O’zbеkistоn rеspublikаsi оliy vа o’rtа mахsus tа’lim vаzirligi аlishеr nаvоiy nоmidаgi sаmаrqаnd

3. Mavsumiy sikllar
Mavsumiy sikllar deb yashash sharoitining mavsumlar bo’yicha o’zgarishi va unga moslashish xususiyatlari tushuniladi. O’zgarish, asosan, oziqa va oziqlanish, issiqlik almashinuvi, suv va gazlar almashinuvi va boshqa sharoitlar bilan ifodalanadi. Ushbu o’zgarishlar asosida iqlimning mavsumiyligi yotadi. Iqlim mavsumiyligi tropik kengliklarda juda kam seziladi, chunki yil davomida haroratning o’rtacha oylik o’zgarish (farqi) 1-6⁰C ni tashkil etadi. Ba’zan bundan ham kam farq qiladi. Subtropik hududlarda iqlimning mavsumlar bo’yicha o’zgarib turishi tropik hududlarnikidan ancha farq qiladi, ya’ni bunday joylarda atmosfera bosimi, harorat, havo namligi, shamol va yog’in miqdori biroz ko’p bo’lishi bilan ajralib turadi. Lekin ushbu o’zgarishlar boshqa kengliklardagi (tropik va subtropik savannalar, cho’l-biyobonlar, sahro va boshqalar) hududlarning iqlimini mavsumiy o’zgarishlardan farq qiladi, balki subtropikda ham amplituda tropikdagiday juda kichik bo’ladi. Mo’tadil (o’rtacha) yuqori, ayniqsa, arktik kengliklarda yorug’lik, issiqlik, namlik (yog’in) va boshqa iqlim omillari yilning har xil mavsumlarida turlicha bo’ladi, ya’ni iqlim sharoitlari mavsumlar bo’yicha kuchli farq qiladi. Masalan, Verxoyansk degan joyda (Shimolda)haroratning bir yilda o’rtacha oylik amplitudasi (tebranishi) 65,6⁰C ni tashkil etadi.
Iqlim sharoiti mavsumlar bo’yicha sezilarli darajada o’zgaruvchi kengliklarda biologik sikllarning mavsumlar bo’yicha o’zgarib turishini ko’rish mumkin, ya’ni hayvonlar hayotida bir turdagi oziqadan boshqa turdagi oziqaga o’tish, aktivfaol hayot kechirishning uyquga ketish bilan almashinishi, ko’payish davridan tinch jinsiy holatga o’tishi, o’troq hayot kechirish tarzidan ko’chib (migrasiya) hayot kechirishga o’tishi va boshqa o’zgarishlar sodir bo’ladi. Ushbu o’zgarishlar asosida murakkab fiziologik mexanizmlar yotadi. Ushbu fiziologik o’zgarishlar tufayli hayvonlar navbatdagi o’zgaruvchan omillarga ega bo’lgan mavsumni kutib olishga tayyor bo’ladi. Hayvon organizmida yangi muhitga tayorgarlik xususiyatlarining shakllanishi murakkab reflektor xarakterga ega bo’ladi, ya’ni organizmda yangicha moddalar almashinuvini olib borishga shay bo’lishiga ta’sir etuvchi signallar rolini o’zgargan atrof-muhit omillari, jumladan, yorug’lik rejimi, harorat, namlik, yog’inning tushishi va uning miqdori, ma’lum bir oziqa turining paydo bo’lishi yoki tugashi va boshqa bir qator o’zgargan iqlim omillari ta’sir etuvchilar rolini bajaradi. Organizm retseptorlari tomonidan qabul qilingan signal-omil nerv markazlarida (umurtqali hayvonlarda - gipotalamusda) qayta ishlanib informasiyani sekretor organlarga yuboradi. Qabul qilingan informasiyaga binoan ma’lum bir kerakli garmonlar ajratilib, ular o’z navbatida endrokrin sistemasining boshqa bo’g’inlarlariga ta’sir etib, oqibatda moddalar almashinuvi (metabolizm) jarayonini o’zgartiradi. Bu o’zgarish o’z navbatida hayvon organizmi holatini o’zgartiradi. Bunday sxema bilan shakllangan o’zgarishlar tufayli hayvonlar hayotida davriy hodisalar, jumladan, ko’payish, uyquga ketish, migrasiya, semirish va boshqa xususiyatlar yuzaga keladi.
Mavsumiy biologik sikllarning namoyon bo’lishida oziqlanishning o’zgarishi katta ahamiyatga ega, chunki hayvon hayotida oziqa miqdori, sifati va unga erishish yil davomida har xil bo’ladi. Masalan, yuqori kengliklarda qishda qor tushishi munosabati bilan quruqlik umurtqasiz hayvonlarining aksariyati va poykiloterm umurtqalilar qishning sovuq oylarida qishki uyquga ketishadi. Issiqqonli hayvonlar esa qishda oziqaning kamayishi yoki yo’qolishi tufayli faolligini susaytiradi va ular ham qishki uyquga ketishadi.
