Maktabgacha taʼlim tashkilotlari pedagoglarining ish hujjatlarini tasdiqlash toʻgʻrisida

Bolalar davomatini qayd etish daftari yosh guruhlarida bolalar qatnovini har kuni soat 9.00 dan kechiktirmay belgilab boriladi va kelgan bolalarning umumiy soni chiqarib qoʻyiladi. Oy yakunida roʻyxatdagi bolalar kelgan, kelmagan kunlarining umumiy soni chiqariladi va natijalar umumlashtiriladi. Tahlilda roʻyxat boʻyicha bolalar soni, ushbu oy davomida kelgan va umuman kelmagan bolalarning aniq soni yoziladi. Ushbu tahlil asosida bola kuni bajarilishi aniqlanadi. Umumiy bolalar kuni va bola kelmagan kunlarning sababli va sababsiz soni yoziladi. Tahlil qilgan tarbiyachining familiyasi va imzosi, hamshira tomonidan bolalar sonining haqqoniyligini tasdiqlab imzo qoʻyiladi. Tashkilot direktori oy davomida yuritilgan davomat va tahlilni nazoratdan oʻtkazib, oy yakunida imzo va muhr qoʻyadi.
Tabel daftari tikilgan, sahifalangan, muhrlangan, direktor tomonidan imzolangan boʻlishi kerak.
Filtr daftari tarbiyachi bolalarni qabul qilish vaqtida har bir bolaning ota-onasi bilan bola salomatligi haqida qisqacha suhbatlashadi, birlamchi tibbiy nazoratdan oʻtkazadi. Filtr daftarida tana harorati, teri tozaligi, bosh tozaligi (pedikulyozga tekshiruv) va ota-onadan olingan soʻrovnoma natijalari belgilanadi. Bolaning filtr nazorati ota-ona oldida oʻtkaziladi.
Bola uch kun kelmagan takdirda filtr nazoratini tashkilotning tibbiyot xodimlari tomonidan oʻtkazilishi va ota-onadan bolaning tashkilotga kelmaganlik sababini tasdiqlovchi tegishli hududiy davolash tashkiloti tomonidan berilgan maxsus shakldagi tibbiy maʼlumotnoma taqdim etilishi talab etiladi. Filtr daftari tikilgan, sahifalangan, muhrlangan, direktor tomonidan imzolangan boʻlishi kerak.
Patronaj daftari - ushbu daftarni yuritish tashkilot xamshirasiga yuklatildi. Lekin tarbiyachi hamshira bilan hamkorlikda ishlashi va tarbiyalanuvchining kelmaslik sabablarini oʻz vaqtida aniqlashda yordam berishi zarur xisoblanadi.
Ota-onalar toʻgʻrisidagi maʼlumotlar daftari: ushbu daftarga bolaning familiyasi, ismi, sharifi, tugʻilgan sanasi, uy manzili, telefon raqami, ota-onasining familiyasi, ismi, otasining ismi, ularning ish joylari haqidagi maʼlumotlar kiritiladi va qoʻshimcha maʼlumotlar olinganda, daftarga qayd etib boriladi. Ota-onalar haqidagi maʼlumotlar daftari tikilgan, sahifalangan, muhrlangan, direktor tomonidan imzolangan boʻlishi kerak.