Microsoft Word saylanma abdulla oripov ziyouz com doc

BAHOR TILAKLARI 
Nechun ko‘klam madhi tushmas g‘azaldan, 
Shoirlar bahorni kuylar azaldan? 
Oshiqlar zangori kenglikka boqib, 
Qo‘shiqlar aytadi bag‘rini yoqib. 
Tabarruk chollarning chakkasida gul, 
Momolar o‘yida bahordir nuqul. 
Bir lahza yasharar qarri qo‘rg‘onlar, 
Ajib dilbar bo‘lib qolar insonlar. 
Ha, bahor misrasi menda ham talay, 
Bu holning boisi bordir harqalay. 
Azizim, g‘unchaga nazar sol bir on, 
Bag‘rida hozircha turfa hol pinhon. 
Ranglar yashar unda balki pushti, oq, 
Ajab, tikoni ham hozircha yumshoq. 

---

Saylanma. Abdulla Oripov