GÜRCÜstanda türk məNŞƏLİ

Tədqiqatçılara görə, 889-cu ildə şərqdən gələn qıpçaqlar peçeneqləri məğlub edərək Qara dənizin şimal çöllərinə sıxışdırmışdılar. Bu hadisə ilə əlaqədar olaraq peçeneqlərin Kov və Vərəndə tayfaları qıpçaqlara qarışmışdır(bax:195). Cənubi Qafqazda bir neçə Qovlar və Vərəndə kənd adları məhz bu tayfaların adları ilə əlaqədardır.

Gürcü mənbələrində peçeneqlər paçanik adı ilə eranın I əsrinin 70-ci illərinə aid hadisələrdə çəkilir(170,32). Mənbədə deyilir ki, həmin vaxt gürcü ordusu paçaniklərlə ittifaqda Erməniyəyə hərbi səfər təşkil etmişdir (145, I, 45-46).Qədim gürcü mənbələrində V əsrdə gürcü hökmdarı Vaxtanq Qorqasalın hakimiyyəti illərində hadisələrlə əlaqədar Şimali Qafqazda Ovseti (yəni Osetiya) ilə sərhəddə Paçaniketi(“Peçeneq ölkəsi”) əyaləti də çəkilir(170,85). Gürcüstanda Peçeneq etnonimi Becaniani, Bcinevi, Bceanini, Becini,  və Becani məntəqə adlarında əksini tapmışdır.

Ermənistanda Bcini və Albaniyada VIII-IX əsrlərdə Becan (indiki Zəyəmçayın bir qolunun adı) toponimləri də bu sıradandır.

Peçeneqlərin müəyyən hissəsi VIII-X əsrlərdə Cənub- şərqi Avropada yaşamaqa davam edirdilər. Onlar haqqında X əsr Bizans müəllifi Konstantin Baqryanorodnı mə’lumat vermişdir. Bu müəllif yunanca yazılışında peçeneqlər tayfalarının adlarını  İrtim, Tsur, Qila,Kulpey, Xorovoy, Talmat,Xopon və Tsopon kimi qeyd etmişdir (bax: 108,106-107). O, həm də peçeneqlərin üç tayfasının Kəngər adlandığını  yazmışdır.

Peçeneq tayfalarının adları bu mənbədə çox təhrifə mə‘ruz qalmışdır. Əslində bu tayfaların adları belə idi: Erdim, Çur, Kula, Kuloba, Karabaq, Kapan və Çopan. Həmin tayfalar Gürcüstanda Karabağlı,Kulalisi,Kolaqır,Kapan və Çobano adlarında əksini tapmışdır.

İlk dəfə biz müəyyən etmişik ki, Azərbaycanda Qarabağ bölgə adı məhz peçeneqlərin Qarabağ tayfasının adındandır. Türkoloqlar yazırlar ki, başqa türk dilləriində  “q” səsi peçeneqlərin dillərində “y” səsi kimi tələffüz olunurdu. Qarabağ tayfa adının peçeneqlərdə “Karabay” kimi səslənməsi də  bununla əlaqədardır.

Gürcüstan toponimiyasında peçeneqlərin yuxarıda adları çəkilmiş tayfalarının bə’zilərinin adları yaşayış məntəqə adlarında indiyədək qalmışdır. Gürcüstanda mənşəcə peçeneqlərlə bağlı yer adlarından biri Kəpənəkçidir. Kəpənəkçi peçeneqlərin  Kapan  tayfasının adından və bir sıra türk tayfalarının adları üçün səciyyəvi “ak“, “ək“ şəkilçisindən ibarətdir. Bu şəkilçi elə peçeneq etnonimində (Basin etnonimindən və “ak“ şəkilçisindən) də iştirak edir. Kəpənəkçi etnoniminin sonundakı “çi” şəkilçisi Kəpənəkçi tayfasının  Kapan tayfasına məxsusluğunu göstərir. (müqayisə üçün: Kazan-Kazançı; Tana-Danaçı və b.).

IX əsrin axırlarında Cənub- şərqi Avropaya Bizans mənbələrində Uz (ərəb mənbələrində Quz) tayfaları gəldilər. Rus salnamələrində uzların Bout (194, X, 51), Kaebiçi (Kay etnonimindən, oba sözündən və rusca “içi” patronimik şəkilçisindən) (194,II, 507) və Turbey (Tur etnonimindən və oba sözündən ibarət etnonimin rusca yazılışı) və b. tayfalarının adları qeyd olunmuşdur ( 194,II, 398).

