O’zbekiston respublikasi oliy va o’rta ta’lim vazirligi

Muhokama ucun savollar:
1.2.1. Dastlabki metall qotishmalaridan insoiniyat nima maqsadlarda foydalana boshlagan?
1.2.2. Simob olishning qadimiy usullarini bilasizmi?
1.2.3. Insoniyat nega barcha muammolarini osmon va samoviy jismlar bilan bog’lashga urinadi?
1.2.4. Hindlarning “Vedalar” degan muqaddas kitobida qanday moddalar tilga olinadi?


3-savol bo’yicha dars maqsadi: Talabalarga Qadimgi yunon olimlarining matеriya tuzilishi to’g’risidagi fikrlari va Yunon atomistikasi haqida tushuncha berish hamda bilim va malakasini oshirish.
Identiv o’quv maqsadlari:
1.3.1. Butun borliq haqida yunon olimlarining fikrlari bilan tanishadi.
1.3.2. Fales Miletskiy, Anaksimandr, Anaksimen, Geraklit, Pifagor, Anaksagor va Empedokl g’oyalari haqida ma'lumot bеra oladi.
1.3.3. Qadimgi Yunonistonda va Rimda kimyoning qaysi sohalari rivojlanganligini tushuntirfdi.
1.3.4. Materiyaning kichik zarrachalardan iboratligi haqidagi Demokrit va Levkipp xulosalarini umumlashtira oladi.
1.3.4. Aristotelning „Metafizika“ asarini tahlil qiladi va mohiyatini izohlaydi.


