Klassik və ya inzibati idarəetmə məktəbi bütünlükdə təşkilatın idarə edilməsinin ümümi problemlərinin və prinsiplərinin hazırlanmasına yönəldilmişdir. İdarəetmənin inzibati məktəbinin nümayəndələrindən biri olan A.Fayol idarəetməyə firmanın ehtiyatlarından və imkanlarından daha səmərəli və optimal istifadə etməklə sahibkarlıq fəaliyyətinə yönəldilmiş prinsiplərin, qaydaların və fəndlərin məcmusu kimi baxırdı. O, idarəetməyə - planlaşdırma, təşkiletmə, sərəncamvermə, razılaşdırma və nəzarət etmə kimi bir neçə qarşılıqlı əlaqəli funksiyalardan ibarət olan universal proses kimi baxırdı. Eyni zamanda istehsalın təşkili və idarə edilməsinin strukturunun qurulması prinsiplərini də A. Fayol hazırlamışdır.
Bu konsepsiya XX əsrin 20-ci illərində firmanın təşkilat strukturu müəyyən iyerarxiyaya malik qarşılıqlı əlaqələr sistemi kimi ifadə edilmişdir. Bu halda təşkilata qapalı sistem kimi baxılırdi. Onun fəaliyyətinin yaxşılaşdırılması xarici mühitin təsiri nəzərə alınmadan firmadaxili səmərəli fəaliyyətlə təmin edilirdi. Eyni zamanda aydın oldu ki, məqsədə daha səmərəli surətdə çatmaq üçün təşkilatı sistemləşdirilmiş qaydada idarə etmək olar.
