4. Sirt turlari. Sirtlar hosil bo’lish usulari va ularning ta’rif belgilari asosida quyidagi turlarga bo’linadi:
1. Yasovchilarning ilgarilanma, aylanma va vintsimon harakat qilishi natijasida hosil bo’ladigan sirtlar;
2. Yasovchilarning turiga qarab, to’g’ri chiziqli (yasovchisi to’g’ri chiziq) va egri chiziqli (yasovchisi egri chiziq) sirtlar;
3. Yasovchilarning harakati jarayonida o’z shakllarini muttasal o’zgartirib yoki o’zgartirmasdan hosil bo’ladigan sirtlar;
4. Sirtlarning tekislikka yoyilish va yoyilmaslik belgilari asosidagi sirtlar;
5. Sirtlarni analitik va grafik usullarda berilishi;
6. Sirtlarning differensial xususiyatlari (sirtlarning tekis yoki notekisligi) hamda ularning egriligi asosidagi sirtlar.
Bir xil sirtlar har xil belgilar bilan ajralishi mumkin. bunda asosiy belgi sifatida yasovchilarning shakli va ularning harakatlanish holatlari, ya’ni sirtlarning kinematik hosil bo’lish belgilari bo’yicha ajratilishi maqsadga muvofiqdir.
8 -shaklda loyiha uchun kerak bo’lgan sirtlarni osonlik bilan ajratib olish va pozision, metrik masalalarni tezkorlik bilan yechish uchun sirtlarni ma’lum bir ta’rifi berilgan. Bunda hamma sirtlar ikki qismga bo’linadi: birinchi qism asosiy bo’lib, kinematik usul bilan hosil qilish, ikkinchisi esa, karkas orqali berilgan sirtlar. Har ikki qism ham guruhlarga bo’linadi. texnikada ko’proq qo’llaniladigan to’g’ri chiziqli yoyiluvchi, aylanish, vint, parallelizm tekisligiga ega bo’lgan sirtlar hamda karkasli sirtlar bilan mukammalroq tanishib chiqamiz
5. To’g’ri chiziqli yoyilgan sirtlar. Cheksiz yaqin turgan ikki qo’shni yasovchi to’g’ri chiziqlar o’zaro kesishib yoki parallel vaziyatda tekis element hosil qilsa, bunday sirtlar yoyiladigan sirtlar deyiladi. To’g’ri chiziqli yoyiluvchi sirtlarda yasovchi to’g’ri chiziq bo’ladi. To’g’ri chiziqli yoyiluvchi sirtlarning xususiyatlari shundan iboratki, ulardan tekis egiluvchan har xil egri chiziqli shakllar, ya’ni sanoat uchun quvurlar quritgich qurilmalarning qismlari kabilarni yasash mumkin. bundan tashqari, sirtni yoyish jaraynida undagi har bir chiziqning uzunligi, ikki chiziq orasida hosil bo’lgan burchak va yopiq shakllarning yuzalari o’zgarmasdan saqlanib qoladi.
To’g’ri chiziqli yoyiluvchi sirtlarga asosan qaytish qirrali sirtlar silindrik, konus va tors sirtlari kiradi.