Gürcüstan ərazisinə bu tayfalar  qıpçaqların tərkibində gəlmiş və toponimlərdə iz qoymuşlar.

Xəzərlər.-VII əsrdə  Avropanın cənub-şərqində Xəzər dövləti yaranır. Bu dövlətin əsasını Xəzər adlı türk tayfası qoymuşdur.Xəzərlər bu bölgənin hunlara qədərki yerli tayfası hesab olunurlar. “Xəzər” etnoniminin özü fikrimizcə qədim türk mənşəli Kas etnonimindən və ər- “kişi”, “döyüşçü” sözündən ibarət adın təhrif formasıdır.

Şimali Qafqazdan xəzərlərin Cənubi Qafqaza ilk gəlişi II əsrə (dəqiqi 193-213-cü illər) aiddir.  O vaxtdan IX əsrə qədər onlar dəfələrlə Cənubi Qafqaza, o cümlədən Gürcüstana hərbi səfərlər etmiş, ərəblərlə yüz ilə qədər müharibələr aparmış və müəyyən hissəsi burada məskunlaşmışdır.  İran Sasanlar dövlətinin şahları 1 Qubadın (489-531) və Xosrov  Ənu -şirəvvanın (531-579) hakimiyyəti illərində xəzərlərin Cənubi  Qafqaza  hərbi yürüşləri haqqında mə’lumatlar çoxdur(bax: 106,42-43).1X əsr ərəb müəllifi Balazori Sasani şahı Qubadın (428-531) hakimiyyəti illərində Curcanın (Gürcüstanın) və Aranın (Albaniyanın) xəzərlərin hakimiyyəti altında olduğunu yazmışdır(84,5). Alban tarixçisi Musa Kalankatlının “Alban tarixi” əsərində xəzərlərin 627-ci ildə Tbilisi şəhərini alınması haqqında mə’lumat vardır. 765-ci ildə xəzərlərin Ras  Tarxanın başçılığı ilə Tbilisi şəhərini  tutması mə’lumdur(18,27). Ərəb tarixçisi İbn əl Əsirin əsərinin bir  fəsli “Gürcülərin islam ölkəsinə soxulmaları və Tiflisi almaları haqqında” adlanır(18,106). Başlığın belə adlanması  onunla bağlıdır ki, Tbilisiyə qədər (Tbilisi daxil olmaqla) ərazi “İslam ölkəsi” hesab edilirdi.

XI əsr gürcü müəllifi Leonti Mroveli Kartlidə hələ Makedoniyalı İskəndər(e.ə.1V -əsr) vaxtında xəzər dilində (“xazarauli”) danışıldığını yazmışdır(170,27).Bu mə’lumat göstərir ki, xəzərlərin müəyyən hissəsi erkən orta əsrlərdə Gürcüstan ərazisində yaşayırdı.  Leonti  Mrovelinin bu mə’lumatı da diqqəti cəlb edir ki, bütün torqomoslar(yə’ni Qafqaz xalqları) xəzərlərə vergi verirdilər (“vse  torqomosiani bıli dannikami xazar”...) Gürcüstanda xəzərlərin kütləvi sür’ətdə məskunlaşması VII-VIII əsrlərə aiddir. IX əsr ərəb müəllifi Balazori ərəblərin Cənubi Qafqaza gəldikləri vaxt (VII əsr) Curcanın (Gürcüstanın) və Arranın xəzərlərə tabe olduğunu yazmışdır (84,16). Bu müəllif VIII əsrin əvvəllərinə aid hadisələrdən danışıqda Gürcüstanda Bazalet əyalət adını çəkir ki, bu da xəzərlərin Bizal tayfasının adını əks etdirir. 1X əsrdə ərəb ordusunun  komandanı əslən türk Böyük Buğa Gürcüstana hərbi səfər edərək xilafətə tabe olmaq istəməyən gürcü tayfaları ilə mübarizəyə başladı. “Otkrıl (Buqa) Derbentskie vorota i  vıvel xazar, trista domov i posadil ix v Dmanisi"(180,516). V.F.Minorski 1X əsr ərəb müəllifi Əl Balazorinin mə’lumatına əsasən ərəb canişini Mərvan İbn Məhəmmədin V111 əsrin əvvəllərində 20 min nəfər xəzər ailəsinin Gürcüstanda yerləşdirdiyini yazmışdır(168,110).1X əsr ərəb müəllifi Əhməd ibn Ə’sam əl Kufi də Mərvan İbn  Məhəmmədin 40 min xəzər ailəsini Samur çayı boyunda və  “Kür çayının hər iki tərəfində olan düzənliklərdə” yerləşdirdiyini yazmışdır (31,49).