3-savol bayoni: Dastlabki falsafiy ta’limotlar modda haqida dualistik tushuncha bilan cheklangan edi, masalan, dunyoning boshlanishi ikki xil moddalarning (oydin va qorong’u) o’zaro ta’siridir deb tushunishgan. Eramizgacha III asrda Xitoy olimlari dastlabki materiya ikkiga ajraladi deb o’rgatishar edi: In - oy bilan taqqoslandi, Yan - quyosh bilan taqqoslandi. Ulardan 5 element tarkib topgan deb hisoblanar: suv, olov, yog’och, yer, metall va ularning har biri bir sayyora bilan nisbatlanardi.
Eramizning I asrida yashagan Qadimgi rimlik harbiy Gay Pliniy II «Tabiiy tarixi» qomusiy asarida sovun olish, matolarni bo’yash, o’simliklardan non, uzumdan vino, pivo va sirka olish, shisha olish usullarini bayon qilgan. Atir-upa, dorilar tayyorlash Qadimgi Yunoniston vrachlari Gippokrat (eramizgacha 460-377 y.) va Teofrast (372-277 y.) ishlarida aniq yoritilgan. Demak, kimyodan qadimgi xalqlar keng foydalangan ekan, uning nazariy asoslarini Qadimgi Yunonistondan izlash kerak.
Qadimgi Yunonistonda fan va madaniyat sohasida erishilgan daraja insoniyatni lol qoldirgan. Qadimgi yunon olimlarining (eramizdan oldingi V-VI asrlar) fikrlari o’z davridan bir necha yuz yil ilgarilab ketgan. Dastlabki materiya haqidagi tushuncha qadimiy Gretsiyada (Yunoniston) shakllandi. Yunon faylasuflari element, atom va kimyoviy birikma haqidagi tushunchalarni kashf etdilar. Eramizdan oldin yashagan Fales Miletskiy (640-546-yy.), Anaksimandr (610-546-yy.), Anaksimen (585-525-yy.), Geraklit (540-475- yy.), Pifagor (532-497-yy.), Anaksagor (500-428-yy.), Empedokl (490-430- yy.) larning ishlari fan taraqqiyotidagi dastlabki tushunchalar edi. Bu olimlarni moddalar­ning olinish usuli, ularning amaliy ishlatilishi emas, balki nega bu mod­dalarning xossalari boshqa moddalardan farq qiladi, degan savolga javob qidira boshladilar, ya’ni boshqacha qilib aytsak, bugungi kimyoviy nazariyaning dastlabki elementlarini qidirishga tushdilar.
Falesning fikricha, bizni o’rab olgan borliqning dastlab­ki asosini tashkil etuvchi element - modda –suv borki, qolgan barcha jismlar shundan hosil bo’ladi va suvsiz hayot bo’lmasligini e’tirof etadi. Qadimgi yunonlar vakuum bo’lishi mumkinligini inkor etishar, Yer bilan osmon orasida bo’shliqning havo bilan bandligini hisobga olib, suv va yerdan boshqa barcha joy havo bilan to’lgan deb tasavvur qilishardi. Anaksimenning fikricha koinotni tashkil qiluvchi modda bu havo bo’lib, koinot markaziga yaqinlashgan sayin uning zichligi ortadi va siqilishi natijasida moddaning boshqa ko’rinishi - suv va yerni hosil qiladi. Efes shahrida yashagan boshqa qadimgi yunon faylasufi Geraklit agar koinot doimo o’zgarib turish xususiyatiga ega bo’lsa, unda materiya asosini unga o’xshagan shunday xossali substansiya - olov tashkil qiladi deb hisoblaydi.
Eramizdan avval 529-yilda Samos orolida yashagan Pifagor janubiy Italiyaga ko’chib o’tadi va o’zining falsafiy maktabini yaratadi. Pifagor qarashlarining tarafdorlaridan biri faylasuf Empedokl (490-430-yy.) o’z ustozi bilan materiya asosini qanday element tashkil etishi haqida bosh qotirishadi, ammo ioniyaliklarning fikrlariga hech qo’shilmaydilar. Ular materiya asosi nega birgina element bo’lishi kerak, deb hisoblagan Empedokl yer olam materiya elementlaridan biri va uning asosini birgina jism emas, balki dunyodagi barcha borliqning asosini Geraklitning olovi, Anaksimenning havosi, Falesning suvi va yer jami to’rt unsur tashkil etadi, degan xulosa chiqaradi. Bu 4 unsur insonni o’rab olgan predmetlarga turlicha sifat berib turar ekan.
Qadimgi Hindistondagi ayrim falsafa maktablari (eramizdan oldingi I asr) moddaning birinchi bo’linmas zarrachalari borligini emas, balki ularning bir-biri bilan birikib yangi zarrachalar hosil qilish xususiyatini ham tan olishgan.
Materiyaning bo’linishi haqidagi savol yunon faylasuflari qiziqishlarining ikkinchi muhim tomoni edi. Keyinchalik ana shu tasavvurlar zaminida “Yunon atomizmi” deb atalgan ta’limot shakllandi. Ioniyalik Levkipp (eramizgacha 500-440 yy.) birinchilardan bo’lib mayda bo’laklangan zarrachalarni yanada kichikroq qismga ajratish ma’lum chegaradan keyin to’xtaydi, degan xulosaga keldi. Uning shogirdi Demokrit (470-360-yy.) ustozining bu fikrini rivojlantirdi va cheksiz bo’laklarga bo’lingan mitti zarrachani “atomos” - "bo’laklarga bo’linmaydigan" so’zini qo’lladi. Uning fikricha, bizni qamrab olgan dunyo cheksiz bo’shliqda harakatlanuvchi atomlarning birikishi va parchalanishi natijasidir. Ta’m, rang, issiqlik va sovuqlik kabi xossalar faqat inson sezgi organlariga ta’sir etuvchi shartli hodisadir deydi. Materiya kichik zarrachalardan iborat bo’lib, uning bo’linish chegarasi bor degan ta’limot bugungi kunda atomistika nazariyasi deb aytiladi. Demokritning fikricha, har qanday elementlar atomlari shakli va kattaligi bilan farq qiladi, shuning uchun ham ularning xossalari bir-biriga o’xshamaydi. Biz ko’radigan va his qiladigan real moddalar turli element atomlarining birlashishi mahsulidir. Bu birikmalar tabiatini o’zgartirish yo’li bilan bir aniq moddani ikkinchisiga aylantirish mumkin.
Qadimgi Yunon faylasufi Aristotel (384-322-yy.) demokritcha ta’limotni bayon qilib, barcha hodisalar sababi atomlardagi muayyan farqdadir. Bu farqlar shakl, tartib va holatda bo’ladi degan tushunchani ilgari surdi. Aristotel o’zining „Metafizika“ asarida borliq mavjudotni tashkil etuvchi to’rt unsur-stixiyalar material substansiya emas, balki xarakterli xossalarini namoyon qiluvchi (issiqlik, sovuqlik, quruqlik va namlikni) belgi deb hisoblaydi. Qarama-qarshi xil xossalarni namoyon qiluvchi element-stixiyalar birika olmaydi: issiqlik va sovuqlikni, namlik va quruqlikni birlashtirib bo’lmaydi. Aristotelning fikricha, elementlar bir-biriga o’ta oladi, hatto ularni biriktirib, murakkabroq jism va birikmalarni olish mumkin:
Dastlabki materiya + issiqlik va quruqlik = olov;
Dastlabki materiya + sovuqlik va quruqlik = yer;
Dastlabki materiya + issiqlik va namlik = havo;
Dastlabki materiya + sovuqlik va namlik va suv.
Issiq Olov Quruq
Yer, (tuproq)
Nam Sovuq