Qishda kaloriyaga boy oziqalar, ayniqsa, yog’li oziqalar ko’p bo’ladi. Shunga binoan yozda mayda hayvonlar bilan oziqlanuvchi qushlar qishda o’simlik urug’lari bilan ovqatlanishga o’tadi. Masalan, kedrovka qushining yozdagi oziqa ratsioning 43% ni hasharotlar tashkil etsa, qishda uning oziqasini 96% ni kedr yong’og’i tashkil etadi.
Qishda qor tushishi munosabati bilan yirtqich hayvonlarning oziqa turi va uni topish usuli o’zgaradi. Masalan, boyo’g’li qor tagida hayot kechiruvchi dala sichqoni bilan oziqlana olmasligi tufayli u qor ustiga chiquvchi boshqa turdagi sichqonlar bilan oziqlanadi. Shimol tulkisi qishda o’lgan hayvonlar tanasi va ularning tana qoldiqlari bilan oziqlanishga o’tishi tufayli juda ham ozib ketadi. Tanasidagi yog’ qatlami kamayib ketadi.
Ba’zan hayvonlar oziqa turining mavsumlar bo’yicha o’zgarishi o’sha oziqa bo’luvchi o’simlikning hosildorligiga ham bog’liq bo’ladi. Agar hayvonning asosiy oziqasi hisoblanuvchi o’simlik joriy yilda hosilsiz bo’lsa, u boshqa turdagi o’simlikni iste’mol qilishga o’tadi. Ko’p hollarda hayvonlarning mavsumlar bo’yicha oziqa turining o’zgarishi, tananing semirishi yoki zapas yog’ moddalarning to’planishi bilan bog’liq. Bu zapas oziqa bo’lajak mavsumda oziqa yetishmay qolganda ishlatiladi. Masalan, bog’ sassiq qandalasi (Eurigaster integriceps) to’plagan yog’ moddasiga yana qo’shimcha zahira sifatida kuzda o’rta ichagida kraxmal donalari to’planadi.
Baliqlarda semirish, odatda, tuxum qo’yish oldidan sodir bo’ladi. Quruqlik hayvonlarida (hasharotlar, umurtqalilar) yog’ to’plash jarayoni ko’pincha uyquga ketish oldidan yoki qush va sut emizuvchilarda migrasiya (ko’chish) oldidan yoki qish oldidan amalga oshadi. Masalan, katta voyaga yetgan sug’ur qishni muvaffaqiyatli o’tkazish uchun tanasidagi zahira yog’ 2-2,5 kg dan, yosh sug’urlar 1-0,9 kg dan kam to’plamasligi kerak. Agar shuncha miqdorda yog’ zapasi bo’lmasa, ba’zan bahor mavsumi sovuq va cho’ziladigan bo’lsa, ularning zapasi yetmay qolib, halok bo’ladi. Ko’pgina hayvonlarning mavsumiy siklida zahira oziqa to’plash xususiyati mavjud. Bu xususiyat, ayniqsa, nerv faoliyati murakkab bo’lgan yuqori taraqqiy etgan umurtqali hayvonlarda va jamoa bo’lib yashovchi hasharotlarda rivojlangan.
Jamoa bo’lib yashovchi hasharotlarda (asalarilarda, chumolilarda va ayrim arilarda) zapas oziqa to’plash xususiyati ulardagi polimorfizm bilan bog’liq. Hasharotlarda lichinkalar zapas oziqa bilan ta’minlanadi. Yakka holda hayot kechiruvchi arilar va asalarilar o’z tuxumlarini tutib olgan boshqa hasharotlarning lichinkalari ichiga qo’yadi. Bu lichinka tuxumdan chiqqan ari lichinkasi uchun oziqa bo’lib xizmat qiladi.
Qushlarda oziqani zaxira sifatida to’plash juda primitiv (oddiy), chunki ularda ushbu instinkt juda past taraqqiy etgan. Ayrim qushlar oziqasini (o’simlik urug’larini) daraxtlarning po’stlog’i ostiga yoki po’stloq yoriqlariga yashirib qo’yadi. Ba’zilari yer yoriqlariga, daraxtlarning tomirlari ostiga yashiradi.
Sut emizuvchilarda zahira oziqa to’plash instinkti ancha yuqori taraqqiy etgan. Masalan, dala sichqonlari, qumsichqonlar, og’maxon (xomyak), burunduq (olasichqon) kabilar zahira oziqa to’plamasa qishki mavsumga o’tmaydi. Ushbu hayvonlarda oziqa to’plash instinktining paydo bo’lishiga oziqaning ko’p bo’lishi, haroratning pasaya borishi, kun uzunligining qisqara boshlashi kabi o’zgarishlar turtki bo’ladi.