Ümumiyyətlə qeyd edilməlidir ki,  xəzərlər erkən orta əsrlərdə Gürcüstanın  siyasi həyatında mühüm rol oynamışdır. Gürcü mənbələrində Abxaz çarlığının xəzərlərin  köməyi ilə yaradıldığı fikri vardır(145,1,251) Bu, xəzərlərin Şimali Qafqazda qədimdən yaşaması ilə bağlı idi. Tarixşünaslıqda xəzərlər Cənub- şərqi Avropanın və Şimali Qafqazın hunlara qədərki yerli tayfası hesab olunurlar

Cənubi Qafqazda xəzər etnonimi Ordubad rayonunda Tivi kəndindən şimal-şərqdə Xəzəryurd (hün. 3168 m),Babək rayonunda Xəzərtəpə, Laçın rayonun Qırmızı Güney kəndi ərazisində  Xəzərtəpə,  Dağlıq Qarbağda Xəzərdaq(hün. 1745 m) dağ adlarında  və Gürcüstanda Kazreti toponimində əksini tapmışdır (xəzərlərin Kabar tayfasının adı) Gürcüstanda  Kapar (181,113), Azərbaycanda Kəbirli kənd adlarında qalmışdır.

Mənbələrdə xəzərlərin Kabar, Paçinak, Alikan (us),  Raqbina, Tarna Buz, Zabuk, Unqar, Tilmis,Samker,  Tauris, Avaz, Bizal, Uquz, Znur və b. tayfaların adları çəkilir (bax:82,13). Bu tayfaların adları Gürcüstanın toponimiyasında  əksini tapmışdır. Məsələn, xəzərlərin Bizal tayfasının  adı ilə  bağlı Bazalet toponimi X1-əsr  ərəb müəllifi Balazorinin əsərində çəkilmişdir. Kulas tayfasının adı Borçalı mahalında Xulaş oykonimində  qalmışdır. Azərbaycanda Ulaşlı və Dağıstanda  Ulaşkənd yaşayış məntəqə adları ilə  Xulaş toponimi mənşəcə eynidir. İrəvan quberniyasının Novo-Bayazid qəzasının ərazisi orta əsrlərdə xəzərlərin Kabar tayfasının adı ilə Kavar adlandığı mə’lumdur.

Bulqarlar.  Eranın əvvəllərindən başlayaraq Cənub-şərqi Avropada Bolqar (yaxud Bulqar) tayfasının adı mənbələrdə tez-tez çəkilir. Erkən orta əsrlərdə bu  tayfanın Bulqar adlı dövləti mövcud olmuşdur.Şimali Qafqaz çöllərindən bolqarların müəyyən hissəsinin Şərqi Anadoluya və Cənubi Qafqaza gəlməsi barədə qədim mənbələrdə mə’lumatlar vardır. Gürcüstanda Çorox çayının sol tərəfində Bulqar dağları vardır (237). Mənbələrdə bulqarlar xəzərlərlə yanaşı çəkilir. Bulqarların Kuviar, İskil, Kul, Kazan,Çakar, Kuriqur və b. tayfalardan ibarət olması mə’lumdur (81,227). Gürcüstanda bu  tayfaların adları toponimlərdə əksini tapmışdır. Orada Kuviar  İskil və  Kul tayfaları ilə bağlı toponimlər, Xubiara, Askilauri və Kulari kənd adları) göstərir ki, bu  tayfalar xəzərlərin  tərkibində gəlmişlər.

Avarlar - Qədim türk tayfalarından biri avar (dəqiqi abar) adlanmışdır. Cənub-şərqi Avropa çöllərində yaşamış avarlar (rus mənbələrində  obr, latınlaşdırılmış forması- avarus) ilk dəfə Prisk Paniyskinin hunlar ölkəsinə səfərinin  hesabatında çəkilmişdir (bax: Oçerk istorii SSSR, III- 1X vv.M. 1958, s. 569). Avarlar Şimali Qafqaz çöllərinə hunların tərkibində gəlmişlər. Ona görə də  Bizans müəllifi  Feofilakt  Simokatta abarları hun kimi qeyd  edir (225,30).

Erkən orta əsrlərdə  avarlar Qara dənizin şimal çöllərində hakim mövqeyə malik tayfaya çevrilmiş və  tarixşünaslıqda Avar xanlığı adlı qüdrətli dövlət yaratmışlar (bu barədə bax: Əsmət Muxtarova. Avar xaqanlığı “Azərbaycan tarixi məsələləri”, 11, 1997).

