Mazkur kursni o‘qitishda kommunikativ yondashuv qo‘llanadi, ya'ni tilni amaliy qo‘llash orqali ko‘nikmalar singdirib boriladi

O‘zbek tilining ona tili sifatida o‘qitilishida kommunikativ yondashuvni qo‘llash
Hozirgi kunda ona tili maktabda grammatik ilm sifatida o‘rgatiladi, unda tilshunoslikka oid tushunchalar o‘rgatib boriladi. Tilning amaliy tarafi, xususan, fikrni to‘g‘ri va samarali ifodalash, so‘zlardan kerakli o‘rinda samarali foydalanish, matnni to‘g‘ri tushunish kabi ko‘nikmalarga darslar davomida eʼtibor qaratilmaydi.

Filologiya fanlari doktori Аziz Jo‘raev qayd etib o‘tganidek, umumiy o‘rta taʼlimdagi ona tili va hozirgi o‘zbek adabiy tili kurslari doirasida tilga oid qonun-qoidalar asosan badiiy adabiyotdan keltirilgan misollar bilan tushuntiriladi. Vaholanki, til faqat badiiy uslubdan iborat emas. Tilning badiiy bo‘lmagan uslublari inson kundalik hayotida ko‘proq zarur bo‘lsa-da, qolgan uslublar maktabdagi taʼlim davomida eʼtibordan chetda qoladi .

Oliy taʼlim muassasalariga kirish imtihonlarida ham ona tilining grammatik qonun-qoidalariga urg‘u berilishi ortidan maktabdagi ona tili taʼlimi jarayonida o‘quvchining nutqiy ko‘nikmalari eʼtibordan chetda qoladi. Xususan, o‘quvchi ergash gapli qo‘shma gapning o‘n to‘rt xil turining qoidalarini yoddan aytib berishi mumkin, biroq shu turdagi gaplardan qachon, qanday nutqiy vaziyatda foydalanish o‘rinli bo‘lishini bilmaydi.

O‘quvchi maktab davrida diktantdan tashqari amalga oshiradigan yozma ishlar, asosan, bayon va insho shaklida bo‘ladi. Ularni baholashda o‘quvchi matnining badiiyligi asosiy mezon bo‘lib xizmat qiladi. Yozma matn yaratish ko‘nikmasi ham faqat badiiy matn doirasida cheklanib qoladi.

Insonning til malakasi og‘zaki nutqni tushunish, yozma nutqni tushunish, fikrini og‘zaki va yozma ifodalash orqali shakllanishi ilmiy jihatdan isbotlangan. Biroq ona tili o‘qitishda bu to‘rt xil malakaga yetarli darajada eʼtibor qaratilmaydi. Bugungi kunda o‘zbek tilini ona tili sifatida qo‘llanish doirasida kuzatilayotgan kamchiliklar ona tili taʼlimida tildan to‘g‘ri foydalanish ko‘nikmasini shakllantirishga urg‘u berilmaganligi bilan bog‘liqdir. Shuning uchun ham ona tilidan savodxonlik darajasini oshirish bo‘yicha malaka oshirish kurslari dasturlari va o‘quv materiallarini ishlab chiqishda kommunikativ yondashuvni qo‘llash maqsadga muvofiqdir.

Kommunikativ yondashuvning mohiyati real vaziyatda nutqni tushunish, o‘z fikrini to‘g‘ri ifodalashga o‘rgatishdir. Shuning uchun har bir mavzu uchun alohida vaziyat beriladi va shu vaziyatda nutq vositasida masalani hal qilish talab qilinadi.

Til qobiliyatini inson hayotining farovonligini taʼminlashga xizmat qiladigan boshqa qobiliyatlardan ayri tasavvur qilib bo‘lmaydi. Shuning uchun ham uni rivojlantirishda inson hayotida uchraydigan vaziyatlardan foydalanish muhim. Bu, birinchidan, o‘rganuvchida dars jarayoniga nisbatan qiziqish va rag‘batni kuchaytiradi; ikkinchidan, unda foydalanilgan nutq vaziyatning ichida bo‘lgani uchun insonning xotirasida yaxshiroq saqlanadi.

