Hazırlanmış neftin keyfiyyətinə müasir tələblər. Çıxarılan neftin tərkibində çirkləndiricilər olmamalıdır. Çirkləndirilər deyəndə su, mineral duzlar, mexaniki qarışıqlar, kükürd birləşmələri və s. nəzərdə tutulur. Belə çirkləndiricilər neftin tərkibində mövcud olduqda, qurğu və avadanlıqların korroziyası sürətlənir və onların xidmət müddəti azalır. Məsələn, nefti boru ilə nəql edən zaman tərkibində su və ya başqa çirkləndiricilərin neftlə birlikdə daşınması əlavə xərclərə səbəb olur. Eyni zamanda suyun sıxlığı neftinkindən böyük olduğu üçün borunun aşağı hissəsində yığılır və burada korroziyaya səbəb olur. Ətraf mühiti qorumaq üçün neftlə birlikdə çıxan lay sularını neftdən ayırdıqdan sonra yenidən laya vururlar. Bununla eyni zamanda lay təzyiqi bərpa olur və neftvermə artır.