Abar etnonimini Abaran  forması Azərbaycanın şimal şərqində Abaran toponimində(Xaçmaz r-nu) də əksini tapmışdır.N.Y.Merpertin yazdığına görə V1 əsrdə avarlar Cənubi Qafqaza gəlmişlər(bax: Oçerki istorii SSSR,111-1X vv.M.1958.s.576). Avarların bir hissəsinin gürcü çarı  Quramın (570-600) hakimiyyəti illərində Gürcüstanda məskunlaşması da mə’lumdur (Kartlis Sxovreba. SMOMPK, vıp. XXII, Tiflis , 1897, s. 22). Gürcüstanda Abari kənd adı abar etnonimini əks etdirir. VI əsrdə Albaniyada abarların yaşaması barədə mə’lumata (157,35) əsasən demək olar ki, Həmdullah Qəzvininin (XIV) Kür çayının mənsəbində qeyd etdiyi Abarşəhr yaşayış məntəqə adı da bu qədim türk tayfasının adı ilə bağlı idi. Gürcü mənbəyində qeyd olunur ki, Bizans imperatoru Yustinian (585-611) avarların bir hissəsini Qafqaz dərələrində və “habelə Xunzaxda” yerləşdirilmişdi. (özlərini marulal “dağlı” adlandıran Dağıstandilli azsaylı xalqın özünü “avar” adlandırılması da ehtimal ki, bu hadisə ilə bağlıdır). Mənbədə daha sonda deyilir ki, "vposledstvii praviteli Kartaliani naznaçalisğ iz gtoqo knəceskoqo roda avarov" və Ksan eristavları (ordu komandaları) avarlardan idi (SMOMPK c.XX11 s.18-21).

Gürcüstan ərazisində bir neçə Abari, Alabar və Hallavar  (əsli “El-abar”) Opareti və Oparten toponimləri orada qədim türkmənşəli abar (avar) tayfasının yaşadığını göstərir.

Qıpçaqlar. Gürcüstan azərbaycanlılarının etnik  tarixində qıpçaqlar mühüm yer tutmuşdur.

Tarixşünaslıqda qıpçaqların 1X əsrin ortalarında  Volqa çayını keçərək Cənub- şərqi Avropaya gəlmələri fikri vardır. Rus  salnamələrində qıpçaqlar 1X əsrin  sonlarından çəkilir (194,1,16).  Belə çıxır ki,Cənubi Qafqazda qıpçaqlar yalnız  göstərilən  əsrlərdən sonra gəlib məskunlaşa bilərdi. Azərbaycan tarixşünaslığında qıpçaqların Azərbaycanda məskunlaşmasının X1-XIII əsrlərə aid edilməsi də    bununla əlaqədardır. Həqiqətdə  də 1223-cü ildə monqolların Şimali Qafqazda  Kalka çayı kənarında qıpçaqlar üzərində  qələbəsindən sonra Dərbənd keçidi ilə qıpçaqların müəyyən  hissələri Şimali Azərbaycan ərazisinə keçmişlər. Lakin qıpçaqlar  Cənubi Qafqazda ilk dəfə  eranın əvvəllərində məskunlaşmışlar.

X11-X111  əsrlərdə rus səlnamələrində  adları çəkilən qıpçaq tayfalarının bə‘zilərinin adları  göstərilən əsrlərdən çox əvvəl Azərbaycanın toponimiyasında əksini tapmışdır. Məsələn, qıpçaqların rus  mənbələrində adı çəkilən Tərtər tayfasının (82,79) adı ilə Tərtərçay toponimi alban tarixçisi Musa Kalankatlının “Alban tarixi” əsərində V11 əsrə aid hadisələrdə çəkilmişdir.

Qıpçaqların bə’zi  tayfaları hələ eranın əvvəllərində hunların tərkibində Cənub-şərqi Avropaya, ordan Cənubi Qafqaza gəlmişdir. Tədqiqatçılara görə qıpçaqlar  eradan əvvəl IV-II əsrlərdə Mərkəzi Asiyada hunların tərkibində olmuşlar (81, 83; 233,42). Deməli, erkən orta əsrlərdə Azərbaycanda və Gürcüstanda qıpçaq tayfalarının adları toponimlərdə əksini tapa bilərdi. Tərtərçay hidronimi məhz hunların tərkibində gəlmiş qıpçaqlarla əlaqədardır. Bunu  habelə qıpçaqlarla bağlı olan Kazak (Qazax) etnonimindən yaranmış Qazax məntəqə adının VII əsrə aid hadisələrdə qeyd olunması(31,46) da göstərir.  Cənubi Şərqi Avropada qıpçaqların bir qolunun Əncə adlanması mə’lumdur. Gürcüstanın Ança adlı mahal adı IX əsrə aid mənbədə göstərilmişdir (214, 41). Bu mahal adı da, şühəsiz, X11 əsrdən əvvəl Gürcüstanda məskunlaşmış qıpçaqlarla əlaqədar ola bilər. Qıpçaqların  Ança tayfasının adı Gürcüstanda İncədağ, İncəoğlu, Onçaxeti, Onçevi, Oncakei və b. məntəqə adlarında əksini tapmışdır (181,193-194).

