoidalarini buzib, qizil kitobga kiritilgan obyektlardan foydalanish yoki katta miqdorda (eng kam ish g`aqining o`ttiz baravaridan yuz baravarigacha) ziyon yetkazilsa, yoxud bir guruh shaxslar tomonidan oldindan til biriktirib sodir etilsa, O`zbekiston Respublikasining Jinoyat kodeksini 202-moddasi ikkinchi qismi bilan kvalifikatsiya qilinishi lozim. qizil kitobni yuritish tartibi O`zbekiston Respublikasi Vazirlar Mahkamasining 1992 yil 9 martdagi 109-sonli “O`zbeksiton Respublikasining qizil kitobi to`g`risida”gi qarori bilan belgilangan.

Agar ov qilish, baliq tutish, yoxud hayvonot va o`simlik dunyosidan foydalanishning boshqa qoidalari xavfli retsedivist tomonidan shaxsning o`z xizmat mavqyeidan foydalanib, yer, suv yoki havoda ishlatiladigan mexanizatsiyalashgan vositalardan foydalanib; portlash qurilmalari, zaxarli kimyoviy moddalar yoki boshqa yalpi qirib yuboradigan usullarni qo`llab, uyushgan guruh tomonidan, juda ko`p (eng kam ish haqining uch yuz baravaridan ortiq bo`lgan) miqdorda zarar yetkazib sodir etilsa, bu jinoyat mazkur moddaning uchinchi qismi bilan kvalifikatsiya qilinadi. Bu jinoyatning obyekti hayvonot va o`simlik dunyosidan foydalanishning belgilangan tartibi hisoblanadi. Bu jinoyatlar fuqaro va mansabdor shaxslar tomonidan sodir etilishi mumkin. Ushbu jinoyat qasddan sodir etiladi. Obyektiv tomondan, harakat bilan tavsiflanadi.

O`zbekiston Respublikasining Jinoyat kodeksini 203-moddasida suv yoki suv havzalaridan foydalanish shartlarini buzganlik uchun jinoiy javobgarlik belgilangan. Suv va suv havzlaridan foydalanish shartlari “Tabiatni muhofaza qilish to`g`risida”gi Qonunning 19-moddasida, “Suv va suvdan foydalanish to`g`risida”gi qonunning 12-15, 17, 30, 35 va boshqa moddalarida hamda Vazirlar Mahkamasining 1993 yil 3 avgustdagi 385-sonli “Limitlangan suvdan foydalanish to`g`risida”gi qarorida ko`zda tutilgan. Suv va suv havzalaridan foydalanish qoidalarini buzishga quyidagilar kiradi: o`zboshimchalik bilan suvdan foydalanish, limitlarga rioya qilmasdan suv olish, suvlarning ifloslanishi, bulg`alanishi hamda ularni zararli ta'sirining oldini oluvchi qurilma va moslamalarsiz korxona yoki boshqa obyektlarni ishga tushirish, suvlardan xo`jasizlarcha foydalanish, suv xo`jalik inshootlari va qurilmalarini buzish hamda ulardan foydalanish qoidalarini buzish va boshqalar. Mazkur jinoyatning obyekti suv va suv havzalaridan foydalanishning belgilangan tartibi. Uning subyekti fuqaro va mansabdor shaxslar hisoblanadi. Subyektiv tomondan, bu jinoyat qasddan yoki ehtiyotsizlik oqibatida sodir etiladi. Obyektiv tomondan, bu jinoyat harakat yoki harakatsizlik orqasidan sodir qilinishi mumkin.

O`zbekiston Respublikasining Jinoyat kodeksini 204-moddasiga muvofiq, alohida muhofaza qilanadigan tabiiy hududlarning huquqiy holatini buzganlik uchun jinoiy javobgarlik belgilangan. Muhofaza qilinadigan tabiiy hududlarning huquqiy holati O`zbekiston Respublikasining “Muhofaza etiladigan tabiiy hududlar to`g`risida”gi Qonunida va har bir qo`riºxona, milliy tabiiy bog`lar, buyurtmali qo`riqxona, tabiiy yodgorlik va boshqa muhofaza etiladigan tabiiy hududlar to`g`risidagi nizomlarda aks ettirilgan. Muhofaza etiladigan tabiiy hududlarning huquqiy holati, ularda tabiiy resurslardan foydalanishning man qilinishi yoki cheklanishi va ularni muhofaza etishning qattiqroq talablari bilan tavsiflanadi. Mazkur moddada ko`zda tutilgan jinoyatning obyekti muhofaza etiladigan hududlarning huquqiy holati hisoblanadi. Ushbu moddaning birinchi qismida ko`rsatilgan jinoyatlar ko`p miqdorda (eng kam ish haqining yuzdan uch yuzgacha baravarida) ziyon yetkazilsa yoki noyob o`simlik va hayvonot dunyosining turlarining kamayib ketishi, ularning tabiiy sharoitlarini o`zgarishi kabi oqibatlar vujudga kelsa, tugallangan hisoblanadi. Jinoyat kodeksining 204-moddasi ikkinchi qismida nazarda tutilgan jinoyat muhofaza qilinadigan hududlarda tabiiy obyektlarni qasddan nobud qilib yoki shikastlantirib, ko`p miqdorda zarar yetkazilsa, yoxud muhofaza etiladigan hududning o`z noyob xususiyati va qimmatliligini yo`qotsa yoki boshqa og`ir oqibatlarga olib kelsa, sodir etilgan hisoblanadi. Mazkur moddada ko`rsatilgan jinoyatning subyekti fuqarolar va mansabdor shaxslar hisoblanadi. Muhofaza qilinadigan hududlarning huquqiy holatini buzish harakat yoki harakatsizlik oqibatida, qasddan yoki ehtiyotsizlik bilan sodir etiladi.

O`zbekiston Respublikasining Jinoyat kodeksini 229<sup>1-</sup>moddasi yer uchastkalarini o`zboshimchalik bilan egallab olish uchun jinoiy javobgarlikni belgilaydi. Agar aybdor shaxs O`zbekiston Respublikasining Ma'muriy javobgarlik to`g`risidagi kodeksining 60-moddasi bo`yicha o`zboshimchalik bilan yer uchastkasini egallab olish uchun javobgarlikka tortilgan bo`lib, mazkur huquqbuzarlikni bir yil mobaynida takroran sodir etsa, u jinoyat sodir etgan deb hisoblanadi. Mazkur jinoyat subyekti fuqarolar va mansabdor shaxslar hisoblanadilar. Jinoyatning subyektiv tomoni qasddan sodir etilishi bilan ifodalanadi. Ushbu jinoyatning obyektiv tomoni faqat harakat bilan sodir etilishi mumkin.