Aristotel mexanik va chin aralashmalar borligini ajratdi. Mexanik aralashmalarda komponentlar mustaqil, alohida bo’lsa, chin aralashmalarda moddalar qo’shilib, murakkab bir jinsli birikmaga aylanadi, unda dastlabki moddalar qolmaydi. Bu aralashmani faqat olov buzishi mumkin deydi. Aristotelning fikricha, kimyoviy birikma –“miksis” - bir jinsli gomogen va yaxlit sifatga egadir. Aristotel fikrini tushuntirgan masalaning mohiyati quyidagichadir: ayrim harf va bo’g’nlardan so’z tarkib topganidek murakkab moddalar ham ayrim elementlardan hosil bo’ladi. Olov, havo, suv va tuproq bu real modda bo’lmasdan birlamchi butun materiyaning turli to’rt holati yoki shakli- deydi Aristotel.

Boshqa yunon faylasufi Epikur (342-270-yy.) Demokritning mexanistik atom nazariyasini tanqid qiladi. U atomlar ma’lum shakllarga ega bo’lib, ular juda katta zichlikka ega, aynan massa va kattalik bilan farqlanadi va bir-biri bilan kichkina o’simtalari orqali birikadi deb hisoblaydi. “Atomlar shakli, og’irligi va shu shakli belgilaydigan xossalaridan tashqari boshqa xil xossalari bilan bizning sezgi organlarimizga ta’sir etmaydi”,- deb yozadi Epikur. Uning fikricha, atomlar to’g’ri chiziqli harakatidan og’ishi mumkin va bu to’qnashuvlar natijasida yangi agregatlar hosil qiladi.
Demokrit va Epikur ta’limoti davomchilari keyingi asrlarda ham bor edilar. Masalan, eramizgacha I asrda yashagan rimlik shoir va donishmand Tit Lukretsiy Kar (95-55 yy.) 6 kitobdan iborat “Buyumlarning tabiati” (De Rerum Natura) nomli didaktik poemasida Epikurning atomistik ta’limotini bayon qiladi. Bu mashhur poema 1473- yilda chop etilgan va 1486 -yilda ikkinchi marta nashr qilindi. XVII-XVIII asrlarda atomistik nazariyaning qayta yaratilishiga bu kitob kuchli ta’sir etdi, chunki Demokrit va Epikurning asarlari yo’qolib ketgan va ulardan ayrim parchalargina saqlangandi.
Lukretsiyning poemasi bizgacha yetib keldi va atomistik ta’limot yangi ilmiy usullar bilan isbotlandi. Endi bu nazariya faqat ilmiy tafakkurning natijasi bo’lmasdan, balki zamonaviy eksperimental tajribalarga asoslandi. Bularga ko’rinmas zarrachalarning mavjudligi, yuvilgan kiyimning qurishi, xushbo’y moddalar hidi tarqalishi, yopiq idishlardagi havoning kengayishi va hokazo misollarni ko’rsatish mumkin. “Atomlar bo’lmaganda barcha moddalar vaqt o’tishi bilan parchalanib, yuvilib ketishi lozim”,- bu Epikur va Lukretsiy Kar atomistik konsepsiyasining dastlabki boshlang’ich nuqtasidir.
Shuni ta’kidlash kerakki, ko’pchilik qadimgi Yunon olimlarining fikriga ko’ra, murakkab jismlar bu atomlarning oddiy aralashmasi emas, balki yangi xossalarga ega bo’lgan sifat jihatdan yangi bir butun hosiladir. Lekin o’sha vaqtda yunonlarda atomlar bilan murakkab jismlar o’rtasida oraliq holatni egallaydigan jismlarning xossalarini o’zida saqlaydigan alohida «ko’p atomli» zarrachalar – molekulalar haqida tushuncha ham paydo bo’lmagan edi. Bu fikrlarning barchasi bizlarning zamonaviy dunyoqarashimizga mos kelsa ham, Demokrit o’zining nazariy g’oyalarini eksperimentlar bilan isbotlay olmadi va keyingi 2000 yil davomida bu nazariyadan hech kim keng foydalanmadi. Qadimgi zamon yunon faylasuflari umuman tajribalar amalga oshirmasdan haqiqatni bahslardan izlashgani uchun Aristotelning material zarrachaning cheksiz bo’linmasligi haqidagi ta’limotini qabul etmadilar, Demokritning atomistik g’oyalari yo’qolib ketmadi.
Lekin Demokritning “… moddiy dunyo atomlar va ular orasidagi bo’shliqdan iborat” degan g’oyasi XIX asrga kelib atom va molekulalar xaotik harakati mexanizmini ifodalovchi tajribalar (Broun harakati) orqali isbotlandi.