Qıpçaqların tayfalarının adları rus və ərəb mənbələrində çəkilir. XI11-XIV və ərəb  coğrafiyaçılarının əsərlərində və rus salnamələrində Cənub-şərqi Avropada qıpçaq  tayfalarının adları qeyd olunmuşdur:Ancaoqlı, Burcoğlu, Arslanopa, Tuk, Urusoba, Burlu, Durt, Toksobiçi (Tokusoba), Kulobiçi, Kitanopa, Çeneqrepa, Aepa, Kobyakoba, Barqu, Etebiçi,  Kuçebiçi,Uran, İlaras, İt (İtlar) və Tertrobiçi (195;94-119 və 219,540-542).Bunlardan başqa qıpçaqların daha bir sıra tayfa adları da mə’lumdur. (bax: 82).

Qədim rus dilinin qrammatikasına uyğun surətdə verilmiş bu etnonimlər əslində belə idi: Ancaoğlu,Arslanoba, Uruzoba, Burlu, Tokuzoba, Kuloba, Kitanoba, Çeneqeroba, Ayoba, Kobyakoba, Etoba,  Kuçoba və Tərtəroba. Rusca yazılışında bu etnonimlərin bə’zilərinə rusca “içi”patronimik şəkilçisi əlavə olunmuşdur. Adları çəkilən tayfaların əksəriyyəti Azərbaycan, Ermənistan və Gürcüctanda toponimlərdə iz qoymuşdur.

Deyilənləri gürcü mənbələrində qıpçaqların “köhnə qıpçaqlar” (gürcücə “naqi qivçakara”) və “yeni qıpçaqlar” (gürcücə “axali qivçakara”) hissələrinə ayrılması da göstərir. Həm də “yeni qıpçaqlar” ifadəsi gürcü çarı 1V David tərəfindən   gətirilmiş qıpçaqlara aid edilirdi (bax, 67, 119). Bu mə’lumatda “yeni qıpçaqlar” deyildikdə XII əsrdə gürcü hökmdarlarının hərbi qüvvə kimi istifadə olunması məqsədilə Şimali Qafqazdan Gürcüstana köçürülüb yerləşdirdikləri qıpçaqlar nəzərdə tutulur.1194-cü ildə çariça Tamaranın Şirvanşah Axsitanın Gürcüstanda qəbulunda “əvvəlki və yeni” qıpçaqların başçılarının da iştirak etdiyi mə’lumdur (144,1,275).

Gürcü hökmdarı IV David  başda elbəyi Atrak olmaqla Şimali Qafqazdan Gürcüstana 225 min nəfər qıpçaq köçürmüşdü. 1V Davidin qıpçaqları Gürcüstana də’vət etməsi düşünülmüş addım idi. O vaxt Səlcuq oğuzları Gürcüstan ərazisini işğal etməyə başlamışdılar. Qədim gürcü mənbəyində yazılır ki,  “zapolnili törki i bıli  istreblenı ili vzətı v  plen vse  citeli gtix oblastey"(144,1,319-320)  "razoren bıl Kartli,ne bılo lödey v  krepostəx stranı i ne bılo lödskix cilih"(144,1,324; 331-332; 335-336). Ona görə 1V David yeganə çıxış yolu tapmışdı və o,1116-cı ildə əvvəlki arvadını boşayıb  qıpçaq xanı Atrakın qızı Turanduxta (qızın əsl adı mə’lum deyil, bu ad gürcü mənbələrindədir) evlənmişdi (144,336).1V David tezliklə qıpçaqlardan 50 minlik ordu yaratmış və gürcüstanın müdafiəsini təşkil etmişdi(1441,343).