Grammatik qoidani avval berib keyin mashq bajarish usuli shuncha vaqtdan beri ona tilini o‘qitishda qo‘llab kelingan. Uning asosiy kamchiligi amaliyotga yetarli darajada bog‘lanmaganligidir. Mazkur usulda mavzuni o‘qigan bola nazariy jihatdan shunday ekanligini biladi, ammo shu qoida qaysi vaziyatlarda qo‘llanishi haqida tasavvurga ega bo‘lmaydi. Kommunikativ yondashuvda esa tilning muloqot vositasi sifatidagi vazifasi birinchi planga qo‘yiladi. Maʼlum vaziyatda qanday gapirish to‘g‘ri bo‘ladi, yaʼni qanday ifoda yordamida fikrni bexato yetkazish mumkin – shu masalani hal qilish orqali til qonuniyatlarini tushuntiradi. O‘rganuvchiga ana shu bexato shakl asosida tilga oid qanday qoida borligi shu qoidaning bir necha xil vaziyatda aks etishi orqali tushuntiriladi.

Kommunikativ yondashuvga asoslangan darslarda faqat yozma matn bilan cheklanib qolinmaydi. Tilning og‘zaki va yozma shaklidan darslar davomida baravar foydalaniladi. Mavjud anʼanaga ko‘ra ona tili o‘qitishda yozma matn asosiy o‘rinda turadi, og‘zaki nutqqa alohida eʼtibor qaratilmaydi. Vaholanki, insonning birlamchi til ko‘nikmasi og‘zaki nutqdir. Og‘zaki nutqni rivojlantirish tilning qolgan shakllarini rivojlantirish uchun asos bo‘lib xizmat qiladi. Yozma nutq bilan ko‘p ishlash og‘zaki nutqni o‘z-o‘zidan rivojlanib qolishiga olib kelmaydi, chunki yozma nutq va og‘zaki nutq mazmun jihatidan bir nuqtaga birlashsa-da, ularning amalga oshish jarayoni inson ongida boshqa-boshqa mexanizmning ishlashi orqali taʼminlanadi. Shuning uchun ularning har biriga alohida eʼtibor berish zarur.

Shuningdek, og‘zaki va yozma nutqni tushunish masalasiga alohida eʼtibor qaratiladi. Nutqni tushunish jarayoni murakkab jarayon bo‘lib, bir necha darajadan iborat bo‘ladi. Bir nutqni bir davrada hamma bir xil eshitsa-da, har bir tinglovchi uni turli darajada tushunadi. Nutqni tushunish jarayoni alohida so‘zlarning maʼnosini tushunish, gapning maʼlum qismini tushunish, matn mazmunining maʼlum qismini tushunish kabi bosqichlardan iborat bo‘ladi. Nutqning qanchalik tushunilishi diqqatni ushlab turish ko‘nikmasi bilan bog‘liqdir. Mazkur ko‘nikmani turli mashqlar yordamida shakllantirish mumkin. Shu vaqtgacha ona tili va adabiyot darslarida matn ustida ishlash bo‘yicha mashqlarda matn mazmunini to‘liq ochish nazarda tutilmagan. Ona tili darslarida matn, odatda, maʼlum til qoidasining ifodalanishini topish (masalan, ot turkumiga oid so‘zlarni toping yoki ega bilan kesimni toping) maqsadida berilgan bo‘lsa, adabiyot darslarida matnda ifodalangan badiiy jihatlarga urg‘u berilgan. Kommunikativ yondashuv asosidagi mashqlar matnning mazmunini anglashga yo‘naltiriladi, so‘zlar va gaplar mazmunni ifodalashda aynan qanday vazifani bajarayotganiga eʼtibor qaratiladi.

Og‘zaki nutqni turli ko‘rinishlarda – monolog, dialog, suhbat, bahs-munozara shakllarida to‘g‘ri tushunish ko‘nikmasiga eʼtibor qaratiladi.

Og‘zaki nutqni tushunishda og‘zaki nutqning turli ko‘rinishlarini hisobga olish insonning tushunish qobiliyatini charxlaydi: tinglovchi nutqning turli qirralariga eʼtibor qilinishni o‘rganadi. Tilga oid qoidalar zaruriy holatlarda izohlab o‘tiladi va amalda qo‘llanishi birinchi planda bo‘lgani uchun qoidani o‘zlashtirish samaraliroq bo‘ladi.