İstifadə olunan ixtisarların siyahısı

1.Saxlanan verilənlərin detallaşdırılma səviyyəsi.

OLTP-sistemdə tipik sorğuya cavab, adətən, cədvəllərdən çıxarılan yazılar əsasında formalaşdırılır. Həmin yazılar detallaşdırılmış verilənlərdəın ibarət olur. QQDS-də isə, əksinə, müəyyən göstəricilərə (vaxta, məkana və s.) görə ümumiləşdirilən və (və ya) aqreqatlaşdırılan verilənlər saxlanır və sorğuya cavab böyük sayda verilənləri çıxarıb analiz etməklə formalaşdırılır.Məsələn, istehsalat müəssisəsində OLTP-sistemi vasitəsilə həll olunan operativ uçot məsələsinin həllində müəssisənin operativ (növbə, gün, həftə) fəaliyyətini xarakterizə edən detallaşdırılmış verilənlərdən istifadə edilir. Statistik uçot məsələsinin həllində isə müəssisənin aylıq, kvartallıq, yarımillik və illik fəaliyyətini əks etdirən ümumiləşdirilmiş və aqreqatlaşdırılmış verilənlərdən istifadə edilir.

Cədvəl 6.1.

Xarakteristika	OLTP-sistemə qoyulan tələblər	QQDS-ə qoyulan tələblər
Saxlanan verilənlərin detallaşdırma səviyyəsi	Əsasən detallaşdırılmış verilənlər saxlanır	Əsasən ümumiləşdirilmiş və aqreqatlaşdırılmış verilənlər saxlanır
Verilənlərin keyfiyyəti	Hazırlama və daxiletmə zamanı buraxılan səhvlər üzündən səhv verilənlər mümkündür	Verilənlərdə səhvlərə yol verilmir
Verilənlərin saxlanma forması	Tətbiqdən asılı olaraq verilənlər müxtəlif formatlarda saxlana bilər	Verilənlər razılaşdırılmış vahid formatda saxlanır
Verilənlərin izafiliyi	Verilənlərin izafiliyi minimum olmalıdır	Nəzarət olunan izafiliyə yol verilir
Verilənlərin idarə edilməsi	İstənilən vaxt verilənlərin əlavə edilməsi, dəyişdirilməsi və silinməsi mümkün olmalıdır	Verilənlərin yalnız vaxtaşırı əlavə edilməsi nəzərə alınır
Saxlanan verilənlərin miqdarı	Bütün operativ verilənlər baxılan anda əlçatan olmalıdır	Uzun müddət ərzində toplanan verilənlərin hamısı əlçatan olmalıdır
Sorğuların xarakteri	İstifadəçilərin verilənlərə müraciəti əvvəlcədən tərtib edilmiş sorğulara görə aparılır	Verilənlərə əvvəlcədən tərtib edilməyən ixtiyari sorğularla müraciət oluna bilər
Sorğulara cavab vaxtı	Sistemin sorğulara cavab vaxtı saniyələrlə ölçülür	Sorğulara cavab vaxtı bir neçə dəqiqə ola bilər
Sistemin hesablama yükünün xarakteri	Sistemin işi zamanı prosessorun orta yükü sabit olur	Prosessor yalnız sistemə sorğu daxil edildikdə yüklənir
Sistemin xarakteristikalarının üstünlük dərəcəsi	Əsas üstünlük məhsuldarlığa və əlçatanlığa verilir	Üstünlük sistemin çevikliyinə və istifadəçilərin işlərinin müstəqilliyinə verilir