Sonra gürcü çarı 111 Georgi (1156-1184)  əlavə olaraq 10 min (1156-1184)  qıpçaq köçürüb gətirmişdi (67,118-119; 115,25). “Gürcüstan tarixi” əsərinin müəllifləri yazırlar ki, David Şimali Qafqazdan 45 min qıpçaq ailəsini Gürcüstana köçürüb gətirməklə burada türkdilli əhali kütləsini artırdı (139,163). Lakin başqa mənbəyə görə Atrakın başçılığı ilə Şimali Qafqaz çöllərindən Gürcüstana köçürülmüş qıpçaqların miqdarı 230-240 min nəfər olmuşdur (192,96). Gürcü çarı  David Atrakı sarayına gətirmişdi. Lakin Don sahillərində qalmaqda davam etmiş qıpçaqların başçısı Sırçan ozan Orevi Gürcüstana göndərmiş və Atrakın geri qayıtmasını xahiş etmişdi. Orev özü ilə bir yovşan da gətirmiş  və iyləmək üçün Atraka vermişdi. Atrak yovşanı iyləyən  kimi qıpçaqların bir hissəsi ilə geri qayıtmışdı. Məhz qıpçaqların böyük miqdarda Gürcüstanda yerləşməsindən sonra qədim gürcü mənbəində Gürcüstan ərazisinin Kartveloba və Didi Turkoba (Böyük Türkoba)  adlandığı qeyd olunmuşdur (144,1,320). (194,11,716).

Cənub-şərqi Avropada qıpçaqlarda ərəb və rus mənbələrində Burcoqli (əslində “Burçaklı”) və Burçeviçi kimi çəkilən tayfanın adı diqqəti cəlb edir. Əksər  tədqiqatçılar Borçalı toponimini həmin etnonimlə bağlayırlar. Lakin bütünlükdə “Borçalı” toponiminin mənşəyi indiyədək  aydınlaşdırıl- mamışdır. S.S.Əliyarova görə,  bu toponimdə qədim türk dillərində börü, böri “qurd”, “canavar” sözü əksini tapmışdır. (S.S.Əliyarov. Qurddan törəyiş əfsanəsinin tarixi coğrafiyasına dair. “Türk dünyası  araşdırmaları”. İstanbul,1990, türkcə). Lakin bu fikir inandırıcı deyil. Əvvələn, toponimika elm  sahəsində makrotoponimin əfsanə əsasında yaranması qaydası yoxdur; ikinci, Burçoğlu (əsli Burçaklı) və Burçeviçi etnonimlərinin kökünü təşkil edən Burç (əsli, bizcə, “Borçalı” adından göründüyü kimi, “Borç”) sözündə ehtimal olunan börü “canavar” sözündən “ü” səsinin  düşümü və onun “ç” səsi ilə əvəzlənməsinin  filoloci izahı mümkün deyil. Ona görə də biz hesab edirik ki, Burçaqlı ( Burçaklı) və Burçeviçi ( yuxarıda deyildiyi kimi, “Burç” kökündən, türk dillərində oba “maldar tayfa” sözündən və rusca  yazılışda əlavə olunma “içi”  patronimik şəkilçisindən) etnonimlərinin kökünü Borç (əsli “Boruç”) etnonimi  təşkil edir və  Borçalı etnonimi də mənşəcə həmin etnonimlə bağlıdır. Antik mənbələrdə (məsələn, Ptolemeydə) Şimali Qafqaz çöllərində  savarlarla  yanaşı çəkilən Borus (yunan dilində “ç” səsi olmadığına görə “s” səsi ilə verilmişdir) tayfa adı və Bizans mənbələrində Şimali Qafqazda  yaşaması göstərilən Bersili, Bersula toponimi “Bərçalı” toponiminin əsasını təşkil edir. Bunun ərəb mənbələrində həmin tayfanın və  ölkənin “Borçola“ və “Barşali” kimi qeyd olunması da təsdiqləyir. Bersili, Bersula, Bərçola toponimləri məhz qədim Boruç etnonimindən və qədim türk  dillərində el, il “tayfa” sözündən ibarətdir. Deməli, qədim forması “Borçeli “(əsli Boruçeli) olmuş etnonim danışıqda “Borçalı” formasını kəsb etmişdir.

Borçalı  elinin Gürcüstana qıpçaqların tərkibində gəlməsi şübhəsizdir, lakin  bu gəlişin tarixi mə’lum deyil. Ola bilsin bu el eranın ilk əsrlərində hunlarla gəlmişdir. Məsələn,X1-X111 əsrlərdə Cənub-şərqi Avropada  qıpçaqların içərisində çəkilən Tərtər (rus mənbələrində “Tertrobiçi”, Tərtər tayfa adından, oba sözündən və rusca “içi” patronimik şəkilçisindən)  tayfasının adı ilə bağlı Tərtərçay hidronimi “Alban tarixi”ndə V11 əsrə aid hadisələrdə çəkilir. Deməli, çayın Tərtər adlanması hər halda V11 əsrdən əvvələ aiddir.  Qıpçaqların Ança tayfasının adı ilə bağlı Ança toponimi Gürcüstanda qədim gürcü mənbələrində qeyd olunmuşdur.

Rus mənbələrində Burçeviçi tayfasının Aklan,Beqlik və Osoluk  qollarından ibarət olduğu göstərilmişdir (194,11,641-675). Bu tayfaların adları Ermənistanda  Əylənli (bax.6,246), Beqludaq (6,152), Bıqlı(6,158), Gürcüstanda Beqlevi, Beqleti, Beqli, Azərbaycanda Beklə toponimlərində əksini  tapmışdır.

Borçalı eli orta əsrlərdə maldar el idi. 1727-ci ilə aid mənbədə də borçalıların maldar el olduğu göstərilmişdir(241).

Gürcüstanda qədim türkmənşəli Kaymak  tayfası ilə əlaqədar Kaymaklı toponimi vardır. Bu toponim Qazax rayonunda Qaymaqlı kənd adı ilə mənşəcə eynidir. N.A.Baskakova görə, Kaymak tayfası(mənbələrdə bu  tayfanın adı həm də Kimak kimidir) V1-V111 əsrlərdə Türk  xaqanlığında böyük tayfa ittifaqının adı idi(81, 83).V111-1X əsrlərdə kaymaklar Altaydan şimalda, İrtış çayının orta axınında  yaşamış və dövlət qurumu yaratmışdılar (83,V, 524-525). Mənşəcə onlar qıpçaqlarla qohum tayfa hesab edilir. Ona görə də kaymaklar Cənub- şərqi Avropaya yalnız 1X əsrdən sonra qıpçaqların tərkibində gələ bilərdilər. Görünür ki, onların Gürcüstana və Azərbaycana gəlmələri məhz  gürcü çarlarının X11 əsrdə Şimali  Qafqazdan dəvət etdikləri qıpçaqlarla  əlaqədardır. Başqa sözlə, Qaymaqlı toponimləri X11-əsrdə yarana bilərdi.

Mənbələrdə kaymakların bir qolunun İmi adlanması göstərilir(233,46). Bu tayfa Gürcüstanda Əmili (gürcücə yazılışda Amili) yaşayış məntəqə adında əksini  tapmışdır. Azərbaycanda isə bu etnonim Böyük Əmili və Kiçik Əmili (Qəbələ r-nu) kənd adlarında qalmışdır. Ona görə də gürcü tədqiqatçısının Gürcüstanda Amili toponimini namə‘lum mənşəli ad sayması (156,49) müəllifin türk etnonimiyasını dərindən bilməməsi ilə əlaqədardır. Görünür, onu Əmili etnoniminin sonluğunu təşkil edən “i” səsi çaşdırıb. Həqiqətdə də, əgər bu səsi gürcü dilində adlıq hal şəkilçisi hesab etsək, onda əlbəttə “Amil” alınır və toponim namə‘lum ada çevrilir. Müəllif bilməyir ki, bu toponimin sonunda  Azərbaycan dilinə mənsub “li” şəkilçisi vardır və deməli, burada gürcücə “i” adlıq hal şəkilçisi yoxdur. Müəllif Gürcüstanda  Quşloqa (Qışlaq) və  Dadalo (Dədəli) kənd adlarını da naməlum  toponimlər sırasına salmışdır(156,53) .Kaymakların İmak və Tabar tayfalarının da adları mə’lumdur (192,27). Tabar tayfasının adı Gürcüstanda Tabor (i) kənd adında saxlanmışdır (181,225).

Gürcüstanda bir sıra toponimlərdə “Sarı” sözü diqqəti cəlb edir (Sarı k., Sarı Əhməd, Sarı Sabunçu, Sarıxana və b.). Bə’zi tədqiqatçılara görə erkən orta əsrlərdə yaşamış qıpçaqlar özünü “Şar” adlandırırdılar ki, bu əslində Sarı qıpçaqlara mənsub addır (182,40).

Azərbaycanın qərb bölgəsinin əhalisi əsas e‘tibarilə qıpçaq-mənşəlidir. Bu bölgənin mərkəzini Qazax şəhəri təşkil edir. Bir yaşayış məntəqəsi kimi Qazaxın adı Kasak formasında  Bərdədən 40 fərsəh aralıda ərəb mənbəyində VII əsrə aid mə’lumatda çəkilir (31,46). Kazak bir türkmənşəli tayfa adıdır. Şimali Qafqazda yaşayan noqaylarda indi də bir tayfa Kazak adlanır. Gürcüstanda, xüsusilə Qazax bölgəsi ilə bilavasitə həmsərhəddə yerləşən Borçalı bölgəsində Qazax etnonimi yalnız Qazax-Yol adlı məntəqə adında qalmışdır (181).

Qazax tayfası tarix boyu xarici təzyiqlərə qarşı cavab vermişdir. XVI əsrin 80-ci illərində türk ordusunun təzyiqi altında Qızılbaşların orduları Azərbaycanı tərk etdikdə Qazax tayfası Qacar, Qaraman, Bayat və digər tayfalar kimi ərazisini tərk edərək İrana köçmədi. Elin başçısı Nəzər xan Qazaxlı Türkiyənin hakimiyyətini qəbul etdi və bununla  da ölkəsinin əlində qalmasını tə’min etmiş oldu. İkinci dəfə Şimali Azərbaycan Qızılbaş dövlətinin hakimiyyəti altına keçdikdən sonra da Nəzər xan öz hakimiyyətini  saxlaya bilmişdi. Onun xələfi Şəmsəddin xan Qazaxlı hətta 1605-ci ildə Şah Abbasdan xan titulu almışdı. Lakin 1736-cı ildən sonra Qazax mahalı gürcü hakimiyyətinin tə’sirinə düşmüşdü. Bu Nadir şahın Qazax-Borçalı bölgəsini Gəncə bəylərbəyindən qoparıb Gürcüstana verməsi ilə əlaqədar olmuşdur. Gürcü çarı İraklinin (1768-1777) Qazax bölgəsində yaşayan tayfaları istismar edirdi. Buna etiraz əlaməti olaraq elə İraklinin vaxtında 1759-cu ildə Qaracalı, Cinli, Salahlı, Dəmirçi Həsənli, Qızıl Hacılı, Qaraqoyunlu, Alpout, Səfikürd, Boyəhmədli, Kəngər, Həsənli  və b.Qarabağa köçmüşdülər. Bir mə’lumata görə  İrakli vaxtında Qazax mahalından 1500 ailə, Şəmşədil mahalından 3200 ailə  Qarabağa köçmüşdü.

X1X əsrin 1 yarısına aid  mə ‘lumata görə  Qazax tayfası  aşağıdakı  qollardan ibarət olmuşdur:  Qarapapaqlı (840 ailə) , Böyük Çobankərə (159 ailə), Saraşlı (90 ailə),  Dəmirçili, Qafarlı, Cəfərli(16 ailə), Qarabağlı(12  ailə), Əli--Şərurlu, Kərimbəyli(55 ailə), Ködəkli (Kərimbəylidən ayrılma), Cəmilli(10 ailə), Şeyxlər (34 ailə), Çaxırlı(57 ailə), Kərkibaşlı(13 ailə). (bax:106,72). Başqa mənbədə qazaxların 14  tayfadan ibarət olduğu göstərilmişdir: Qarapapaxlı, Ayrumlu(4  nəsilli), Muğanlı, Şahdilli (əsli Şadılı), Qaraqoyunlu, Kənkərli, (Kənkərlilərin isə 33 nəsildən ibarət olduğu qeyd olmuşdur) (230,46). Qeyd etmək lazımdır ki,  tarixşünaslıqda eramızın 1 minilliyinin 11 yarısında Cənub- şərqi  Avropada yerləşmiş qıpçaqlarla rus  salnamələrində “poleves” adı altında çəkilən   komanlar qarışdırılmışdır. Məsələn,  bə’zi mənbələrdə qıpçaqların tayfalarının adları kimi göstərilən Ancaoğlu (149,149), Burçebiçi(Borç tayfa adından, türklərdə oba” sözündən və rus dilində əlavə olunmuş “içi” patronimik şəkilçisindən ibarət etnonimin qədim rusca yazılışı) (194,11,61), Durut(194,149), İt (İd,həm də Eta) (194,11,501) və başqaları rus salnamələrində  poloves tayfaları kimi çəkilmişdir.

Ümumiyyətlə,Gürcüstanın toponimiyasında qıpçaqlardan Ança ( İncədaq,İncəoğlu,Öncakeli, Öncaxeti, Onçevi), Kul (Kulevi, Kuleti,  Qullar),Tikan (Qaratikan), İd (Eto, İdleti ,İdliani), Tuk(Dokla,Doqauri,Toki, Toxla,Toxliauri, Tokli-Yurt),Urus (Oruzman, Urusxevi, Urustəpə, Uruzyaylaq), Bur(Borbalu, yə’ni Burobalı). Uran ( Uranqıran, Aquran,Kök-Uran) və b. tayfaları- nın izi qalmışdır